"திங்க"க்கிழமை : பஜியா -- கீதா சாம்பசிவம் ரெஸிப்பி

 

பஜியா

கீதா சாம்பசிவம்

சென்ற வார காராவடையே இன்னமும் போணி ஆகிக் கொண்டிருக்கிறது. ஆனாலும் மிச்ச மாவை எத்தனை நாட்கள் வைப்பது? அதான் அதில் பஜியா போடலாம்னு தீர்மானிச்சுட்டேன்! இந்த பஜியா என்பது வேறே ஒண்ணும் இல்லை. நம்ம தூள் பஜ்ஜி தான். வட மாநிலங்களில் உருளைக்கிழங்கு, வெங்காயம், குடமிளகாய், வெந்தயக்கீரை, பாலக் போன்றவற்றை நறுக்கி பஜ்ஜிக்கு மாவு கரைப்பது போல் காரம், உப்பு, பெருங்காயம் போட்டுக் கடலைமாவைக் கரைத்து அதில் நறுக்கிய இந்தக் காய்களைச் சேர்த்துப் போடுவார்கள். சில சமயங்களில் வெறும் கீரையில் மட்டுமே போடுவதும் உண்டு. ஆனாலும் இந்த உ.கி., வெங்காயம் போட்டுப் பண்ணும் பஜியா நம்மவருக்கு ரொம்பப் பிடிக்கும். இதைக் காலை ஆகாரத்துக்கே அதிகம் பண்ணுவார்கள். சில கடைகளில் நாள் முழுவதுமே கிடைக்கும். காரட்டைத் துருவி அதைக் கடுகு தாளித்துக் கொண்டு மஞ்சள் பொடி, காரப்பொடி, உப்புப் போட்டு லேசாக வதக்கி வைத்துக்கொள்வார்கள். அதில் கொத்துமல்லியை நறுக்கி தாராளமாகத் தூவுவார்கள். வெங்காயமும் பொடியாக நறுக்கித் தனியாக வைத்துக் கொள்வார்கள். இந்த பஜியா குறைந்த பக்ஷம் நூறு கிராமில் இருந்து வாங்கிக்கலாம். பஜியா மேல் காரட், வெங்காயம் தூவித் தருவார்கள்.

காரட், வெங்காயம் எல்லாம் துருவாமல் வெறும் பஜியாவாகவே போடலாம்னு நினைச்சேன். மாவில் முதலில் கருகப்பிலை, கொஞ்சம் போல் உப்பு, (நேற்றைய மாவு இல்லையா) பெருங்காயம், அரைத் தேக்கரண்டி காரப் பொடி போட்டுக் கொத்துமல்லி நறுக்கிப் போட்டு ஒரு சின்ன பச்சை மிளகாயும் போட்டேன். குடமிளகாய் இல்லை என்பதோடு அவருக்குப் பிடிக்காது. பின்னர் உருளைக்கிழங்கு ஒன்றும் வெங்காயம் ஒன்றும் நடுத்தரமானது. சீவல் கட்டையில் சீவி வைத்துக்கொண்டு உருளைக்கிழங்கை மட்டும் நன்கு அலசிப் போட்டு, வெங்காயத்தையும் போட்டேன்.

உ.கி.யை நன்கு அலசிப் போட வேண்டும்.

கலந்த மாவு

மாவை நன்கு கலந்து கொண்டேன். பின்னர் அடுப்பில் எண்ணெயைக் காய வைத்துக் கொண்டு இதை அப்படியே பரவலாகக் காய்ந்த எண்ணெயில் தூவினேன். பின்னர் நன்கு சிவக்க வேக விட்டு எடுத்தேன். என்னிடம் காரட் இருந்தாலும் காரட் எல்லாம் துருவிச் சேர்க்கவில்லை. ரொம்பவே அதிகம் ஆகிவிடும். இது கொஞ்சம் கொஞ்சம் வந்தாலும் போதும்! ஆகவே கலந்த மாவைப் போட்டு முடித்துச் சாப்பிட்டாயிற்று. இனி நாளைக்கெல்லாம் எண்ணெய் வைத்துப் பண்ணப் போவதில்லை என்று சொல்லிவிட்டேன். ஏதேனும் சுண்டல் தான்.

======================================================================================

பழசிலிருந்து....  

இப்படி எல்லாம் ஒரு வழக்கம் இருந்தது என்பது எனக்குத் தெரிந்தது!

கொள்ளை விடுவது என்றால் என்ன என்று தெரியுமா?

முன்குறிப்பு : பதினாலாம் பக்கம் அந்த பைண்டிங் புத்தகத்தில் இல்லை!

******************************************************************

ஏரிக்குப் போனோம். தேளி மீன் கடித்தது!

