பிக்மி நம்பர் தெரியுமா

 PICME Number என்றால் என்ன தெரியுமா உங்களுக்கு?

சிலருக்கு தெரிந்திருக்கலாம்.  சிலருக்கு தெரியாமல் இருக்கலாம்!

எனக்கு சமீபத்தில்தான் தெரிந்தது.  தேவை ஏற்படும்போதுதானே இதெல்லாம் தெரிந்து கொள்கிறோம்!

சமீபத்தில் மணமான என் அண்ணன் மருமகள் கர்ப்பம் என்று சந்தேகப்பட்ட நாள் முதல் மருத்துவரிடம் சோதனைக்கு சென்று வந்து கொண்டிருந்தார்.

அந்த மருத்துவரும் முதல்முறை எல்லாம் ஒன்றும் சொல்லவில்லை.  இது சமீபத்தில் ஓரிரு வருடங்களாகத்தான் ஆரம்பித்திருக்கும் வழக்கம் போல...

ஐந்தாவது மாதம் நெருங்கும் சமயம் பர்த் சர்டிபிகேட் வாங்க ரெஜிஸ்டர் செய்யவேண்டும் என்று அவர் ஊர் செல்ல (பிரசவம் அங்குதானே பார்த்துக்கொள்ளப் போகிறார்) , 'இது என்னடா அதற்குள் பர்த் சர்டிபிகேட்?' என்று நினைத்துக் கொண்டேன்.

அங்கு சென்று பதிவு செய்யும் சமயம் இந்த பிக்மி எண்ணைக் கேட்டிருக்கிறார்கள்.  அது என்னடா பிக்மி  எண் என்று கேட்டு அதை இங்கு கொடுங்களேன் என்று கேட்டபோது அது அவர்கள் வசிக்கும் இடத்தில், பிறக்கப்போகும் குழந்தையின் தகப்பனின் ஆதார் எண் கொண்டு செய்யப்படும் ஏற்பாடு என்று தெரிந்தது.

இதை கர்ப்பம் என்று நிச்சயமான நாளிலேயே கூட வீட்டுக்கு அருகில் இருக்கும் ஆரம்ப சுகாதார நிலையத்தில் அல்லது மாநகராட்சி மருத்துவமனையில் செய்து கொள்ளலாம்.   இணையவழி மூலமாகவே கூட ஆரம்பகட்ட பதிவுகளை செய்யலாம்.  ஆனால் ஐந்து மாதத்துக்குள் கட்டாயமாக இந்த எண்ணை வாங்கி விடவேண்டும்.  இந்த எண் இருந்தால்தான் குழந்தையின் பிறப்புச் சான்றிதழ் வாங்க முடியும்.  பின்னர் ஸ்டேட்டஸ் இணையத்திலேயே தொடரலாம்.

இது ஏன் தொடங்கப்பட்டது என்றால் அந்தக் காலம் வரை நிறைய குழந்தைகளுக்கு இரண்டு இடங்களில் பிறப்புச் சான்றிதழ் வழங்கப்பட்டது தெரிய வந்தது.  இது சென்சஸ் கணக்கிலும் குழப்பத்தை உண்டு பண்ணும்.   இப்படி பதிவு செய்து விட்டால், அந்தக் குழந்தையின் வளர்ச்சி, ஆரோக்கிய நிலை என்பது தொடர் கண்காணிப்பில் இருக்கும்.  இதன் மூலம், பிறப்பு கணக்கு, அபார்ஷன், இறப்புக்கணக்கு தாய்சேய் நலம், நலக்கேடு எல்லவதையும் அரசால் மானிட்டர் செய்ய முடிகிறது.

மேலும் தமிழக அரசின் இந்தத் திட்டத்தின்படி, முத்துலட்சுமி சுகாதார நிதியிலிருந்து, குழந்தை பெற்ற தாய்மார்களுக்கு 12,000 ரூபாய் வழங்குகிறார்கள்.  ஏழாவது மாதத்தில் 4,000 ரூபாய், பிரசவம் ஆனதும் 4,000 ரூபாய் மற்றும் மூன்றாவது தவணை 4000 ரூபாய் குழந்தை தனது மூன்றாவது டோஸ் DPT  ஹெபடைடிடிஸ், போலியோ கடுப்பூசி போட்டுக் கொண்டதும் என்று வழங்கப்படுகிறது.  இந்த நிதி  கிட்டத்தட்ட 2016 க்கு முன்னரே வழங்கப்பட்டு வந்ததது.  ஜெயலலிதா பின்னர் இதை 18,000 ரூபாய் என்று தொகையை ஏற்றியதாகச் சொல்கிறார்கள்.

மேலும் குழந்தை பிறந்த பிறகு நியூட்ரிஷன் கிட் என்ற ஒன்றும் வழங்கப்படுகிறது. 

