'திங்க'க்கிழமை : கொடிப் பசலை பனீர்க் கூட்டு - துரை செல்வராஜூ ரெஸிப்பி

 சிறப்பு மிகும் கீரை வகைகளில் பசலையும் ஒன்று.. 

கண்களுக்கும் நரம்பு மண்டல ஆரோக்கியத்திற்கும் நோயெதிர்ப்பு சக்தி அதிகரிப்பதற்கும் கொடிப் பசலை நல்லது..

இரும்புச் சத்து மிக்க கொடிப் பசலையினால், ரத்தம் சுத்தமாகின்றது.. ரத்தம் விருத்தியாகி சிவப்பணுக்கள் குறைவு எனும் பிரச்னையும் தீர்கின்றது..

இப்படியான  கொடிப் பசலைக் கீரையுடன் வீட்டில் தயாரிக்கப்பட்ட பனீர் சேர்த்து பருப்புக் கூட்டு..

வளைகுடா நாட்டிற்கு சென்ற பிறகு தான் பனீர் பற்றி எனக்குத் தெரியும்.. 

கேரளத்து நண்பர் ஒருவர் சொன்னதன் பேரில்  இப்படியான பசலை பனீர்க் கூட்டு எனக்கு விருப்பமானதாகி விட்டது.. 

தினசரி சொந்தச் சமையல் என்றாலும் வாரம் இருமுறை கொடிப் பனீர்க் கூட்டு..  நானே செய்து கொள்வேன்..

அங்கே  செய்த பனீர்க் கூட்டு இன்றைய திங்கள் குறிப்பு..

இதனின்று மாறுபட்ட செய்முறைகளும் இருக்கின்றன..

வேறு கீரைகளுடன் பனீர் சேர்த்து செய்வது அவரவர் விருப்பம்..

                               

பசலை பனீர்க் கூட்டு

தேவையானவை: 

பசலைக் கீரை கைப்பிடி 

(கை நிறைந்த அளவு)

பயற்றம் (பாசிப்) பருப்பு 100 gr

பனீர் 100 gr

பெரிய வெங்காயம் ஒன்று 

பச்சை மிளகாய் 2

இஞ்சி சிறிது

பூண்டு 2 பல்

மஞ்சள் தூள் 1⁄2 tsp

சீரகம் 1⁄2 tsp

மிளகுத் தூள் 1 tsp

கல்உப்பு தேவையான அளவு

 தாளிப்பதற்கு

கடுகு, கறிவேப்பிலை,

கடலெண்ணெய்,   தேவையான அளவு

செய்முறை:  பயற்றம் பருப்பை சுத்தம் செய்து கொண்டு சரிக்கு சரி தண்ணீருடன் வேக வைக்கவும்.. 

பசலைக் கீரையை சுத்தம் செய்து நறுக்கி சிறிது நீருடன் வேக வைத்துக் கொள்ளவும்..

பூண்டு இஞ்சியை சுத்தம் செய்து விழுதாக்கவும்..

வெங்காயத்தை தோல் உரித்து மெல்லியதாகவும்  பச்சை மிளகாயை நீளவாக்கிலும் கீறி வதக்கிக் கொள்ளவும்..

இந்நேரம் பயற்றம் பருப்பு அரை வேக்காட்டில் இருக்கும்.. 

இதனுடன் கீரை,  இஞ்சி பூண்டு  விழுது மஞ்சள் தூள் மிளகுத் தூள் சீரகத்துடன் உப்பு போட்டு மேலும் சிறிது தண்ணீர் விட்டு மிதமான சூட்டில் வைக்கவும். 

கொதித்து வரும்போது  பனீரை துண்டுகளைச் சேர்க்கவும். முதல் கொதி வந்ததும் வாணலியில் எண்ணெய் விட்டு கடுகு கறிவேப்பிலை தாளித்து இறக்கவும்