"திங்க"க்கிழமை : காஞ்சிபுரம் இட்லி - கீதா சாம்பசிவம் ரெஸிப்பி

காஞ்சிபுரம் இட்லி 

ஊற வைச்ச பொருட்கள் 

அம்பத்தூரில் இருந்த வரைக்கும் காஞ்சிபுரம் இட்லி அடிக்கடி பண்ணுவேன். ரசிகர்கள் நிறைய. அதோடு அந்த மாவு மிஞ்சினால் செய்யும் திப்பிசங்களையும் ரசித்தவர்கள் பலர். இங்கே வந்ததிலிருந்து என்னமோ பண்ணவே இல்லை. இப்போ ஆதி வெங்கட் பண்ணினதை முகநூலில் பகிர்ந்ததைப் பார்த்ததும் எனக்கும் சாப்பிட ஆசை வந்துடுச்சு! ஆகா, ஓடி வந்தேன்.  உடனேயே ஒரு நாள் ஒரு கிண்ணம் பச்சரிசி, ஒரு கிண்ணம் புழுங்கலரிசி, முக்கால் கிண்ணத்துக்கும் கொஞ்சம் குறைச்சு உளுந்து (உளுந்தின் தரத்தைப் பொறுத்து அளவு மாறுபடும்) களைந்து ஊற வைச்சு அரைச்சு எடுத்து உப்புப் போட்டுப் புளிக்க வைச்சேன். 

அரைச்ச மாவு

இதோடு இது முடியாது. அலங்காரம் எல்லாம் செய்யறது பாக்கி இருக்கே. அதுக்குத் தேவையான பொருட்கள்

சுக்கு, மிளகு, ஜீரகம், நெய் ஒரு கரண்டி, கடுகு, உபருப்பு, கபருப்பு, கருகப்பிலை, கொ.மல்லி, தேங்காய்க் கீறல்(விரும்பினால்)

சுக்கு

சுக்கைப் பொடி செய்து மாவின் மேல் போட வேண்டும். பெருங்காயமும் சேர்க்கலாம்.

மிளகு, ஜீரகம். சுக்கோடு மிளகு, ஜீரகம் பொடித்து நெய்யைக் காய்ச்சி மாவில் பொடியைப் போட்டு மேலே நெய்யை ஊற்றினேன். இன்னும் கொஞ்சம் நெய் ஊற்றிக் கடுகு, உபருப்பு, கபருப்பு, தேங்காய் இருந்தால் பல்லுப்பல்லாகக் கீறிப் போடலாம். கருகப்பிலை சேர்த்துத் தாளித்து மாவில் ஊற்றினேன். கலந்த மாவு படம் எடுத்தது தவறுதலாக டெலீட் ஆகி இருக்கு! :( காணோம். கிடைக்கலை!

மிளகு ஜீரகம் பொடித்துப் போட்ட மாவு மட்டும் படம் கிடைச்சிருக்கு. போட்டிருக்கேன். 

நெய்யில் தாளிதம் செய்து மாவில் கொட்டிக்கலந்து மூடி குளிர்சாதனப் பெட்டிக்குள் வைச்சேன். சாயந்திரம் தான் பண்ணணும்.

கடுகு, உபருப்பு, கபருப்பு, கருகப்பிலை நெய்யில் வதக்கி  இதைப் பக்கத்தில் தெரியும் பாத்திரத்தில் உள்ள மாவில் கொட்டிக்கலந்தேன். அந்தப் படம் தான் கிடைக்கலை! படத்தைத் தவறுதலாக ஆல்பத்தில் இருந்தே நீக்கி இருக்கேன். ஆகையால் அப்லோட் செய்யவும் முடியலை! எல்லாப் படங்களையும் சேர்த்தால் பெரிசா இருக்குனு கூகிள் மிரட்டல் வேறே தாங்கலை. எல்லோரும் எப்படி நிறையப் படங்கள் போடறாங்கனு ஒண்ணுமே புரியலை! என்னை என்ன இ.வா. னு கூகிள் நினைக்குதோ?

