நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 28 : நெல்லைத்தமிழன்

 

நாம் ஆக்ரா கோட்டையில், அக்பர்/ஜஹாங்கீரின் அரண்மனைப் பகுதிகளைப் பார்த்துக்கொண்டிருந்தோம். ஆக்ரா கோட்டையின் பகுதிகள் எப்படி அமைந்துள்ளன என்பதைக் கீழே உள்ள படத்தில் காணலாம்.

சோம்நாத் கதவு

அங்கிருந்த சோம்நாத் கதவு.  கஜினி முகம்மது, சோம்நாத்தைக் கொள்ளையடிக்க வந்தபோது, அங்கிருந்த கதவையும் எடுத்துக்கொண்டு சென்றுவிட்டானாம். (1010ல்). பிரிட்டிஷார்கள், இந்தியர்களின் (இந்துக்களின்) நன் மதிப்பைப் பெற, கஜினியில் (Ghazni என்ற ஊரின் முகம்மது என்பவன். அதனால் அவனுக்கு கஜினி முகம்மது என்ற பெயர்), முகம்மதுவின் கல்லறையிலிருந்த கதவை 1840களில் இந்தியாவிற்குக் கொண்டுவந்து, நாங்கள் கஜினியிலிருந்து சோம்நாத்திலிருந்து களவு போன கதவைக் கொண்டுவந்துவிட்டோம் என்று பொய் பரப்புரை செய்தார்களாம். ஆக்ரா கோட்டையில் அந்தக் கதவை வைத்தார்களாம். தற்போது அந்தக் கோட்டையில் கண்ணாடி அறைக்குள் இந்தக் கதவு இருக்கிறது.

நான் எடுத்த படங்கள் (இதையும் வேலையத்துப் போய் இந்த பிரிட்டிஷார் அங்கிருந்து கொண்டுவந்திருக்கிறார்களே என்று நினைத்துக்கொண்டேன்)

 

இந்தத் தெளிவான படங்கள் இணையத்திலிருந்து (சோம்நாத் கதவு)

ஷாஜஹான் மகள்கள் மாளிகைப் பகுதி

ஜஹானாரா மாளிகை…. அதன் பக்கத்தில் நீதிக் கயிறு இருந்ததற்கான அறிவிப்பு. 

நீதிக்கான கயிறு (தங்கம்), ஷாஜஹானின் மாளிகையை அடுத்து உள்ளதைக் காணலாம் (சல்லடைக் கம்பி வழியாகப் பார்த்தால் ஷாஜஹானின் பால்கனி தெரியும்)

ஜஹாங்கீரைப் பற்றி விமர்சனங்கள் இருந்தாலும் அவர் ஒரு உன்னதமான கலைஞர். ராஜ வம்சத்தைச் சேர்ந்தவர் என்பதைப் பலவிதங்களில் நிரூபித்தவர். 1605ல் (பட்டத்திற்கு வந்த பிறகு), பிற்காலத்தில் கட்டப்பட்ட ஜஹானாரா மாளிகைக்கு அருகில் (ஔரங்கசீப்பின் சகோதரி, ஜஹாங்கீரின் பேத்தி) அவர், ஒரு திறப்பில், “நீதிக் கயிறு” என்ற பெயரில் அங்கிருந்து அரண்மனையின் வெளிப்பகுதியில் (யமுனை ஆறு பக்கம்) 80 அடி நீள தங்கக் கயிறைத் தொங்கவிட்டார். அதில் 60 மணிகள் கோர்க்கப் பட்டிருந்தன. சாமானியனுக்கு அரசாங்கத்தில் நீதி கிடைக்கவில்லை என்றால், அல்லது அதிகாரிகள் நியாயமற்று நடந்துகொண்டால், கோட்டையின் பின்புறமுள்ள இந்தக் கயிற்றை இழுக்கலாம். அந்த மணிச் சப்தம் அரசருக்குக் கேட்டு, அவரின் கவனத்திற்கு வந்து உடனே தீர்ப்பு வழங்குவார். பொதுமக்கள் அனைவருக்கும் இந்த உரிமை உண்டு, ஏழை, பணக்காரன், இந்த மதம், அந்த மதம் என்று எந்த வேறுபாடும் கிடையாது என்று ஆணையிட்டிருந்தார்.  (பிற்பாடு ஔரங்கசீப் காலத்தில், இது என்ன பைத்தியக்காரத்தனம் என்று சொல்லி அந்தத் தங்கக் கயிற்றை எடுத்துவிட்டார்)

