கண் மூடி இருக்கும் கன்னி..

 

நியூஸ் ரூம் 

பானுமதி வெங்கடேஸ்வரன் 

- அயன் பட பாணியில் உணவை மறுத்த ஏர் இந்தியா பயணி கைது செய்யப்பட்டார்.  உணவை மட்டுமல்ல தண்ணீரைக் கூட அந்த ஐந்தரை மணி நேரப் பயணத்தில் அவர் மறுத்தே வந்தது பணிப்பெண்களுக்கு வினோதமான இருக்க, அவர்கள் மூலம் அந்த நபர் பிடிபட்டிருக்கிறார்.

​- ஏர்-இந்தியாவில் 1000+ பணியிடங்களுக்கான தேர்விற்கு நேரில் விண்ணப்பிக்கலாம் என்ற அறிவிப்பை தொடர்ந்து மும்பையில் திரண்ட 15000+ இளைஞர்கள்.

- நம் நாட்டில் எளிய மக்கள் பயன்படுத்தும் வார் வைத்த ரப்பர் செருப்பு குவைத்தில் 45,000 ரியாலுக்கு அதாவது இந்திய மதிப்பில் ஒரு லட்ச ரூபாய்க்கு விற்கப்படுகிறது. இந்த செய்தி இண்ஸ்டாவில் வைரலானது. இந்த வகை காலணிகளை இப்போது இந்தியர்கள் கழிவறைக்குச் செல்லவே பயன் படுத்துகிறார்கள் என்றும் சிலர் இண்ஸ்டாவில் குறிப்பிட்டிருக்கிறார்கள்.

- பெரிதும் வெறுக்கத்தக்க உணவுகளில் முதலிடம் பிடித்திருப்பது ஜல் ஜீரா.  இதைத் தொடர்ந்து கஜக், தேங்காய் சாதம், பண்டா பட், ஆலு பைங்கன், *தண்டை, மிர்சி கா சலன், மால் புவா இதைத் தொடர்ந்து உப்புமா:)).

- பெரிதும் விரும்பப்படும் உணவுகளில் மாங்கோ லஸ்ஸி இடம் பிடிக்கிறது. அதைத் தொடர்ந்து மசாலா சாய், கார்லிக் நான், தந்தூரி ரொட்டி போன்றவை இடம் பிடிக்கின்றன.  கேள்வியேபடாத இந்த உணவுகள் எந்த மாநிலத்திற்குரியவை என்பது தெரியவில்லை. அதன் சரியான உச்சரிப்பும். தெரிந்தவர்கள் கூறுங்கள்.

- புது டில்லி: உ.பி. அரசுப் பள்ளிகளில் 'கற்றுப் பார்' என்று ஒரு கல்வி திட்டம் அமல்படுத்தப்படுகிறது. இதன் கீழ் மாணவர்கள் கல்வியோடு சுய தொழிலையும் கற்கலாம் என்னும் திட்டத்தின் கீழ் தேர்ந்தெடுக்கப்பட்ட 26 அரசுப் பள்ளிகளில் மாணவர்களுக்கு டீ தயாரிப்பது, பக்கோடா போடுவது, பஞ்சர் ஒட்டுவது, பழச்சாறு தயாரித்தல், விவசாயம், தச்சு வேலை போன்றவற்றை ஆசிரியர்கள் போதிக்க வேண்டும். மாணவர்களின் எதிர்காலத்திற்கு இவை உதவும்.

- பெங்களூரு: 2004 ஆம் ஆண்டு, செப்டெம்பர் மாதம் நடந்த அறுவை சிகிச்சையின் பொழுது பத்மாவதி என்னும் பெண்ணின் வயிற்றுக்குள் ஊசியை வைத்து தைத்த தீபக் மருத்துவமனை மீது வழக்கு தொடர்ந்தார். இருபது வருடங்கள் கழித்து இப்போது பாதிக்கப்பட்ட அந்த பெண்ணிற்கு ₹500,000 வழங்கப்பட வேண்டும் எனவும், இந்த தவறை செய்த இரு மருத்துவர்களும் அந்த பெண்ணிற்கு தலா ₹50,000 கோர்ட் செலவுகளுக்காக தர வேண்டும் எனவும் கோர்ட் உத்தரவிட்டுள்ளது.

