பூந்தோட்டமே சொந்தம் என்றால் நான் போவது எங்கே

 

 திடீரென்று பழைய வீட்டின் அருகே இருந்தவர் போனில் அழைத்து 'உங்களுக்கு ஒரு கடிதம் வந்திருக்கிறது இது உங்கள் வீட்டுப்பெயரா?' என்று மாமியார் பெயர் குறித்து கேட்க, 'ஆமாம்' என்று சொல்லி, அதை இங்கு அனுப்பச்சொல்லி, அது வந்ததும் படித்துப் பார்த்தால்  மாமியாரின் குடும்ப ஓய்வூதியம் தடைப்பட்டிருக்கிறது என்பதை சொன்ன கடிதத்தில் 'காரணம் நீங்கள் லைவ் சர்டிபிகேட் கொடுக்காததே' என்கிற அந்த வாசகத்தைப் படித்ததும்தான் நான்கைந்து மாதங்களாக அவருக்கு வரவேண்டிய ஓய்வூதியம் வரவேயில்லை என்பதும் கவனத்துக்கு வர,  'கடந்த ஜூன் மாதம் தபால் அலுவலகம் மூலமாக லைவ் செய்தோமே என்னாச்சு' என்று கேள்வியும் எழ, நண்பர்களிடம் விவரம் விசாரித்து, மறுபடி அதே மாதிரி தபால் அலுவலகம் மூலம் (வீட்டுக்கு வரவழைத்துதான்) லைவ் செய்ய்யலாமா என்கிற எங்கள் யோசனையும் நிராகரிக்கப்பட்டதில், சரி நேரில் சென்று வந்துவிடுவதே உத்தமம் என்கிற எண்ணம் ஏன் அவ்வளவு தயக்கத்துக்குரியதாக இருந்தது என்றால் மாமியாரின் வயது 85 ஐத் தாண்டியதுதான் என்பதால், யோசித்தாலும் வேறு வழியில்லையே என்று சென்ற வாரம் வெள்ளிக்கிழமை அன்று செல்ல முடிவெடுத்தபோதே இன்னொரு வேலையும் காத்திருப்பதும் நினைவுக்கு வர, அதையும் முடித்து விடலாம் என்று முடிவெடுத்து, அதனோடு கூட இன்னொரு உறவினர் வீட்டுக்கு சென்று வர வேண்டிய கட்டாயம் இருந்ததையும் நினைவில் கொண்டு அங்கும் சென்று வரவும் திட்டமிட்டு, டிரைவருக்குச் சொல்லி விட்ட பிறகு கோர்ட் விஷயம் ஒன்றும் செல்ல வேண்டிய வேலை இருப்பது நினைவில் வந்தததென்றால் அது என்ன என்றால், நான் ஒரு பில்டரிடம் முன்பு ஏமாந்தேன் என்று சொன்னேனே, அவன் IP கொடுத்து விட்டான் என்று எனக்கு அலைபேசி கடுப்பேற்றி, 30 நாட்களுக்குள் கோர்ட்டுக்கு சென்றுவரச் சொன்ன காரணத்தால், அதையும் யோசிக்க வைத்து, அதையும் திட்டத்தில் சேர்க்க வைத்ததால், ஒவ்வொரு வேலையாக சீக்கிரம் முடிய வேண்டுமே என்று டிரைவர் வந்ததும் காலை ஒன்பதரைக்கு கிளம்பியபோது இன்னொரு வேலையையும் சேர்த்து பார்க்க வேண்டும் என்கிற கட்டாயத்தை உண்டு பண்ணிய ஒரு வேலை என் செல்லுக்கு வந்த எஸ் எம் எஸ்ஸில் , என் வங்கி கணக்கு அளவு மீறிவிட்ட காரணத்தால் நிறுத்தப்பட்டிருப்பதாகவும், சரி செய்ய உடனே என்னை வங்கிக்கு நேரில் வரச் சொல்லியும் வந்த அந்த எஸ் எம் எஸ் ஒரு புதிய வேலையையும் சேர்த்து விட்டதால், ஓய்வூதிய வேலை எவ்வளவுநேரம் பிடிக்குமோ என்கிற எண்ணத்தோடேயே உள்ளே போனால் நாங்கள் நினைத்ததற்கு மாறாக சீக்கிரமே அந்தத் வேலை முடிந்து விட்டதற்கு காரணம் கார்ஷெட் போன்ற இடத்தில் நான்கைந்துபேர் செல்லும் கையுமாக 'லைவ்' வேலையினை கவனித்துக் கொண்டிருந்ததுதான் என்பதும், அவர்களிடம் பேசியபோது இனி தபால் நிலையங்களில் 'லைவ்' கொடுக்க முடியாது என்பதையும் தெரிந்து கொள்ளவும் முடிந்ததால் செக்ஷனில் போய் லைவ் ஆனதைச் சொல்லி அரியர்ஸை காலாகாலத்தில் அனுப்புவதற்கு ஏற்பாடு செய்து விட்டு வெளிய வந்து கோர்ட்டை கேன்சல் செய்து விடலாமா, அதற்குத் தேவையான ஆவணம் எதுவும் கையில் இல்லையே என்று யோசித்துவிட்டு, சரி என்னதான் சொல்கிறார்கள், ஒரு நடைமுறையாவது தெரியுமே என்று முடிவு செய்து கோர்ட்டை அடைந்து, அவர்கள் மூன்று இடங்களில் உடம்பெல்லாம் கிசுகிசு மூட்டி சோதித்து, பாதி தூரம் சென்றபின் 'Pass எங்கே?'' என்று ஒருவர் கேட்டதில் ஒன்றும் புரியாமல் விழித்து அவரிடமே விளக்கம் பெற்று எதிரே இன்னொரு இடத்துக்குப்போய் நம் விவரங்கள் சொல்லி கம்பியூட்டரில் செலுத்தி ஒப்புகை சீட்டு பெற்று மறுபடியும் இந்த இடம் வந்து மறுபடியும் உடம்பெல்லாம் தடவப்பட்டு முதல் மாடியை அடைந்து, ஃபேமிலி கோர்ட்டில் IP செக்ஷன் இருக்கும் இடத்துக்கு கொஞ்ச நேரம் அலைந்து ஒருவழியாய் அங்கிருக்கும் ஒரு பணியாளரின் உதவியாலேயே இடமறிந்து உள்ளே சென்று முகவரி மாற்றத்துக்கு எழுதிக் கொடுத்து விட்டு, அவர்கள் 'அப்புறம் ஃபில் அப் பண்ணிக் குடுங்க' என்று சொன்னபடி கிளெயின் பார்மையும் வாங்கி வரும் வழியில் நேரமாகி விட்டதால் மவுண்ட்ரோட் கீதம் ஹோட்டலில் லன்ச் முடித்து,  அங்கிருந்து உறவினர் வீடு சென்று அளவளாவி, காபி குடித்து கிளம்பி, வரும் வழியில் நேரமாகி விட்டாலும் எதற்கும் இருக்கட்டுமே என்று நுழைந்து,  என் வங்கிக்கும் சென்று அவர்களும் ஒத்துழைக்க, அவர்கள் சொன்ன ஃபார்மாலிட்டிஸ் அவ்வளவு முக்கியமில்லை என்று அறிந்தாலும், வந்ததற்கு அதையும் முடித்து வீடு திரும்பும்போது மணி மாலை ஆறு!

