எதிர் இருக்கை யுவதி

 

இதுவரை சாப்பிடாத புதிய உணவகம் ஏதும் கண்ணில் பட்டால் மனதில் குறித்துக் கொண்டு அடுத்த வாய்ப்பில் உள்ளே நுழையும் வழக்கம் எனக்கு.

D Mart டில் ரிட்டர்ன் கிஃப்ட்  ஐட்டம் சிலவற்றை மாடி ஏறி, இறங்கி, அலைந்து திரிந்து பொறுக்கிக் கொண்டு, அதைவிட கடினமான காரியமாய் பில் பே செய்து காரில் ஏற்றிய நேரம் இரவு ஒன்பதைக் கடந்திருக்க, என் சாப்பாட்டு நேரமும் (இரவு 7 மணி) பாஸ் சாப்பாட்டு நேரமும் (இரவு ஏழரை மணி) எப்போதோ கடந்து விட்டிருந்தது.  D  மார்ட் பில்லிங் பற்றி தனியாய் கொஞ்சம் எழுத வேண்டும்.  அது அப்புறம்.

அடுத்து என்ன செய்ய வேண்டும் என்று மனதில் திட்டமாக கட்டளை இருந்தது (சாண்டில்யன் பாணி)

பக்கத்தில் முதலில் எதிர்ப்படும் ஹோட்டலுக்குள் நுழைய வேண்டும். ("தெரிந்த விஷயம்தானே?  வேறென்ன செய்யப்போகிறாய் நீ?" என்று நினைப்பவர்களை வன்மையாக ஆமோதிக்கிறேன்!) ஏற்கெனவே அங்கு நான் இதுவரை நுழையாத ஹோட்டல் ஒன்று இருந்தது.  வாசன் கஃபே... 

அதன் பெயர் விதிமுறையை மீறி சற்றே பெரிதாகவே இருந்தது அந்த உணவு அகம்!

கீழே உள்ள ஐந்தாறு மேசைகளும் உண்பவர்களால் நிரம்பி இருக்க, எங்கள் கண்கள் AC ஹாலைத் தேடின.  மாடியில் என்ற பரிமாறுபவரிடம்  என் முழங்கால் பிரச்னை  காரணமாக "லிப்ட்?" என்றேன் சுருக்கமாக... அதைவிட சுருக்கமாக அவர் கையை விரித்து விட்டு இடது கையால் படிகளைக் காட்டி வெறுப்பேற்றினார்.

மு.கால் வலி காரணமாக குளத்துக்குப் போகிறவன் போல கால்களை அகல வைத்து படியேறினேன்.

  AC ஹாலும் நிரம்பி இருக்க, வழக்கமான இந்தியக் குடிமகனாக வீட்டில் சாப்பிடாமல் ஹோட்டலில் குடும்பம் குடும்பமாக சாப்பிடும் அவர்களை மனதுக்குள் வைதபடியே அவைலபிளாக இருந்த முச்சீட்டில் இடம்பிடித்தேன் / தோம்...  நான், பாஸ், டிரைவர்.

ஆறு குஷன் இருக்கைகள் கொண்ட அது மூன்று மூன்றாக பிரிக்கப் பட்டிருக்க,  இந்தப்;பக்கம் காலியாயிருந்த மூன்றில் நாங்கள்.  எதிர்ப்பக்கம் ஒரு பேரிளம்பெண்ணும் - அதாவது சுமார் 30 அல்லது 34 வயது மதிக்கத்தக்க பெண்  -ஒரு சிறுவனும் - சுமார் 15 அல்லது 16 வயதிருக்கலாம் - அமர்ந்திருந்தனர்.

சிறுவனை விடுங்கள்..  அவன் எப்படி இருந்தால் நமக்கென்ன...  அந்தப் பெண்ணை நைசாக கவனிப்போம்.  கண்ணில் பட்ட வரை க்ரே கலரில் கறுப்புப் பட்டை இருக்கும்  டீ ஷர்ட் போட்டிருந்தாள்.  கோணல் வகிடு எடுத்த வகையிலும், இன்னும் ஏதோ காரணத்தினாலும் அவள் மலையாளி என்று புரிந்து கொள்ளச் செய்தாள்.  

