புதன் 191127 :: குடும்பத்தை நல்லபடி நடத்தத் தெரிந்தவர்கள் ஆண்களா? பெண்களா?

சென்ற வார புதன் பதிவில், பெருமளவில் பங்கேற்று, கருத்துகளைப் பதிந்த எல்லோருக்கும் எங்கள் நன்றி. கலந்துரையாடல், கருத்துரையாடல் எல்லாமே எங்களுக்குப் பிடிக்கும். தொடர்ந்து ஆதரவு கொடுக்கும்படிக் கேட்டுக்கொள்கிறோம். 

கேள்வி கேட்டவர்களுக்கு எங்கள் நன்றி. 

அதிரா : 

1. கொன்றால் பாவம் தின்றால் போச்சு.. என்பதன் சரியான அர்த்தம் என்ன?

# கொன்றால் பாபம். ஐயமில்லை.

தின்றால் போயிற்று. உணவுக்காகக் கொல்வதும் இரையைத் தின்பதும் இயற்கையின் நியதி.

எனவே உணவுக்காகக் கொல்வது பாபமில்லை. 

ஆனால் ருசிக்காகக் கொல்வது ? சிந்திக்க வேண்டிய கேள்வி.

(இயற்கையில் violence இருக்கும் violation இருக்காது)

& 

இதற்கு கிருபானந்த வாரியார் தனது சொற்பொழிவு ஒன்றில் கூறியதை பார்ப்போம்,

உயிர்களைக் கொன்ற பாவிகளை அவர்களின் இறப்பிற்குப் பிறகு எம தூதர்கள், நரகத்திற்குக் கொண்டு போய் கிடத்துவார்கள். அங்கு அந்தப் பாவிகளின் மாமிசத்தை அறுத்து, அவர்கள் வாயில் ஊட்டி, மாமிசத்தை உண்டவனே! உன் மாமிசத்தை நீயே சாப்பிடு’ என்று சாப்பிட வைப்பார்கள். உயிர்களை வதைத்துத் தின்ற பாவமானது, தன் சதைகளை தின்றால்தான் தீரும். இதுதான் அந்தப் பழமொழியின் உட்பொருள். அதனால் தான் கொன்றால் பாவம் தின்றால் போகும் என்று கூறி வைத்தார்கள்.

2.குடும்பத்தை நல்லபடி நடத்தத் தெரிந்தவர்கள் ஆண்களா? பெண்களா?

# குடும்பத்தை நடத்துவது பெண்கள் மட்டுமே. ஆண்கள் இப்போதுதான் அந்தப் பக்கம் திரும்பிப் பார்க்கிறார்கள்.

& இதிலென்ன சந்தேகம்? நிச்சயம் பெண்கள்தான். 

தற்காத்துத் தற்கொண்டாற் பேணித் தகைசான்ற
சொற்காத்துச் சோர்விலாள் பெண்
(அதிகாரம்:வாழ்க்கைத்துணை நலம் குறள் எண்:56)

பொழிப்பு (மு வரதராசன்): கற்புநெறியில் தன்னையும் காத்துக்கொண்டு, தன் கணவனையும் காப்பாற்றி, தகுதியமைந்த புகழையும் காத்து, உறுதி தளராமல் வாழ்கின்றவளே பெண்.

      

3.தன் பிள்ளையைக் எங்காவது கூட்டிச் செல்லும்போது, கண்ணின் மணிபோலவும், அடுத்தவர்[நண்பர்கள்] பிள்ளையைக் கூட்டிச் செல்லும்போது ஏனோதானே எனப் பொறுப்பில்லாமலும் பலர் இக்காலத்தில் இருக்கிறார்கள், அவர்கள் பற்றி என்ன நினைக்கிறீங்க?

# இது பொதுவாகக் காணப்படாத பாங்கு. எனவே இப்படி இருப்பதை ஒரு பிறழ்வு அல்லது முரண் என்று தான் பார்க்க வேண்டும்.

& எனக்கு அப்படித் தோன்றவில்லை. அப்படி யாரும் உள்நோக்கோடு செயல்படுவார்கள் என்று நான் நினைக்கவில்லை. மேலும் நம் குழந்தைகள் எப்படி நடந்துகொள்வார்கள், அவர்களுக்குப் பிடித்தது என்ன, பிடிக்காதது என்ன என்பதெல்லாம் நமக்குத் தெரியும். மற்றவர்களின் குழந்தைகள் என்றால் அந்த விவாரங்கள் தெரியாததால் தடுமாற்றம் ஏற்பட வாய்ப்பு உண்டு. 

