வெள்ளி வீடியோ : தேனில் செய்த தேகம் தாங்குமோ தென்றல் வந்து தீண்டினால்

நண்பர்கள் அனைவருக்கும் கிறிஸ்துமஸ் வாழ்த்துகள்.

==============================================================================================

 காமத்துக்கும் காதலுக்கும் என்ன வித்தியாசம்?  காதலில் காமம் இருக்கும்.  காமத்தில் காதல் இருக்க வாய்ப்பில்லை.  வந்த வேகத்தில் மறையும் காமம்.  பிரிந்து நின்றாலும் மறையாது காதல்.  பலபேரிடம் வரும் காமம்.  ஒரே ஆளிடம் வரும் காதல்.  

அலைகள் ஓய்வதில்லை ஆகட்டும், இந்தப் படம் ஆகட்டும், ஏன் இன்னும் பல படங்கள் காதல் என்ற பெயரில் காமத்தைதான் காட்டியதாகத் தோன்றும்.   

கடவுளுக்கு எதிரான சாத்தானின் வேலையாகவே காமத்தைப் பார்க்கிறது புராணங்கள்.  இயற்கைக்கு முரணான செயல்!  ஒருவரின் சொத்தை அவர் விருப்பம் பற்றி கவலைப்படாமல் இன்னொருவர் அபகரிக்கும் செயல்.  குரான், பைபிள், கீதை என்று எல்லாமே காமத்தில் ஆழ்வது நரகத்துக்கு இட்டுச் செல்லும் செயல் என்றே சொல்கின்றன.

அப்படி காதலைச் சொல்வதாகக் காமத்தைக் காட்டிய படங்களில் ஒன்றிலிருந்து இன்று இரண்டு பாடல்கள்!

வாலிபமே வா வா .  1982 இல் வெளிவந்த படம்.  பாரதிராஜா இயக்கத்தில் பி கண்ணன் ஒளிப்பதிவில் இளையராஜா இசையில் ராஜ்கண்ணு தயாரிப்பு.  

அலைகள் ஓய்வதில்லை போல இதுவும் பட்டையைக் கிளப்பி விடும் என்று எதிர்பார்த்திருப்பார்கள் போல...   ஊ..ஹூம்!  நான் வழக்கம்போல இத் திரைப் படம் பார்க்கவில்லை.  இந்த இரு பாடல் தவிர வேறெதுவும் என்னை இந்தப் படத்தில் கவரவில்லை. 

முதல் பாடல் கே ஜே யேசுதாஸும் எஸ் பி ஷைலஜாவும் இணைந்து பாடி இருக்கும் பாடல்.  இப்பாடலின் ப்ளஸ் இளையராஜாவின் மெட்லீயும் யேசுதாஸின் குரலும்!  முன்னர் இந்தப் பாடல் என்னுடைய யேசுதாஸ் கேசெட்டின் இரண்டாவது பக்கம் இறுதிப் பாடலாக இருந்தது.  கடைசியாக மறுபடி பல்லவி தொடங்கும்போது கட் ஆகிவிடும்!

பொன்வானப் பூங்காவில் தேரோடுது 

பொன்வானப் பூங்காவில் தேரோடுது 

போராடுது எண்ணம் நீராடுது இன்னும் 

வானிலே 

கவிபாடித் துதிபாடித் தொழுகிறது 

பொங்கும் காவேரி நீராக இன்பம் தானின்று நூறாக 

எண்ணம் எங்கெங்கிலும் பனிப்பூவாக 

எண்ணும் இன்பங்களின் துணை நீயாக 

இளம் தேகங்கள் தாளாதது அவை 

நான் சொல்லி மாளாதது 

என்றும் தானாக தேனாகத்தான்....

தென்றல் பூவாக ஆனந்தம்  உந்தன் தோளோடு ஆரம்பம் 

பனிக்காலங்களில் மனம் தான்வாட 

அதை நான் பாடவே தினம் நாள் கூட 

இது தானாகத் தீராதம்மா இனி 

நீயின்றி ஆறாதம்மா 

  எந்தன் கையோடு மெய்யோடு வா...  

 

 

அடுத்த பாடல் மலேசியா வாசுதேவன், பி சுசீலா பாடிய இந்த இன்னொரு பாடலும் இதேபோல ஒருமுறை கேட்கலாம் ரகம்.

புலமைப்பித்தன் எழுதிய பாடல்.  மலேசியா வாசுதேவன் பாடலின் இறுதி கட்டத்தில்தான் இணைவார்.

திரைப் பிரபலங்களில் இரண்டு பேர் நாட்டுப் பெயரோடு அறியப் படுகிறார்கள் என்று நினைக்கிறேன்.  மலேஷியா வாசுதேவன், சிலோன் மனோகர்!  வேறு யாராவது இருக்கிறார்களா?

அழகே உன்னைக் கொஞ்சம் 

கண்ணில் எழுத வா வா 

நெஞ்சம் முழுதும் நீ நீ நீ 

உயிர் எழுதும் ஒரு கவிதை 

ராகம் சொல்ல வா வா வா 

வானில் இன்று மேக ஊர்வலம் 

யாரைத்தேடிப் போகுமோ 

ஏழுவண்ண வானவில்லிலே 

மாலையாக சூட்டுமோ 

மலையின் அர்த்தமெங்கும் பச்சை மரகதம் 

இயற்கை அன்னை தந்த அன்பின் தரிசனம் 

அழகை விழியில் அளப்போம் வா வா வா 

தேனில் செய்த தேகம் தாங்குமோ 

தென்றல் வந்து தீண்டினால் 

வெளில செய்த பார்வை தாங்குமோ 

எண்ணெய் பார்த்து வீசினால் 

அடியே நீயே எந்தன் கண்ணின் முகவரி 

எனக்கும் காமன் தந்தான் உந்தன் முகவரி 

எனக்கும் அவன்தான் கொடுத்தான் வா வா வா