24.10.11
தேதியும் சேதியும்
காலையில் நாட்காட்டியில், நேற்றைய தினத்தாளை, இன்று காலையில் கிழித்தவுடன், கிழிக்கப்பட்டக் காகிதத்தை, ஒவ்வொருவர் மிகவும் விசித்திரமான வகையில் பயன் படுத்துவார்கள்.
என்னுடைய தந்தை, தினமும், கிழிக்கப்பட்ட தேதிக் காகிதத்தில்தான், பல் தேய்க்க கரிப்பொடி + உப்பு கலவையை எடுத்துக் கொள்வார். பல் தேய்க்கும் பொழுது அவர் எழுப்புகின்ற விசித்திர சத்தங்களை இன்றும் என் தம்பி மிமிக்ரி செய்வது உண்டு.
என்னுடைய அண்ணன் (அப்பா மதுரை ஆடிட் சென்ற நாட்களில்) அந்தக் காகிதத்தை விசிறி மடிப்பாக மடித்து, அதில் ஆங்கில எழுத்து W வடிவில் வரும் வகையில் செய்வார். சில சமயங்களில், நான் கேட்டுக் கொண்டதற்காக கப்பல், கத்திக் கப்பல், பறக்கும் கப்பல் - என்று ஏதாவது செய்து கொடுப்பார்.
இப்பொழுதெல்லாம், நான் பெரும்பாலும், கிழிக்கப்பட்டக் காகிதத்தை (அதாவது நேற்றைய தினத்தாளை) ஆதியோடு அந்தமாக இன்றைக்குத்தான் படிப்பேன். அதில் நேற்றைய தினத்திற்குப் போட்டிருந்த ராசி பலன் சரியாக இருந்ததா என்று ஒரு நிமிடம் யோசித்துப் பார்ப்பேன். தொண்ணூறு சதம் சரியாக இருக்காது. ஆனால் நேற்றைய பலன் இன்றைக்கு ஐம்பது சதவிகிதம் சரியாக அமைவது உண்டு! இன்றைய ராசி பலனை - இன்று படிக்க மாட்டேன்! நாளைதான்!
நேற்றைய தினத் தாளை - கிழித்து, இன்று படித்து ஆராய்ச்சி செய்த பொழுது, தினப் பலனை விட, அதில் இருந்த ஒரு வரி அறிவுரை, என்னைப் பெரிதும் கவர்ந்தது!
"ஆனி அடியிடாதே, கூனி குடிபோகாதே." இதற்கு என்ன பொருள் என்று சட்டென்று விளங்கவில்லை. வாசகர்கள் இதன் பொருள் உரைத்தால் (குறும்புத் தனமான விளக்கமாகக் கூட இருக்கலாம்) மிகவும் நன்றி உடையவனவாக இருப்பேன்.
23.10.11
21.10.11
ஆவிகள் உண்டா இல்லையா?
சமீபத்திய 'வாசகரின் ஜீரணம்' (ஹி ஹி - ரீடர்ஸ் டைஜஸ்ட் அக்டோபர் இதழ்) பத்திரிக்கையைப் புரட்டிக்கொண்டிருந்த போது - கிடைத்த தகவல் இது:
ஆவிகள் இருக்கின்றன என்று நம்புகின்றீர்களா? என்ற ஒற்றைக் கேள்வியைக் கேட்டு - உலக நாடுகளில் ஒரு சர்வே செய்திருக்கின்றார்கள். அதில், ஆமாம் - ஆவிகள் இருக்கின்றன - நான் நம்புகிறேன் என்று கூறியவர்கள் விவரம்:
மலேசியா : 57%
அமெரிக்கா (யு எஸ் ): 47%
கனடா : 43%
பிலிப்பைன்ஸ்: 43%
ஆஸ்திரேலியா: 39%
ரஷ்யா: 39%
ஸ்பெயின்: 39%
இந்தியா: 37%
இங்கிலாந்து (யு கே): 37%
சீனா: 31%
மெக்ஸிகோ: 28%
ஜெர்மனி: 24%
நெதர்லாண்ட்ஸ்: 23%
பிரேசில்: 21%
பிரான்ஸ்: 20%
தென் ஆப்ரிக்கா: 17%
வாசகர்கள் தங்கள் கருத்துகளைப் பகிர்ந்துகொண்டால், நாங்க மாயாவுக்கு அந்தத் தகவலைச் சொல்கிறோம். (அல்லது அவரே இங்கு படித்துத் தெரிந்து கொள்ளட்டும்!)