ஜஹாங்கீர் ஓவியங்கள், பறவைகள், விலங்குகள் போன்றவற்றில் ஈடுபாடு நிறைந்தவர் என்பதும், அதற்காக தன் கூடவே ஒரு ஆஸ்தான ஓவியரை வைத்துக்கொண்டு, ஒவ்வொரு பறவையையும் வரையச் சொல்லி, அதன் தனித்தன்மையைக் குறிப்புகளாக எழுதியிருக்கிறார் என்பதும் ஆச்சர்யம்தான்.  இன்னொரு பிரமிக்கவைக்கும் செயல், தான் செய்த தவறுகளை அப்படியே குறிப்பிட்டு, அது அரசியலுக்கு அவசியமான செயல் என்பதால் செய்ய நேரிட்டது என்பதையும் எழுதியிருக்கிறார்.

சுவரின் அலங்காரங்கள். அந்தக் காலத்தில் விலை உயர்ந்த ரத்தினங்கள் பதிக்கப்பட்டிருக்கலாம்.

தங்க ரேக்குகளாலும் ரத்திங்னகளாலும் அலங்கரிக்கப்பட்டிருக்கும்.

விதானத்தின் அலங்காரங்கள்

இந்த மாதிரி மாடங்களில் என்ன இருந்திருக்கும். அழகிய ஓவியங்களா இல்லை குளிர்/வெயில் முதலியவற்றிற்காக ஏதேனும் செய்திருப்பார்களா என்பது தெரியவைல்லை.

அங்கிருந்த கிணறு

ஷாஜஹானின் அரண்மனைக்கு (அதாவது அவரது வீட்டிற்கு) அருகில் அவரது இரண்டு மகள்களுக்கான அரண்மனை இருக்கிறது. ஒன்று இளைய மகள் ரோஷனாரா. இரண்டாவது மூத்த மகள் ஜஹானாரா.  (இவர்கள் ஔரங்கசீப்பின் சகோதரிகள்).  மேலே உள்ளது ரோஷனாராவின் வீடு (அப்போது தங்கக் கூரை வேய்ந்தது)

 மூத்த மகள் ஜஹானாராவின் வீடு.  இரண்டு அறைகள் மற்றும் இடையில் ஒரு ஹால். பெரும்பாலும் முகலாய அரண்மனைகள் இப்படித்தான் இருக்கின்றன. கோல்கொண்டா கோட்டையில் வழிகாட்டி, இப்போது எல்லோரும் பார்க்கும்படியாக எல்லாமே openஆக இருந்தாலும், அப்போதைய காலகட்ட த்தில் ஒவ்வொன்றிர்க்கும் திரைச்சீலை இருந்தது (தடிமனான). அத்தகைய திரைச்சீலைகளை (கூடாரத்திற்கான துணி) வைத்துத்தான் ஒவ்வொரு அறையையும் பிரித்திருந்தார்கள் என்று சொன்னார். அவருடைய வீட்டிற்கு அருகில் (நமக்கு இடது புறத்தில்) தெரியும் கூரை உடைய பகுதிதான் ஷாஜஹானின் அரண்மனைக்குச் செல்லும் வழி.

