சிறுகதை : ஏன்... எதற்கு? 2/2 - துரை செல்வராஜூ

 ஏன்...  எதற்கு? 2/2

-----------------------------

" குறி கேக்கலையோ.. குறீய்!..

சாமீ.. குறி கேக்கலையோ.. குறீய்!.. "

தெருவில் இளம் பெண்கள் இருவர் மஞ்சள் புடவையுடன் சென்று கொண்டிருந்தனர்..

ஒருத்தியின் கையில் ஒரு முழத்துக்கு வெள்ளிப் பூண்களுடன் பிரம்பு... இன்னொருத்தியின் தோளில் சிவப்பு நிற பை.. இருவர்

நெற்றியிலும் வடிவாகக்  குங்குமம்.. கண்களில் மை.. அள்ளி முடித்த கூந்தலில் மல்லிகைச் சரங்கள்.. கைகளில் நிறைவான வளையல்கள்..

இங்கே பிள்ளைகள் இருவரும் ஓடி வந்து தோளில் தொற்றிக் கொண்டு,

" அப்பா.. அப்பா.. " - என்றனர்..

" என்னடா... " 

சாலையில் சென்று கொண்டிருந்தவர்களைச் சுட்டிக் காட்டினர்..

" அது.. ஏன்டா?...  வாயில் வந்ததைச் சொல்லிட்டுப் போவாங்க.. மனசு கஷ்டமாயிடும்.. "

" நீங்க தான் தைரியமான ஆள் ஆச்சே.. " இடங்கண்டு இடித்தாள் இல்லத்தரசி..

" அவங்க உள்ள வந்து பார்க்கலாமா.. உள்ளே வர்றதுக்கு அனுமதி உண்டா?.. " 

விடுதி வாசற்கதவின் அருகில் இருந்த மீசைக்காரரிடம் கேட்டார் மூர்த்தி..

" ம்ம்... "

" யம்மா... இங்கே வாங்க..."

மூர்த்தி அந்தப் பெண்களை அழைத்ததும் பிள்ளைகள் இருவரும் துள்ளிக் குதித்தனர்.. 

மா மரத்தின் நிழலில் அமர்ந்து கொள்ள, " ஜெய்ஸ்ரீ கையைக் காட்டும்மா... "  என்றார் மூர்த்தி..

" நா உங்க கண்ணப் பார்த்தே அவங்களுக்குச் சேதி சொல்லுவேன்.. " - என்றவள் மூர்த்தியின் கண்களை உற்று நோக்கினாள்.. 

கண்களுக்குள் அம்பு பாய்ந்த மாதிரி இருந்தது அவருக்கு..

" உங்க பங்களாவுக்குப் பக்கத்துல புத்து இருக்குதானே.. "

 " ஆமா...  "

 " ரெண்டு தடவை அதை  இடிச்சிருக்கீங்கதானே!...  "

" ஆமா.. "

" அப்புறம் இங்கே எதுக்குடா வந்தே நாக தோஷம் தீரணும் ன்னு?... " அந்தப் பெண் நாகம் எனச் சீறினாள்...

மூர்த்தியின் மனைவியிடம் விசும்பல்..

" நான் அன்னைக்கே சொன்னேன்...இவங்கதான் கேக்கலை... இப்போ என்னம்மா செய்றது?.. பெரியவளுக்கு நாக தோஷம் தீரணும் ன்னு பரிகாரம் செய்ய வந்துருக்கோம்,.. "

" மஞ்சளிலே குளிச்சிருக்கும்

மாதரசி வாருமம்மா..

மடியேந்தி நிக்கறப்போ

மனங்குளிரத் தாருமம்மா!..

கொடி வாட விடலாமோ

கொடிமுத்து நாயகியே

கோபம் தவிர்த்திடுவாய்

கோலவிழி ரத்தினமே!.. 

வைகுந்தன் சோதரியே

வாசலுக்கு வந்திடம்மா..

வாக்கு திரு வாக்கு சொல்லி

வாசல் வழி காத்திடம்மா.. "

பிரம்பு வைத்திருந்தவளிடம் மெல்லிய புன்னகை..

மூர்த்தியின் கண்களில் ஈரம்..