===================================================================================== 

13 ஆண்டுகளாக கோமாவில் வாழும் இளைஞர் கருணை கொலைக்கு சுப்ரீம் கோர்ட் அனுமதி

13 ஆண்டுகளாக கோமாவில் உள்ள நிலையில், அவருக்கு பொருத்தப்பட்ட உயிர் காக்கும் கருவிகளை அகற்றி, கருணை கொலைக்கு உச்ச நீதிமன்றம் அனுமதி அளித்துள்ளது. இதுபோன்ற அனுமதி அளிக்கப்படுவது, நம் நாட்டில் இதுவே முதல்முறை.

நீதிபதி கண்ணீர் : சுவாசிப்பதற்கும், உணவு அளிப்பதற்குமான குழாய் அவருக்கு பொருத்தப்பட்டுள்ளது. சுயநினைவு இல்லாமல் உள்ளார். டாக்டர்கள் கைவிட்ட நிலையில், ஹரீஷ் ராணாவுக்கான உயிர் காக்கும் கருவிகளை அகற்ற அனுமதி கோரி அவரது பெற்றோர் உச்ச நீதிமன்றத்தில் மனு தாக்கல் செய்தனர்.

இந்த மனுவை, நீதிபதிகள் ஜே.பி.பர்திவாலா, கே.வி.விஸ்வநாதன் அடங்கிய அமர்வு விசாரித்து தீர்ப்பு வழங்கியது. அப்போது நீதிபதி பர்திவாலா உணர்ச்சிவசப்பட்டு கண்ணீர்விட்டார்.
"இது வெறும் சட்டம் சார்ந்த முடிவு அல்ல; அன்பு, மருத்துவம் மற்றும் அறிவியல் சார்ந்த முடிவு. உங்கள் மகனை கைவிடவில்லை. மாறாக அவர் கண்ணியத்துடன் இறக்க நீங்கள் அனுமதி கேட்டுள்ளீர்கள்," என்று ராணாவின் பெற்றோரை நோக்கி குறிப்பிட்டார்.  