4.கண்ணன் என்றாலே பெண்கள் கூட்டத்துள் இருப்பவர் எனும் கருத்து ஏன் வந்தது?..

# கோபியருடன் கண்ணன் எனும் சித்திரம் மனதில் ஆழமாகப் பதிந்திருப்பதும் ஜயதேலர் அஷ்டபதியின் தாக்கமும்தான் காரணம்.

& எனக்கு கண்ணன் என்றால் பகவத் கீதை ஞாபகம் மட்டும்தான் வருகிறது.  

5. பல ஆண்களுக்குப் பாசத்தை வெளிக்காட்டத் தெரியாது எனப் பொதுவான கருத்து நிலவுதே அது உண்மையோ?:) இல்ல தப்புவதற்காகச் சொல்லப்படும் சாட்டோ?:).

# பாசத்தை வெளிப்படையாகக் காண்பிப்பது மட்டுமல்ல நெகிழ்ச்சியும்கூட  "ஆண்மை"யல்ல  என ஒரு மனோபாவம் பரவலாக உண்டு.

& பாசத்தை வெளியே வெளிப்படையாகக் காட்ட, எல்லோரும் பாசமலர் சிவாஜியாக ஆகிவிட்டால், எங்கு பார்த்தாலும் ஆண்கள் தாடியுடன், கிழிந்த கோட்டுடன் அலைந்துகொண்டிருக்க வேண்டியதுதான்! பார்க்க சகிக்காது! 

6. எப்படியும் வாழலாம்.. பொழுதைக் கழிச்சால் சரி, எனும் மனநிலையோடு இருப்போர் எப்படிப் பட்டவர்கள்?

 # உல்லாசிகள்.

& அப்படியும் சிலர். ஆனால் அது சரியா அல்லது தவறா என்று யாரும் சொல்ல முடியாது. 

ஏஞ்சல் : 

1,குழந்தையை தூளியிலோ அல்லது கால்களிலோ தோளிலோ போட்டு ஆராரோ பாடி கஷ்டப்பட்டு தூங்க வைப்போம் ..அப்பாடான்னு அரை டு ஒரு மணிநேர போராட்டத்தின் பின் பெருமூச்சு விடும்போது கண்ணை சிமிட்டி சிரிக்கும் நண்டு சிண்டுகளின் ஏமாற்று வேலைகளை ரசித்ததுண்டா ?அனுபவித்திருக்கிறீர்களா ?

# நிறைய.

& நான் தூங்க வைக்கும்பொழுது, கர்ண கடூர குரலில் தாலாட்டு பாடுவேன் என்பதால், முழித்துக் கொண்டிருக்கும் குழந்தை கூட, தப்பித்துக்கொள்வதற்காக, தூங்குவது போல ஆக்ட் பண்ணும். 

2, டெய்லி காலை 8 மணி வேலைக்கு அலாரம் வச்சி எழும்பறோம் ஆனா அலார்ம் வைக்காத நாளிலும் அதே டைமுக்கு முழிப்பு வருதே ! அந்த அனுபவங்கள் எல்லாருக்கும் இருக்கா ?

# பயோ கடிகாரம் அலாரம் அடிக்கிறது. சித்திரம் போல் நித்திரையும் ஒரு மனப்பழக்கம்.

& பள்ளி, கல்லூரி நாட்களிலும் சரி, அலுவலகத்தில் வேலை பார்த்த நாட்களிலும் சரி, அலாரம் வைத்து எழுந்த பழக்கம் இல்லை. பள்ளி நாட்களில், காலை ஆறுமணி சுமாருக்கு அக்கா எழுப்பி விட்டுவிடுவார். எழுந்திருக்கவில்லை என்றால், முகத்தில் தண்ணீர் தெளிப்பார். 
கல்லூரி நாட்களில் காலை ஐந்தே முக்கால் ஆகின்ற சமயத்தில் எழுந்துவிடுவேன். இல்லை என்றால் அம்மா எழுப்பிவிடுவார்கள். 
அலுவலக நாட்களில் காலை ஏழரைக்கே தொழிற்சாலையில் இருந்தாகவேண்டும். காண்டீனில் காலை டிபன் சாப்பிடவேண்டும் என்றால், அதற்கும் முன்பே தொழிற்சாலையில் இருக்கவேண்டும். சென்ட்ரல் ஸ்டேஷனில் கும்மிடிப்பூண்டி லோகல் வண்டி ஆறு முப்பத்தைந்துக்கு (என்று ஞாபகம்) அதைப் பிடிக்க புரசவாக்கத்திலிருந்து ஐந்தே முக்கால் மணிக்கே கிளம்பிவிடுவேன். ஐந்து மணிக்கு எழுந்தால்தான் இது சாத்தியம். அப்போ ஆரம்பித்த பழக்கம் எல்லா நாட்களிலும் ஐந்து மணிக்கு எழுந்துவிடுவேன். சில நாட்களில் தூங்கினேன் என்றால், பெரிய அண்ணன் ஒரு கிள்ளு கிள்ளி எழுப்பிவிட்டுவிடுவார். 