" கோயில்ல  சாமி தரிசனம் மட்டும் பண்ணுங்க... நாகவல்லி மன்னிப்பு கொடுத்துட்டாங்க... "

" அப்போ பரிகாரம்?.. "

" ஊருக்குப் போற வழியில நாலு பேருக்கு இடுப்புத் துணி வாங்கிக் கொடுங்க... அது தான் பரிகாரம்.. வீட்டுக்குப் போன மூணாம் நாள் ஜாதகம் ஒன்னு வரும்.. அது தான் மன்னிப்புக்கு சாட்சி..  பெரியவளுக்கு வைகாசியில திருமாங்கல்யம்.. ஆறாவது மாசம் சின்னவளுக்கும் திருமாங்கல்யம்.. "

குறி சொல்லிய பெண்ணின் முகத்தில் வியர்வைத் துளிகள்... அவளுடன் வந்திருந்தவள் தோள் பைக்குள் வைத்திருந்த மடிப்பு விசிறியை எடுத்து விசிறி விட்டாள்..

மூர்த்தி கண்களைத் துடைத்துக் கொள்ள - அவரது மனைவி ஆகாயத்தைப் பார்த்துக் கும்பிட்டுக் கொண்டாள்..

" ரெண்டு நாளா ஐயா மனசுக்குள்ள குடைச்சல்.. அதை சரி செய்யட்டுமா!.. "

" ம்!.. "

" கோயிலுக்கு வந்தமா.. சாமி பார்த்தமா.. ஊர்க்குப் புறப்பட்டமா ன்னு இருக்கணும்.. இங்க  நடக்கிற விசயத்தை எல்லாம் ஆராய்ச்சி பண்ணக் கூடாது..   புரியுதா?.. "

" ம்.. "

" ஊர் காக்கும் உத்தமியே..

உஜ்ஜயினி காளியம்மா..

ஓங்காரப் பேரழகி..

ஒய்யார நாயகியே!..

சீர் காக்க வாருமம்மா

சிங்கார நாயகியே..

சிவசக்தி ஆனவளே

சிந்தையில வாருமம்மா..

உம்பேரச் சொல்லிடவும்

உத்தரவு தாருமம்மா..

உம்பிள்ளை கூப்பிடவும்

உம்முகத்தைக் காட்டுமம்மா

உள்ளிருக்கும் ரகசியத்த

ஊரறியச் சொல்லிடம்மா..

உத்தமியே முத்தழகி

உன்பாதம் சரணம் அம்மா..

ஏழைக்குன்னு இரங்குனவன்

இந்தமகன் வாடுவதோ?..

உண்மையது எங்கேயின்னு

ஊர்முழுக்கத் தேடுவதோ!.. "

குறி சொன்னவள் கண்களை மூடியபடி -

" என்ன புரியுதா?.. " என்றாள்..

 " புரியுதும்மா.. " - என்றார் மூர்த்தி..

" போகும்வழி புரியாம

போனதொரு புல்லுருவி

நடந்தது  நல்லது ன்னு

நடப்பதை நீ கவனி..

காணாத காட்சியின்னு

கட்டுரைக்கும் வேளையில

நாடு மாறி நல்லவன் தான்

நாதியத்த கும்பலுக்கு..

பொண்ணு ன்னும் தெரியாது

கண்ணு ன்னும் புரியாது

கன்னியரை அழிக்க வந்த

கருவேல முள்ளு அவன்..

நல்ல வழி நடந்ததில்லே

நல்ல சொல்லு கேட்டதில்லே..

நாலுபேரு மத்தியில

நானுரைக்க நீதியில்லே..

கன்னியர்க்குப் பெருந்துயரம்

களவாணித் தனத்தாலே..

காத்திருந்த தேவி அவ

வகுந்தாளே நகத்தாலே...

வச்ச பயிர் வாழணுமே

வரப்பெடுத்துக் காக்கணுமே

களையெடுக்கும் கோவத்துல

காளியவள் ஆடிவந்தா..

தேவியவள் முடிவெடுத்தா

தீர்க்காம விட மாட்டா..

திக்கு திசை அதிர விட்டா..

திட்டு திடல் அலற விட்டா..

அங்க ஒரு தடயம் இல்லே

ஆகிவரும் விஷயம் இல்லே..

பின் தொடர்ந்து போகாம

பிள்ளைகளை கவனியப்பா!..

உம்பிள்ளை உனக்காக

உங்கையில் கொடுத்தேனே

உம்மீது பாசத்தினால்

உள்ளதையும் உரைத்தேனே..

