நாங்கள் தரிசனம் செய்த கோயில்கள் :: புள்ளமங்கை-ஆடுதுறையார் கோயில்: நெல்லைத்தமிழன்

 

திருஞானசம்பந்தர்  அல்லியங்கோதை அம்பாள் சமேத ஸ்ரீ ஆலந்துறை நாதரை, ‘பாலுந்துறுதிரளாயின’ பதிகத்தால் பாடியிருப்பதைப் பார்த்தோம். மகேந்திரபல்லவன் காலத்தில்தான் அப்பர் (திருநாவுக்கரசர்) சுவாமிகள் வாழ்ந்தார். அவர் காலத்தில்தான் திருஞானசம்பந்தர் சிறு பிள்ளை. 9ம் நூற்றாண்டில் முதல் பராந்தக சோழன் காலத்தில் புள்ளமங்கை கோயில் கற்றளி ஆனது. அதற்கு முன்னால் இருந்த கோயிலுக்கு திருஞானசம்பந்தர் வந்து தரிசித்து இந்தப் பதிகம் இயற்றியிருக்கவேண்டும்.

 

 

 

 

 

விமானத்தின் கீழ், கருவறையின் வெளிப்புறச் சுவற்றில் லிங்கோத்பவர். 

 

லிங்கோத்பவருக்கு இரு புறமும் விஷ்ணு மற்றும் பிரமன்(?). இன்று செதுக்கியது போன்ற அழகு. இந்த மாதிரி சிற்பத்தின் முகங்களை மாதிரியாக வைத்துத்தான் கல்கியின் நாவல்களுக்கு மணியம் அவர்கள் ஓவியம் வரைந்திருப்பார்.

அரை அடிக்கும் குறைவான இடத்தில் அமைக்கப்பட்டுள்ள சிற்பத்தைப் பெரிதுபடுத்திக் காண்பித்துள்ளேன். அழகு குறையவில்லை.

கோவிலின் அடிப்பகுதியைத் தாங்குகின்ற பூதகணங்கள். 

 

 

சௌந்திர நாயகி அம்மன். 

 

நால்வர் அணி. சைவ சமயக் குரவர்கள்

 

துவாரபாலகர்கள். 

துவாரபாலகர்களுடன் கூடிய முன் மண்டபம். எல்லா ஆலயங்களிலும் இந்த மாதிரி ஒரு இடத்தை 2 ரூபாய் விளக்கு வைப்பவர்களுக்காக ஒதுக்கிவிடுகிறார்கள். 2 ரூபாய் விளக்கு என்று அலட்சியமாகச் சொல்லவில்லை, ஆனால் ஆலயத்துக்கு விளக்குக்காக எண்ணெய், திரி முதலியன தந்தால் உபயோகம். சும்மா இந்த மாதிரி விளக்கை ஏற்றிவைப்பதில் என்ன பிரயோசனம் இருக்க முடியும்? இதனால் மற்றவர்களுக்கும் ஆலயத்திற்கும் இடைஞ்சல்தான். அதனால்தான் வேறு வழியில்லாமல் எல்லா ஆலயங்களிலும் ஒதுக்குப்புறமான இட த்தில் ஒரு டேபிளைப் போட்டு, இங்கே விளக்கேற்றுங்கள் என்று சொல்லிடறாங்க. பக்தர்களும் புண்ணியத்தை பக்கெட்டில் எடுத்துக்கொண்டு போகும் சந்தோஷத்துடன் 2 ரூபாய் விளக்கை ஏற்றுகிறார்கள்.  இதனால் யார் பயன் பெறுவார்கள்?

 

உன் தரிசனமன்றி வேறு என்ன வேண்டும்?

 

 

அர்த்த மண்டபத்தின் விதானத்தில் வெளியே பார்த்தது போலே உள்ள சிற்பங்கள்.

கருவறை, அதற்கு முன் இருக்கும் மண்டபத்தின் தற்போதைய தோற்றம். விதானத்தில் இருக்கும் ஓவியம் பிற்காலத்தையது.