அவள் கீழே அணிந்திருந்தது பாவாடை போன்ற உடையா, லெக்கின்ஸா, வேறு ஏதாவதா என்று பார்க்க வேண்டுமென்றால் எட்டிப் பார்க்க வேண்டும் என்பதால் ஆர்வத்தைக் கட்டுப்படுத்தி அமைதி காத்தேன்.  ஏதுவாய் இருந்தால் என்ன, தெரிந்தவரை நன்றாய் இருக்கிறாள்!

கூட வந்த சிறுவன் அவள் மகனல்ல என்பது வயதின் காரணமாக தெரிந்தது.  தம்பியாயிருக்க முடியாது என்று முகஜாடை முகத்தில் அறைந்து சொன்னது!

பின் யாராயிருக்கும்?  மெல்லிய குரலில் பேசிக்கொண்டார்கள்..."என்ன வேணுமோ...  எவ்வளவு வேணுமோ கேட்டு வாங்கிச் சாப்பிடு..   கூச்சப்படாத..  தயங்காத.." 

அவன் பனீர் பட்டர் மசாலா, மஷ்ரூம் ஃபிரை டிக்கா, பிக்கா என்று ஏதேதோ ஆர்டர் செய்து கொண்டிருந்ததை அந்த அக்கா  கைகளைக் கட்டிக் கொண்டு புன்னகையுடன் பார்த்துக் கொண்டிருந்தாள்...

பாஸ் என்னை இடித்தாள்.  "என்ன வேணும்..  சீக்கிரம் சொல்லுங்க...  எவ்வளவு நேரமா நிக்கறார் அவர்?" என்று சர்வரைக் காட்டினார்.  குறித்துக் கொள்ள வசதியாக மொபைலை திறந்து வைத்துக் கொண்டு என்னை பார்த்துக் கொண்டிருந்த சர்வரிடம் "முதல்ல ரெண்டு இட்லி" என்று சொல்லி விட்டு  மீண்டும் பார்வையைத் திருப்பி....."இட்லி இல்ல ஸார்" என்ற சர்வரின் பதிலால் மீண்டும் திரும்பி "பொங்கல்" என்றேன்.  "இல்ல ஸார்" என்றார் அவர்.

"என்னதான் இருக்கு?"

"தோசை வகைகள், பூரி, சப்பாத்தி..."

"நூடுல்ஸ்?"

"இல்ல சார்"

"தோசை இருக்குன்னு சொல்றீங்க...  இட்லி இல்லங்கறீங்க" என்று சொல்லி விட்டு வியாபார உத்தி / சிரமங்களை மனதில் ஏற்றி ஒரு ஸ்பெஷல் தோசை சொன்னேன்.

அவர் அகல, என் பார்வை எதிரே திரும்ப, எதிர் யுவதி அதுவரை புன்னகையுடன் என்னைப் பார்த்துக் கொண்டிருந்திருக்கிறாள் என்று புரியும் வகையில் பார்வையைத் திருப்பினாள்.  

அவ்வப்போது மொபைலை பார்த்துக் கொண்டே இருந்தாள் என்பதை நானும் கவனிக்கிறேன் என்பதை அவளும் கவனித்தாள் என்பதை நானும் கவனித்தேன்!  பாஸும் கவனித்திருக்கிறார் என்பதை அவர் குரல் நிரூபித்தது.

"ஏன்...  நம்பர் வாங்கிக்கறதுதானே?"  பாஸ் என் விலாவில் இடித்து ரகசியமாகச் சொன்னதை கேட்டு அவள் இதழோரம் மிகச்சிறிய ஒரு புன்னகை பூத்தது.  ஆம், என் பாஸ் ரகசியம் பேசுவது அப்படிதான்.  சமயங்களில் தெரிந்தேதான் செய்கிறாரோ என்ற சந்தேகம் வருவதையும் தவிர்க்க முடியாதுதான். அவள் இதற்குச் சிரித்தாளா, மொபைல் பார்த்துச் சிரித்தாளா என்று அந்த மலையாள பகவதியைத்தான் கேட்கவேண்டும்.  அவளும் ஸ்பெஷல் தோசைதான் ஆர்டர் செய்திருந்தாள் என்பது குறிப்பிடத்தக்கது.