19.10.11
எட்டெட்டு ப 3 :: மாயாவின் கதை
கே வி தொடர்கிறார்:
பாட்டுச் சத்தம் சட்டென்று நின்றவுடன், நான் முழுவதுமாக விழித்துக் கொண்டேன். அந்தப் பழைய மர மேசை மீது ஓர் உருவம் - அதுவும் பெண்ணுருவம் - ஒரு கண்ணாடி டம்ளரில் நீல நிற திரவம் ஊற்றப்படும் பொழுது எப்படி மெது மெதுவே அது டம்ளரின் வடிவத்தைப் பெறுமோ அதே வகையில் யாரோ நீர் வார்ப்பது போல - உருப் பெற்றது. என் கை டார்ச் விளக்கை எடுக்க விரைந்த போது, அந்த உருவம், "வேண்டாம் கே வி. விளக்கு - வெளிச்சம் எல்லாம் என்னைக் காணாமல் செய்துவிடும்." என்றது.
எனக்கு ஆச்சரியமாக இருந்தது. 'என்னுடைய பெயர், இந்த ஆவி உருவில் இருக்கும் பெண்ணுக்கு எப்படித் தெரியும்?' என்று நினைத்துக் கொண்டேன்.
"தெரியும். ஆவியுலகில் இந்த உலகில் உள்ள எல்லா பாசிடிவும் நெகடிவ்; இங்கு உள்ள எல்லா நெகடிவ்களும் ஆவியுலகில் பாசிடிவ்."
'அப்படி என்றால்?' என்று நினைத்துக் கொண்டேன்.
"அப்படி என்றால், இங்கே பகல் - அங்கே இரவு. இங்கே ஸ்தூல சரீரம்; அங்கே சூக்ஷ்ம சரீரம். இங்கே ஒலி; அங்கே எண்ண அலைகள். இங்கே மொழி - அங்கே மௌனம் - இப்படி எல்லாவற்றுக்குமே எதிர் மறை விஷயங்கள்."
"அப்படியானால் ...." என்று பேச ஆரம்பித்த என்னைப் பார்த்துக் காதுகளைப் பொத்திக் கொண்டது அந்த உருவம்.
"தயவு செய்து எதுவும் பேச வேண்டாம். சிறிய ஒலி கூட எனக்கு பெரும் சத்தமாகக் கேட்கும். எனன கேட்க வேண்டும் என்றாலும், மனதினுள் நினைத்தால் போதும்; நான் பதில் சொல்வேன். நீங்க படுத்திருப்பது இரும்புக் கட்டில். அதனுடைய இயற்கையான அதிர்வு அலைகள், உங்கள் எண்ண அலைகளை எனக்குத் துல்லியமாக அறிவிக்கக் கூடியது. இவ்வளவு ஏன்? என் உருவத்தைப் பார்த்தவுடன் நீங்க மனதினுள் நினைத்தது 'இந்தப் பெண் பார்ப்பதற்கு, நான் ப்ளேனில் பயணம் செய்யும்பொழுது பார்த்த விக்ரமாற்குடு தெலுங்குப் படத்தின் கதாநாயகி போல இருக்கின்றாளே!' என்றுதானே?'
'ஆமாம்' என்று நினைத்துக் கொண்டேன்.
"சரி. இனிமேல் நான் மட்டும்தான் பேசுவேன். நான் இன்னும் ஐம்பத்து மூன்று நிமிடங்கள்தான் இங்கு இருக்க அனுமதி இருக்கின்றது. சுப்ரீம் ஆவியிடம் அனுமதி பெற்று வந்துள்ளேன். சரியாக ஒரு மணி ஏழு நிமிடம் ஆகும் பொழுது மறைந்து போய்விடுவேன். எனக்கு ஓர் உதவி நீங்க செய்தே ஆகவேண்டும். அது எனன, ஏன் என்று சொல்லப் போகின்றேன். நான் பேசுவதைக் கேட்டால் போதும். நான் பேசிக் கொண்டிருக்கும் பொழுது - குறுக்கே எந்த எண்ணமும் வேண்டாம். ஏதேனும் சந்தேகம் வரும்பொழுது, வலது கால் விரல்களை அல்லது கைக் கட்டை விரலை அசைத்தால் போதும். புரிகிறதா?"