எப்போது இந்த வழக்கம் தொடங்கப்பட்டது என்று தேடி / கேட்டுப் பார்த்தேன்.

ஜனவரி 2018 ல் இது தொடங்கப்பட்டது.  அப்போது இது RCH (Reproductive And Child Health) என்று தொடங்கப்பட்டது.  அந்த வருடம் ஜூன் மாதத்திலேயே பிக்மி எண் வாங்கும் நடைமுறை அமுலுக்கு வந்து விட்டது.   

இதைத் தெரிந்து கொள்ள எனக்கு நான்கு வருடங்கள் தேவைப்பட்டிருக்கிறது!!

இந்த 18,000 ரூபாய் வழங்கப்படுவதும், நியூட்ரிஷன் கிட் வழங்கப்படுவதும் அரசு மருத்துவமனையில் பிரசவம் பார்த்துக் கொண்டால்தான் கிடைக்கும்.  தனியார் மருத்துவமனையில் பார்த்துக்கொண்டால் நான்காயிரம் ரூபாய் மட்டுமே கிடைக்குமாம்.

ஆனால் பிறப்புச் சான்றிதழ் வாங்க இந்த எண் மகா அவசியம்.

எங்கள் விஷயத்தில் என்ன நடந்தது என்பதையும் சொல்லவேண்டும்.  குழந்தையின் தகப்பனின் ஆதார் எண் விஷயத்திலேயே தொல்லை தொடங்கி விட்டது.  அவன் ஆதார் கார்ட் வாங்கியது மதுரையில்.  2016 முதல் அவன் சென்னையில் இருந்தாலும் ஆதார் அட்ரஸ் மாற்றாமல் இருந்திருக்கிறான்.  அப்புறம் ஒரு வீடும், இப்போது ஒரு வீடும் மாறி இருக்கிறான்.  

இவன் பிக்மி எண் வாங்க வேண்டும் என்றால் மதுரைக்கு செல்லவேண்டும்.  அதுவும் கர்ப்பமாய் இருக்கும் பெண்ணையும் அழைத்துச் செல்ல வேண்டும்.  அந்த ஏரியாவில் இருக்கும் அரசு ஆரம்ப சுகாதார நிலையத்தில் காட்டி சோதித்து எண்ணைப் பெற வேண்டும்.  எண்ணைப் பெற்றுவிட்டால் பிரசவம் எங்கு வேண்டுமானாலும் பார்த்துக் கொள்ளலாம்.  

இந்த விஷயத்தை இவன் அறிந்தபோது ஐந்து மாதங்கள் தொடங்க இன்னும் நான்கே நாட்கள் இருந்த நிலை.

அப்புறம் தெரிந்தவர்கள் மூலமாக சம்பந்தப்பட்ட நிலையங்களில் பிரச்சனையைச் சொல்லி கேட்டபோது ஏதாவது ஒரு இருப்பிடச் சான்றிதழாவது கொண்டுவரச் சொன்னார்கள்.  இவனிடம் வங்கி பாஸ் புத்தகம் இல்லை.  எல்லாம் ஆன்லைன்!  ரேஷன் கார்ட் மாற்றவில்லை. எதற்கு என்று விட்டிருந்தார்கள்.  

எனவே இருக்கும் வீட்டின் வாடகை ஒப்பந்தத்தை வைத்து பிக்மி எண்ணைப் பெறுவது என்று முடிவானது.  அடுத்து நம் வீட்டுக்கு அருகில் இருக்கும், நம் ஏரியா அ ஆ சு நி எது என்று கண்டுபிடிக்கும் படலம்.  அருகில் விசாரித்து, இன்று அ ஆ சு நிலையத்தைத் தொடர்பு கொண்டு குழப்பி, அப்புறம் அது குடியிருப்பு நலச்சங்க செயலாளரைக் கேட்டு எது என்று தெரிந்து....  ஒரு வழியாய் இந்த சாங்கியங்களை முடித்தாயிற்று.

அங்கு சென்று பார்க்கும்போது இந்த விஷயம் அறியாமல் ஐந்து மாதங்களுக்கு மேற்பட்ட நிறைய தாய்மார்கள் வரிசையில் காத்திருந்தார்களாம்.  அதில் ஒரு பெண் நிறைமாதம்!  ஏகப்பட்ட திட்டுகளாம்.  எதெதற்கோ விளம்பரம் செய்கிறார்கள்...  இதற்கு விளம்பரம் போதுமான அளவில் இல்லையோ, அல்லது நான்தான் கவனிக்கவில்லையோ!

===============================================================================================================

இரண்டு வருடங்களாய் வாங்க முடியாமல் போனது.  கொரோனா காலம்!  கையில் இருந்த ஸ்டாக் எல்லாம் இரண்டு மாதங்களுக்கு முன்னால் தீர்ந்த நிலையில் இந்த வருடம் வாங்கியாச்!

