"திங்க" க்கிழமை : ஹுச்செள்ளு/குரெள்ளு (கன்னடத்தில்) உச்செள்ளு/பேயெள்ளு/காட்டெள்ளு -- கீதா ரெங்கன் ரெஸிப்பி

 

ஹுச்செள்ளு/குரெள்ளு (கன்னடத்தில்) உச்செள்ளு/பேயெள்ளு/காட்டெள்ளு (தமிழில்) சட்னி பொடி

வணக்கம்! வணக்கம்! எபி அடுக்களைக்குள் ரொம்ப நாள் கழித்து கீதா புகுந்திருக்கா! இன்னிக்கு என்ன சொல்லப் போறாளோ? தலைப்பைப் பார்த்தா பயமா இருக்கே சாப்பிடும் படியா இருக்குமான்னு கொஞ்சம் பேர் யோசிக்கறீங்களா!!! ஹாஹாஹாஹா.  யோசிங்க யோசிங்க... நல்லா யோசிங்க!

Niger Seeds - உச்செள்ளு/ஹுச்செள்ளு

ஆங்கிலத்தில் Niger Seeds. கன்னடத்தில் ஹூச்செள்ளு, குரெள்ளு, தெலுங்கில் வலிசல்லு/வலசுல்லு, மராத்தியில் கார்ளே/க்குர்சணி, வடக்கே ராம்தில் என்றும் சொல்லப்படும் இது காட்டெள்ளு என்றும் ஓசூர், கிருஷ்ணகிரி, ஈரோடு பகுதிகளில் பேயெள்ளு, உச்செள்ளு என்றும் சொல்லப்படுகிறது. 

பார்ப்பதற்குக் கருப்பு ஜீரகம் (கருஞ்சீரகம் வேறு) போல இருந்தாலும், எள்ளின் சுவை. பல மருத்துவ குணங்களைக் கொண்ட உச்செள்ளை, உணவில் எள்ளிற்குப் பதில் பயன்படுத்தலாம். அதே சுவை, மணம், அதே குணம். இதிலிருந்து எடுக்கப்படும் எண்ணையும் சந்தையில் விற்கப்படுகிறது. Niger Seed oil.

இது என் கண்ணில் பட்டு அறிந்த நாளிலிருந்து (சென்னையில் இருந்த போதே)  இதைப் பற்றித் தெரிந்து கொண்டு சட்னி, பொடி என்று செய்வதுண்டு. இங்கு பகிர மறந்தே போனேன். மகனுக்குச் செய்த போது அட! இதை எபியில் பகிரலாமே என்று இதோ இப்போ. செய்முறையை எழுத்தில் சொல்வதோடுஒரு காணொளியாகவே பகிர்கிறேன். எபியில் திங்க பதிவில் காணொளியுடன் பகிர வேண்டும் என்று நான் ஸ்ரீராமிடமும், இங்கு கருத்திலும் சொல்லியும் அனுப்பியதில்லை. இங்கு இது இப்ப என் சிறு முயற்சி. எனவே படங்கள் அதிகம் இல்லை.

நம்முடைய உணவுகளை நான் கண்ணளவில் தான் செய்வது வழக்கம். ஆனால் பேக்கிங் என்றால் கண்டிப்பாக அதற்கான அளவுப் பொருட்களை அளந்துதான் போடுவது வழக்கம். அப்படி நான் பயன்படுத்தும் கப் (பேக்கிங்க் செய்ய பயன்படுத்தும் கப்புகள், தேக்கரண்டி, மேசைக்கரண்டிகள், மற்றும் அடுக்க்ளை Weighing Scale ல் அளந்து (மகனுக்காக) செய்ததால் அந்த அளவுகளையும் இங்கு தருகிறேன்.