'புரிகிறது. ஆனால் நான் இங்கே வந்திருப்பது என் ஆபீஸ் பிரச்னையைத் தீர்க்க - அதை விட்டு, கண்ட கண்ட ஆவிகளிடம் கதை கேட்டுக் கொண்டிருந்தால் என் கதி என்னாவது?' என்று நினைத்துக் கொண்டேன்.
"உங்கள் பிரச்னையைத் தீர்க்க எனக்கு வழி தெரியும். கவலை வேண்டாம். உங்கள் பிரச்னையைத் தீர்க்க 'ராமாமிர்தம்' உங்களுக்கு உதவுவார். ராமாமிர்தம் என்ற பெயரை மட்டும் நினைவில் வைத்துக் கொள்ளுங்கள். அது போதும். நாளை உங்கள் அலுவலகத்தில் இந்தப் பெயர் உடைய நபர் பற்றி விசாரியுங்கள். மேற்கொண்டு இதில் எந்தத் தகவலும் கொடுக்க சுப்ரீம் ஆவி இப்பொழுது மானசீகமாகத் தொடர்பு கொண்டபோது, மறுத்துவிட்டது."
'சரி' என்று நினைத்துக் கொண்டேன்.
ஆவி சொன்ன கதை:
என் பெயர் மாயா. தந்தை பெயர் கோவிந்தராஜன். தாயார் நான் பிறந்தவுடனேயே புண்ணியலோகம் நோக்கிப் பயணம் செய்துவிட்டார்கள். ஊர் தஞ்சைக்கு அருகே வல்லம். பிறந்த தேதி 8 - 8- 1970 (சனிக்கிழமை) இரவு 8 மணிக்கு. இறந்தது 8 - 8 - 2006. காலை 8 மணி, எட்டு நிமிடம் ஆகும் பொழுது . .....
(தொடரும்)
18.10.11
பிச்சா[த்து] காசு
சிக்கனம் பற்றிப் பேசுபவர்கள் எல்லோரும் பெரும்பாலும் 'சிறு துளி - பெரு வெள்ளம்' என்ற தலைப்பில் நிறைய பேசக் கூடியவர்கள்.
இங்கே விவரிக்கப்பட்டுள்ள குடும்ப நிகழ்வை ஊன்றிப் படியுங்கள். இங்கே கூறப்பட்டுள்ளது பிசாத்து சமாச்சாரம் என்று தோன்றினாலும் - இது போல பலப்பல பிசாத்து சமாச்சாரங்கள் (சினிமாவுக்குப் போதல் / கடற்கரை - கண்காட்சி - என்று பல) நம் குடும்பங்களில் அன்றாடம் நிகழ்ந்து கொண்டுதான் உள்ளன.
*** *** ***
ராகவன் வழக்கம் போல் பேப்பர் படிப்பதாய் பாவனை செய்து கொண்டு ,'என்னதான் நடக்கும் நடக்கட்டுமே' என்ற மனப்பான்மையுடன் எல்லாமும் கேட்டுக் கொண்டிருந்தும் கேட்காதவன் மாதிரி [அது தான் உங்களுக்கு நன்றாகத் தெரியுமே, நான் வேறு விளக்க வேண்டுமா என்ன !] தடித்துக் கொண்டிருந்தான் [பின்னே வீட்டில் ஒரு வேலையும் செய்யாமல் பேப்பர் மட்டும் படித்துக் கொண்டிருந்தால் தடிக்காமல் ?]
தங்கை வத்சலா காலையிலிருந்து அம்மாவை அரித்துக் கொண்டிருந்ததைக் கேட்டுக் கொண்டிருந்தான். "அம்மா - போன மாதம் நாம எல்லோரும் பீட்சா பார்லர் போய் பீட்சா சாப்பிட்டோமே! அந்த மாதிரி இன்றைக்கும் போகலாம் அம்மா. ப்ளீஸ் அம்மா!" அம்மா என்ன பதில் சொல்கிறாள், 'முடியாது' என்பதற்கு எப்படிப்பட்ட சமாதானங்கள் சொல்ல முயற்சி செய்கிறாள் என்று தெரிந்து கொள்வதில் ஓர் ஆர்வம்.