சிட்டென்றும் சிமிழ் என்றும்

மனை வாழும் மங்கலத்தில்

மஞ்சள் முக மகராசி

மாறாத நெஞ்சகத்தில்..

தங்க மகன் சஞ்சலிக்க

சக்தி வடிவாகி வந்தேன்..

மஞ்சளயும் பார்த்திருப்பேன்

குஞ்சுகளை காத்திருப்பேன்..

வேலோடு மயிலாடி 

வாசல் வரும் நேரமப்பா..

சேவல் ஒன்னு சேர்ந்து வரும்

தண்டனிட்டு கும்பிடப்பா!... "

அந்தப் பெண்ணிடமிருந்து ஸ்ஸ் ஸ்ஸ் - என்ற ஒலி மெல்லியதாய்க் கேட்டது..

பாட்டுப் பாடி குறி உரைத்த பெண் - முகத்தில் வியர்வை முத்துக்களுடன் அரை மயக்கத்தில்  இருக்க - அருகில் இருந்த பெண் வியர்வைத் துளிகளை மெல்ல ஒற்றிக் கொண்டிருந்தாள்..

அமர்ந்திருந்த பெண்ணின் காலடியில் ஐநூறு ரூபாய் தாள் இரண்டை வைத்துக் கும்பிட்டார் மூர்த்தி.. 

" இதை அந்த மீசைக்காரர் கிட்ட கொடுத்துட்டு வா.. அன்னைக்கு ரொம்பவும் பயந்துட்டார்.. நான் கொடுக்கச் சொன்னேன் னு சொல்லு.. " - என்றபடி எழுந்து பிள்ளைகள் கன்னத்தை வருடி முத்தமிட்டாள்.. அருகில் இருந்தவளும் எழுந்தாள்..

மீசைக்காரரிடம் பணத்தைக் கொடுத்து விட்டு வந்த மூர்த்தியிடம் மீண்டும் சந்தேகம்..

" எல்லாம் புரியுது ம்மா.. ஆனா கடைசியில ஒரு துப்பு கூட கெடைக்கலையாமே.. என்ன தான் ஆனது?.. "

" அவனுக்குத் தெரியும்!.. "

" எவனுக்கு?.. "

" அதோ!.. "  - என்று கை காட்டிய திக்கில் திருஷ்டி பொம்மை இருந்தது.. 

இரு பெண்களும் வாசலை நோக்கி நடந்தனர்.. 

" கொடுத்த பணத்தையும் செக்யூரிட்டிக்கிட்ட கொடுக்கச் சொல்லிட்டாங்க.. இவங்க செலவுக்கு என்ன பண்ணுவாங்க.." - மூர்த்தியின் இல்லத்தரசி கவலைப்பட்ட நேரத்தில்  மூர்த்தி சொல்லிக் கொண்டிருந்தார்..

" கடைசியில - கண் திருஷ்டி பொம்மை க்குதான் தெரியும் ன்னு கை ய காட்டிட்டாங்க!... "

" அந்த புற்றை இடிச்சது ல உண்மை இருக்கு தானே.. அப்போ இந்த திருஷ்டி  பொம்மையிலயும் உண்மை இருக்கும்!.. " - மூர்த்தியின் இல்லத்தரசி..

" அம்மா சொல்றது தான் சரி.. " பிள்ளைகள் இருவரும் சிரித்தனர்..

எழுந்து நடந்த பெண்கள் சாலை வளைவில் திரும்பி -  காற்றினில் கரைந்து கொண்டிருந்தனர்..

ஃஃஃ

' என்னடா இது?.. ' என்பவர்களுக்கு.. இத்தளத்தில் வெளியான

' காற்றினிலே.. ' ஆறு பகுதிகளையும் மீண்டும் படித்துப் பார்க்கவும்..

சுட்டிகள் : 

பகுதி 1 

பகுதி 2 

பகுதி 3 

பகுதி 4 

பகுதி 5 

பகுதி 6 

இங்கே வந்தவர்கள் - அந்தத் திலகபுரி நாட்டின் இளவரசி - அவந்திகா ஸ்ரீ ஷாந்தினியும் ஆத்மார்த்த தோழி மித்ரா சுபாஷினியும் -  தான் என்பது புரியும்!..

***