நான் தரிசனம் செய்த கோவில்கள் :: நெல்லைத்தமிழன்

அஹோபில நவ நரசிம்ஹர் யாத்திரை– பகுதி 12

நேற்றைய தினம் நவ நரசிம்ஹர்களில் ஏழு கோயில்களின் தரிசனம் முடிந்தது. இன்று பாக்கி இருக்கும் இரண்டு கோவில்களைத் தரிசனம் செய்துவிட்டு அஹோபிலத்தைவிட்டுக் கிளம்பப் போகிறோம்.

சென்ற முறை அஹோபில யாத்திரையில், டிராக்டரில் இந்த இரண்டு கோயில்களுக்கு அழைத்துச் சென்றிருந்தார்கள். எல்லோரும் சேர்ந்து ஒரு டிராக்டரில் (இரண்டு டிராக்டர்கள்) உட்காரும்போது நன்றாகத்தான் இருந்தது. காட்டுப் பாதையில் கரடு முரடான பாதையில் டிராக்டர் குலுங்கிய குலுக்கலில் எல்லா எலும்புகளும் இடம் மாறிவிட்டது போல ஆகிவிட்டது. அதிலும் இரண்டாவது கோயிலுக்குச் செல்லும்போது எப்படா இந்தப் பயணம் முடியும் என்று ஆகிவிட்டது.  அதுவும் தவிர, போட்டுக்கொண்டிருந்த வேஷ்டி செம்மண் புழுதி பட்டு, வீணாகிவிட்டது. இதனை சில வாரங்களுக்கு முன்பு யாத்திரை நடத்துபவரிடம் சொன்னபோது, இப்போதெல்லாம் ஜீப் பிரயாணம்தான், கொஞ்சம் சௌகரியமாக இருக்கும் என்றார். சென்றமுறை தொலைதூரத்தில் இருக்கும் பாவன நரசிம்மர் கோவில், பிறகு பார்கவ நரசிம்மர் கோவில் என்று சென்றிருந்தோம். இந்த முறை, காட்டுக்குள் செல்ல அனுமதிக்கும் நேரம் சிறிது மாறியிருப்பதால், முதலில் பார்கவ நரசிம்மர் கோவில், பிறகு பாவன நரசிம்மர் என்று மாற்றியிருந்தார்கள்.

7 பேர் ஒரு ஜீப்பில். ஒரு ஜீப்பிற்கு 3500 ரூபாய் வாடகை, இரண்டு கோவில்களுக்கும் கூட்டிச்சென்று திரும்ப அஹோபில மட த்திற்குக் கொண்டுவந்து விடுவதற்கு. இது தவிர 100 ரூபாய் டிப்ஸ் ஓட்டுநருக்கு. எங்களை ஒருவருக்கு 300 ரூபாய் கொடுத்தால் போதும், அது தவிர டிப்ஸ் ஒருவருக்கு 20 ரூபாய் என்று சொல்லியிருந்தார்கள். மொத்தம் 7 ஜீப்புகள்.

காட்டுப் பாதையில் 15 நிமிட ஜீப் பிரயாணத்திற்குப் பிறகு பார்கவ நரசிம்மர் கோவில் இருந்த குன்றின் அடிவாரத்திற்கு வந்துசேர்ந்தோம்

அங்கிருந்து 300 மீட்டர்கள் மலைப்பாதையில் நடந்து, கோவில் இருக்கும் சிறிய குன்றின் அடிவாரத்துக்கு வந்து சேர்ந்தோம். பிறகு 150 படிகள் ஏறினால் பார்கவ நரசிம்மர் கோவில் வரும். குன்றின் அடிவாரத்தில் திருக்குளம் (பார்க்கவ தீர்த்தம்) ஒன்று உள்ளது.

பார்கவ நரசிம்ஹருக்கும் ஜ்வாலா நரசிம்ஹருக்கும் இரண்டு வித்தியாசங்கள் உண்டு, இரண்டிலும் மடியில் ஹிரண்யகசிபுவை வைத்துக்கொண்டு சம்ஹாரம் செய்யும் விதத்தில் இருந்தாலும்.  ஒன்று, ஹிரண்யகசிபு, இடம் மாற்றி நரசிம்ஹரின் மடியில் படுத்திருப்பான். இன்னொன்று, இந்த நரசிம்ஹரின் தலைக்குப் பின்னால் இருக்கும் சிலாதோரணத்தில், தசாவதார சிற்பங்களும் செதுக்கப்பட்டிருக்கின்றன. இதன் காரணம், பார்க்கவருக்கு (பரசுராமர்) தசாவதார ஸ்வரூபியாக இந்த நரசிம்ஹர் காட்சி கொடுத்ததால்.

சென்றமுறை வந்தபோது, கோயில் பாலாலயத்தில் இருந்ததால், மூலவரைச் சேவிக்க முடியவில்லை. இந்த முறை தரிசனம் செய்ததுடன் தீர்த்தம் சடாரியும் கிடைத்தது.

தரிசனம் முடிந்ததும் படிகளில் இறங்கி, ஜீப் இருந்த இடத்தை அடைந்தோம். அங்கிருந்து 9 மணிக்குப் புறப்பட்டு பார்கவ நரசிம்மர் கோவிலுக்குச் செல்ல ஆரம்பித்தோம். 

இந்தக் காட்டுப் பாதையில் சில கிமீ தூரம் சென்றதும் தார்ச்சாலை வருகிறது. அட..சாலை நன்றாக இருக்கிறதே என்று சென்றமுறை நினைத்தேன். சிறிது நேரத்திலேயே காட்டுப்பாதை ஆரம்பித்தது. அதற்கு அப்புறம் 14 கிமீக்கு மேல் காட்டுப் பாதைதான்.

செல்லும் வழியில் இருபுறமும் இருக்கும் மரங்களிலிருந்து சில கிளைகள் ஜீப்பின் கண்ணாடியை மறைக்கும் அளவு வந்திருந்தன.  இரண்டுபுறங்களிலும் நிறைய மரங்கள், செம்மண்ணில். நீரோடைகள் வரும்போது இரு புறமும் ஏதேனும் விலங்குகள் இருக்கின்றதா என்று என் கண்கள் தேடின. பகலில், அதுவும் ஜீப் வரும் பாதையில்/சப்தத்தில் அவை வராதாம்.

செம்மண்ணின் துகள்கள் ஜீப்பினுள்ளும் வந்தன. ரொம்ப கடினமான பயணம் என்று சொல்வதற்கில்லை, ஆனால் கொஞ்சம் அசௌகரியமாக ரொம்ப தூரம் பயணிப்பதுபோலத் தோன்றியது.

எப்படா கோயிலை அடைவோம் என்று நினைக்கும் நேரத்தில், 16 கிமீ காட்டுப் பாதையைக் கடந்து கோவில் இருக்கும் பகுதிக்கு வருகிறோம்.

அங்கு கோயில் எப்படி இருந்தது, வேறு என்ன இடத்திற்குப் போனோம் என்பதை அடுத்த வாரத்தில் பார்ப்போமா?