கருணை கொலை தொடர்பாக, 2018ல் வழங்கப்பட்ட தீர்ப்பில், 'வென்டிலேட்டர் போன்ற உயிர் காக்கும் கருவிகளை அகற்ற அனுமதி இருந்தது. ஆனால், குழாய் மூலம் உணவு மற்றும் நீர் வழங்குவது சிகிச்சையா அல்லது அடிப்படை உரிமையா என்பதில் தெளிவு இல்லாமல் இருந்தது.  தற்போது குழாய் வழி உணவும், மருத்துவ சிகிச்சையின் ஒரு பகுதியே என்றும் டாக்டர்கள் பரிந்துரைத்ததால், 'அதை நிறுத்திக் கொள்ளலாம்' என, உச்ச நீதிமன்றம் தெளிவுபடுத்தியுள்ளது.

இந்த சம்பவத்தின் கண்கலங்க வைக்கும் கடைசி காட்சிகளை விவரிக்கும் போஸ்ட்.

https://www.facebook.com/share/p/1EcbesVrDm/

===================================================================================

விஜயகாந்த் தொடர்ச்சியாக எஸ்.ஏ.சந்திரசேகர் படங்களில் நடித்துக் கொண்டிருந்தபோது சந்திரசேகரின் உதவியாளராக இருந்த செந்தில்நாதனை விஜயகாந்திற்கு மிகவும் பிடிக்கும். அவரது பணிவு, கடும் உழைப்பு அவருக்கு பிடித்து விட்டது. அவருக்கு ஒரு படம் நடித்து கொடுத்து அவரை இயக்குனராக்க வேண்டும் என்று முடிவு செய்தார்.

ஒரு நாள் செந்தில்நாதனை அழைத்து "நான் ஒரு படம் நடித்து தருகிறேன். ராவுத்தர் பிலிம்ஸ் தயாரிக்கும் ஒரு நல்ல கதை எழுதி கொண்டு வா" என்று சொல்லி அவருக்கு ஒரு ஒட்டலில் அறையும் புக் செய்து கொடுத்தார். சில வாரங்களில் செந்தில்நாதன் கதையோடு வந்தார். அந்த கதையும் விஜயகாந்திற்கு பிடித்து விட்டது. செந்தில்நாதனுக்கு ஒரு தொகை முன்பணமாகவும் கொடுக்கப்பட்டது.

அப்போது விஜயகாந்த் 'காலையும் நீயே மாலையும் நீயே படத்தில் நடித்து வந்தார். செந்தில்நாதனுக்கு முன்பணம் கொடுத்த அன்று படப்பிடிப்பில விபத்து ஏற்பட்டு மருத்துவமனையில் சேர்க்கப்பட்டார். இதனால் சகுணம் சரியில்லை என்று கூறி இந்த படத்தை டிராப் பண்ணிடலாம் என்று ராவுத்தர் கூறினார். அதற்கு விஜகாந்த் மறுத்து விட்டார்.

படப்பிடிப்புகள் நடந்தபோது படத்தில் இளம் ஜோடிகளாக நடித்த ஆனந்த், வாண விஸ்வநாத் காட்சிகள் படமானபோது விபத்து ஏற்பட்டு ஆனந்த் படுகாயம் அடைந்தார். இதனால் 2 மாதங்கள் படம் தடைபட்டது. இருவழியாக படம் முடிந்து இளையராஜாவிடம் பின்னணி இசைக்காக ஒப்படைக்கப்பட்டது. படத்தை பார்த் இளையராஜா 'இந்த படத்திற்கு ரீரிக்கார்டிங் பண்ணுவதே வேஸ்ட்' என்று சொன்னதாக ஒரு தகவல் பரவ படத்தை வாங்கிய விநியோகஸ்தர்கள் பணத்தை திருப்பி கேட்க தொடங்கினார்கள். இதனால் கோபம் அடைந்த விஜயகாந்த் இளையராஜாவை சந்தித்து படம் எப்படி வேண்டுமானாலும் இருந்து விட்டு போகட்டும் நீங்கள் இசை அமைத்து கொடுங்கள் என்று கூறிவிட்டார்.

பின்னணி இசை கோர்ப்பு முடிந்ததும் படத்தின் பிரிவியூ ஷோ போடப்பட்டது. மிகுந்த மன உளைச்சலில் இருந்த விஜயகாந்த் அந்த ஷோவிற்கு போகவில்லை. காரணம் படத்தை பார்க்க அவர் விரும்பவில்லை. ஷோ முடிந்ததும் விஜயகாந்திற்கு போன் கால்கள் பறந்தது. சார் இந்தப் படம் சூப்பர் டூப்பர் ஹிட்டாகும், நீங்க பிரமாதமாக நடிச்சிருக்கீங்க என்றது போன்கால்கள்.
அதன்படியே படமும் சூப்பர் டூப்பர் ஹிட்டாகி வெள்ளி விழா கொண்டாடியது. அந்த படம் 'பூந்தோட்ட காவல்காரன்'.

பிளாஷ்பேக் - தினமலர் 

=====================================================================================

ஒருமுறைதான் காதல் வரும் தமிழர் பண்பாடு...   பாடல் கேட்டிருக்கிறீர்களா?  1975 ல் வெளியான ஒன்பதாம் மயங்குகிறாள் ஒரு மாது.  