கோயிலின் மண்டபத்துக்கு வெளியே ஒரு சிறிய அறை போன்று உள்ளது.  இதைத்தான் அந்தக்காலத்தில் மடப்பள்ளியாக அமைந்திருந்தனர். அது மிகவும் பழுதுபட்டிருந்தது. வௌவால்களின் குடில் போல எனக்குத் தோற்றம் தந்தது. அதிலும் சில சிற்பங்கள் கிடத்திவைக்கப்பட்டிருந்தன. அவைகளின் படங்கள் கீழே.

 

தேவியரின் சிற்பங்கள் மிக அழகு. ஆனால் அவை எங்கு வைக்கப்பட்டிருந்தனவோ.

அந்தக் கோயிலில் சிறிய போஸ்டரில் எழுதியிருந்தது,  இரவு படுக்கும் முன் கீழுள்ள பாசுரத்தைச் சொல்லிவிட்டுப் படுக்கவேண்டும் என்று.

கல்லாப் பிழையும் கருதாப் பிழையும் கசிந்துருகி

நில்லாப் பிழையும் நினையாப் பிழையும் நின்னஞ்சழுத்தைக்

சொல்லாப் பிழையும் துதியாப் பிழையும் தொழாப்பிழையும்

எல்லாப் பிழையும் பொறுத்தருள்வாய் கச்சி ஏகம்பனே

இது பட்டினத்தார் இயற்றிய திரு ஏகம்பமாலையில் வரும் பாசுரம். ஈசனுடைய ‘நமசிவாய’ என்ற திருநாமத்தைக் கல்லாத, கருதாத, கசிந்துருகி உருகாத, நினையாத, சொல்லாத, துதியாத, தொழாத மற்றும் எல்லாப் பிழையையும் பொருத்தருள்வாய் கச்சி ஏகாம்பரநாதனே என்பது பாசுரத்தின் பொருள்.

ஆயிரத்து நூறு ஆண்டுகளுக்கு முன்னால் கட்டப்பட்ட (கற்றளியாக) புள்ளமங்கைக் கோயிலையும் அதன் சிற்பங்களையும் முழுமையாகப் பார்த்துவிட்டோம் என்ற மகிழ்வுடன் அங்கிருந்து கிளம்பினோம். மீண்டும் இங்கு வருவோமா என்ற சந்தேகம் மனதில் எழுந்தது.  இந்தக் கோயிலின் பெருமையையை பெரிய பதாகையில் அனைவரும் சுலபமாகப் புரிந்துகொள்ளுமாறு எழுதிவைத்தால், அல்லது சிறு கையேடு விற்பனை செய்தால் பார்ப்பவர்களும் புரிந்துகொண்டு சிற்பங்களின் சிறப்பை அனுபவிக்குமாறு இருக்குமே என்று தோன்றியது.

ஆனாலும் இது ஒரு பாடல் பெற்ற திருத்தலம் என்பதையும் நம் நினைவில் வைக்கவேண்டும். 

இங்கு இறைவன் பிரம்மபுரீஸ்வரர். அவரைத் தொழுதுவிட்டு அந்த இடத்தைவிட்டுச் சென்றோம்.  சோழர் காலத்தைய கோயில்கள் அனைத்தையும் தொகுத்து வழங்குவது என்பது இயலாத காரியம். ஆனால் சோழர் வரலாற்றிலேயே மிக முக்கிய மூன்று கோயில்களில்,  இராஜராஜ சோழனின் தஞ்சை பெருவுடையார் கோயிலைப் பார்த்தோம். அதற்கு முன்பு சாளுக்கிய சோழ வம்ச அரசனின் தாராசுரம் ஐராவதீஸ்வரர்  தெய்வநாயகி அம்மை கோயில்களைக் கண்டுகளித்தோம். இடையில் சோழ சாம்ராஜ்யத்தை உச்சத்துக்குக் கொண்டு சென்ற கங்கைகொண்ட சோழன் இராஜேந்திரனின் கங்கைகொண்ட சோழீச்வரத்தை மாத்திரம் காணாமல் போகமுடியுமா? அதை பிறகு பார்ப்போம். 

- - - - - - - - - - - - - - - -