"திங்க"க்கிழமை : டோக்ளா -- பானுமதி வெங்கடேஸ்வரன் ரெஸிப்பி

 

 டோக்ளா

தேவையான பொருள்கள்:

கடலை மாவு   - 1 1/2 கப்

தயிர்                   - 1 கப்

தண்ணீர்   -   தேவையான அளவு

தேங்காய் துருவல்  -  3 டேபிள் ஸ்பூன்

சர்க்கரை    - 1 1/2 டீ ஸ்பூன் 

ஈனோ சால்ட்    - 1 1/4 டீ ஸ்பூன்

பேக்கிங் பவுடர்  -  ஒரு சிட்டிகை

உப்பு      - 1 1/4 டீஸ்பூன்

கொத்துமல்லி தழை - சிறிதளவு

எலுமிச்சை சாறு   - 2 அல்லது 3 டீ ஸ்பூன்

சர்கரை தண்ணீர்(Sugar syrup) தயாரிக்க தேவையான அளவு:

சர்க்கரை   - 4 டீ ஸ்பூன்

பச்சை மிளகாய்   -  2 

தண்ணீர்    -  1 கப்

தாளிக்க:

எண்ணெய், கடுகு, கருவேப்பிலை

செய்முறை:

ஒரு அகன்ற பாத்திரத்தில் கடலை மாவு, சர்க்கரை, உப்பு, ஈனோ சால்ட் இவைகளை போட்டு நன்றாக கலக்கவும். பிறகு தயிரை மற்ரும் தண்ணீர் சேர்த்து கலக்கவும். கெட்டியாக இருந்தால் இன்னும் கொஞ்சம் தண்ணீர் சேர்த்து இட்லி மாவு படத்திற்கு கலந்து கொள்ளவும். கடைசியாக பேக்கிங் சோடா சேர்த்து கலக்கவும்.

ஒரு பேக்கிங் ட்ரேயில் எண்ணெய் தடவி அதில் கலந்து வைத்திருக்கும் கடலை மாவு கரைசலை கொட்டி, இட்லி பானை அல்லது குக்கரில் வேக வைக்கவும். 

வேக வைத்த மாவு நன்றாக பொங்கி வரும். ஒரு குச்சியால் குத்திப் பார்த்தால் அதில் ஒட்டாமல் வந்தால் வெந்து விட்டது என்று பொருள்.  உடனே அடுப்பை அணைத்து விட்டு, பாத்திரத்தை எடுத்து வெளியே வைத்து, ஆற விடவும். ஆறிய பிறகு அதை ஒரு தட்டில் கொட்டி, துண்டு போட்டுக் கொண்டு, அதன் மீது கடுகு தாளிக்கவும். பிறகு தேங்காய் துருவலையும் கொத்துமல்லி தழையையும் தூவவும். பிறகு எலுமிச்சை சாறை எல்லாத் துண்டுகளிலும் படுமாறு ஊற்றவும். 

இதற்கிடையில் ஒரு வாணலியை அடுப்பில் வைத்து, அதில் கொஞ்சம் எண்ணெய் ஊற்றி, அதில் கீறிய பச்சை மிளகாய். கறிவேப்பிலை சேர்த்து நன்கு வதக்கவும். பிறகு தண்ணீர் சேர்த்து தண்ணீர் கொதித்ததும் சர்க்கரை சேர்த்து, சர்க்கரை கரைந்ததும் அடுப்பை நிறுத்தி விடவும்.  

இந்த சர்க்கரை கரைசலை துண்டுகள் போட்டிருக்கும் டோக்ளா மீது ஊற்றவும். அப்படி ஊற்றும் பொழுது பச்சை மிளகாய், கறிவேப்பிலை போன்றவையும் விழலாம், தப்பில்லை.  சுகர் சிரப்பில் சற்று நேரம் ஊறிய பிறகு டோக்ளாவை தனியாகவோ, கொத்தமல்லி சட்னியோடோ சாப்பிடலாம். பிறகு ஒரு மசாலா சாய் அருந்துங்கள்!