கல்யாணம் ஆன பின்பு, ஐந்து மணிக்கு நான் எழுந்திருக்காவிடில், மனைவி என்னை எழுப்பியதில்லை. 'பாவம் தூங்கட்டும் - ஒருநாள் ஆபீஸ் போகாவிட்டால் லீவு போட்டுக்கொள்ளலாம் ' என்று சொல்லி பேசாமல் விட்டுவிடுவார். பல நாட்கள் நான் முன்பே எழுந்திருந்து, மனைவியை எழுப்பி, டிபன் காபி தயார் செய்யச் சொன்னதும் உண்டு. 

(இப்போ எல்லாம் காலை நாலு மணிக்கே எழுந்து விடுகிறேன்!) 

3, ஒருவர் நல்லது செய்யும்போது எதையும் ஆராயாமல் பாராட்டி  ஏற்கும் உலகம் அதே அவர்  ஒரு தவறு சின்னதா செஞ்சாலும் உடனே அவரின்  ஹிஸ்டரி ஜியோகிராஃபி anthropology என கிளறுவதேன் ?

# நல்லதைப் பாராட்டுவதை ஏற்பவர் அல்லாததை மறுப்பதையும் ஏற்பது அழகு. இங்கு ஏற்பது இகழ்ச்சி அல்ல நேர்மையான விமர்சனம்.

& அதானே இது ரொம்ப அநியாயமுங்க. இதனால்தான், நான் நல்லதும் செய்வதில்லை, கெடுதலும் செய்வதில்லை! 

பானுமதி வெங்கடேஸ்வரன்: 

என்ன இப்படி இருக்கிறார்கள்? என்று இந்தக்ககால இளைஞர்களைப்பார்த்து நீங்கள் சந்தோஷப்படும்,வருத்தப்படும் விஷயங்கள் எவையெவை?

 

# கொஞ்சம் விழிப்புணர்வு இருக்கும் குடும்பங்களில் உள்ள இளைய தலைமுறையினர் படிப்பில் சாதிக்கிறார்கள்.  வாழ்க்கையில் நல்ல குறிக்கோளுடன் இருக்கிறார்கள். பந்த பாசம் நன்றாக இருக்கிறது.

இதெல்லாம் பிளஸ்.

மாற்றம் என்பதால் மட்டுமே தலைமுடியை கோரம் செய்து கொள்வது, பேசும் மொழியில் அழுத்தம் என்ற பெயரில் ஆபாசம், அதீத பணச் செலவில் ஆடம்பரத்தில் நாட்டம், அடுத்தவரிடம் இருப்பதெல்லாம் தனக்கும் வேண்டும் என்ற பேராசை, பெண்கள் / பையன்கள் பால் நெருடல் விளையும் அளவுக்கு அன்யோன்யம், வயசுக்கு மதிப்பு தராமல் கண்ணியம் மீறிய பேச்சு.

இதெல்லாம் மைனஸ்.

இந்த வருடம் சங்கீத கலாநிதி விருது வாங்கும் செளம்யா குறித்து நாலு வார்த்தைகள் என்ன, அதற்கு மேலும் கூறுங்களேன்.

# சௌம்யா விருதுக்கு முற்றிலும் தகுதி படைத்தவர். அடக்கம் இன்முகம் அபார வித்வத் அவர் சொத்து. 

சம்பிரதாயமான அதே சமயம் மனதைத் தொடக் கூடிய சுஸ்வரமான இசை அவரது தனிச்சிறப்பு.

போக்குவரத்து நெரிசலில் டூ வீலரில் மனைவி மற்றும் இரண்டு குழந்தைகளை வைத்துக்கொண்டு யாருமே ஹெல்மெட் போட்டுக்கொள்ளாமல் வேகமாக பயணிக்கிறார்களே.. இந்த தைரியம் எப்படி வருகிறது?

