"திங்க"க்கிழமை : பூசணி உ. கி கூட்டு, துவையல். - கமலா ஹரிஹரன் ரெஸிப்பி

 

கூட்டும், துவையலும், கூட்டின் முறையும்...

 பூசணி உ. கி கூட்டு, துவையல்.

வணக்கம் சகோதர சகோதரிகளே 

இன்று சமையல் பதிவுடன் வந்திருக்கும் என் அன்பான அறுவைகளை சற்றுப் பொறுத்துக் கொள்ளுங்கள். அப்படி பொறுக்க இயலவில்லையெனில், பேசாமல் மன்னித்து விடுங்கள். :)) 

சிகப்பு பூசணிக்காய் முழுதானதாக ஆனால் சின்னதாக மற்ற காய்களுடன் சென்ற வாரம் ஒருநாள் வாங்கினேன். (பூசணி என்றதும் எனக்கே நான் இறுதியில் எழுதிய கற்பனை கதையின் முடிவின்  உறுத்தல் நினைவுக்கு வருகிறது. உங்களுக்கும் அப்படி  வந்திருக்குமானால், "கொன்றால் பாவம். தின்றால் போச்சு." என சமாதானத்துடன் விட்டு விடலாம்.. என்ன நான் சொல்வது.. சரிதானே..!! ) 

பார்டா!!! சந்தடி சாக்கில் இவர்களின் பதிவுக்கு   இப்படி ஒரு விளம்பரமா..? ஆகா.. தாங்க முடியவில்லையே...!! என  (நீங்கள் காதை பொத்திக்கொண்டு, இல்லையில்லை, கண்களை ஆயாசமாக மூடிக் கொண்டு) மனதுக்குள் லேசாக முணுமுணுப்பது  எனக்கும் லேசாக கேட்கிறது./தெரிகிறது. ஹா. ஹா. ஹா. 

அதில் அது (சிகப்பு பூசணிக்காய்) சில நாள் கு. சா. பெட்டியில் பொறுமையாக காத்திருந்து பின் ஒரு கால் வாசி ஒருநாள் சாம்பாராக பயன்பட்டு புண்ணியம் தேடிக் கொண்டு விட்டது. மீதி இருப்பவை கொண்டு இருவிதமாக செய்தால், (துவையலும், கூட்டும்.) ஒருநாள் சமையல்பாடு கழிந்து விடும் என்பதற்காக இந்த சிறு முயற்சி. 

இது சுத்தமாக கழுவிய பின் (இருக்கிற தண்ணீர் பிரச்சனையில் ஒரு தடவைக்கு இரண்டு தடவையாக வேறு கழுவினேன். :)) ) தோல், (அதனுடனேயே  பூசணியில் உள்ளிருக்கும் பகுதிகள் மட்டும் கூடவே. ) சற்று பட்டையாகவே எடுத்து தனியே வைத்திருக்கும் படம். 

இது தோல் நீக்கிய காயை பொடிதாக கூட்டுக்காக அரிந்து வைத்திருப்பவை.

துவையலுக்கு தேவையான மி. வ. நான்கு, இரண்டு ஸ்பூன் க. ப, இரண்டு ஸ்பூன் உ. ப, கொஞ்சம் கடுகு என கடாயில் சிறிது சமையல் எண்ணெய் விட்டு வறுத்து வைத்திருக்கும் தயாரிப்பு படம். 

இது அதே கடாயில், துவையலுக்கான பூசணித் தோலுடன் சேர்ந்த காய்களை போட்டு ஒரு தம்ளர் தண்ணீருடன் வேக வைத்த படம். 

வறுத்து எடுத்த பருப்புக்கள், மி. வ காரத்துடன் கொஞ்சம் புளி, கல் உப்பையும் சேர்த்து வைத்து விட்டால் அது சிறிது ஆறியதும் மிக்ஸியில், முதலில் போட சௌகரியமாக இருக்கும். 

, 

அரிந்து வைத்த காய்களுக்கு தாளிப்பாக முதலிலேயே சிறிது கடுகு, ஒரு ஸ்பூன் மசூர்தால் ( இதுவும் ஒரு வித்தியாசத்திற்குத்தான்) போட்டு, தேவையான உப்பையும் போட்டு விட்டேன். ஒரே கடாயில் எல்லாவற்றையும் இப்படி செய்து வைத்துக்கொண்டால் கடாய் உபயோகம் குறைவாக இருக்கும். (இங்கு இப்போதுள்ள தண்ணீர் சிக்கனத்திற்கும் வழி வகுக்கும்.) துவையலுக்கான காய் கலவைகள் வெந்து எடுத்ததும் இதையும் அதிலேயே வேக வைத்து விடலாம். 

