புதன் 181128 ஆஹா ஜாலி ஜாலி!

சென்ற வாரக் கேள்விகளைக் கண்டுபிடித்து, பதில்களை அழகாகப் பதிந்த 

திண்டுக்கல் தனபாலன் 

துரை செல்வராஜூ 

பானுமதி வெங்கடேஸ்வரன் 

ஆகியோருக்கு நன்றி. 

மேலும் அன்பு, காதல், பாசம், நேசம் பற்றிய எங்கள் பதில் குறித்து அலசி ஆராய்ந்து எழுதிய 

கீதா சாம்பசிவம்

ஏகாந்தன் 

திண்டுக்கல் தனபாலன்  

நெல்லைத் தமிழன் 

கில்லர்ஜி 

கீதா ரெங்கன் 

பானுமதி வெங்கடேஸ்வரன்  

ரேவதி நரசிம்ஹன் 

 ஆகியோருக்கு, 

எங்கள் சார்பிலும், மற்ற வாசகர்கள் சார்பிலும் நன்றி!

பானுமதி வெங்கடேஸ்வரன்  : 

"எனக்கு கடவுள் நம்பிக்கை கிடையாது,அதனால் நீயும் கடவுளை கும்பிடக்கூடாது" என்று மனைவியை வற்புறுத்தினால் உறவினர்கள் கோபிக்கிறார்கள். நம் கொள்கையை மற்றவர் மீது திணிக்க வேண்டாம் என்று பெருந்தன்மையாக நடந்து கொண்டால் சமுதாயம் கேலி செய்கிறது. பாவம் இந்த நாத்தீகர்கள் என்ன செய்வார்கள்?  

ப 1 : //"பாவம் இந்த நாத்தீகர்கள் என்ன செய்வார்கள்? "//

ஹி ஹி நமது மாண்புமிகு நாத்திக நண்பர்களுக்கு பாவம், புண்ணியம் என்று எதுவும் கிடையாது ஆகையால், கவலைப்பட ஏதும் இல்லை. 

ப 2: ஆத்திகத்தைப் பரப்புவது தவறல்ல ஆனால் நாத்திகம் பரப்புவது சரியில்லை எனத் தோன்றக் காரணம் ஆ.க்கள் மெஜாரிட்டி என்பதால்தான். 

நாத்திகர்கள் சும்மா இருந்தால் கேலிக்கு ஆளாகிறார்கள் என்பது சரியல்லவே !

உடையுடுத்துவதிலும், தலை அலங்காரத்திலும் ஒரு சமயம் ஒன்று பிரபலமாக இருக்கிறது, பின்னர் வேறு ஒன்று அந்த இடத்திற்கு வருகிறது. இந்த fashion எனப்படும் விஷயம் எங்கே எப்படி துவங்குகிறது? எப்படிபரவுகிறது? 

ப 1: Fashion துவங்குமிடம் என்பது கொஞ்சம் விசித்திரமானதுதான்! எங்கோ ஒரு நகரத்தில், தவறாகத் தைத்துவிட்ட ஒரு தையல்காரர்கூட காரணமாக அமையலாம்! கடந்த சில மாதங்களாக சிறுமிகள் முதல் பெருமிகள் வரை சில பெண்கள் அணியும் மேல்சட்டை (இரண்டு) தோள்பட்டைப் பகுதியிலும் பெரிய கிழிசலுடன் காணப்படுகிறது. சிறுமிகளை மன்னித்துவிடலாம்! ஆனால் இந்தப் பெருமிகளை என்ன சொல்வது! யாரோ ஒரு பெண் ஒருபக்கம் கிழிந்துபோன ரவிக்கையை, மறுபுறமும் கிழித்துவிட்டுக்கொண்டு, இந்த நாகரீகத்தை ஆரம்பித்திருப்பாரோ என்று சந்தேகம். 

இன்று என் வீட்டிற்கு கேபிள் கனெக்ஷன் அமைக்க வந்த மெக்கானிக் குனிந்து வேலை செய்த போதெல்லாம் அவருடைய லோஹிப் பாண்ட் சென்சார் காட்சிகளை மௌன அரங்கேற்றம் செய்துகொண்டிருந்தது. ஆண்களுக்குப் போட்டியாக பெண்களும் அந்த வகை லோஹிப் ஜீன்ஸ் போடுகிறார்கள். சில வருடங்களுக்கு முன்பு, பக்கத்தில் உள்ள அபார்ட்மெண்ட் ஒன்றில் அத்தகைய ஜீன்ஸ் அணிந்து உடல்பயிற்சியில் ஈடுபட்டிருந்த ஒரு பெண்ணை, ரஜினி பார்த்திருந்தால், "கடவுளே, கடவுளே, கடவுளே ...." என்று அரற்றியபடி ஓடிப் போயிருப்பார்!