# "அதெல்லாம் நமக்கு நடக்காது" என்ற அசட்டு தைரியம் சராசரி மனித இயல்பு.

       

=================================================

காடராக்ட் அறுவை முடிவுப் பகுதி. 

அறுவை சிகிச்சை முடிந்த மறுநாள், தயக்கத்துடன் இடது கண் பார்வை எப்படி இருக்கிறது என்று இருட்டு அறையில் இருந்தவண்ணம் நோட்டமிட்டேன். 

இடது கண்ணுக்கு நேரே சிலந்திக்கூடு, ஒட்டடை, பிகாசோ ஓவியம் எல்லாம் டிஸ்கோ டான்ஸ் ஆடின. 

ஒருவேளை மருத்துவர் அறுவை சிகிச்சை எதுவும் செய்யாமல், சும்மா eye wash செய்து அனுப்பிவிட்டாரோ என்று கூட சிறிய சந்தேகம். 

தொடர்ந்து இரண்டு மூன்று நாட்களுக்கு, இதே நிலைமைதான். அப்புறம் கொஞ்சம் கொஞ்சமாக ஒட்டடை குறைந்தது. 

ஒரு வாரம் கழித்து மீள்பார்வைக்குப் போனபோது, பயாஸ்கோப் வைத்துப் பார்த்த கண் மருத்துவர், " எல்லாம் சரியாக இருக்கு. இனிமே ஆப்பரேஷன் செய்துவிடலாம்" என்றார். 

திடுக்கிட்டு, பயந்து, திகைப்பூண்டை மிதித்து அவரைப் பார்த்து மலங்க மலங்க விழித்தேன். 

" இன்னொரு கண்ணுக்கு இன்னும் மூன்றே  நாட்களில் ஆப்பரேஷன் செய்துவிடலாம்" என்றார். 

" ஏன் டாக்டர்? அந்தக் கண்ணுல பார்வை சரியாத்தானே இருக்கு?" என்று கேட்டேன். 

" இல்லை, இல்லை - அந்தக் கண்ணுல மைனஸ் பாயிண்ட் ஃபைவ். " என்றார். 

எனக்கு வந்த கோபத்துக்கு அவரைப் பார்த்து நெற்றிக்கண்ணைத் திறந்திருப்பேன். அப்போ அவர், 'நெற்றிக்கண்ணுக்கும்  ஆப்பரேஷன் செய்கிறேன்' என்று கிளம்பிவிடுவாரோ என்ற பயத்தில் சும்மா இருந்தேன். 

இன்று வரை, ஆப்பரேஷன் செய்யப்பட்ட இடது கண்ணை விட ஆப்பரேஷன் செய்யப்படாத வலது கண் பார்வை கூர்மையாகத்தான் உள்ளது. 

ஓய்வு காலம் முடிந்து வந்த பிறகு, பக்கத்து ஃப்ளாட் நண்பர் கேட்டார் - " சிகிச்சைக்கு முன்பு இருந்த பார்வை நிலைக்கும், சிகிச்சைக்குப் பின் இப்போ இருக்கும் பார்வை நிலைக்கும் வித்தியாசத்தை எப்படிக் கண்டுபிடிப்பீர்கள்?"

" அதுக்கு நான் ஒரு சூப்பர் ஐடியா செய்துள்ளேன் சார்!"

" என்ன அது?"

" ஆப்பரேஷனுக்கு முன்பு, என் மொபைலில், இடது கண்ணால் பார்த்து, இடது கண்ணுக்கு நேரே லென்ஸ் பிடித்து சில ஃபோட்டோக்கள் எடுத்து சேமித்து வைத்திருக்கிறேன். அதை இப்போது பார்த்தேன் என்றால், சரியாக எந்த அளவுக்கு பார்வை தெளிவடைந்திருக்கு என்று தெரிந்துகொள்வேன் " என்றேன். 

சரிதானே? 

===========================
கும்மி அடிப்போருக்கு, ஒரு பிடி அவல் : 

1) 

 2) 

3) 

(எதை என்று தெரியவில்லை. ஏதோ ஒரு  கோவிலில் எப்பவோ கொடுக்கப்பட்ட விபூதியை மடித்து வைத்திருந்த பேப்பரில் இருந்த வாசகம் !)

===================================================

மீண்டும் அடுத்த வாரம் சந்திப்போம்!

===================================================