சோளே பூரி ஆர்டர் செய்திருந்த டிரைவருக்கும், சப்பாத்தி ஆர்டர் செய்திருந்த பாஸுக்கும் அவை வந்து சாப்பிட்டு முடிக்கும் நிலையில் இருக்க, நான் அல்லது நாங்கள் இன்னமும் அந்த ஸ்பெஷல் தோசைக்கு காத்திருந்தோம்.

அப்படிக் காத்திருப்பதைப் பற்றி நகைச்சுவையாய் (என்று எண்ணிக்கொண்டு) நான் அங்கலாய்த்ததை அவளும் கேட்டு இடது இதழோரம் மின்னம்மினி புன்னகையோடு ஆமோதித்ததை நான் ரசித்தேன் என்பதை பாஸும் கவனித்து விட்டார் என்பதை நானும் கவனித்து உஷாரானேன்.

நிற்க, அங்கலாய்ப்பு என்பதற்கு நான் உபயோகித்திருக்கும் பொருளை இணையம் காட்டவில்லை என்பதைக் காண்க...  ஒரே ஒரு இடத்தில கொஞ்சம் ஒத்து வருகிறது!

ஒரு வழியாய் அவளுக்கு முதலில் தோசை வர,. என்னை ஓரக்கண்ணால் பார்த்தபடியே சாப்பிட ஆரம்பித்தார்.  அப்புறம் எனக்கும் வந்தது.  நானும் பதிலுக்கு அவளை ஒரு கண்ணால் பார்த்தபடியே தோசையில் கைவைத்தேன். 

அரை தோசைக்குத்தான் சாம்பார் வைத்திருந்த நிர்வாகத்தை கண்டித்ததை அவளும் ஆமோதித்தாள்.  எக்ஸ்டரா சாம்பார் இருவரும் ஒரே நேரத்தில் கேட்டோம்!  என்ன சிக்கனமோ...   முன்னர் ஒருமுறை ரோடோரக் கடை ஒன்றில் எக்ஸ்ட்ரா சால்னா பாக்கெட்டுக்காக சண்டை போட்டவன் நான்!  சப்பாத்திக்கு குருமா கூட அப்படிதான் சிக்கனமாக வைத்திருந்தனர் என்பதை பாஸ் சுட்டிக் காட்டினார்.  சாதாரணமாக இது போன்ற சந்தர்ப்பங்களில் எதிரில் அல்லது அருகில் இருக்கும் இதுபோன்றவர்களுடன் பேசும் வழக்கமுடைய பாஸ் ஏனோ இவருடன் பேச முயற்சிக்கவில்லை.

இதையெல்லாம் எதைப் பற்றியும் கவலைப்படாமல் அந்தப் பையன் ஏதேதோ ஆர்டர் செய்து ஒருகை அல்ல பல கை பார்த்துக் கொண்டிருந்தான்!

பில் பே பண்ணும் நேரம் வர, பாஸ் ஃபோனில் மகனுடன் (என்று நினைத்தேன்.  இல்லையாம்.  மாமாவின் மருமகளிடமாம்) பேசிக் கொண்டிருந்தார்  

"விட்டால் ஃபோன் நம்பர் கூட வாங்கிடுவார் போல"

நிஜமாகவே கேட்டு விட்டால் என்ன என்று தோன்றியது!!

டிப்ஸ் வைத்து விட்டு நான் எழ முயற்சிக்கும் நேரம் அந்தப் பெண் என்னை நோக்கி குனிந்தார்.

"எக்ஸ்கியூஸ்மீ...   கொஞ்சம் உங்கள் ஃபோன் நம்பர் கொடுக்கிறீர்களா?"

என் காதுகளை நம்ப முடியாமல் (ஆனந்த) அதிர்ச்சியுடன் அவரைப் பார்த்தேன்.

"என்ன?"

"உங்க ஃபோன் நம்பர் தர்றீங்களா?"