ராகவனுக்கு ஒரு வகையில் இன்று ஏமாற்றம்தான் காத்திருந்தது. அம்மா, "நாம எல்லோரும் அன்னைக்கி அசோக் பில்லர் கிட்ட ஒரு இடத்துல பீட்சா சாப்பிட்டோமே பில் எவ்வளவு என்று நினைவிருக்கா?" என்று கேட்க, தங்கை, "அறுநூறுக்கும் மேலே" என்றாள். அம்மா, "நீ போய் ராகவனிடம் கேளு. மாட்டேன் என்று சொல்ல மாட்டான். அப்படி அவன் இல்லை என்று சொன்னால் நான் வந்து அவனிடம் எடுத்து சொல்கிறேன்"என்றாள். அதைக் கேட்ட ராகவன், வத்சலா வந்து கேட்டவுடனேயே "சரி" என்று சொல்லி விட்டு மீண்டும் யோசனையில் ஆழ்ந்தான் [அல்லது பேப்பரில் மூழ்கினான்]
நாம் ஒரு மாதம் அல்லது வருடத்தில் எத்தனை முறை இப்படி பி(ட்)சா[த்து] முடிவுகள் எடுக்கிறோம். இத்தகைய முடிவுகளால் வரும் செலவு நாம் நினைப்பது போல் சின்ன செலவாக இல்லாமல் மிகவும் பெரிய தொகையாக வரும் மாதிரி இருக்கிறதே! இன்று அலுவலகம் போனவுடனே, நண்பன் பாலகிருஷ்ணனிடம் இது பற்றிப் பேச வேண்டும் என்று முடிவெடுத்தான். சிக்கனம் என்பது உணவுப் பொருள்களில் கூடாது. 'வைத்தியனுக்குக் கொடுப்பதை வாணியனுக்குக் கொடு என்று வாதாடுவோரும் உள்ளனர். ஆனால், ஜன்க் ஃபுட் (junk food) வகையறாக்களுக்குப் பணத்தை வாரி இறைப்பது வீண் செலவு என்று கூறுவோரும் உள்ளனர்.
உங்கள் அனுபவம் எப்படி ?
17.10.11
படித்ததும் கேட்டதும்...
Dennis MacAlistair Ritchie (September 9, 1941 – October 12, 2011)
டென்னிஸ் மேக் அலிஸ்டர் ரிட்சி இரண்டாம் உலகப் போரின் நடுவே செப்டம்பர் 1941 இல் பிறந்தவர். என்னவோ முகலாய சரிதம் போல ஆரம்பிக்கிறேனே என்று எண்ணாதீர்கள். மெய்யாலுமே அவர் ஒரு கிராண்ட் மொகல் தான் - கணினி உலகைப் பொறுத்தவரை.
கென் தாம்சனுடன் சேர்ந்து அவர் உருவாக்கிய C - என்னும் கணினி மொழி உலகையே மாற்றி அமைத்ததில் முன்னணி இடம் பெறுகிறது. பெரிய சூப்பர் கணினி முதல் கை பேசி வரை இன்று ஒரு சீராக இயங்குகிறது என்றால் காரணம் டென்னிஸின் முயற்சி மட்டுமே.
Steven Paul "Steve" Jobs (February 24, 1955 – October 5, 2011)
ஆப்பிள் ஸ்டீவ் ஜாப்ஸுக்குக் கொடுத்த முக்கியத்துவத்தை டென்னிசுக்கு மீடியா கொடுக்காததன் காரணம் நமக்குப் பிடிபடவில்லை.
அவர் தம் வியாபார வெற்றி இவரது உள்ளுறை மென்பொருளின் முக்கியத்துவத்தை மறைத்து விட்டது என்று தான் சொல்ல வேண்டும்.
கல்லூரி படிப்பைத் தொடராமல் வியாபாரத்துக்கு முதலிடம் கொடுப்பவர்களின் இடையே விஞ்ஞானி குடும்பத்தில் பிறந்து, விஞ்ஞானமும் கணிதமும் படித்து, தந்தையார் வேலை செய்து வந்த பெல் ஆய்வுக் கூடத்திலேயே வேலையில் சேர்ந்து வெற்றிகரமாக டாக்டர் பட்டமும் பெற்று தம் முயற்சிகளை அயராது தொடர்ந்து யூனிக்ஸ் என்கிற பெரிய பெரிய கணினிகளில் காணப்படும் மென்பொருளையும் உருவாக்கிய பெருமை இவரை சேரும்.
சென்ற அக்டோபர் 12 அன்று தம் 70௦ ஆவது வயதில் எப்படி என்று தெரியாமல் காலமானார்.
"I am not now, nor have I ever been, a member of the demigodic party."
"Usenet is a strange place."