விஜயபாஸ்கர் இசையில் 'சம்சாரம் என்பது வீணை',  'வரவேண்டும் வாழ்க்கையில் வசந்தம்' போன்ற நல்ல பாடல்களைக் கொண்ட படம்.  எஸ் பி முத்துராமன் இயக்கத்தில், முத்துராமன், சுஜாதா, தேங்காய், விஜயகுமார் நடித்திருக்கும் படம்.

திருமணத்துக்கு முன் விஜயகுமாரை காதலித்து, உடலுறவு கொண்டு கர்ப்பமாகி, அதைக் கலைக்கும் சுஜாதா பின்னர் முத்துராமனுக்கு மனைவியாகிறார்.  விஜயகுமார்-சுஜாதா தப்பு செய்த போட்டோக்களை கள்ளத்தனமாக எடுத்து தேங்காய் சுஜாதாவை பிளாக்மெயில் செய்கிறார்.  அவர் மனைவி சுஜாதாவின் கல்லூரித்தோழி.  பிளாக்மெயில் விஷயம் தோழிக்கு தெரியாது.  சங்கடம் போதாது என்று விஜயகுமாரும் அதே வீட்டுக்கு  வந்து சேர்கிறார்.  தேங்காய் பணம் கேட்கும்போதெல்லாம் சுஜாதா முத்துராமனுக்கு தெரியாமல் பணம் எடுத்துக் கொடுத்துத் தவிக்கிறார்.  ஒருபுறம் விஜயகுமார், ஒருபெயரம் தேங்காய், நடுவில் சுஜாதா, அவர்களுக்கு பொதுவில் முத்துராமன்.  இந்தக் காட்சி அமைப்பில் வாணி ஜெயராம் குரலில் இந்தப் பாடல்.  பாடல் கண்ணதாசன்.

ஒரு புறம் வேடன் மறுபுறம் நாகம்

இரண்டுக்கும் நடுவே

அழகிய கலைமான் அழகிய கலைமான்

ஒரு புறம் வேடன் மறுபுறம் நாகம்

இரண்டுக்கும் நடுவே

அழகிய கலைமான் அழகிய கலைமான்

ரகசிய இதயம் பலவகை துயரம்

அவனருள் கிடைத்தால் துயரங்கள் விலகும்

ஒரு புறம் வேடன் மறுபுறம் நாகம்

உண்மையைச் சொன்னால் சன்னிதி திறக்கும்

ஒவ்வொரு மானுக்கும் நிம்மதி கிடைக்கும்

யாரறிவாரோ ஊமையின் கனவு

யாரறிவாரோ ஊமையின் கனவு

மானுக்கும் உண்டு ஒரு வகை மனது

ஒரு புறம் வேடன் மறுபுறம் நாகம்

இரண்டுக்கும் நடுவே

அழகிய கலைமான் அழகிய கலைமான்

பாட நினைத்தது பைரவி ராகம்

பாடி முடித்தது யாவையும் சோகம்

மானும் நினைத்தது மங்கலம் பாட

மானும் நினைத்தது மங்கலம் பாட

மயங்கி விழுந்தது சங்கமமாக

ஒரு புறம் வேடன் மறுபுறம் நாகம்

இரண்டுக்கும் நடுவே

அழகிய கலைமான் அழகிய கலைமான்

பெண்ணாய் பிறந்தால் பேதமை உள்ளம்

பேதமையாலே விளைந்தது கள்ளம்

கண்ணா உனது கருணையை காட்டு

கண்ணா உனது கருணையை காட்டு

காரிகை வாழ்வினில் நிம்மதியூட்டு

ஒரு புறம் வேடன் மறுபுறம் நாகம்

இரண்டுக்கும் நடுவே

அழகிய கலைமான் அழகிய கலைமான்

ரகசிய இதயம் பலவகை துயரம்

அவனருள் கிடைத்தால் துயரங்கள் விலகும்

ஒரு புறம் வேடன் மறுபுறம் நாகம் 

 

=============================================================================================

ஒரு அறிமுகம்....