"இதோ.." தயாராய் அமர்ந்தேன்.  எதற்கு என்றெல்லாம் கேட்கவில்லை. 

அவள் தொடர்ந்தாள்..  

"நீங்க ஜி  பே செஞ்சீங்க,  பார்த்தேன்.  எனக்கு  ஒரு 50 ரூபாய் கொடுங்க..  டிப்ஸ் கொடுக்கணும்..  நான் உங்களுக்கு ஜி பே பண்ணிடறேன்...  அதுக்குதான் நம்பர் கேட்டேன்..."

டிப்ஸ் 50 ரூபாயா?  ஆ.....!

என் அலைபேசி எண்ணையும் 50 ரூபாயையும் கொடுத்தேன்.  உடனே என் கணக்கில் 50 ரூபாய் வந்து விழுந்தது. 

புன்னகையுடன் தலையசைத்து விட்டு வந்தேன்.  புன்னகையுடன் தலையசைத்து உபரியாய் கையையும் அசைத்து அனுப்பினாள் அந்த நங்கை.

பாஸ் ஒரு வித கடுப்புடன் எனக்காகக் காத்திருக்காமல் முன்னதாக இறங்கிச் சென்று விட்டார்..

அந்தப் பெண்ணின் பெயர் வனஜா என்று மட்டும் தெரிந்தது.  நம்பர் XXXXX களால் மறைக்கப்பட்டிருந்ததை பாஸிடம் காட்டினேன்.  புன்னகைத்தவரிடம் சொன்னேன்.

"அவரிடம் என் நம்பர் இருக்கு.  அவராக நினைத்தால் தொடர்பு கொள்ளலாம்"

"தொல்லை விட்டது...  என்னவோ பண்ணிக்குங்க..."

(பின்குறிப்பு  :-  கொஞ்சம் நகாசுவுடன் மானே தேனே சேர்த்து எழுதப்பட்டிருக்கும் இதை நகைச்சுவையாய் மட்டும் எடுத்துக் கொள்ளவும்.  தவறாக நினைக்க வேண்டாம், சண்டைக்கு வரவேண்டாம்...  சம்பவம் நிஜமாக நடந்ததே....)

பின் பின் குறிப்பு  :-  சம்பவம் நடந்து நீண்ட நாட்களாகியும் இன்னமும் ஒன்றும் தகவல் வரவில்லை!!

=================================================================================================================

                                                                     நியூஸ் ரூம் 

                                               பானுமதி வெங்கடேஸ்வரன்   

- சீனாவில் நூற்றுக்கும் மேற்பட்ட உயிருள்ள பாம்புகளை காற்சட்டைக்குள் வைத்து கடத்த முயன்றவர் சுங்கத்துறை அதிகாரிகளால் கைது செய்யப்பட்டுள்ளார்.  ஹாங்காங்கிலிருந்து எல்லை நகரமான ஷென்சென் நகருக்கு செல்ல முயன்ற அந்த நபர் டேப் சுற்றப்பட்ட 6 பைகளை தனது காற்சட்டையில் மறைத்து வைத்திருந்தார்.  அவரைப் பிடித்து சோதனை செய்தபோது ஒவ்வொரு பைக்குள்ளும் ஒவ்வொரு வகையான, ஒவ்வொரு நிறமான பாம்புகள் உயிருடன் இருந்துள்ளன.

- புதைக்கப்பட்ட குழாயில் காஸ் கசிவு திடீரென உப்பிய ஆவடி சாலை  வீடுகளுக்கு குழாய் வாயிலாக காஸ் வினியோகம் செய்வதற்காக, சாலைகளில் குழாய் புதைக்கும் பணியை, தனியார் நிறுவனம் மேற்கொண்டு வருகிறது.​  அதன் ஒரு பகுதியாக, சென்னை - திருத்தணி தேசிய நெடுஞ்சாலை மற்றும் ஆவடியில் இருந்து பூந்தமல்லி செல்லும் சாலையில், குழாய் பதிப்பு பணி நடக்கிறது.​  இந்நிலையில், ஆவடி பேருந்து நிலையம், அண்ணாதுரை சிலை அருகே புதைக்கப்பட்டிருந்த காஸ் குழாயில், நேற்று முன்தினம், காஸ் அனுப்பி சோதனை செய்யப்பட்டது. அப்போது, குழாயில் காஸ் கசிவு ஏற்பட்டதால், வேகத்தடை அமைப்பு போல், சாலை மேடாக மாறியது.​  பின்னர் சரி செய்யப்பட்டது.