அக்பர் கோட்டையிலும், அரண்மனைப் பகுதி வீரர்கள் (பாதுகாப்புப் பணியில் இருந்தவர்கள்) எல்லோருமே மூன்றாம் பாலினத்தவர்கள் (அல்லது அப்படி ஆக்கப்பட்டவர்கள்) என்று வழிகாட்டி சொன்னார். அதன் காரணம், சொன்னதை அப்படியே செய்யும், விசுவாசமான அவர்களது குணம், இரண்டாவது அங்கிருந்த இளவரசிகளுடன் உறவு வைத்துக்கொள்ளும் வாய்ப்பே கிடையாது (அதாவது வேறு ரத்தத்தைச் சேர்ந்த வாரிசு உருவாகாது)

கஸ் மஹல் - இந்தப் படத்தில் இடது மேற்புறம் இருப்பது ஷாஜஹானின் அரண்மனை ஆரம்பம். அதற்கு அடுத்தது ஜஹானாராவின் மாளிகை. நடுவில் மண்டபம் அல்லது இடைவெளி. அதற்கு அடுத்தது இளையமகள் ரோஷனாராவின் மாளிகை. அடுத்த அரசனிடம் அதிகாரம் வந்துவிட்டால், முந்தைய அரசனுக்கு மரியாதை குறையும். அதிலும் ஷாஜஹான் வீட்டுச் சிறையில் இருந்ததால், அவர் சிறிது அவமரியாதையாக நட த்தப்பட்டார். அவரது கடைசி காலத்தில் அவருக்கு உதவியாக இருந்தவர் மூத்த மகள் ஜஹானாரா.  அதனால், ஷாஜஹான் அவருடைய மகள் ஜஹானாராவைத் திருமணம் செய்துகொண்டார் என்று அரசல் புரசலாகப் பேசப்பட்டது. இருந்தாலும் அந்தக் காலத்தைய வரலாற்று அறிஞர்கள், அப்படி பரவலாகப் பேசப்பட்டாலும் அதில் சிறிதும் உண்மையில்லை என்றே எழுதியிருக்கிறார்கள்.

மேடைபோலக் காணப்படும் பகுதியில் உள்ள நீரூற்று. அதன் பின்னணியில் பல்வேறு அறைகள், முப்புறமும். இங்குதான் ஷாஜஹானின் ஆசை நாயகிகள் தங்கினார்கள் என்று சொன்னார் வழிகாட்டி.

ஒவ்வொரு மாடத்திலும் அழகிய அலங்காரங்களும், தங்க ரேக்குகளும் மணிகளும் இருப்பதாகக் கற்பனை செய்யுங்கள். எப்படி உயர்வாக இருந்திருக்கும்? பாரதம் முழுமைக்கும் சக்கரவர்த்தியின் மாளிகை ரத்தினங்களால் அலங்கரிக்கப்பட்டதாக இருந்திருக்காதா?

வெறும் மெல்லிய கோடுகள், தீற்றல்கள் மாத்திரமே எஞ்சியிருக்கிறது. விதானங்கள், மாடங்கள், சுவற்றின் அலங்காரங்கள் போன்றவற்றைக் கண்முன் நிறுத்த படங்களைக் கோர்த்திருக்கிறேன். இவற்றில் இருந்த பொன், விலையுயர்ந்த ரத்தினங்கள் மற்றும் பொருட்கள் பிரிட்டிஷாரினால் எடுத்துக்கொள்ளப்பட்டிருக்கும்.

ஷாஜஹான் காலத்தில் கட்டப்பட்ட வெள்ளைப் பளிங்கு மாளிகைப் பகுதியைப் பார்க்க ஆரம்பித்த நாம், ஷாஜஹானின் அரண்மனையைப் பார்க்காமலா விடப்போகிறோம்?  அதிசயத்தால் அரச பதவிக்கு வந்து, தன் வீரத்தால் தக்கவைத்துக்கொண்ட ஷாஜஹானையும் விதி சும்மா விட்டுவைக்குமா? என்ன ஆனது என்பதை வரும் வாரங்களில் பார்ப்போம்.

 (தொடரும்)