============================================================================================================

மன உறுதியே முதுமையை வெல்லும்!

முதுமையை எப்படி அணுக வேண்டும் என கூறுகிறார், பிரபல முதியோர் நல மருத்துவர் வி.எஸ்.நடராஜன்:

முதுமை எப்போது துவங்குகிறது என்று, என்னிடம் பலர் கேட்பர். அவர்களுக்கு நான் சொல்லும் பதில், 'முதுமைக்கு வயதில்லை; அது ஒரு பருவம்' என்பேன்.நம் நாட்டில், 58வயதுக்கு மேல் முதுமைப் பருவம் துவங்குகிறது என்று, அரசு ஒரு கோடு போட்டிருக்கிறது.அது ஒரு குறியீடு தானே தவிர, வயதானோர் என்று சொல்ல முடியாது.

இந்த வயது வரம்பும், இப்போது மாறிக் கொண்டே தான் இருக்கிறது.வயதை வைத்தோ, தோற்றத்தை வைத்தோ சொல்ல முடியாத நிலையில், எதை வைத்துத் தான் சொல்வது என்ற கேள்வி எழலாம். ஆனால், ஒருவருக்கு வயது ஏற ஏற, எல்லா உறுப்புகளின் செயல் திறன்களும் கொஞ்சம் கொஞ்சமாக குறைந்து கொண்டே போகும்.குறையாதது அவரின் மனநிலை மட்டும் தான். மனம் மட்டும் எப்போதும் எதையாவது எண்ணி, ஓய்வின்றி அசை போட்டுக் கொண்டே இருக்கும்.முதுமையை நலமுடன் கடக்க வேண்டும் என்றால், முதலில், அலைபாயும் மனதை கட்டுப் படுத்தி, ஒரு நிலைக்கு கொண்டு வர வேண்டும். ஒருவரின் மனோ பலத்துக்கு மரணத்தைக் கூட வெல்லும் சக்தி உண்டு.சில ஆண்டுகளுக்கு முன், கிராமத்தில் இருந்து வந்த ஒரு முதியவருக்கு, வயிற்று வலிக்காக ஆப்பரேஷன் செய்ய தீர்மானிக்கப்பட்டது. ஆனால், வயிற்றில் புற்றுநோய் தீவிர நிலையில் இருந்ததால், ஆப்பரேஷன் செய்ய முடியவில்லை. உறவினர்களிடம் மட்டும் உண்மையை சொல்லிவிட்டு, பெரியவரிடம், 'வாய்வு தொல்லை' என்று கூறி மருந்து கொடுத்து அனுப்பி விட்டோம்.

இரண்டு ஆண்டுகள் கழித்து, முதியவரின் உறவினர் வாயிலாக, அவரை நேரில் சென்று பார்த்த போது, அவர் வயலில் வேலை செய்து கொண்டிருந்தார்.அவருக்கு புற்றுநோய் பாதிப்பு உள்ளதை பற்றி, இரண்டு ஆண்டுகளுக்கு முன் தெரிவித்திருந்தால், அவர் மன பலத்தை இழந்திருக்கலாம். நோயை அதுவே தீவிரப்படுத்தி இருக்கலாம்; எதுவும் நடந்திருக்கலாம்.ஆரோக்கியமாக வாழ்ந்து, முதுமையை முடிந்தளவுக்கு தள்ளிப்போட, நம்மை நாம் முதலில் தயார்படுத்திக் கொள்ள வேண்டும். இதை செய்து முடிக்க அல்லது சாதித்துக் காட்ட முதலில் மனதில் அதீத உறுதி வேண்டும்.நம் முயற்சியில், நாம் கண்டிப்பாக வெற்றி அடைவோம் என்ற எண்ணத்தை, நம் ஆழ் மனதில் விதைக்க வேண்டும். பின் அதே உறுதியில், நாம் நினைத்ததை செயல்படுத்த வேண்டும்.

இதை தவறாமல் வாழ்க்கையில் கடைப்பிடித்தால் முதுமையையும் வெல்ல முடியும்.முதுமை என்பது முடிவல்ல; அதுவும் ஓர் ஆரம்பமே. சுமையல்ல சுகமே!

- தினமலரிலிருந்து - 

=========================================================================================================================

அப்போது இதற்கு வெங்கட் பதில் சொல்லவில்லை!!!