-  மும்பை, மஹாராஷ்டிராவில், வீடு புகுந்து திருடிய திருடன், அது மறைந்த மராத்தி எழுத்தாளரின் வீடு என்பது தெரிந்ததும் திருடிய பொருட்களை மீண்டும் வைத்துவிட்டு மன்னிப்பு கேட்ட சம்பவம் அரங்கேறி உள்ளது.

- 69 குழந்தைகளைப் பெற்று கின்னஸ் சாதனை புத்தகத்தில் இடம் பெற்ற ரஷ்யப் பெண். வாலண்டினா என்னும் விவசாய குடும்பத்தை ரஷ்ய பெண்ணிற்கு 16 பிரசவங்களில் 32 குழந்தைகள், 7 முறை மூன்று குழந்தைகள் பிறந்தனவாம், அப்படி 21 குழந்தைகள், ஒரே பிரசவத்தில் நான்கு குழந்தைகளை நான்கு முறை பெற்றிருக்கிறார், அப்படி பதினாறு குழந்தைகள். ஆக மொத்தம் 69 குழந்தைகள். மக்களை பெற்ற மகராசிதான்!

- இந்தியக் குடியுரிமையைத் துறந்து வெளிநாடுகளில் குடியேறும் குஜராத்திகள் எண்ணிக்கை அதிகரிப்பு.

- பெற்றோர்களுடன் நேரத்தை செலவழிக்க அரசு ஊழியர்களுக்கு இரண்டு நாள் விடுப்பு. அசாம் முதல்வர் பிசந்த் விஸ்வ சர்மா தனது அலுவலக எக்ஸ் பக்கத்தில் பகிர்ந்திருக்கிறார். மேலும் இந்த விடுமுறையை பெற்றோர்களோடு கழிப்பதற்கு மட்டுமே பயன்படுத்த வேண்டும்  தனிப்பட்ட கேளிக்கைகளுக்கு பயன்படுத்தக் கூடாது என்றும், பெற்றோர்கள் இல்லாதவர்களுக்கு இந்த விடுப்பு கிடையாது என்றும் தெரிவித்துள்ளார்.

- புவனேஷ்வர், ஒடிசா: தன்னை வரவேற்க விமான நிலையத்திற்கு சொகுசு கார் அனுப்பாத காரணத்திற்காக அதிகாரியை அடித்து,உதைத்ததோடு தன் ஷூவை நக்கவும் உத்தரவிட்டிருக்கிறார் அம்மாநில கவர்னரின் மகன் லலித் குமார். இது குறித்து போலீசில் புகார் அளித்தாலும் அது ஏற்றுக் கொள்ளப் படவில்லை என்று சம்பந்தப்பட்ட அதிகாரியின் மனைவி தெரிவித்திருக்கிறார்.

- புதுச்சேரியில் குவியும் குப்பைகளிலிருந்து இயற்கை உரம் தயாரித்து அசத்தல்.

- இத்தாலி பண்ணைகளில் அடிமைகளாக வேலை பார்த்த 33 இந்திய தொழிலாளர்கள் விடுவிப்பு. 15 லட்சம் கொடுத்தால் இத்தாலியில் நல்ல வேலை என்று ஏஜண்டுகளால் ஆசை  காட்டப்பட்டு இத்தாலிக்கு அனுப்பப்பட்ட விவசாயத் தொழிலாளர்கள் அங்கிருக்கும் பண்ணைகளில் அடிமைகளாக வேலை பார்த்து வந்திருக்கின்றனர். வாரத்தின் ஏழு நாட்களும் ஒரு நாளைக்கு 12 மணிநேர  வேலை, விடுப்பு கிடையாது. அப்படி வேலை பார்த்தபொழுது விபத்துக்குள்ளான முப்பத்தாறு வயதான சத்தன் சிங் என்பவருக்கு உரிய சிகிச்சை அளிக்காமல் பண்ணை முதலாளிகள் சாலையோரத்தில் கிடத்தி விட்டு சென்றதால் அவர் மரணமடைந்துள்ளார். இது அந்நாட்டில் அதிர்ச்சி அலைகளை எழுப்பி, அரசு நடவடிக்கை எடுத்து அடிமைகளாக இருந்த 33 இந்திய தொழிலாளர்களை மீட்டுள்ளது. அதோடு அவர்களுக்கு பாதுகாப்பு மற்றும் வேலைக்கு ஏற்பாடு செய்யப்படும் என்று உறுதி அளிக்கப்பட்டுள்ளது.

