திரையில் நீங்கள் ரசித்த ரீல் ஜோடி எது?

கேள்வி பதில்கள் :

பானுமதி வெங்கடேஸ்வரன் : 

நம் பாரம்பரியத்தில் விருந்தில், சமைத்த உணவோடு ராய்தா மாதிரியான பச்சடி, ஸ்வீட் பச்சடி என்று பழங்களில் செய்த பச்சடி, சாலட் போன்ற கோசுமல்லி, சாப்பாட்டிற்கு பிறகு பழம் என்று சாப்பிட்டோம். இப்போது சமைத்த உணவோடு சமைக்காத உணவுகளையும், பழங்களையும் சாப்பிடக் கூடாது என்கிறார்களே?

# நம் முன்னோர்களின் சிறப்புகள் பல இருந்தாலும் இந்தியர்களின் சராசரி வயது மிகக் குறைவாகவே இருந்தது.  இது உணவுப் பழக்க வழக்கம் காரணமாகவும் இருந்திருக்கும்.  நிறைய ஆராயாமல் எளிதில் நிர்ணயிப்பது சரியில்லாமலும் இருக்கலாம்.  நிபுணர்கள் பதில் சொல்ல வேண்டிய கேள்வி.  உறவுக்குள் திருமணம் குறித்துக்கூட பலவாறு சொல்லப் படுகிறது.  பொது உடல்நலம் நன்றாகவும் சிக்கலின்றியும் இருப்பின் என்ன எப்படிச் செய்தாலும் சரி என்பதே சரி.

திரையில் நீங்கள் ரசித்த ரீல் ஜோடி எது?

# பெரிய ஈடுபாடு இல்லையெனினும் திரேதாயுகத்தில் சிவாஜி பத்மினி சில படங்களில் ரசித்ததுண்டு.

& திரையில் நான் ரசித்த ஜோடி என்று யோசித்தால் கமல் ஸ்ரீதேவி ஜோடி மட்டும் ஞாபகம் வருகிறது. 

உங்கள் குழந்தைகள் உங்களோடு எதற்கு வாக்குவாதம் செய்வார்கள்?

# எல்லாத்துக்கும்தான்.‌ எனினும் அண்மையில் மோடியை எதிர்த்தாலும் ஜால்ரா போட்டாலும் சூடான  விவாதம் தவிர்க்க முடியவில்லை.

இப்போது வரும் சீரியல்கள், மற்றும் திரைப்படங்களில் பெண்கள் குடிப்பதாகவும், புகைப்பதாகவும் சித்தரிப்பது சரியா? அல்லது நம் கலாசாரத்தை உடைக்க திட்டமிட்ட சதியா?

# நம் பெண் மக்கள் (சிலரேனும்) இத்தகைய பழக்கங்கள் வைத்திருப்பதாகத் தெரிகிறது.  கலாச்சாரம் பற்றி அவர்களே அக்கரை காட்டாத போது என்ன சொல்ல இருக்கிறது ?

பெண்கள் குடிப்பது மட்டுமே கெட்ட பழக்கம், அதுவே ஆண்கள் ஆனால் பரவாயில்லை என்ற மனோபாவம் சரியென்று நினைக்கிறீர்களா ?

& பல வருடங்களுக்கு முன்பிருந்தே (2005+) சென்னை மற்றும் பெங்களூரு நகரங்களில் புகை பிடிக்கும் இளம் பெண்களைப் பார்த்து வருகிறேன். காலத்தின் கோலம்!  

ஜெயக்குமார் சந்திரசேகரன் : 

ஸ்மிரிதி, புராணம், வேதம் போன்றவை தொகுக்கப்பட்டு நூல்களாக உள்ளன. சனாதன தர்மம் என்றால் என்ன? கீதை போன்ற தொகுப்பா? அப்படியானால் தொகுத்தவர் யார்? அது ஏன் தற்போது பெரிதாக பேசப்படுகிறது? ஒன்றுமே புரியலை. விளக்கம் கூற முடியுமா?