18-ஆம் நூற்றாண்டு தென்னிந்திய வரலாற்றில் மிக முக்கியமான காலகட்டம். பலம் வாய்ந்த மொகலாய, விஜயநகர அரசுகள் சிதறுண்டு மராட்டியர்கள், ஹைதராபாத் நிஜாம், ஆற்காடு நவாப், திருவிதாங்கூர், ராமநாதபுரம், புதுக்கோட்டை, சிவகங்கை தனி யரசுகள், எழுபத்தியிரண்டு பாளையங்கள் எனத் தென்னிந்தியா ஒரே நேரத்தில் பல சுதந்திர அரசுகளைக் கொண்டிருந்தது. இவை போதாதென்று தனி நபர்கள் தலைமையில் இயங்கிய கூலிப் படைகள். இந்தத் தனியரசுகள் ஒன்றுக்கொன்று போரிட்டுக் கொண்டு தென்னகத்தைப் பெரும் கலவரப் பூமியாக மாற்றியிருந்தன. கலைத்துப் போட்ட சீட்டுக்கட்டுகளைப்போல், நம் அரசர்கள் இருப்பதை அறிந்த ஆங்கிலம், பிரெஞ்சு, போர்த்துக்கீசியம், லத்தீன் பேசும் ஐரோப்பிய வணிகர்கள், வழிவழியாக வந்த அரசுரிமை பெற்றவர்களை ஓரம் தள்ளிவிட்டு, இந்தியாவின் ஆட்சியாளர்களாக மாற முயற்சி செய்த நேரமது.

அக்காலகட்டத்தில் பெரும்பாலான அரசுகளை வழிநடத்தியவர்கள் அதன் அமைச்சர்களும், தளபதிகளும்தான். துபாஷ்கள் என்ற புதிய அதிகாரவர்க்கம் ஒன்று தங்களது மொழிபெயர்ப்புத் திறமையால் பலம் பெற்றனர். துபாஷ்கள் இன்றி ஐரோப்பியர்களின் எந்த நடவடிக்கையும் இருக்காது.

அமைச்சர்களையும், துபாஷ்களை யும் அனுசரித்தே ஆட்சி நடத்த வேண்டிய சூழலில் உள்நாட்டு அரசர்களும், ஐரோப்பியர்களும் இருந்தனர்.

தென்னிந்தியாவின் அமைதியையும், சுதந்திர அரசர்களுக்கிடையில் இருந்த ஒற்றுமை யின்மையையும் துபாஷ்கள்மூலம் தெரிந்துகொண்டு ஐரோப்பிய அரசர்கள் அடுத்த நகர்வுகளைத் தீர்மானித்தனர். அந்நிய மொழி தெரிந்த துபாஷ்கள், நம் ஊர் அரசர்களிடம் நேரடியாகப் பேச வழி யில்லாததால் அமைச்சர்கள், தளபதிகள் மூலமாகக் காய் நகர்த்தினர்.

விஜய நகர அரசனைவிட அவனது தளபதி விஸ்வநாத நாயக்கர், தென்னிந்தியாவின் தலைவிதியை நிர்ணயிப்பவராக இருந்தார். விஸ்வநாத நாயக்கரை வழி நடத்தியது அரியநாத முதலியார் என்னும் அமைச்சர். ஆற்காடு நவாப்பை வழி நடத்தியது அவரது மரு மகன் சந்தா சாகிப். ராமநாதபுரம் அரசர்களை வயிரவன் சேர்வை, வெள்ளையன் சேர்வை, பிச்சைப் பிள்ளை, முத்திருளப்பப் பிள்ளை போன்ற அமைச்சர்கள் வழிநடத்தினர். புதுக்கோட்டை அரசரைத் தஞ்சையில் அமர்ந்துகொண்டு பிளாக்பர்ன் என்ற ஆங்கிலேயத் தளபதி வழிநடத்தினான்.

தஞ்சாவூர் மராட்டிய அரசனைவிட அவனது தளபதிகள் முராரி ராவும், மானோஜியும் பலம் வாய்ந்தவர்களாகக் கருதப்பட்டனர். மைசூர் உடையார் அரசரைவிட அமைச்சர் பூர்ணய்யாவின் வார்த்தைக்கு மதிப்பு அதிகம். அமைச்சர் சிவசுப்ரமணிய பிள்ளை யின் வார்த்தைகளைக் கட்டபொம்மன் மீறியதில்லை.

வாணிகம் செய்ய இந்தியா வந்த வெளிநாட்டவர்கள் இங்கிருந்த சூழ்நிலைகளைப் பயன்படுத்திக் கொண்டனர். கிடைத்த மிளகு, ஏலம், லவங்கம், தென்னிந்தியாவில் பனை வெல்லம், பருத்திக்கு ஐரோப்பியாவில் மிகுந்த தேவையிருந்தது. இங்கு வாழ்ந்த அரசர்களின் வாழ்க்கைமுறை, படோடபம், செல்வம் அவர்கள் நாட்டு அரசர்களின் வாழ்க்கைத்தரத்தோடு ஒப்பிடுகையில் மிக உயரியதாக இருந்தது. ஐரோப்பிய மத குருக்கள், தங்கள் பங்கிற்கு, இங்குள்ள சூழலை விரிவாகத் தங்கள் தலைமையகங்களுக்குக் கடிதமாக எழுதினர். வெளிநாட்டிலிருந்து இரண்டு மாதக் கடல் பயணத்தில் இந்தியாவிற்கு வந்து சேரக் கப்பல் போக்குவரத்தும், கடிதப் போக்குவரத்தும், தென்னிந்தியாவின் கட்டுப்பாடற்ற சுதந்திரத்திற்கு முடிவுகட்டத் தலைப்பட்டன.

