எங்கள் Blog: குஷ்பூ

பாடல்களை மட்டும்தான் காப்பியடிக்க வேண்டுமா என்ன? சில காட்சிகள் கூட பிறமொழித் தயாரிப்பாளர்களைக் கவர்ந்து விடும். அமெரிக்கத் திரைப்படமான 'சிங்கிங் இன் தி ரெயின்' படத்தில்தான் மழையில் நனைந்தபடியே பாடும் காட்சி படமாக்கப்பட்டதாம்.

அவ்வளவுதான், அதைத் தொடர்ந்து உலகப் படங்களில் எல்லாம் மழையில் நனைந்தபடி வரும் பாடல் காட்சி பிரபலமானதாம். இந்தியாவிலும் ஹிந்தியில் ஸ்ரீ 420, அப்னாதேஷ் தொடங்கி தமிழிலும் தொடர்ந்தது. மௌனராகம், புன்னகைமன்னன் வழியாக இந்த நனையல் காட்சிகள் உங்கள் நினைவிலும் இருக்கும்.

ஜாக்கி சான் அறிமுகமாகி, பிரபலமான நேரம். சுட்டுக்கொண்டே மறைவிலிருந்து வெளிப்பட்டு பாய்ந்து விழும் காட்சி போலீஸ் ஸ்டோரி என்னும் அவர் படத்தில் இடம்பெற்ற காட்சி. அப்புறம் அது பல தமிழ்ப்படங்களில் இடம்பெற்றது.

இன்றைய பதிவின் விஷயத்துக்கு வருகிறேன். 'குஷ்பூ' என்னும் ஹிந்திப் படத்தில் இடம்பெற்ற இந்தப் பாடல் காட்சி! குல்ஸார் படம். அவர் படங்களின் கதாநாயகர்கள் தோற்றத்திலும் அவரைப் பிரதிபலிப்பது வழக்கம். குல்ஸார்எழுதிய இந்த அருமையான பாடல் இடம்பெறும் காட்சி அமைப்பைப் பார்த்தீர்களா? பாடலையும் ரசியுங்கள். கிஷோர் குரலில், ஆர் டி பர்மன் இசையில் மிக அருமையான பாடல்.

இந்தக் காட்சி பிடித்துப்போன 'காத்திருந்த கண்கள்' படக் குழுவினர் தங்கள் படத்தில் இதே காட்சி அமைப்புடன் ஒரு தத்துவப் பாடலை வைத்து விட்டனர். சீர்காழியின் குரலில் இந்தப் பாடலைக் கேட்கும்போது ஹிந்திப் பாடலின் சாயல்கூட லேசாகத் தெரிகிறதோ என்கிற ஐயம் வருகிறது. விஸ்வநாதன் ராமமூர்த்தியின் இசையில் அந்தப் பாடல்....

14.6.13

வெள்ளிக்கிழமை வீடியோ 130614

காட்சி ஒன்று கானம் நான்கு! 'இவர்' சொல்லிக் கொடுப்பார். 'அவர்' கற்றுக் கொண்டு வேறு இடத்தில் பாடி பரிசு வாங்குவார்.

1) மிலன் திரைப் படத்தில் முகேஷ்-லதா மங்கேஷ்கர். 'சாவன் கா மஹீனா'

2) பிராப்தம் படத்தில் டி எம் எஸ்-சுசீலா. 'சந்தனத்தில் நல்ல வாசமெடுத்து...'

3) ஆனந்தராகம் படத்தில் கே ஜே யேசுதாஸ்-ஜானகி. 'மேகம் கறுக்குது.. மழைவரப் பார்க்குது....' ஒரே மாதிரிக் காட்சியமைப்பு!

4) ரிக்ஷா மாமா படத்தில் எஸ் பி பாலசுப்ரமணியம்-ஜானகி. 'வைகை நதியோரம்...'

5) காட்சி ஒன்று என்ற வரிக்கு இந்தப் பாட்டு ஒத்து வராது. அப்புறம் ஏன் ஐந்தாவதாக இந்தப் பாட்டு? 60 களில் வந்த, ஒன்றாவதாகச் சொல்லப் பட்டிருக்கும் 'மிலன்' படப் பாடலான 'சாவன் கா மஹீனா...' வை வெகு திறமையாக தமிழில் காபி அடித்த பாடல். யாரும் கவனிக்க மாட்டார்கள் என்று நினைத்திருப்பார் தேவா!! குறிப்பாக சரணத்தைக் கேளுங்கள் (கேட்பீர்கள்தானே!) காபியை நன்றாகக் கண்டுபிடிக்கலாம்! [ஜோதிகாவின் டான்ஸ் இதில் ஒரு சுவாரஸ்யம்]