# சனாதனம் என்ற சொல்லுக்கு அழிவில்லாதது ஆதியந்தம் இல்லாதது என்று பொருள் சொல்லப்படுகிறது. எனவே நமது இந்து மதக் கோட்பாடுகளில் அடிப்படையான சில  காலத்தால் அழிக்க முடியாதவை -  என்றென்றும் இருந்து வருபவை,  என்பதைக் குறிக்கிறது சனாதனம் என்கிற சொல். அதைத் தனியாகத் தொகுத்து வைத்த புத்தகம் எதுவும் கிடையாது. மிகவும் அடிப்படையான இந்து மத நம்பிக்கைகள் தான் சனாதனம் என்று சொல்லலாம். 

வாழ்வின் சிறந்த இயல்பு என்பதை தர்ம அர்த்த காம மோக்ஷம் என்று பிரித்திருக்கிறார்கள். அர்த்தம் காமம் என்றால் விரும்பியதை அடைவது,  சௌகரியங்களுக்கான பொருளை சேர்த்துக் கொள்வது. இதில் நீதி பிறழாமல் நியாயமான வகைகளில் சம்பாதிப்பதும், சுக சௌக்கியங்களை  அனுபவிப்பதும் இருக்க வேண்டும். வாழ்வின் பிற்பகுதியில் இயல்பாக,  பற்றற்ற நிலையும் இறைவன் - இறைமை பற்றிய தேடுதலும் புரிதலும் நம் உள்ளங்களுக்குச் சரியான பக்குவத்தை வழங்கி, நம்மைப் பிறப்பு -  இறப்பு என்னும் சுழற்சியினின்று விடுபடச் செய்யும் என்று தெரிந்து கொள்வதே சனாதனம்.

நெல்லைத்தமிழன் :

1. ஆபாசம் என்பதை வரையறை செய்ய இயலுமா?  ஒரு புகைப்படமோ இல்லை கட்டுரையோ இல்லை திரைப்படமோ 'ஆபாசம்' என்ற வரையறைக்குள் எப்போது வருகிறது?  

#  நிச்சயமாக ஆபாசம் என்ன என்பதை வரையறை‌ செய்ய இயலும்.  " செய்யுங்கள் பார்க்கலாம் " என்று சொல்லக் கூடாது. நிர்வாணம், மூன்றாவது நபர் பார்க்கத் தகாதது பிறர் பார்வைக்கு வைக்கப் படுவது ஆபாசம்.

2.  நாடார் கடைகள் என்று சொல்லப்படும் சிறு மளிகைக்கடைகளுக்கு  டி.மார்ட், லூலூ போன்ற மிகப் பெரிய ஹைப்பர் மார்க்கெட் போட்டியா? சிறு மளிகைக்கடை வியாபாரங்களை இவை அழித்துவிடுமா? 

#   மெல்ல மெல்ல, சிறு வியாபாரிகளைப் பெருமளவு அழித்து விடும் சாத்தியக்கூறுகள் உண்டு.  சிறிய தொகை கைமாறும் சில்லறை வியாபாரம் மட்டுமே பிழைத்திருக்கும் என்று தோன்றுகிறது.

3.  நீங்கள் பட்டாசு வாங்கும்போது அவற்றின் MRPஐக் கவனித்திருக்கிறீர்களா? அதீத விலையில் இருக்கும். உதாரணமாக 10 கம்பி மத்தாப்புகள் கொண்ட பெட்டி 200 ரூபாய் என்று MRP போட்டிருக்கும். ஆனால் நமக்கு 60 ரூபாய்க்குக் கிடைக்கும். இந்த மாதிரி MRPயை யார் தீர்மானிக்கிறார்கள்?  

# பட்டாசு ஒரு இடத்திலிருந்து இன்னொரு இடம் எடுத்துச் செல்வது அபாயகரமானது அதனால் செலவு மிக அதிகம் ஆகும். பட்டாசுகளும் வாணங்களும் வெளிநாடுகளுக்கும் கூட ஏற்றுமதி செய்யப்படுகின்றன. வாங்குபவர் மனம் உவந்து லாபகரமான விலை கொடுத்து வாங்க வேண்டும் என்றால் அதில் குறிக்கப்படும் விலை மிகவும் அதிகமாக இருக்க வேண்டும் என்கிற நிர்பந்தம் ஏற்படுகிறது.