தென்னிந்தியாவின் சில சிற்றரசுகள் தங்களது சுதந்திர உணர்வைக் காப்பாற்றிக்கொள்ள இறுதிக் கட்டப் போரைப் பதினெட்டாம் நூற்றாண்டின் இறுதி ஆண்டுகளில் அறிவித்தன. ​1799 ஆம் ஆண்டு மே மாதம் 4-ஆம் தேதி திப்பு சுல்தான் ஸ்ரீரங்கப் பட்டினத்தில் கொல்லப்பட்ட பின்பு அடுத்த 160-ஆவது நாளில் கட்டபொம்மன்  தூக்கிலிடப்பட்டார். துந்தாஜி வாக், மருது பாண்டியர்கள், ஊமைத்துரை, சிவத்தையா, கோபால் நாயக்கர், பொம்மை நாயக்கர் எனப் போராளிகள் அடுத்த இரண்டு ஆண்டுகளில் தூக்கிலிடப்பட்டனர். சின்ன மருதுவின் பன்னிரண்டு வயது மகன் துரைசாமியோடு சேர்த்து திண்டுக்கல், வாராப்பூர், கோயம்புத்தூர், நாங்குநேரிப் போராளிகள் எழுபத்தி இரண்டு பேர் மலேசியாவிலுள்ள பினாங்குத் தீவிற்கு நாடு கடத்தப்பட்டனர். சிவகங்கை அரசரும், பெரிய மருது சேர்வைக்காரரின் மருமகனு மான வெங்கம் பெரிய உடையணத் தேவர், சுமத்திரா தீவிலுள்ள பென்கோலனுக்கு போராளிகளின் நாடு கடத்தப்பட்டார். வருடத்திற்கு ஒருவராகப் போராளிகள் கொல்லப்பட்டனர். வீழ்ச்சியினால், மீதம் இருந்த சிற்றரசுகள் தங்களது சுதந்திரத்தை இழந்தன. ஆங்கி லேயர்களுக்கு அடிபணிந்து போயின. கிராமங்கள் பொருளாதாரத்தை இழந்தன.

குழந்தைகளைப் பிணைக் கைதிகளாக மாற்றுவதும், தனக்கு எதிரானவர்களை நாடு கடத்துவதும், பொது இடங்களில் தூக்கிலிடு வதையும், தேடப்படுபவர்களை உயிருடன் பிடித்துக் கொடுத்தால் சன்மானத் தொகையும், அவர்களைப் பிணமாகக் கொண்டுவந்தால், அதில் பாதிப்பணமும் தரும் நடைமுறைகளை ஆங்கிலேயர்கள் தென்னிந்தியாவில் 18-ஆம் நூற்றாண்டில் முதன் முறையாக அறிமுகப்படுத்தினர்.

- 1801 நாவல் - டாக்டர் ,மு. ராஜேந்திரன் இ. ஆ. ப முன்னுரை  -

========================================================================================

வடிவுக்கரசி மிரட்டி இருக்கிறார் என்று சொல்லலாமா?  அங்கே பெரிய விளம்பரங்களுடன் ராதிகாவின் தாய்க்கிழவி வேஷம் பேசப்பட்டுக் கொண்டிருக்க, இங்கே வடிவுக்கரசி விளம்பரமில்லாமல் நூறு வயதுக்கும் மேற்பட்ட கிழவியாக நடித்து பயமுறுத்தி இருக்கிறார்.

நிதானமான நடிப்பு.  பார்வையிலேயே நடிக்கிறார்.

வசனமே கிடையாது.   விபரீதமான கதை அமைப்பு.  நாமொன்று நினைக்க முடிவொன்றாய் இருப்பதும் எதிர்பார்க்கக் கூடியதே..   இரண்டாம் பாகம் வேணுமில்லோ..

========================================================================================

அம்மா மறைந்த உடன் அப்பா 'ஹேமாஞ்சாலி' என்ற பெயரில் ஒரு புத்தகம் வெளியிட்டார்.  அதனோடு கூட,  மறைந்த மனைவியுடன் தொடர்பு கொள்ள நிறைய முயன்றார்.  ஓஜோ போர்ட், ஆவியுலக ரவிச்சந்திரனுக்கு கடிதம், இறந்த மனைவியுடன் பேசியதாகச் சொன்ன ஆர் வி லக்ஷ்மண் புத்தகம்...  இப்படி...

காஞ்சி மடத்துக்கும் சில சந்தேகங்களை எழுதி கேட்டிருந்தார்.  அங்கிருந்து வந்த பதில்..

===========================================================================================

வீட்டிலேயே இருந்திருக்கலாம் 

என்று தோன்றுகிறது 

வீட்டிலிருந்தால் 

ஒரு மாமியார், ஒரு நாத்தனார் 

வெளியில் பலர்.