மதுராந்தகம் ஏரியில் மீன் பிடிப்பதற்காக இறங்கிய இருநூற்று சொச்சம் பெயர்களும் அலறிக்கொண்டு கரை ஏறினார்கள் ஆஸ்பத்திரிக்கு ஓடினார்கள் ஏன்?

விஷ மீனிடம் கடிபட்டவர்களில் ஒருவரான திரு. சிவலிங்கம் சொல்கிறார்.

நான் பிறந்தது பவுஞ்சூர் கடலூர் கிராமத்தில். இ(அ)ப்போது என் வயது 49.

எங்க மதுராந்தகத்திலே அக்கா வீடு இருக்கு. தினம் லாரியிலே சரக்கு ஏற்றிச் சம்பாதிக்கிற கூலியை அங்கே கொடுத்திட்டுச் சாப்பிடறேன்.

இரண்டு வாரத்துக்கு முன்னே மதுராந்தகம் ஏரியிலே தண்ணி வத்திச்சி. உடனே பஞ்சாயத்திலே மீன்பிடிக்கிறதுக்கு ஏலம் விட்டாங்க. ஒரு நாயக்கர் ஏலம் எடுத்து, எண்பது பேர்களை வச்சு பெரிய வலையிலே மீன் பிடிச்சாரு. பத்து நாளைக்கு மேலே வேலை நடந்திச்சு.

நாயக்கர் அன்னிக்கு எங்களுக்குக் கொள்ளை விட்டுட்டார். (ஏலம் எடுக்கிறவங்க பத்து, பதினைஞ்சு நாளைக்கு மீன் பிடிச்சுட்டு, ஒருநாள் எல்லா ஜனங்களுக்கும் விட் டுக் கொடுத்துடுவாங்க. கொள்ளை விடறது.) அதுதான்

ஊரிலிருந்த ஜனங்களுக்குச் சந்தோஷம் தாங்கல்லே. தபதபன்னு தண்ணியில இறங்க ஆரம்பிச்சோம்.

நூற்றுக்கணக்கான பேர் தண்ணியிலே இறங்கினதும் ஏரி ஒரே சேறாப் போச்சு.

சிலபேர் திடீர்னு ஐயோ, அம்மான்னு கரையை நோக்கி ஓடினாங்க. திரும்பிப் பார்த்தேன். எனக்கு ஒண்ணும் புரியல்லே.

திடீர்னு என் காலிலேயும் தேளு கொட்டறமாதிரி இருந்தது. தேளி மீன் கடிச்சிட்டுதுன்னு புரிஞ்சுகிட்டேன். உள்ளங்கால்லே ரத்தம் வந்தது. இரண்டு இடத்திலே முள்ளு குத்தின மாதிரி ஒரே கடுப்பா வலிச்சுதுங்க. எல்லோரும் ஆஸ்பத்திரிக்கு ஓடினாங்க. சிலருக்கு மயக்கம் கூட வந்திடுச்சு.

நான் டாக்டர் கிட்டே காண்பிச்சு ஊசி போட்டுக்கிட் டேன்.

தமிழக அரசு மீன் இலாகா உதவி டைரக்டர் திரு. சீனிவாசனும், செங்கல்பட்டு ஜில்லா மீன் இலாகா உதவி டைரக்டர் திரு. கா. முகமது சுல்தானும் கூறியவை:

செங்கற்பட்டு மாவட்டத்தில் மொத்தம் முப்பத்தேழு மீன் வளர்ப்பு நிலையங்களில் மதுராந்தகம் ஏரி ஒன்று. ஆண்டுக்கு ஒரு முறை ஏரியில் மீன் பிடிக்ககிறது. அனுமதிக்கப்படுகிறது

தேளி மீனை ஆங்கிலத்தில் சாக்கோபிரான்ஸ் ஃபாஸில்ஸ் கூறுவார்கள். கழுத்தி மீன் வகை சேர்ந்தது இது. மூன்றாண்டு உயிருடன் வாழ வல்ல இந்த மீன் பதினைந்து சென்டிமீட்டர் வரை வளரும்

இதன் கழுத்திலிருக்கும் முள் மனிதரின் தேகத்தில் படும்போது வலி உண்டாகும். ஆனால் இது விஷ மீனல்ல.சாப்பிடுவதற்கு இந்த மீன் மிகவும் ருசியாக இருக்கும்.

சமைப்பதற்கு முன் இந்த மீனின் கழுத்துவரை (முள்ளை சேர்த்து) வெட்டி எடுத்துவிடுவார்கள்.

பேட்டி: எம்.எஸ்.ஆர்

இப்படி அமர்க்களப்படுத்திய மீன் எப்படிமிருக்கும் ? பார்க்க 14 'ம் பக்கம்.