4. உங்களுக்கு நீங்கள் வேலை பார்த்த அலுவலகத்திற்கு, படித்த பள்ளிக்கு, வாழ்ந்த ஊருக்கு மீண்டும் சென்று பார்க்கவேண்டும் என்ற ஆசை வந்திருக்கிறதா?   

# ஆசை வந்திருக்கிறது.  இரண்டொரு சமயம் அது பூர்த்தியும் ஆகியிருக்கிறது. அவ்வாறான சில சந்தர்ப்பங்களில் ஒரு சிறிய ஏமாற்ற உணர்ச்சியும் கூட ஏற்பட்டிருக்கிறது.

5. அம்மா அப்பா மீதான அன்பு, அவர்கள் மறைந்த பிறகு அதிகமாகியிருக்கிறதா இல்லை அவர்கள் இருந்தபோது இருந்த அதே அன்புதான் இப்போதும் இருக்கிறதா?

# அப்பா அம்மா மீதான அன்பு அவர்கள் போனபின்பு சற்றே மிகைப்படுத்தப்பட்டு இருக்கிறது. அவர்கள் நம்முடன் இருக்கும்போது நமக்கு எரிச்சல், சலிப்பூட்டும் வகையில் சில நிகழ்ச்சிகள் வரும்.  காலமான பின் அல்லது நீக்கி நல்லது நினைக்கிறோம்.‌

= = = = = = = = =

படமும் பதமும் :

எங்கள் வளாகத்தில் ஆங்காங்கே பலவித செடிகள் பூங்காக்கள்-நடைபாதையுடன் கூடியது, உண்டு. முழுப் பாதையில் ஒரு முறை நடந்தாலே 3000-4000 ஸ்டெப்ஸ்க்கு மேலேயே இருக்கும். அதில் ஒரு பகுதியில் இத்தகைய மிகச் சிறிய புல் வகைச் செடிகள் உண்டு. அதில் இந்த வெண்ணிறப் பூக்கள் பூக்கும். அனைத்தும் பூத்துவிட்டால் பளிச் என்று கண்ணைப் பறிக்கும். இரண்டு மூன்று நாட்களில் வாடிவிடும், செடியைவிட்டு அகன்றுவிடும். பிறகு வெறும் பச்சைப் புல் போன்ற செடிதான் கண்ணுக்குத் தெரியும். இதன் பெயர் உங்களில் யாருக்கேனும் தெரியுமா?

இது மொட்டுக்கள் வரும் ஸ்டேஜ். 

பூக்களின் க்ளோசப் இது. மிக அருகில் பார்த்தால் அவ்வளவு கவர்ச்சியாக இல்லை இல்லையா? இதற்கு அப்புறம் மறுநாள் வாட ஆரம்பித்துவிடும். 

= = = = 

KGG பக்கம் 

= = = = = = = = 

Bitcoin போன்ற Crypto currency பற்றி விளக்கும் ஒரு கதை ! 

ஒரு ஊர்ல நிறைய குரங்குங்க வாழ்ந்து வந்துச்சாம். ஒரு நாள், ஒரு வியாபாரி அந்த ஊருக்கு குரங்குகளை வாங்க வந்தானாம்..! 

ஒரு குரங்கை நூறு ரூபாய்க்கு வாங்குறதா அறிவிச்சானாம். அந்த ஊர் ஜனங்க எல்லாம் அவனை பைத்தியம்னு நினைச்சாங்களாம். யாராச்சும் மரத்துக்கு மரம் தாவிட்டு இருக்கிற குரங்கை காசு கொடுத்து வாங்குவாங்களான்னு யோசிச்சாங்களாம். இருந்தாலும் கொஞ்ச ஆளுங்க, குரங்களை புடிச்சு வியாபாரி கிட்ட கொடுத்து, அவன் கொடுக்குறதா சொன்ன பணத்தை வாங்கிட்டாங்களாம். இந்த சேதி காட்டுத் தீ மாதிரி பரவ, நிறைய மக்கள் குரங்கு புடிக்கிற வேலையில இறங்குனாங்களாம். 

