"திங்க"க்கிழமை : பஜ்ஜி மிளகாய்த் தொக்கு - பானுமதி வெங்கடேஸ்வரன் ரெஸிப்பி

 

 பஜ்ஜி மிளகாய்த் தொக்கு 

தேவையான பொருள்கள்:

பஜ்ஜி மிளகாய்    - 6

பச்சை மிளகாய்  - 2

புளி                           - சிறு எலுமிச்சம்பழம் அளவு 

உப்பு                        - 1 1/2 டீ ஸ்பூன்

மஞ்சள் தூள்       -  இரண்டு சிட்டிகை 

தாளிக்க:

நல்லெண்ணெய்   - 2 டேபிள் ஸ்பூன் 

கடுகு                          - 1/4/ டீ ஸ்பூன்

வெல்லம்(optional) - ஒரு சிறு துண்டு  

செய்முறை:

புளியை வெந்நீரில் ஊற வைத்து கெட்டியாக கரைத்துக் கொள்ளவும். 

பஜ்ஜி மிளகாயையும், பச்சை8 மிளகாயையும் காம்பு ஆய்ந்து விட்டு பொடியாக அரிந்து  கொள்ளவும். 

ஒரு அடி கனமான வாணலியை அடுப்பில் வைத்து, கொஞ்சமாக எண்ணெய் ஊற்றி அரிந்து வைத்திருக்கும் மிளகாயை போட்டு வதக்கி எடுத்துக் கொண்டு, அது ஆறியதும் மிக்சியில் மைய அரைத்துக் கொள்ளவும். 

அதே வாணலியில் நல்லெண்ணை ஊற்றி அது காய்ந்ததும் கடுகை போட்டு வெடிக்க விட்டு, புளி கரைசலை சேர்த்து, மஞ்சள் பொடி ,உப்பு சேர்த்து கொதிக்க விடவும். புளி வாசனை போகும் வரை கொதித்ததும் அரைத்து வைத்திருக்கும் மிளகாய் விழுதை சேர்த்து கெட்டியாகும்வரை கிளறி இறக்கினால் சுவையான மிளகாய்த்தொக்கு ரெடி. இட்லி, தோசை, தயிர் சாதத்திற்கு அருமையான சைட்  டிஷ்!

பஜ்ஜி மிளகாயில் காரம் அதிகம் இருக்காது அதற்காகத்தான் பச்சை மிளகாய் சேர்ப்பது. காரம் வேண்டாம் என்பவர்கள் பச்சை மிளகாய் சேர்க்க வேண்டாம். அதே போல வெல்லமும் காரம் அதிகம் தேவையில்லை என்பவர்களுக்காகத் தான். புளிப்பு, இனிப்பு, காரம் மூன்றும் சேர்வது ஒரு தனி சுவை.  நல்லெண்ணையில் தாளிப்பதும் காரத்தை கட்டுப்படுத்தும். 

புளி கரைசல் கெட்டியாக கரைப்பது கஷ்டமாக இருந்தால், பதினைந்து நிமிடங்களுக்கு முன்பே எப்போதும் போல தீர்க்க கரைத்து வைத்து விடவும். பதினைந்து நிமிடங்களில் தெளிந்து விடும். மேலாக இருக்கும் தண்ணீரை கொட்டி விட்டால் கெட்டியான புளிச்சாறு கிடைத்து விடும்.