ஓவியனின் பார்வையில் 

படமாய் உறைந்தேன் 

பேப்பரில்.

புத்தகம் திறந்ததும் 

புத்துயிர் பெறுகிறார்கள் 

கதை மாந்தர்கள்

==============================================================================================

மனிதனின் மறுபக்கம்..

ரஜினியின் வெளிவராத படம்.

பாலச்சந்தருக்கு அந்தச்செய்தி கேட்டதுமே ஒரு மாதிரி ஆகி விட்டது. புது வீடு கட்டி அதில் வைத்திருந்த பாலச்சந்தரின் பெரிய போட்டோவை அதில் கலந்து கொண்ட பாலச்சந்தரை பெருமைப்பட வைத்த அந்த போட்டோவை ரஜினி உடைத்துப்போட்டார் என்பது தான் அது.

'நினைத்தாலே இனிக்கும்' படத்தில் அனந்துவோடு சண்டை என்பதும் அவர் காதுகளுக்கு வந்து கொண்டு தான் இருந்தது. நினைத்தாலே இனிக்கும் டப்பிங் பேச வர வேண்டியது. வேறு ஒரு ஷுட்டிங்கிலிருந்த அவர் வரவேயில்லை.

ரஜினிகாந்த் பாலச்சந்தரின் பார்வையில் இப்படிப்பட்ட ஆளேயில்லை. அபூர்வராகங்கள் ரிலீசுக்குப்பின் ஒரு நாள் கே.பியை தேடிவருகிறார் ரஜினி. என்ன விஷயம் என்கிறார் கே.பி. "இல்லை..போன வருடம் இதே நாளில் நீங்கள் எனக்கு பெயர் வைத்தீர்கள்..ஆசிர்வாதம் வாங்க வந்தேன்". கேபிக்கு ஆச்சர்யம். வேறு எந்த புதுமுக நடிகனோ, நடிகையோ இப்படி வந்ததில்லை. அப்படி ஒரு நடிகரா இப்படி அடம் பிடிக்கிறார். எரிந்து விழுகிறார். மதுரையில் நடந்த திரிசூலம் விழாவிற்கு போய் விட்டு வரும் போது தகராறு.

ரஜினியின் சகோதரர் நாகேஸ்வரராவை அழைத்து கேட்கிறார் கே.பி. ரஜினியின் மாற்றம் குறித்துகேட்க அவரோ "பெரியண்ணனை கண் முன்னே வரவேண்டாம்" எனச்சொல்வதாக சொல்கிறார். "நீங்கள் அவர் கூடவே எப்போதும் இருங்கள்.." ஆனால் அவர் அன்றிரவே பெங்களூர் போய்விடுகிறார்.

பாலச்சந்தரை தேடி ஸ்ரீப்ரியா வருகிறார். "ரஜினியை காப்பாற்ற உங்களால் மட்டுமே முடியும்" ஸ்ரீப்ரியாவின் அந்த கோரிக்கையில் இருந்த அக்கறை கே.பிக்கு உறைத்தது. தந்தையாக தான் நிற்க வேண்டிய இடம் இது.

ரஜினியை சந்திக்கிறார் கே.பி. கே.பியின் கைகளை பிடித்துக்கொண்டு அழுகிறார் ரஜினி.

"என்னை ஏன் சார் ரஜினிகாந்த் ஆக்கினீர்கள். புகழின் வெளிச்சத்தை என்னால் தாங்கமுடியவில்லை..." ஒரு குழந்தையின் பரிதவிப்பாக ரஜினியிடம் கண்ட கே.பி நிலைமையை ஆராய்கிறார். ஓய்வில்லாத படப்பிடிப்பு. வரும் படங்களையெல்லாம் ஒத்துக்கொள்வது.

ரஜினியை நேரே டாக்டர் ஆர்.எஸ்.ராஜகோபாலிடம் கொண்டு போகிறார் கே.பி. அவர் பார்த்துவிட்டு "ஓய்வில்லாமல் இருப்பதால் பிபி எகிறி இருக்கிறது. ரெஸ்ட் எடுக்க வேண்டும்"

கே.பியே எல்லா இயக்குனர்களையும் அழைத்து கன்வின்ஸ் செய்கிறார். டாக்டர் செரியனிடம் அட்வைஸ் கேட்கப்படுகிறது. ஓய்வுக்குப்பின் கொஞ்சம் நார்மலாகிறது. பின் நின்று போன படங்களை முடித்துக்கொடுக்கிறார் ரஜினி.

கே.பி ரஜினியை வைத்து கொஞ்சம் எடுத்திருந்த 'மனிதனின் மறுபக்கம்' தேதிக்கு வேண்டி காத்திருக்கிறது. வேறொரு படமும் நிற்க பாலச்சந்தர் கலாகேந்திராவிடம் பேசி தன் படத்தை நிறுத்துகிறார். அந்தப்படத்தில் நடிக்கிறார் ரஜினி. அது தான் தர்மயுத்தம்.