கொஞ்ச நாள் கழிச்சு, அந்த வியாபாரி ஒரு குரங்குக்கு 200 ரூபாய் தருவதாக சொன்னானாம். அது வரை சோம்பேறித்தனமா வீட்டுலயே இருந்தவங்களும் உடனே குரங்கு புடிக்க ஆரம்பிச்சிட்டாங்களாம்.  பாக்கி இருக்கிற குரங்குகளை எல்லாம் 200 ருபாய்க்கு ஜனங்க வித்ததும், இனிமே வாங்குற குரங்குக்கு 500 ரூபாய் தரேன்னு சொன்னானாம் வியாபாரி.

ஜனங்களுக்கு தூக்கம் எல்லாம் போச்சு.. ஊருல மிஞ்சி இருக்குற அஞ்சாறு குரங்குகளையும் புடிச்சி வித்து, ஒன்னுக்கு 500 ரூபாய் வாங்கினாங்களாம். வியாபாரி அடுத்து என்ன அறிவிப்பு விடப்போறான்னு மக்கள் ஆர்வமா காத்திருந்தாங்க.

ஒரு வாரம் தான் ஊருக்கு போறதாவும், திரும்பி வந்ததும் ஒரு குரங்க 1000 ரூபாய்க்கு வாங்கிக்கிறதாகவும் சொன்னான் வியாபாரி.

 தன் வேலைக்காரன கூண்டில இருக்கிற குரங்குகள எல்லாம் பாத்து பராமரிக்க சொல்லிட்டு, தன்னுடைய ஊருக்கு போனானாம் வியாபாரி. 

பிடிச்சு வித்து 1000 ரூபாய் வாங்குறத்துக்கு ஒரு குரங்குக்கூட எஞ்சி இல்லையேன்னு மக்களுக்கு கவலை. 

அத பார்த்த வியாபாரியோட வேலைக்காரன், ஜனங்களுக்கு ஒரு குரங்க 700 ரூபாய்க்கு விக்கிறதா சொன்னானாம். 

காட்டு தீ மாதிரி செய்தி பரவிச்சு. வியாபாரி 1000 ரூபாய்க்கு குரங்கு வாங்கினா, எப்படியும் தங்களுக்கு 300 ரூபாய் லாபம் கிடைக்கும்னு யோசிச்சாங்க ஊர் ஜனங்க. 

அடுத்த நாள் கூண்டில அடைஞ்சு இருக்கிற குரங்குகளை வாங்க பெரிய வரிசை காத்திருந்துச்சு. 

ஒவ்வொரு குரங்கையும் 700 ரூபாய்க்கு வியாபாரியோட வேலைக்காரன் வித்தான். பணக்காரங்க நிறைய குரங்குகள வாங்க, ஏழைங்க கடனவுடன வாங்கி, கொஞ்சம் குரங்குகளை வாங்குனாங்களாம்.

 குரங்குகளை எல்லாம் பத்திரமா பாத்துக்கிட்ட ஜனங்க, அந்த வியாபாரி மறுபடியும் எப்போ ஊருக்கு வருவான்னு காத்திருந்தாங்களாம்.

யாருமே வரல..! எல்லாரும் அந்த வியாபாரியுடைய வேலைக்காரனைப் பாத்து விஷயத்தை கேக்க ஓடினாங்க. 

ஆனா அவன் எப்பவோ ஊரை விட்டு ஓடிட்டான்..!  அப்பதான் ஊர் ஜனங்க, ஒன்னுக்கும் பிரயோஜனப்படாத குரங்குகளை 700 ரூபாய் கொடுத்து வாங்கி, விக்க முடியாத நிலைமையில இருக்கோம்னு உணந்தாங்க. 

இந்த வியாபாரத்துக்கு பேருதான்  crypto currency! 

 

இந்த குரங்கு வியாபாரத்தில சொற்ப ஆட்கள்தான் பணக்காரங்க ஆக முடியும். பெரும்பாலான ஆட்களுக்கு குடிதான் மூழ்கிப்போகும்...

படித்த பகிர்வு