- பின்தொடர்வோர் எண்ணிக்கை 10 கோடியை எட்டியது. எக்ஸ் தளத்தில் பிரதமர் மோடி முதலிடம்.

- உ.பி., தியோரியா மாவட்டத்தில் உள்ள ஆனந்த் நகர் கிராமத்தில் திருமண விருந்தில் அசைவம் இல்லை என்பதற்காக பெண் வீட்டார்களை தாக்கி திருமணத்தை நிறுத்திய மாப்பிள்ளை வீட்டார். இதைத் தொடரந்து போலீசில் அவர்கள் மீது புகார் அளித்த பெண்ணின் தந்தை இந்த திருமணத்திற்காக மாப்பிள்ளை வீட்டாருக்கு ரூ.4 லட்சம் வரதட்சணை அளிக்கப்பட்டது எனவும், மாப்பிள்ளைக்கு ₹20,000 மதிப்பில் இரண்டு மோதிரங்கள் போட்டிருப்பதாகவும் மணப்பெண்ணின் தந்தை குறிப்பிட்டிருக்கிறார்.

- தமிழ்நாடு: உயர்த்தப்பட்டுள்ள மின்சார கட்டணத்தால்  குறுந்தொழில்கள் முடங்கும் அபாயம் - அதனால் என்ன? இலவசங்கள் கிடைக்கிறதே.

- ஒரே நாளில் (24 மணி நேரத்தில்) 11லட்சம் மரக்கன்றுகளை நட்டு இந்தூரில் சாதனை. இதற்கான அதிகாரபூர்வமான சான்றிதழை கின்னஸ் அமைப்பிடமிருந்து மத்திய பிரதேச முதல்வர் மோகன் யாதவ் பெற்றுக் கொண்டார் - நல்ல விஷயம்தான்,நடப்பட்ட மரக்கன்றுகள் பராமரிக்கப்படுவது இந்த செயலை அர்த்தமுள்ளதாக்கும்.

-

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

நுரையீரல் நோய்களுக்கு என்று நிபுணத்துவம் பெற, தனிப்படிப்புகள் உண்டா?

உண்டு.  MD(Chest) படிக்கலாம்.  DTCD (DIPLOMA IN TUBERCULOSIS AND CHEST DISEASES) என்று ஒரு படிப்பு உல்ளது.  இதுபோக D.M (DOCTOR OF MEDICINE) PUMONARY MEDICINE படிக்கலாம்.  மேலும் DNB (Diplomate Of National Board) Pulomonology படிக்கலாம்.  இதெல்லாம் போக, வெளிநாடு சென்றும் படிக்கலாம்.

கேள்வி  :  ஆஸ்துமா என்றால் என்ன?  அது எப்படி ஏற்படுகிறது?

