நடராஜனுக்கு ஏக டிமாண்ட் !

 

சென்ற வார முதல் கேள்விக்கான பதிலில், இப்படி எழுதியிருந்தேன் : 

& வீட்டுக்கு வருபவர் எதையும் வாங்கி வரவேண்டும் என்று எதிர்பார்ப்பதில்லை. இருந்தாலும் வாங்கி வருபவர், இந்த இரண்டு பழங்களில் எதையாவது வாங்கி வரவேண்டும் என்றால், வாழைப்பழம் வாங்கி வந்தால் எனக்குச் சந்தோஷம் ! ஏன் என்றால் - வாழைப் பழத்தை சுலபமாக உரித்துச் சாப்பிட்டுவிடலாம். ஆப்பிள் பழம் என்றால், கழுவி, கத்தி தேடி எடுத்து, (விரல்களை வெட்டிக்கொள்ளாமல் கவனமாக) துண்டங்களாக நறுக்கி, விதைகளை நீக்கி, ( என் மனைவி, பையன் போன்ற சிலர், ஆப்பிளுக்கு தோல் சீவ வேண்டும் என்று அடம் பிடிப்பார்கள் - இருக்கற வேலையில இது வேறயா !!) பிறகு சாப்பிட வேண்டும். ஆகவே, வா ப வா வ வா ப! (இதற்கு விளக்கம் கீ சா தருகிறாரா பார்ப்போம்! ) 

வா ப வா வ வா ப! : இதற்கு விளக்கம் எழுத யாரும் முயற்சி செய்யவில்லை. ஆகையால் நானே சொல்லிவிடுகிறேன்! ' வாழைப் பழம் வாங்கி வருபவர், வாழ்க பல்லாண்டுகள்! 

= = = = = 

சென்ற வாரத்தில் யாரும் எங்களை எந்தக் கேள்வியும் கேட்கவில்லை. 

நாங்க ரொம்ப சிம்பிள் கேள்விகள் கேட்கிறோம். 

பதில் சொல்லுங்கள். 

1) காதலிக்க நேரமில்லை படத்தில் டி எம் சௌந்தரராஜன் பாடிய பாடல் எது? 

2) கீழ்க்கண்டவற்றுள் உங்களுக்கு மிகவும் பிடித்தது எது?

a ) கடலை உருண்டை 

b ) கடலை மிட்டாய் (கேக் )

c ) எள்ளு மிட்டாய் 

3) சிறு தீனிகளில் நீங்கள் இதுவரை சுவைத்துப் பார்க்காதது எது? 

= = = 

KGG பக்கம் : 

ஐந்தாம் வகுப்பு படித்தது எங்கள் ஊரில் (நாகை) தேர்முட்டி ஸ்கூல் என்று அழைக்கப்பட்ட ஒரு பள்ளிக்கூடத்தில். 

ஐந்தாம் வகுப்புக்கு அந்த பள்ளியில் நான்கு பிரிவுகள். 

5 A பிரிவு தலைமை ஆசிரியர்தான் வகுப்பு ஆசிரியர். சுப்ரமணியன் என்னும் கண்டிப்பான ஆசிரியர். 

5 B பிரிவு & 5 D பிரிவு - ஆசிரியைகள். (பெயர் ஞாபகம் இல்லை ) 

5 C பிரிவுதான் நான் படித்த பிரிவு. ஆசிரியர் பெயர் ஷண்முகசுந்தரம். இவருக்கு வயிற்று வலி என்று ஒரு பட்டப் பெயர் இருந்தது. அடிக்கடி வயிற்று வலி காரணமாக லீவு எடுத்துக்கொண்டு சென்றுவிடுவார். 

அவர் வராத நாட்களில், வகுப்பில் இருக்கின்ற எல்லா மாணவ மாணவிகளும் மூன்று பிரிவுகளாக பிரிக்கப்பட்டு, மற்ற மூன்று பிரிவுகளுக்கும் அனுப்பி வைக்கப்படுவார்கள். 