தேவையான பொருட்கள் :

உச்செள்ளு/பேயெள்ளு - 1 கப் - 150 கி

நிலக்கடலை - 1/4 கப் - 50 கி

வற்றல் மிளகாய் - 10 - 10 கி (உங்களுக்கு இன்னும் காரம் வேண்டும் என்றால் மிளகாயின் தன்மை பொருத்து இன்னும் 5 கூட்டிக் கொள்ளலாம். 10 குண்டூர் மிளகாயும் 5 பைதாகி மிளகாய் (Byadgi- கர்நாடகா மிளகாய்) பயன்படுத்தலாம். காரம் குறைவாகவும் நல்ல நிறமும் கொடுக்கும். 

பூண்டு - 5 பல் - 5 கி (எண்ணிக்கை எனும் போது அதன் Size பொருத்து கிராம் கணக்கு மாறுபடும். என்றாலும் கூடினாலும் குழப்பமில்லை) 

பூண்டு வேண்டாம் என்பவர்கள் அதற்குப் பதில் பெருங்காயம் சேர்த்துக் கொள்ளலாம். 

புளி - சிறிய நெல்லிக்காய் அளவு - 5 கி

கறிவேப்பிலை - ஒரு கைப்பிடி - 5 கி

உப்பு (நான் இந்துப்பு உப்புதான் பயன்படுத்துகிறேன் பொடியும்/கல்லுப்பும் இரண்டுமே) -  தேவையான அளவு  ஒரு தேக்கரண்டி கல்லுப்பு - 10 கி

மேலே கொடுத்திருப்பது 1 கப் அளவு உச்செள்ளிற்கான பிற பொருட்கள் அளவு. நான் மகனுக்காக 3 கப் அளவு உச்செள்ளு எடுத்துச் செய்ததால் அதற்குத் தேவையான மற்ற பொருட்களும் அதற்கேற்ப எடுத்துச் செய்ததால் காணொளியில் அளவு நிறைய இருப்பது போல் இருக்கும். அளவு மாறினாலும் செய்முறை அதேதானே!

காணொளியில், பேயெள்ளு பொரியும் சத்தம் கேட்க வேண்டும் என்பதற்காகக் காணொலியில் கேட்கும் சத்தத்தை நீக்கவில்லை. பக்கத்துவீட்டில் ஏதோ வேலை நடந்து கொண்டிருந்தது எனவே அந்தச் சத்தம் கேட்கலாம். இங்கு வீடுகள் நெருக்கமாக இருப்பதால் பக்கத்து வீட்டில் பேசுவது இங்கு நன்றாகக் கேட்கும் அது போல VICE VERSA

செய்முறை:

செய்முறை ஒன்னும் வித்தியாசம் இல்லை. எல்லாம் நீங்க செய்வது போலத்தான். 

எள்ளை வறுக்கும் முன் வாணலி நல்ல சூட்டில் இருந்தால் டக்கென்று நல்ல பக்குவத்தில் பட் பட்டென்று பொரியும். அப்படிப் பொரிப்பது நல்லது. நல்ல மணம் மற்றும் பக்குவத்தில் பொரியும் என்பதால்  முதலில் வெறும் வாணலியில் அளவான தீயில் மிதமான சூட்டில் பொறுமையாக நிலக்கடலையை பொன்னிறத்தில் வறுபட்டதும் எடுத்து தட்டில் போட்டு வைச்சுக்கோங்க.

வாணலி இப்ப நல்ல சூடாக இருக்கும். உச்செள்ளைப் போட்டு அது பொரியும் சத்தம் கேட்கத் தொடங்கியதும் பிரட்டிக் கொடுத்து பொரிந்து மணம் வந்ததும் எடுத்து தட்டில் கொட்டிக் கொள்ளுங்கள். 

அடுத்து வாணலியில் அரை ஸ்பூன் எண்ணை விட்டு பூண்டையும் கொஞ்சம் பச்சை மணம் போய் நிறம் மாறும் போது தேவையான உப்பைப் போட்டு பிரட்டி (மகனுக்காகச் செய்ததால் உப்பில் இருக்கும் ஈரம் போவதற்காக இப்படிச் செய்வதுண்டு) தட்டில் போட்டுக்கோங்க. பூண்டு வேண்டாம் என்பவர்களுக்கு இதைத் தவிர்க்கலாம். அதற்குப் பதில் புளியங்கொட்டை அளவிலான கட்டிப் பெருங்காயத்தைப் பொரித்துச் சேர்க்கலாம் அல்லது பொடிக்கும் போது பெருங்காயப் பொடி சேர்த்துக் கொள்ளலாம். 