டாக்டர் ராஜ்.பி.சிங்  :  Trachea  எனப்படும் மூச்சுக் குழாய் இரண்டாகப் பிரிந்து பின்பு திராட்சை கொத்தின் கிளைகள் போல சின்ன சின்னதாக 23 முறை கிளைகளை பரப்பி நுரையீரல் முழுக்க ஆக்சிஜனை கொண்டு செல்லும் வகையில் அமையப்பெற்றுள்ளது.  மேலும் ஏராளமான சுரப்பிகள் மூலம் நுரையீரலில் சளி உற்பத்தியாகி கொண்டே இருக்கும். இந்தச் சளியை நாம் நம்மை அறியாமல் உணவு குழாய் மூலம் விழுங்கிக் கொண்டுதான் இருக்கிறோம்.  இந்த சளி நமக்குள் இருப்பதால்தான் நாம் சுவாசிக்கும் காற்றில் உள்ள கசடுகள் அழுக்குகள் எல்லாம் நுரையீரலுக்குள் சேராமல் அந்த சளியில் படிந்து உடனுக்குடன் வயிற்றுக்கு அனுப்பப்படுகின்றன.  எப்படி நமக்குள் எச்சில் ஊறுகிறதோ,  அதேபோல சலியும் நாள் ஒன்றுக்கு இரண்டு லிட்டர் வரை ஊறிக் கொண்டுதான் இருக்கும்.  இந்த ஆஸ்துமா நோய் வந்துவிட்டால் நுரையீரலின் உட்புற சுவர்கள் சிவந்துவிடும்.  எரிச்சல் ஏற்படும்.  இதனால் இருமல் உண்டாகும்.  சளி அதிகமாக சுரக்கும்.  மூச்சு குழாய் சுருங்கிவிடும்.  இதனால் மூச்சை இழுக்கும் போதும் சிரமம் ஏற்படும்.

இவைதான் ஆஸ்துமாவினுடைய அறிகுறி இந்த வியாதி எதனால் வருகிறது என்பது இன்று வரை யாருக்கும் தெரியாது.  ஒருவகையான அலர்ஜியால் வரலாம் என்று கணிக்கப்பட்டுள்ளது.  பரம்பரையாகவும் இந்த வியாதி வர வாய்ப்புள்ளது.  பல பேர் தனக்கு ஆஸ்துமா வியாதி இருப்பதாக வெளியில் சொல்லிக் கொள்ள விரும்புவதில்லை.  அதை ஒரு அவமானமாக கருதுகிறார்கள்.  அதையே இஸ்நோபிலியா என்றால் சிரித்த முகத்தோடு ஏற்று கொள்கிறார்கள்.  சில பேர் இதை டஸ்ட் அலர்ஜி என்ற பெயரில் அழைத்துக் கொள்கிறார்கள்.  இப்போது சமீப பத்தாண்டுகளாக வீசிங் ட்ரபுல் என்று சொல்ல ஆரம்பித்திருக்கிறார்கள்.  என்னை பொறுத்தவரை நாம் நமக்கு இருக்கும் நோயை சரியாக தெரிந்து கொள்ள வேண்டும்.  அதை ஏற்றுக்கொள்ள வேண்டும்.  அப்போதுதான் அதை எதிர்த்து வெல்ல முடியும். நம்மை நாமே ஏமாற்றிக் கொள்ளும் முயற்சிகள் இறங்கக்கூடாது.  இப்போதெல்லாம் இன்டர்நெட்டில் நோயின் பெயரை போட்டாலே அதன் தன்மை என்ன, அதன் அறிகுறிகள் என்ன,  அதனுடைய விளைவுகள் என்ன,  அதற்கு என்ன மாதிரியான மருத்துவம் தேவை,  எவ்வளவு நாட்கள் வைத்தியம் பார்க்க வேண்டும் என்ற எல்லா விவரங்களும் கிடைத்து விடுகின்றன.  ஆகவே நோயை பார்த்து பயப்படாமல் அதன் பெயரை மாற்றி சொல்லி நம்மை நாமே ஏமாற்றிக் கொள்ளாமல் எந்த நோய் நமக்கு வந்திருக்கிறதோ, அந்த நோயை முழுமையாக அறிந்து அதற்குரிய மருத்துவம் செய்ய நாம் நம்மை தயார்படுத்திக் கொள்ள வேண்டும்.

குடிப்பழக்கத்தை நிறுத்தினால் லிவர் தானாகவே சரியாவது போல புகைபிடிப்பதை நிறுத்தினால் நுரையீரல் சரியாகும்?