ப 2 : தொடர்ந்திருக்கும் பலவும் சலித்துப் போகிறது. 

கவனத்தை ஈர்க்க இயல்பாக ஒரு துடிப்பு இளவயதினருக்கு இருக்கிறது. 

அட்டென்ஷன் gathering வெறிமுற்றிய இளைஞர் மற்றும் பிரபலங்கள்தான் ஃபாஷன் ட்ரெண்டுகளுக்கு ஆதிகாரணம்.

நெல்லைத் தமிழன் :

 "எனக்கு கடவுள் நம்பிக்கை உண்டு. பாரம்பர்ய வழக்கங்களில் நம்பிக்கை உண்டு. நீங்கள் அதனைக் குறை சொல்லுவதை பெருந்தன்மையாக அனுமதிக்கறேன். ஆனால் உங்கள் கருத்து தவறு. வீட்டில் உங்கள் கருத்துக்கு மாறாகத்தான் நடக்கும். என் குழந்தைகளையும் அப்படித்தான் வளர்ப்பேன்" என்று வீட்டிலும் வெளியிலும் தைரியமாக நடந்துகொள்ளும் இந்த ஆத்திக திருமதிகளைப் பற்றி உங்கள் கருத்து என்ன? 

ப 1: அதான் நீங்களே சொல்லிட்டீங்களே! தைரியமான திருமதிகள்! 

ப2: ஆத்திகத் திருமதிகளின் கொள்கைப் பிடிப்பு பாராட்டுக்குரியதுதான்.

================================

உங்களுக்குப் பொழுது போவதற்காக , 

இங்கே செவ்வாய்க்கிழமை இரவு தினமலரின் ஒருவரிச் செய்திகளும் அதற்கு எங்கள் கு ம கமெண்டுகளும்! 

காதலி கொலை: காதலன் கைது


காதலிதானே கொலை செய்தார்? காதலனை ஏன் கைது செய்கிறீர்கள்? ஒருவேளை - காதலி யாரையோ கொலை செய்ததால், 
அவளுடைய போலீஸ் காதலன் அவளைக் கைது செய்ய வேண்டிய நிர்ப்பந்தமோ! ( ஆஹா ! நம்ம ஏரியா கதைக் கருவாக கொடுக்கமுடியும் போலிருக்கே!) 

நாகையில் நாளை முதல்வர் ஆய்வு 

  

பாதிக்கப்பட்ட மக்களுக்கு உதவிகள் பாஸ் ஆனால் சரி. 

ரூ.10 ஆயிரம் லஞ்சம் வாங்கிய விஏஓ கைது

அவரும் புயலால் பாதிக்கப்பட்டிருப்பாரோ? 

வேதாரண்யத்தில் பள்ளிகளுக்கு விடுமுறை

ஹூம்! நம்ம ஊருக்கு புயல் மழை எல்லாம் வரமாட்டேங்குதே! என்று மற்ற மாவட்ட மாணவர்கள் ஏக்கம்! 

போலி நகையை வைத்து மோசடி: 2 பேர் கைது

இரண்டு பேர்? ஒருவரை ஒருவர் மோசடி செய்தார்களோ! 

மீண்டும் பழைய ரூபாய் நோட்டுகள் சிக்கின

மீண்டும்? ஓஹோ, அதாவது ஒருமுறை சிக்கி, ஊர்வலம் வந்தபின், மீண்டும் சிக்கினவா! 

அறிக்கை: மத்திய குழுவுக்கு உத்தரவு

யாருங்க அந்த Mr அறிக்கை மத்திய குழுவுக்கு உத்தரவு போட!

புயல் பாதிப்பு: சிறப்பு நிதி ஒதுக்கீடு

நிதியில என்னங்க சிறப்பு நிதி! 

=====================================================

ஹய்யா! இந்த வாரம் ரொம்பப் பேருங்க கேள்வி கேட்காததால், ஜாலி! ஜாலி! நாங்களும் ஒன்றும் கேட்கப்போவதில்லை! என்ஜாய் மாடி! 

அடுத்த வாரம் கேள்விகள் ஏதாவது கேட்கப்பட்டால் பார்ப்போம்! 

===========================================