என் வகுப்பில் அப்போது இரண்டு நடராஜன்கள் படித்தனர். அவர்களில் ஒரு நடராஜனுக்கு ஆசிரியைகளுக்கிடையே ஏக டிமாண்ட். அந்த நடராஜன்  தன் வகுப்பிற்குத்தான் இந்த முறை வரவேண்டும் என்று வாதிடுவார்கள். 

அப்படி அந்த நடராஜனிடம் என்ன அவ்வளவு ஈர்ப்பு என்று ஆச்சரியமாக இருக்கிறதா? அவர் படிப்பில் சூரர் இல்லை. எல்லா பாடத்திலும் முட்டை. ஆனால் பாட்டு பாடுவார். 

நடராஜனை தன் வகுப்பிற்கு எடுத்துக்கொண்ட ஆசிரியைகள், மற்ற எல்லோரையும் அமைதியாக இருக்கச் சொல்லிவிட்டு, நடராஜனை பாட சொல்லிவிடுவார்கள். 

முதலில் ஒரு சாமி பாட்டுப் பாடுவார். தனிப்பாடல். 

பிறகு வரிசையாக அந்தக் காலத்து டி எம் எஸ் ஹிட் பாடல்கள். 

இன்றும் எனக்கு அவர் பாடிய " வா கலாப மயிலே " பாடல் அவ்வளவு பசுமையாக ஞாபகம் உள்ளது. 

 

**** *** 

சில நாட்களில், வகுப்பு பிரித்து அனுப்பப்படும் போது நானும் மற்ற சில மாணவர்களும்  தலைமை ஆசிரியர் வகுப்பிற்கு செல்ல வேண்டி வந்துவிடும். அவருடைய வகுப்பு என்றால் எங்களுக்கு சப்த நாடியும் ஒடுங்கிவிடும். வகுப்பில் எல்லோரும் கையைக் கட்டி, ஒரு விரலால் வாயைப் பொத்திக்கொண்டுதான் உட்கார்ந்திருப்போம். 

வகுப்பு நடக்கும்போது அவரிடம் ' தண்ணிக்கு / 1க்கு ' என்றெல்லாம் கேட்டு வெளியே செல்லமுடியாது. அதனால் சில பையன்கள் அவருடைய வகுப்புக்குச் செல்லவேண்டும் என்ற உடனேயே கிடு கிடு என ஓடிப் போய் 1 & W முடித்துவிட்டு வந்துவிடுவார்கள். 

எனக்கு வலது பக்கத்தில் உட்காருகின்ற பையன் - பரமசிவம் - கொஞ்சம் ஓவராகவே தண்ணீர் குடித்துவிட்டு வந்துவிடுவான். 

வகுப்பு ஆரம்பித்து அரைமணி சென்றதும் கொஞ்சம் நெளிய ஆரம்பிப்பான். கொஞ்ச நேரம் சென்றதும் அவனுடைய இடது தொடையால் என் வலது தொடை மீது ஒரு இடி இடிப்பான். 

நான் : (சிறிய குரலில்)  " என்னடா? "

அவன் : " 1 க்கு  அடைக்குதுடா " 

நான் : " சார் கிட்ட கேட்டுகிட்டு போடா ? "

அவன் : " கேட்டால் விடுவாராடா ? "

நான் : " உம் "

கேட்கமாட்டான். 

கொஞ்ச நேரம் அமைதி. 

இரண்டு நிமிடம் கழித்து மீண்டும் நெளியல். 

இடி. 

அதே வசனங்கள். 

வகுப்பு முடியும் வரை என்னை பாடம் கவனிக்க விடாமல் தொந்தரவு செய்துகொண்டே இருப்பான். 

அந்த வகுப்பு முடிந்ததும் எழுந்து பள்ளியின் பின் பகுதியை நோக்கி தலைதெறிக்க ஓடுவான்! 

