"திங்க"க் கிழமை : தவலை அடை - கீதா சாம்பசிவம் ரெஸிப்பி

 தவலை அடை

கீதா சாம்பசிவம் 

சில நாட்கள் முன்னர் ரேவதியோட பதிவிலே கிராமத்து முறையிலே தவலை அடை என்பதைப் பார்த்ததும் உடனே அந்த யூ ட்யூப் சானலைப் பார்த்தேன்.   என் வலை உலக  வாழ்க்கையிலேயே முதல் முதலாகப் பதிவைப் பார்த்ததுமே உடனே பார்த்த யூ ட்யூப் சானல் அதான்னு நினைக்கிறேன். ஹிஹிஹி, இல்லைனா, அப்புறமாப் பார்த்துக்கலாம்னு விட்டுடுவேன். சில/பல சமயங்கள் மறந்தே போகும். ஆனால் இது "தவலை அடை" என்பதால் பார்த்தேனோ? இருக்கும். அதைப் பார்த்ததும் தான் அட, இப்படித் தான் நாம் ஒரு தரம் செய்து படங்கள் எல்லாம் எடுத்தோமே, போடவே இல்லையேனு நினைப்பு வந்தது. நானும் இதிலே சொல்லி இருந்த மாதிரிக் கடாயிலே தான் பண்ணினேன். நன்றாகவே வந்தது.

தவலை அடை செய்யத் தேவையான பொருட்கள்

அரிசி. பெரும்பாலோர் பச்சை அரிசியே சேர்க்கின்றன. நான் இரண்டுமாகச் சேர்த்துக் கொண்டு (சமமாய்) ஒரு கிண்ணம் எடுத்துக் கொண்டேன். நன்கு களைந்துவிட்டு நீரை வடிகட்டி விட்டுச் சிறிது நேரம் வைச்சுட்டேன். பின்னர் துவரம்பருப்பு அரைக்கிண்ணம், கால் கிண்ணம் கடலைப்பருப்பு எடுத்துக் கொண்டேன். இதற்குப் பலரும் உளுத்தம்பருப்புச் சேர்ப்பதில்லை. என் தம்பி மனைவி சாதாரண அடைக்குக் கூட உ.பருப்புப் போடுவதில்லை. ஆனால் நான் இதில் ஒரு டேபிள் ஸ்பூன் உ.பருப்புச் சேர்த்தேன்.(சேர்ந்து வருவதற்காக)  அதோடயே தேவையான மி.வத்தலையும் ஊற வைச்சேன்.

வடிகட்டி ஊறிய அரிசியை மிக்சி ஜாரில் போட்டு ரவை பதத்துக்கு உடைத்து எடுத்துத் தனியாக வைத்துக் கொண்டேன். தேவையானால் அரைக்கிண்ணம் மோர்/தயிர் சேர்க்கலாம். உப்பு பின்னால் சேர்க்கலாம். இப்போ வேண்டாம். மேலே பார்ப்பது ரவை போல் உடைத்த அரிசியைக் கொஞ்சம் போல் ஜலம் சேர்த்து வைச்சிருக்கேன்.

பின்னர் ஊறியதை மிக்சி ஜாரில் போட்டு ரொம்பவே நைசாக இல்லாமலும், ரொம்ப்க் கொரகொரவென இல்லாமலும் அரைத்து எடுத்துக் கொண்டேன். 

அரைத்து எடுத்துக் கொண்டதை ரவை போல் உடைத்த அரிசியோடு சேர்த்து நன்கு கலக்கவும். தேவையான உப்பை இப்போது சேர்க்கலாம்.

அரிசி மாவோடு சேர்ந்த பருப்புக் கலவை. இதோடு கருகப்பிலை, கொத்துமல்லி, தேங்காய்த் துருவல் அல்லது கீற்றுக்கள் சேர்க்கலாம்.