 

பூசணியின் காய்கள் கூட்டுக்கு கொஞ்சம் குறைவாக இருப்பதாக தோன்றவே, கிட்டத்தட்ட ஒரே குணமுடைய உ. கி யிடம்,  "இந்த  சிகப்பு பூசணியுடன் இன்று நீயும் தயவு செய்து கொஞ்சம் ஒத்துழைத்து போகிறாயா?" என்று கேட்டேன். அது சிறிது யோசித்து விட்டு பிறகு அரை மனதுடன் சரியெனவும், அது மனம் மாறுவதற்குள், அதையும் அவசரமாக தயார் செய்தேன். (இந்தப் பதிவின் தலையில் நான் வைத்த தலைப்(பாகைக்கு)புக்கு இப்படி ஏதாவது சொல்லி தப்பிக்க வேண்டுமே...! அப்பாடா..!! ஒரு வழியாக தப்பித்தாகி விட்டது. :)) ) 

இரு வகை காய்கள் வெந்து, வறுத்த சாமான்கள் அரைப்பதற்கு ஆறுவதற்குள் ஒரு சிறு கதை. 

அறுபத்துமூவர் நாயன்மார்களில் ஒருவரான இளையான்குடி மாறநயினார் பெருத்த செல்வந்தராக இருந்த போதும் சரி, இறைவனின் லீலையால் , வறுமை சூழ்ந்து ஏழ்மையில் தவித்த போதும் சரி, ஈசனிடம் வைத்த அளவு கடந்த பற்று காரணமாக, இறைவனின் அடியார்களுககு தினமும் உணவளித்து உபசாரம் செய்விக்க வேண்டுமென்ற கொள்கையில் மாறாதிருந்து சிறந்து விளங்கினார். இதன் காரணமாக அவரது செல்வங்கள் கரைந்து ஒன்றுமேயில்லாத நிலைமைக்கு வந்தும் கூட அவர் மனந்தளரவில்லை. 

 

இவரின் இச்சிறப்பை உலகத்திற்கு உணர்த்த எண்ணம் கொண்ட இறைவன் ஒரு மழை கால இரவில், நாயனார் வறுமையின் பிடியில் சிக்கி தவித்துக் கொண்டிருக்கும் அந்த வேளையில், அன்னம் புசிப்பதற்காக ஒரு அடியவர் வடிவம் கொண்டு இவரிடம் வரவே அன்று வீட்டில் ஏதுமில்லாத நிலை கண்டும் மாறநயினாரும், அவர் மனைவியும் மனம் கலங்கவில்லை. 

மாறாக, காலையில்தான், ஒதுக்குப்புறமாக  இருக்கும் தன் சிறிதளவான நிலத்தில் விதைத்திருந்த விதை நெல்லை,பெய்து கொண்டிருக்கும் அந்த பெரும் மழையையும்,இரவின்  இருளையும் பொருட்படுத்தாமல் அக்கழனிக்குச் சென்று அவற்றையெல்லாம் சேகரித்து அள்ளி வந்து தம் மனைவியிடம் தந்தார். 

மழையில் ஈரம் சொட்ட அந்நேரம் வரை மிதந்திருந்த நெற் கதிரினின்று அந் நெல்லை, பிரித்தெடுத்து வறுத்து குத்தி அரிசியாக்க, ஈரமில்லாத விறகு இல்லாத காரணத்தால், தங்கள் குடிசையின் பின் பகுதி ஓலைகளுக்கு முட்டு தந்திருந்த மூங்கில் சிலாச்சுகளை உருவியெடுத்து அதை விறகாக பயன்படுத்தி, அந்நெல்லை வறுத்து உரலில் குத்திப்புடைத்து அரிசியாக்கி சுவையான அன்னம் சமைத்தார் அந்த புண்ணியவதி. 

அன்னத்திற்கு உறுதுணையாக காய்கனிகள் ஏதுமில்லாத அந்த நிலையில் வீட்டின் பின்புறம் தாம் வளர்ந்திருந்த கீரைகளை பறித்து வந்து அதையே விதவிதமாக, பலவிதங்களில் சுவை மிகும்படிக்கு கூட்டு, பொரியல், என சமைத்து முடித்ததும், அந்த விபரத்தை கணவரிடம் தெரிவித்தார். 

