"திங்க"க்கிழமை : ஷாஹி பனீர் - பானுமதி வெங்கடேஸ்வரன் ரெஸிப்பி

 

ஷாஹி பனீர்

தேவையான பொருள்கள்:

பெரிய வெங்காயம்   -  2

தக்காளி                          -  6

பனீர்                                - 200கிராம்

பூண்டு.                            - 6 பல்          

முந்திரி.                          - 7 அல்லது 8

பாதாம்.                           - 6

பட்டை.                             - ஒரு துண்டு

லவங்கம்.                        - 3 அல்லது 4

பிரிஞ்சி இலை - 1

பால் ஆடை(மலாய்)      - 2 டேபிள் ஸ்பூன்

வெல்லம்  - சிறு துண்டு, அல்லது வெல்லச் சக்கரை - 1 டேபிள் ஸ்பூன்

காரப்பொடி - 1 டீ ஸ்பூன்

மஞ்சள் பொடி  - 1/4  டீ ஸ்பூன்

தாளிக்க:

சீரகம் -1/2 டீ ஸ்பூன்

சோம்பு - 1/2 டீ ஸ்பூன்

செய்முறை:

வெங்காயம், தக்காளி இரண்டையும் சற்று பெரிய துண்டுகளாக நறுக்கி வைத்துக் கொள்ளவும்.

பனீரை முக்கோணம், அல்லது சதுர துண்டுகளாக நறுக்கி, வென்னீரில் போட்டு வைக்கவும். 

ஒரு வாணலியில் எண்ணெய் ஊற்றி, அதில் நறுக்கி வைத்துள்ள வெங்காயம், தக்காளி போட்டு வதக்கிக் கொள்ளவும். அதிலேயே முந்திரி, பாதாம், பட்டை, லவங்கம்,  இவைகளையும் சேர்த்துக் கொள்ளலாம்.

வதக்கிய இந்த பொருள்கள் ஆறியதும், மிக்சியில் நைசாக அரைத்துக் கொள்ளவும்.

வெங்காயம், தக்காளி வதக்கிய வாணலியை கழுவி விட்டு, அடுப்பில் வைத்து சிறிதளவு எண்ணெய் ஊற்றி, சீரகம், சோம்பு சேர்த்து வெடிக்க விடவும். வெடித்ததும், பிரிஞ்சி இலை மற்றும் அரைத்து வைத்திருக்கும் தக்காளி, வெங்காய விழுதை போட்டு, அதில் மஞ்சள் பொடி, காரப்பொடி, உப்பு போட்டு ஐந்து நிமிடங்கள் கொதிக்க விடவும். 

பிறகு வெந்நீரில் போட்டு வைத்துள்ள பனீர் துண்டுகளை போட்டு வெல்லம் அல்லது வெல்ல சக்கரை போட்டு இன்னுமொரு ஐந்து நிமிடங்கள் கொதிக்க வைத்து அடுப்பை நிறுத்தி விடலாம். வெல்லம் சேர்ப்பது புளிப்பு, உரைப்பு எல்லாவற்றையும் சமன் செய்யும். 

கடைசியாக மலாயை ஊற்றி அலங்கரிக்கவும். இந்த ஷாஹி பனீர் சப்பாத்தி, பரோட்டா, ஜீரா ரைஸ் போன்றவைகளுக்கு தோதான சைட் டிஷ்!

இதை செய்தது என் மருமகள் ஷைலஜா. நான் புகைப்படம் எடுத்து உங்களோடு பகிர்ந்து கொண்டிருக்கிறேன்.