இதற்குத் தாளிப்புத் தேவை. ஒரு சிலர் அரிசி ரவையை உப்புமாப் போல் கிளறிப்பாங்க. அப்போவும் தாளித்துப் பின்னரே கொஞ்சம் ஜலம் சேர்த்துக் கிளறணும். அதன் பின்னர் அரைத்த கலவையைச் சேர்க்கலாம். நான் இதிலும் தாளித்துக் கொண்டேன். கருகப்பிலையைத் தாளிப்பிலும் சேர்க்கலாம். தேங்காய் எண்ணெயை அடுப்பில் உள்ள வாணலியில் ஊற்றிக் கடுகு, உ.பருப்பு,பச்சை மிளகாய் ஒன்றிரண்டு விதைகளை நீக்கியது, இஞ்சி தோல் சீவிச் சேர்த்துக் கொண்டு அந்தத் தாளிப்பை இந்த மாவில் கொட்ட வேண்டும்.

பின்னர் மாவை நன்கு கலந்து உப்புத் தேவையானால் தேவையான அளவுக்கு மறுபடி சேர்த்துக் கலக்கிக் கொள்ளவும். 

எல்லாம் கலந்த மாவு. அடுப்பில் வாணலியை வைத்துச் சூடாக்கி உங்களுக்குத் தேவையான சமையல் எண்ணெயை ஊற்றவும். சுமார் ஒரு மேஜைக்கரண்டி அளவு எண்ணெய் தேவைப்படும். மாவை ஊற்றிய பின்னரும் எண்ணெய் தேவைப்படும். இது கெட்டியாக இருந்தால் மாவை அப்படியே எடுத்து உருட்டி வாணலியில் போட்டுக் கைகளால் தட்டலாம். நான் கொஞ்சம் எடுத்து ஊற்றும் பதத்திலேயே மாவை வைத்துக் கொண்டதால் வாணலி சூடானதும் எண்ணெய் ஊற்றி மாவை வாணலியிலேயே ஊற்றினேன். எண்ணெய் நன்கு எல்லாப் பக்கமும் போகும்படி ஊற்றியதும் ஒரு தட்டால் மூடினேன்.

உள்ளே நன்கு வேக வேண்டும் என்பதால் 2 நிமிடங்களுக்கும் மேல் வேக வைக்கலாம். பின்னர் திருப்பிப் போட வேண்டும். இப்போது மூடணும்னு அவசியம் இல்லைனாலும் மூடினாலும் தப்பில்லை. மறுபக்கமும் நன்கு வேகணும். 

திருப்பிப் போட்டு வெந்து கொண்டிருக்கிறது. 

திருப்பிப் போட்டு இருபக்கங்களும் வேக வைத்த தவலை அடை. இது கொஞ்சம் பெரிதாகவும் கனமாகவும் இருப்பதால் ஒன்று அல்லது இரண்டுக்கு மேல் சாப்பிட முடியாது. என்ன வேண்டுமானாலும் தொட்டுக்கலாம். பொதுவாக இதற்குத் தேங்காய்ச் சட்னி தான் தொட்டுப்பாங்க. இந்த அளவுக்கு சுமார் நான்கு முதல் ஐந்து அடைகள் வரை தயாரிக்கலாம். செய்து பாருங்க, சாப்பிட்டுவிட்டுச் சொல்லுங்க.

வாணலி இல்லாமல் பெரிய வாயகன்ற உருளியை எடுத்துக் கொண்டு காய வைத்துப் பின்னர் எண்ணெயை ஊற்றிக் கொண்டு அதிலும் தட்டலாம். வெண்கலப்பானை வாசனையோடு இதன் ருசி வேறு விதமாய் இருக்கும். எனக்கு இப்போல்லாம் பெரிய உருளியைத் தூக்க முடியாததால் அதில் பண்ணுவதில்லை. அரிசி உப்புமாவுக்கெனச் சின்னதாக ஒரு உருளி வைச்சிருக்கேன். அதில் தான் அரிசி உப்புமா, பொங்கல், சர்க்கரைப் பொங்கல், வெண் பொங்கல் எல்லாமும்.