பின்னர் கூடத்தில் அமர்ந்து பசியால் கண்ணயர்ந்து அமர்ந்து  கொண்டிருந்த அந்த சிவனடியாரரை நோக்கி வந்து அன்போடு அவருக்கான உணவு தயாராகி விட்டதெனவும், சமையல் செய்ய நேரம் கடத்தி விட்ட தங்கள் செயலுக்கு உள்ளம் உருகி விட்ட அன்போடு மன்னிப்பு கேட்டபடியும், தம்பதியர் இருவரும் அடியாரின் அடிபணிந்து அழைத்தார்கள். 

அப்போது ஜோதிப்பிளம்பாக உமையவளோடு காட்சி தந்த இறைவன் "இத்தனை வறுமை சூழலிலும், எத்தனை இக்கட்டான பொழுதினிலும், தன்மீது இந்த தம்பதிகள் வைத்திருக்கும் ஆழமான பக்தியை, இவர்களின் அன்பை உலகிற்கு பறை சாற்றிடவே தான் அடியார் வேடத்தில் வந்ததாகக் கூறி" , இருவருக்கும் இப்பிறவியில் கைலாய வாசம் செய்ய வரமருள் செய்து விட்டு  மறைந்தார். 

நாயன்மார்கள் கதைகளில்,அத்தனை கதைகளும் சிறந்த வைரங்கள் என்றால், இந்தக் கதை என்னால் மறக்க இயலாத அபூர்வமான ஒரு பொக்கிஷ கதை. இவர்களுக்குத்தான் இறைவனிடம் எத்தனை அன்பு. பற்று. இரவென்றும் பாராமல் அந்த கணவரின் மனதிற்கு தகுந்த மாதிரி நடந்து கொள்ளும் மனம் படைத்த அந்த மனைவியான புண்ணியவதி முற்பிறவியில் எத்தனை பாக்கியம் செய்திருப்பார். 

இந்த மாதிரி நான் ஒரே காயை வைத்து  சமையல் செய்யும் போதெல்லாம், இந்தக்கதை என்  நினைவுக்கு வர தப்புவதில்லை. எங்கள்  குழந்தைகளிடம் இக்கதையை சொல்லவும்  தவறுவதில்லை. அதுவும் என்  மனக்கண் முன்னே அன்றே புதிதாக நடப்பது போன்றே மனதுக்குள் அந்தகாட்சிகளை கண்டு அந்த சிவனடியார்களை உள்ளம் கனிந்து தொழுது பூரித்திருக்கிறேன். 

அவர்கள் அன்பில் மூழ்கி செய்த அந்த சமையலில்தான் எத்தனை அபாரமான ருசிகள் இருந்திருக்கும். அந்தளவிற்கு என்  பாகத்தில் சுவை ஏதும் கூட்டாது. இருப்பினும் என்னாலான சமையலை பகிர்ந்து, நான் ரசிக்கும் இந்தக் கதையையும் (இது உங்களுக்கும் ஏற்கனவே தெரிந்திருப்பினும்,) உங்களுடன் பகிர்ந்துள்ளேன். அன்போடு பார்த்து கேட்டதற்கும் என் பணிவான நன்றிகள். 

அரைத்த துவையலில் சற்று பெருங்காய பொடி சேர்ந்து கலந்து விட்ட பின் சாதத்தில் கலந்து சாப்பிட பறங்கிகாய்  துவையல் ரெடி. 

அதே மிக்ஸியில் தேங்காய் சீரகம், இரண்டு மி. வத்தல் சேர்த்து நன்கு அரைத்து, (கறிவேப்பிலை, அல்லது கொத்தமல்லி தழைகள் என வீட்டில் இருந்தால் இதன் கூடவே சேர்ந்து அரைக்கலாம்.) அந்த விழுதை  விட்டு ஒரு கொதி சேர்ந்து வந்ததும், துவையல் சாதத்திற்கு தொட்டுக் கொள்ள இந்த கூட்டும் ரெடி. 

ஒரு சேர கொதித்து வந்ததும், அடுப்பை நிறுத்தும் போது ஒரு ஸ்பூன் தேங்காய் எண்ணெய் விட வேண்டும். துவையல் சாதமும், அதன் துணையாக கூட்டும் தயார் ஆகி விட்டது. இனி என்ன  அழகாக, திருப்தியாக சாப்பிடலாமே.. .!!

இதுவரை திங்களோடு சேர்ந்து செவ்வாயாகவும் மலர்ந்த சமையல், மற்றும் ஆன்மிக கதை கேட்ட சகோதர சகோதரிகள் அனைவருக்கும் என் அன்பான, பணிவுடைய நன்றிகள். 🙏.