-  

==============================================================================================

திறமைக்கும் படிப்புக்கும் சம்பந்தமில்லை.  அனுபவங்கள் அதை நமக்கு மீண்டும் மீண்டும் உணர்த்திய வண்ணமே உள்ளன.  நாம்தான் உடனடியாக அவற்றை மறந்து விடுகிறோம்.

மாத்தி யோசிக்கும் கலை மட்டுமல்ல, பிரச்னை பற்றிய தெள்ளிய அறிவு..

சில கதைகளை நினைவு படுத்துகிறேன், நீங்களும் படித்திருப்பீர்கள்.

ஒரு சிறிய பாலத்தின் அடியில் சுமை ஏற்றிவந்த ஒரு லாரி மாட்டிக்கொள்ள, பாலத்தின் உயரம் பற்றி தெரியாமல், அளவெடுக்காமல் அடுக்கி விட்டார்களே என்று விவாதம் நடக்கிறது.  பாலத்தில் பாதி மாட்டிக் கொண்டிருக்கும் லாரியை எப்படி விடுவிப்பது என்று மண்டையை உடைத்துக் கொள்கிறார்கள்.  சுமையை உருவி உருவி எடுத்து உயரத்தை குறைக்கலாம் என்கிறார் ஒருவர்.  பாலத்தின் மேல்பகுதியை சீவி விடலாம் என்கிறார் ஒருவர்.  முடிவெட்டாமல் முடிவெடுக்காமல் திண்டாடும் நிலையில் அங்கு வந்த ஒரு எளிய கிராமவாசி சொல்லும் யோசனை சிறந்ததாகப் படுகிறது.  வெற்றியும் பெறுகிறார்கள்.  

அவர் சொன்னது லாரியின் நான்கு டயர்களிலும் கொஞ்சம் காற்றைக் குறைத்து விடுங்கள் என்பதாகும்.  இதே காற்றிறக்கும் யோசனையை ஒரு புகழ்பெற்ற கார் தயாரிக்கும் நிறுவனம் தயாரித்த காரை கம்பெனி கேட் தாண்டி வெளியில் எடுக்க முடியாத நிலை வரும்போதும், அங்கு ஒரு தொழிலாளி இதே போல யோசனை சொல்வதாகவும் படித்திருக்கிறோம்.

இன்னொரு கதை, பங்ச்சரான டயரை ஸ்டெப்னி கொண்டு மாற்றும் ஒருவர், டயரை மாட்டும் சமயம் அதன் ஸ்க்ரூஸ் அருகிலுள்ள ஆழமான ஓடையில் விழுந்துவிட, அங்கு வந்த ஒரு கிராமத்து ஆளை (இங்குமா?  கிராமத்து ஆள் என்றால் எவ்வளவு இளப்பமாக பார்க்கிறார்கள் பாருங்கள்!) ஓடையில் குதித்து திருகாணிகளை எடுத்துத் தரச்சொல்ல, அவர் மறுத்து அவரும் ஒரு எளிய யோசனையைச் சொல்கிறார்...  

மற்ற மூன்று டயர்களிலிருந்தும் திருகாணிகள் இரண்டிரண்டு கழற்றி இதில் மாட்டி, அருகிலுள்ள மெக்கானிக் ஷாப் வரை சென்று, அங்கு சரி செய்து கொள்ளலாம் என்கிறார்.  'இது ஏன் எனக்கு தோன்றாமல் போயிற்று?' என்று யோசிக்கிறார் அவர்.

'வாட்ஸாப்'பில் வந்த நகைச்சுவை கதை ஒன்று...  ஒரு பாய் தனது வலதுகால் பச்சை நிறமாய் மாறிப்போவதாக ஒரு மருத்துவரை அணுகுகிறார்.  ஏதேதோ மருந்து கொடுத்து .பார்க்கிறார் மருத்துவர்.  பிரச்னை அப்படியே இருக்க, வலது காலை முழங்கால் வரை வெட்டி எடுத்து விடுகிறார்.  நிம்மதி.  அது கொஞ்ச நாள்தான்.  மறுபடி இடது காலில் அதே மாதிரி வருகிறது.  மருத்துவர் இடது காலையும் முழங்கால் வரை எடுத்து விடுகிறார்,  கொஞ்ச நாள் சென்று மறுபடி பாய் பிரச்னையோடு வர, மருத்துவர் வலது தொடையை வெட்டும் முன் யோசிக்கிறார்.  அப்போதுதான் அவருக்கு விஷயம் விளங்குகிறது..   "பாய்..  நீங்கள் உடுத்தும் பச்சை கைலி சாயம் போகிறது ..  அதுதான் பிரச்னை" என்கிறார்.  இது அசாத்தியம் என்று தோன்றலாம்.  ஆனால் அபப்டியும் இருக்கிறார்கள். 