ஆனால் அன்னிக்குச் சாயங்காலமாக் காஞ்சிபுரம் இட்லி பண்ண முடியலை. அன்னிக்கு மாசப் பிறப்பாய்ப் போய் விட்டதாலே தொட்டுக்க வெங்காய கொத்சு பண்ண முடியாத்!  ஆகவே அந்த மாவிலிருந்து கொஞ்சம் எடுத்துக் கொண்டு அதோடு சில, பல திப்பிசங்கள் செய்து அடை தோசையாக்கி அன்றையப் பொழுதை ஒப்பேற்றியாச்சு. மறு நாள் தான் வெங்காய கொத்சோடு காஞ்சிபுரம் இட்லி பண்ணினேன். அப்படியும் மாவு மிச்சம். அதை என்ன செய்தேன் என்பது சஸ்பென்ஸ்!

காஞ்சிபுரம் இட்லிக்குத் தொட்டுக்கச் சட்னி, சாம்பார்னு பண்ணினாலும் நான் பண்ணினது வெங்காய கொத்சு தான். பருப்புப் போடாமல் பண்ண நினைச்சா, நம்ம ரங்க்ஸ் பருப்புக் கொஞ்சமாப் போடுனு சொல்லிட்டார்!  அரை மனசாப் பருப்புப் போட்டேன். வெந்த பருப்பு, புளி கரைத்து வைத்திருப்பது, கொத்சுக்கு வறுத்து வைத்திருப்பது எல்லாம் படத்தில். நான் ஒரே ஒரு மி.வத்தல் தான் போட்டேன். வறுத்து வைத்திருப்பதில் இரண்டு தெரிந்தாலும் இன்னொன்றைத் தாளிதத்தில் சேர்த்தேன். ஏன்னா இங்கே மி.வத்தல் ரொம்பக் காரம். உங்க தேவைக்கு ஏற்றாற்போல் போட்டுக்கலாம். 

சின்ன வெங்காயம் 

நறுக்கி வைச்சது. கீழே அதைத் தாளிதத்தோடு சேர்த்து வதக்கிய படம்.  நல்லெண்ணெய் அல்லது சமையல் எண்ணெயில் கடுகு, உபருப்பு, கபருப்பு வகைக்கு ஒரு டீஸ்பூன், ஒரு ப.மி. ஒரு சி.மி. மஞ்சள் பொடி சேர்த்துக் கருகப்பிலை, பெருங்காயம் போட்டு வெங்காயத்தைப் போட்டு வதக்கினேன். புளியைக் கரைத்துப் பருப்பு வேக விட்டு வைத்திருக்கும் பாத்திரத்தில் விட்டு, வதக்கிய வெங்காயத்தையும் சேர்த்து உப்புப் போட்டுக் கொதிக்க விட்டேன். இறக்கும் முன்னர் மிக்சியில் அரைத்து வைத்திருக்கும் பொடியில் தேவையானதைப் போட்டுக் கலந்து கொத்துமல்லி நறுக்கிச் சேர்த்தேன். கொத்சு ரெடி.

பொதுவாகவே இட்லியை வேக வைக்கையில் பாத்திரத்தில் தண்ணீர் கொதிக்கணும். காஞ்சிபுரம் இட்லிக்கு நல்லாவே கொதிக்கணும். நான் துணி போட்டுத் தான் இட்லி வார்ப்பேன். காஞ்சிபுரம் இட்லியைக் குடலைகளில் வேக வைப்பாங்க. நம்மிடம் அதெல்லாம் இல்லை. ஒரு சிலர் தம்பளர்களில் வேக வைக்கிறாங்க! தம்பளரில் சுற்றி மூடி இருப்பதால் அது எப்படி வேகுமோனு எனக்கு சந்தேகம். துணி போட்டு வார்த்தால் இட்லித் தட்டின் அடியிலும் ஓட்டைகள் இருப்பதால் நீர் சுட்டு நீராவியாகி அடிப்பாகமும் நன்கு வேகும். மேலேயும் வேகும். இது என்னோட கருத்து மட்டுமே! ஆகவே துணி போட்டே வேக வைச்சேன். இது மூன்று தட்டு உள்ள கொப்பரை. ஆனால் எங்க ரெண்டு பேருக்கு இரண்டு தட்டே ஜாஸ்தி! ஆகையால் இரண்டு தட்டுக்களில் இட்லி வார்த்தேன். மிச்சம் இட்லியை மறு நாள் சாப்பிட்டாச்சு! :)

வெந்து எடுத்த இட்லிகள்