மனிதனின் மறுபக்கத்தில் சினிமா இயக்குனராக ரஜினி, கீதாவுடன் நடிக்க இருந்தார். ஒரு பாடலும் படமாக்கப்பட்டிருந்தது. அதோடு படம் நிறுத்தப்பட்டது.

பாலச்சந்தர் அன்று ஒரு அட்வைஸ் செய்தார்.

"இனி நீ ஒரு நேரத்தில் ஒரு படம் மட்டுமே ஒத்துக்கொள்ள வேண்டும்".

இன்று வரை அதை கடைபிடித்ததால் சூப்பர் ஸ்டாராக உயர்ந்து நிற்கிறார். எல்லா மனிதனின் வாழ்விலும் மனிதனின் மறுபக்கம், தர்மயுத்தம் இவையெல்லாம் இருக்கிறது தானே....

 கேபி ரஜினியை வைத்து எடுத்த 'மனிதனின் மறுபக்கம்' அதற்கு எடுத்த ஒரு பாடல் காட்சியை பின்னர் யுத்தகாண்டம் என்ற படத்துக்கு உபயோகித்துக் கொண்டார்களாம்.

'மனிதனின் மறுபக்கம்' படத்தின் தலைப்பை மட்டும்  சத்யஜோதி நிறுவனத்தார் வாங்கி, 'நிறக்கூட்டு' என்ற ஒரு மலையாள த்ரில்லர் படத்தை தமிழில் எடுத்தனர்.  சிவகுமார், ராதா, ஜெயஸ்ரீ நடித்த அந்தப் படத்தை இயக்கியவர் கே. ரெங்கராஜ்.  இளையராஜா இசையில் நான்கு பாடல்களுமே ஹிட்.  அதில் சித்ரா பாடிய வைரமுத்து பாடல் இன்று. 

மனைவியைக் கொன்றதாக குற்றம் சாட்டப்பட்ட சிவகுமாருக்கு மரணதண்டனை விதிக்கிறது நீதிமன்றம்.  தூக்கு தண்டனைக்கு  முதல்நாள்  சிறையிலிருந்து தப்பும் சிவகுமார் உண்மைக் குற்றவாளியைப் பழி வாங்குகிறார்.  மனைவியின் தங்கை ஜெயஸ்ரீக்கும் உண்மையை எடுத்துச் சொல்கிறார்.

சந்தோஷம் இன்று சந்தோஷம்

இந்த பொன்வீணையில் பொங்கும் சங்கீதம்

சந்தோஷம் இன்று சந்தோஷம்

இந்த பொன்வீணையில் பொங்கும் சங்கீதம்

உன் வார்த்தை செந் தேனா

நான் மாட்டேன் என்பேனா

சந்தோஷம் இன்று சந்தோஷம்

இந்த பொன்வீணையில் பொங்கும் சங்கீதம்

மாலை சூடிடும் முன்னே

இவள் காதல் நாயகி

மாலை கூடினால் கண்ணா

இவள் காவல் நாயகி

சுகமா…..ஹா…..ஹா….உறவை மீட்டுவோம்

சுகம் தீராமல் இரவை நீட்டுவோம்

உன்னை ஒரு பூ கேட்கவே

ஓடிவந்தேன் இங்கே

பூந்தோட்டமே சொந்தம் என்றால்

நான் போவது எங்கே

சந்தோஷம் இன்று சந்தோஷம்

இந்த பொன் வீணையில் பொங்கும் சங்கீதம்

உன்னைக் கேட்கவே வந்தேன்

ஒரு ஆசை வாசகம்

நீயோ என்னிடம் கேட்டாய்

ஒரு காதல் யாசகம்

அதை தாளாமல் மனமோ துள்ளுது

இந்த போராட்டம் சுகமாய் உள்ளது

தெய்வம் வந்து என்னை கண்டு

தேதி ஒன்று கேட்கும்

கட்டி வைத்த நெஞ்சுக்குள்ளே

கெட்டிமேளம் கேட்கும்

சந்தோஷம் இன்று சந்தோஷம்

இந்த பொன்வீணையில் பொங்கும் சங்கீதம்

சந்தோஷம் இன்று சந்தோஷம்

இந்த பொன்வீணையில் பொங்கும் சங்கீதம்

உன் வார்த்தை செந் தேனா

நான் மாட்டேன் என்பேனா

சந்தோஷம் இன்று சந்தோஷம்

இந்த பொன்வீணையில் பொங்கும் சங்கீதம் 

===============================================================================================

ஜோக்ஸ்....

"அப்பா..  அவன் மூக்கு வேடிக்கையா இருக்கு பார்.."

"ச்சீ அசடு..  அப்படி சொல்லக்கூடாது..  அவர் மூக்கு என்று சொல்லணும்"