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

சமீப நாட்களாய் சென்னையில் கடும் வெய்யிலையும் வெப்பத்தையும் உணர்கிறேன்.  ஒன்பது மணிக்கு மேல் பதினோரு, பனிரெண்டு மணிக்குள் கடும் தாகம் ஏற்படும்.  இப்படி வருடத்துக்கு வருடம் வெப்பம் ஏறிக்கொண்டே போனால் என்னாவது?  சமீபத்தில் அடிலாந்திக் பகுதியில் பெரும் பனிமலை ஒன்று உருகி விட்டதாம்.  செய்தியில் படித்த நினைவு.  கீழ்காணும் கட்டுரை நான் 2015 ல் பேஸ்புக்கில் பகிர்ந்தது.

நம்மை நாமேஏமாற்றிகொள்கிறோம்!

சூழலியலாளரும், சமூகச் செயல்பாட்டாளருமான ஒய்.டேவிட்:

"1992ல், ரியோ டி ஜெனிரோவில் நடந்த உச்சி மாநாட்டில், 'புவி வெப்பமடைதல் உலகப் பிரச்னை' என, அங்கீகரிக்கப்பட்டது. அதில், புவி வெப்பமடைய முக்கிய காரணம் வளர்ந்த நாடுகள் என்றும், அவை பசுங்குடில் வாயுவை சுயமாகக் குறைக்க வேண்டும் என்றும் தீர்மானிக்கப்பட்டது.

பிரான்ஸ் நாட்டின் பாரிசில், 21ம் புவி உச்சி மாநாடு, நவ., 30 முதல், டிச., 11 வரை நடந்தது. இம்மாநாட்டின் நோக்கம், உலகின் வெப்பநிலை அதிகரிப்பை, 2 டிகிரி செல்சியசுக்குள் கட்டுப்படுத்த, பசுங்குடில் வாயுவின் வெளியீட்டைக் குறைக்க வலியுறுத்துவதே.

சில ஆண்டுகளுக்கு முன், மும்பையில் ஏற்பட்ட பெரும் வெள்ளம், உத்தரகண்டில் ஏற்பட்ட பாதிப்பு, இப்போது சென்னையில் நடந்திருக்கும் வெள்ளச் சேதம் போன்றவற்றுக்கு, புவி வெப்பமயமாதலே முக்கிய காரணம்.

இதை நாம் மக்களிடம் கூறத் தவறி விட்டோம். இந்த சேதங்களை அரசியலாக்கப் பார்த்து, நம்மை நாமே ஏமாற்றிக் கொள்கிறோம்.

தொழிற்புரட்சிக்கு பின், பூமியின் வெப்ப நிலை, 2 டிகிரி செல்சியசுக்கும் மேல் அதிகரிக்கக் கூடாது என்பது, உலகம் ஏற்றுக் கொண்ட ஒன்று. இன்று புவியின் வெப்பநிலை, 0.9 டிகிரி செல்சியஸ் அதிகரித்துள்ளது. இதற்கே, உலகமெங்கும் அழிவுகளை சந்தித்துக் கொண்டிருக்கிறோம்.

2 டிகிரி செல்சியஸ் அதிகரிக்கும்போது, நாம் பேரழிவுக்குள் நுழைந்து விடுவோம். அதற்கு பின் அழிவுகளை நிறுத்துவது சாத்தியமானதல்ல.

மேலும், 1.50 டிகிரி செல்சியஸ் அதிகரிக்கும்போது, பெரும்பான்மையான தீவு நாடுகளும், கடற்கரையோர நகரங்களும், பெரும் பாதிப்புக்கு உள்ளாகலாம். அதனால் தான், தீவு நாடுகள் அனைத்தும் சேர்ந்து, 'எக்காரணம் கொண்டு புவியின் வெப்பநிலை, 1.50 டிகிரி செல்சியசுக்கு மேல் அதிகரிக்கக் கூடாது' என வேண்டுகோள் வைக்கின்றன.

இந்த நியாயமான கோரிக்கை ஏற்றுக் கொள்ளப்படவில்லை. வெப்பநிலை தொடர்ந்து அதிகரிக்காமல் இருக்க என்ன செய்ய வேண்டும் என்பது குறித்து, நாம் உடனடியாக யோசித்து செயலாற்ற வேண்டும்.

உலகின் வளங்கள் வற்றாதது என்ற எண்ணத்தைத் துாக்கியெறிந்து விட்டு, அவை மறு உற்பத்தி செய்ய முடியாதவை, அவற்றைப் பயன்படுத்துவது உச்சபட்ச நிலையை எட்டிவிட்டது என்பதை, நாம் உணர வேண்டும்.

தினமலர் 2015

=============================================================================================

ரசனையான புகைப்படங்கள் போட்டு கொஞ்ச நாளாச்சு இல்லே?

எத்தனையாவது மாடியோ?! இடது பக்கம் இருப்பவர்களை எறும்பு கடித்தால் என்ன ஆகும்?!

--------------------------------------------------------------------------------------------------------------------------------------------------------------

ஜோக்ஸ்...