= = = = = = 

அப்பாதுரை பக்கம் : 

*காதல் கடை'

மஞ்சள் நிறத்தில் சிறிய புட்டி ஒன்றைக் கொடுத்தேன். "குடிக்கும் பானத்தில் கலந்து கொடு. மாறவசியம். கண்டிப்பா உன்னையே சுத்துவா" என்றேன். பணம் வாங்கிக்கொண்டு திரும்புகையில் நால்வர் வருவதை கவனித்தேன்.

சிங்கபூரில் கடை வைத்திருக்கிறேன். 'ஒரே வாரத்தில் காதல்' என்று கூட்டு வகுப்பு, சுற்றுலா, மாறவசியம் எல்லாம் கலந்தடித்து பேகெஜாக விற்கிறேன்.  ஆயிரம் வெள்ளி.  ஒரே வாரத்தில் காதல் கைகூடாவிட்டால் இன்னொரு மஞ்சள் நிற மாறவசிய புட்டி இலவசம். 

நிறைய கிராக்கி வருகிறார்கள். பெரும்பாலும் சீன, மலேசிய வாடிக்கை. வெள்ளையர்கள், தென்னிந்தியர்கள் என்று அவ்வப்போது சிலர்.

மாறவசியம் ஒரு வித சிலேடை. மனம் மாற வசியம். மாறன் பேரில் வசியம். என் தமிழ் ஆசிரியர் பெருமைப்படுவார்.

வாராவாரம் வரும் கிராக்கிகள் உண்டு. வாங்கிக் கொண்டு காணாமல் போன கிராக்கிகளும் உண்டு. பொதுவாக கிராக்கிகள் யாரும் கூட்டாகத் திரும்பி வந்ததில்லை இதுவரை.

நால்வரும் வந்தார்கள்.  

"சிறிய சிக்கல்" என்றார்கள். "வந்து.." என்று இழுத்தார்கள். "வந்து.. வசியத்தை நாங்கள் நால்வரும் அறியாமல் ஒருவருக்கொருவர் கொடுத்துவிட்டோம்".

பதில் சொல்லாமல் கவனித்தேன். தொடர்ந்தார்கள். "வசியமாவது என்று விளையாட்டாக மொத்தமாக விஸ்கியில் கலந்து குடித்தோம். விபரீதமாகி விட்டது. நால்வரும் ஒருவரையொருவர் மனமாற காதலிக்கிறோம்.  இப்போ என்ன செய்வது?"

உள்ளே சென்று நீல நிற புட்டி ஒன்றை எடுத்து வந்தேன். "இரண்டாயிரம் வெள்ளி" என்றேன். "கலந்து குடிங்க. எல்லாம் சரியாயிடும்".

"இதென்ன?"

"போற வசியம்".

மறு நாள் காலை தொலைகாட்சியில் நான்கு இளைஞர்கள் காதல் பொறாமையால் ஒருவருக்கொருவர் சுட்டுக்கொண்டு இறந்ததை விவரித்துக் கொண்டிருந்தார்கள். போதை மருந்தாக இருக்கலாம் என்று கருத்து சொன்னார் ஒருவர்.

மாலையில் கவனிக்கலாம். இப்போது அவகாசமில்லை. ஒன்பது மணிக்கு கடை திறந்தாக வேண்டும். கிளம்பினேன்.

As China's Birth Rate Falls, College Students Given A Week Off To "Fall In Love". செய்தி.

வால்:

காதலிக்க நேரமில்லை என்று சைனாவில் இனி யாரும் சொல்ல முடியாது.  

தொண்ணூறுகளில் ஆஸ்லோவிலோ ஆம்ஸ்டர்டேமிலோ இது போன்று ஒரு முயற்சி செய்தார்கள். தம்பதியர்களிடம் நெருக்கம் அதிகமாக வேண்டி ஒரு மனோதத்துவ அடிப்படையிலான "தேனிலவு சிகிச்சை" என்றார்கள். அடுத்த வருடம் உச்சத்தைத் தொட்டது விவாகரத்து.

= = = =