"UNIX is very simple, it just needs a genius to understand its simplicity."
"C is quirky, flawed, and an enormous success.
C has "the power of assembly language and the convenience of... assembly language."
==================================================
சுவாரஸ்யக் கண்டுபிடிப்பு.
பழனியிலிருந்து 12 கி. மீ. தொலைவில் உள்ள பொருந்தல் என்ற இடத்தில் நான்கு ஈமக்குழியில் தொல்பொருள் ஆராயச்சித்துறையினர் மேற்கொண்ட ஆராய்ச்சியில் சுவாரஸ்யமான விஷயம் ஒன்று கிடைத்துள்ளது. நான்கு கால்களைக் கொண்ட ஒரு ஜாடியில் நெல்மணிகள் வைக்கப் பட்டிருந்தனவாம். இரண்டு ஈமக்குழியில் கிடைத்த் அந்த நெல்மணிகளை அமெரிக்காவில் உள்ள பீட்டா அனலடிக் ஆய்வுக் கூடத்தில் காலக் கணிப்பு செய்தபோது இந்த நெல்மணிகள் கி மு ஐந்தாம் நூற்றாண்டைச் சேர்ந்தவை என்று தெரியவந்துள்ளதாம். தானாக விளையும் நெல், பயிர் செய்யப் படும் நெல் ஆகிய இரண்டு வகைகளில் இது பயிர் செய்யப் படும் வகையைச் சேர்ந்ததாம்.(பயிரிடப்பட்ட நெல்) நெல்லின் பெயர் ஒரிசா சத்வியா இண்டிகா என்றும் கண்டு பிடிக்கப் பட்டுள்ளதாம்.
ஒரு தமிழ்-பிராமி எழுத்து பொறிப்பு இருந்த பிரிமனை ஒன்றில் இருந்ததாம். அதில் எழுதப் பட்டிருந்தது 'வைய்ரா' என்று அறியப் பட்டதாம். (நெல்லை எடுக்காத வைடா என்று அர்த்தமோ..!!)
=========================================
சனி ஞாயிறுகளில் 'டைம்ஸ் நவ்' ஆங்கிலச் செய்திச் சேனலில் பிற்பகலிலும், இரவிலும் 'டோட்டல் ரீகால் ' என்றும், 'கிரேட்டஸ்ட் ஹிட்ஸ்' என்றும் இரு நிகழ்ச்சிகள் ஒளிபரப்புகிறார்கள். பழைய ஹிந்திப் பாடல்களை பல்வேறு வகைகளில் வகைப்படுத்தி சில பல வரிகளை ஒளி பரப்பி நம் நினைவுகளைக் கிளறுவார்கள்.
நம்மிடம் உள்ள பாடல்கள்தான். நினைத்தால் முழுப் பாட்டையும் கூட உடனே கணினியிலோ ஐ பாடிலோ ஒலிக்க வைத்துக் கேட்க முடியும். ஆனாலும் பிட்டு பிட்டாக அந்த நிகழ்ச்சியில் பல மனம் கவர்ந்த பாடல்களைக் கேட்கும்போதும், அது சம்பந்தப் பட்ட விவரங்களை அதில் சம்பந்தப் பட்டவர்கள் சொல்லும்போதும் சுவாரஸ்யமாக ரசிக்க முடிகிறது.
அதில் பலப்பல பழைய ஹிந்திப் பாடல்களை அலசி ஆராய்ந்து பல்வேறு விவரங்கள் சொல்லும் ஒருவரின் பெயர் கணேஷ் அனந்தராமன். தமிழர். ஹிந்திப் பாடல்கள், இசை அமைப்பாளர்கள், பாடலாசிரியர்கள் என்று இந்தத் துறையில் பி ஹெச். டி வாங்கியிருப்பார் போலும்.
---------------------------------------------
இன்றைய செய்தித் தாளைப் பார்த்தபோது 'கண்ணதாசன் நினைவு நாள்' என்று விளம்பரம் பார்க்க நேர்ந்தது.
24 - 6 - 1927 ------------------ 17 - 10 - 1981
சென்ற முறை தனிப்பதிவே போட்ட நினைவு. இப்போது கவிஞரை நினைவு படுத்த ஒரு பாடல் பகிர்வு.
படங்கள் : நன்றி கூகிள், (ஜோரிகேரளா.காம்), ஆச்சார்யா ஹோம்,
இதற்கு குழுசேர்:
இடுகைகள் (Atom)