 டாக்டர் ராஜ் பி சிங் :  புகையினால் நுரையீரல் பாதிப்படைந்து விட்டால் அது மீண்டும் பழைய நிலைக்கு வர வாய்ப்பே இல்லை.  புகைபிடிப்பது சுற்றுச்சூழல் பாதிப்பு போன்றவற்றினால் சிஓபிடி வரும்.  அதிக அளவில் புகைப்பிடிப்பவர்களுக்கு காலையில் எழுந்ததும் ஒரு இருமல் வரும்.  அதன் மூலம் சளி வரும். ம்யூக்கஸ் இன் லங்ஸ் ஆரோக்கியமான மனிதனுக்கு சராசரியாக உடலில் சளி உற்பத்தியாகி மூக்கு மற்றும் தொண்டை மூலமாக வெளியில் வந்துவிடும்.  புகைப்பிடிப்பதினால் ம்யூக்கஸ் மெம்பரையின் பாதிப்படைந்து விடும். இந்த மியுகஸ் மெம்பரின் மட்டுமே சளியை நம்முடைய நுரையீரலில் இருந்து வெளியில் தள்ளும் பணியை செய்யும். இது பாதிப்படைந்து விட்டால் சளி வெளியேறாமல் நுரையீரலிலேயே தங்கிவிடும். இரவு தூங்கும் பொழுது சளி நுரையீரலில் தங்குவதால் தான் புகை பிடிப்பவர்களுக்கு காலையில் இருமல் வருகிறது. சளியை வெளியேற்றும் உறுப்பு புகைப்பிடிப்பதனால் பாதிப்படைகிறது என்பதுதான் உண்மை. எப்படி ஆஸ்துமா நோய்க்கு மூச்சு குழாய் சுருங்கி இருக்குமோ, அதே போல புகைபிடிப்பவர்களுக்கும் மூச்சு குழாய் சுருங்கி இருக்கும். ஆஸ்துமா நோயினால் மூச்சுக் குழல் சுருங்கி இருந்தால் நெபுலைசர் மூலமாக ஒரு அளவிற்கு அதை விரிவுபடுத்த முடியும். ஆனால் புகைப்பிடிப்பவர்களுக்கு அப்படி செய்ய முடியாது. எனவே கிரானிக் பிராங்க்கைடிஸ் நோயைவிட ஆஸ்துமா நோய் சிறியது.  கிரானிக் பிராங்க்கைடிஸ் என்பது புகைப்பிடிப்பவர்களுக்கு மட்டுமே வரும் நோய் என்று சொல்லிவிட முடியாது. ஆனால் புகை பிடிப்பவர்களுக்கு கண்டிப்பாக இந்த நோய் வரும் என்று சொல்லலாம்

- சில வருடங்களுக்கு முன் எஸ் ஜே இதயா ஏற்பாடு செய்து துக்ளக்கில் வந்த கேள்வி பதில்.

===========================================================================================

கோமதி அக்கா தனது பதிவில் பீப்பாய் படம் போட்டு அலிபாபாவும் 40 திருடர்களும் பாடல் போட்டார்கள்.  நான் அதில் கவரப்பட்டு ஓட்டி ஓட்டி முழுப் படத்தையும் ஒருதரம் யு டியூப் சென்று பார்த்தேன்.  அந்தப் படத்தின் டைட்டிலில் வஹீதா ரஹ்மான் பெயர் இருந்தது.  ஏதோ ஒரு நாட்டியக் காட்சியில்தான் வந்திருக்க வேண்டும்.  கண்ணில் படவில்லை.   பின்னர் ஹிந்திப் படங்களில் அவர் கோலோச்சினார் என்பது நீங்களும் அறிந்ததே....

=======================================================================================================

ரசித்த, பழைய புகைப்படங்கள்...

ஹிட்லர் தன்னைப்போலவே ஏழெட்டு பேரை வைத்திருப்பாராம்.  ஆனால் சுபாஷ் கரெக்ட்டாக ஒரிஜினல் ஹிட்லர் வந்தததும்தான் எழுந்து கைகொடுத்தாராம்.  - எங்கோ படித்தது.

செங்கோல் எங்கே பிரதர்....

====================================================================================================

முன்பொரு கவிதை...  

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

பொக்கிஷம்...