அடுத்து ஒரு ஸ்பூன் எண்ணை விட்டு மிளகாய் வற்றலைப் போட்டு மிதமான தீயில் கறுகாமல் வறுக்கணும் அப்ப சேர்க்க வேண்டிய புளியையும் சேர்த்துக்கலாம் (பல நாட்கள் இருக்க வேண்டும் என்பதால் ஈரப்பதம் போவதற்கு) மிளகாய் நன்கு வறுபட்டு வரும் போது கறிவேப்பிலையையும் போட்டு பிரட்டி, அது மொறு மொறு என்று ஆனதும் அடுப்பை அணைத்துவிட்டு தட்டில் போட்டுவிடுங்கள். 

எல்லாம் நன்றாக ஆறியதும் மிக்சியில் போட்டு பொடித்து எடுக்க வேண்டியதுதான்!  நல்ல மணமான உச்செள்ளுப் பொடி ரெடி!! 

பின் குறிப்பு - நிலக்கடலையின் தோலை நான் தோ வேண்டாம் என்பவர்கள் தோலை நீக்கி விட்டுப் பொடித்துக் கொள்ளலாம். அல்லது வறுத்த நிலக்கடலை வாங்கியும் சேர்க்கலாம். அதில் உப்பு இருக்கிறதா என்று மட்டும் பார்த்துக்கோங்க. உப்பிருந்தால் பொடியில் நாம் போடும் உப்பின் அளவை மாற்றிக்கலாம்.

இப்படிப் பொடிக்காமல் தண்ணீர் சேர்த்து எள்ளுச் சட்னியாகவும் செய்யலாம். உடனடியாகப் பயன்படுத்த. 

இதே உச்செள்ளுடன் ஆளி விதை - Flax Seed வறுத்துச் சேர்த்தும் செய்யலாம். இதே செய்முறையில் நிலக்கடலைக்குப் பதில் உச்செள்ளு/வழக்கமான எள்ளு 1 கப் என்றால் வெள்ளை உளுந்து 1/4 - 1/2 கப், கொஞ்சம் கறிவேப்பிலை, காரத்திற்கு வற்றல் மிளகாய் எல்லாம் வறுத்து உப்புடன் பொடி செய்து வைத்துக் கொண்டால் ஒரு வகையான அருமையான எள்ளுப் பொடி.

நாம் வழக்கமாகச் செய்யும் மிளகாய்ப் பொடியில் வழக்கமாகச் சேர்க்கும் எள்ளிற்குப் பதில் இந்த எள்ளைச் சேர்த்துக்கலாம். இதே எள்ளுடன் பொட்டுக்கடலை சேர்த்தும் செய்யலாம் அது தனியான சுவை. உங்கள் விருப்பம் போல் சாதரண எள்ளை எதிலெல்லாம் சேர்ப்போமோ அதில் இந்த எள்ளைச் சேர்க்கலாம் அதே போன்று வழக்கமாகப் பயன்படுத்தும் எள்ளில் செய்யும் எல்லாமும் இதிலும் செய்யலாம். 

இனி உங்கள் விருப்பம் போல் உங்கள் கற்பனையை விரித்து, புதிதாகச் செய்யும் ஆர்வம் எல்லாம் கலந்து கட்டி சோதனை செய்து... Enjoy Maadi!!!!!

ஸ்பாஆஆஆ.....சமையல் செய்யறப்ப ஃபோட்டோ எடுக்கறதே கஷ்டமா இருக்கு....இப்ப வீடியோ வேற!!! எல்லாரும் எப்படி அழகா எடுத்துப் போடறாங்கன்னு தோணினாலும் விட்டுருவமா!! 

எபி ஆசிரியர்கள் அனைவருக்கும் நன்றி! நன்றி!