எனக்கு ஒற்றைத் தலைவலி பாடாய்ப் படுத்தியபோது மருத்துவரைப் பார்க்கச் சென்றேன்.  நான்கைந்து கேள்விகள் கேட்டதுமே அவர் என்னை ஸ்கேன் எடுக்கச் சொல்லி விட்டார்.  முதலில் மூளையில் டியூமர் இருக்கிறதா என்பதை ரூல் அவுட் செய்து கொள்கிறாராம்.  நமக்கும் அதைச் செய்யாமல் இருக்க மனம் துணியாது.  ஆனால் ஸ்கேன் எடுத்ததில் ஒன்று உறுதியானது.  எனக்கு மூளை இருக்கிறது என்பது!

காசு பார்க்கும் உத்தி என்றும் சொல்லலாம்.  கன்னாபின்னா வைத்தியம் என்றும் சொல்லலாம்!

எங்கள் அப்பார்ட்மெண்ட்டில் தண்ணீர் ஒரு பிரச்னை.  ஏற்கெனவே இருந்த கிணறு நாற்றம் வருகிறது என்று பல்வேறு ரிப்பேர் முயற்சிகளுக்குப் பின் மூடிவிட்டு, போர்வெல் போட்டோம்.  எனக்கு அதிலேயே அதிருப்தி உண்டு.  தற்சமயம் Bபோர் போட்டு ஒன்றரை வருடம் ஆன நிலையில் தண்ணீர் கொஞ்சம் கலராகவும் விட்டு விட்டும் வந்தது.  குழாயில் அடைப்பு எடுக்க முயற்சித்தோம்.  (B)பில்டர் இந்தப் பக்கம் மூன்று வீடுகளுக்கு ஒரு காமன் கனெக்ஷனும், அந்தப் பக்கம் மூன்று வீடுகளுக்கு தனி காமன் கனெக்ஷனும் கொடுத்து சிக்கனம் பார்த்திருந்தார்(ன்). 

எங்கள் பிளம்பர் ஒரு முறை அந்த குழாய் வழியில் ஆசிட் அடித்து அடைப்பெடுத்தார்.  ஆனாலும் மறுபடி கொஞ்ச நாளில் இதே போல ஆனது.  மறுபடி  என்றால் ஃபில்ட்டர் போடலாம், மற்றவர்கள் ஒத்துவரவில்லை என்றால் தனி கனெக்ஷன் எடுத்து ஃபில்ட்டர் போடலாம், (B)போரையே தூக்கி வருடத்துக்கொருமுறை மண்ணெடுக்க  வேண்டும், மண் சரிந்திருக்கும், மூடியிருக்கும், மண்ணோடு வரும்  என்றெல்லாம் சொல்லிக் கொண்டிருந்தார்.  சுமார் 25,000 வரை   பட்ஜெட்டும் சொன்னார்.  நாங்கள் ஒத்திப் போட்டுக்கொண்டே வந்தோம்.  ஆறு வீடுகள் சம்பந்தப் பட்ட அப்பார்ட்மெண்ட் என்பதால் எல்லார் சம்மதமும் பெறவேண்டிய சூழல்.  நான் மட்டும் தனியாக ஒரு கனெக்ஷன் எடுத்து வசதி செய்து கொள்ளலாம் என்றாலும் 25,000 செலவாகும்.  அதை நான் மட்டும் கட்டவேண்டும்!

அவரை பிடிப்பது வேறு பெரும் சிரமமாயிருந்தது.  பெரும்பாலும் ஃபோன் செய்தால் எடுக்க மாட்டார்.  எடுத்தாலும் தவணை வாங்குவார்.  ஆனால் வந்தால் பொறுப்பாக வேலை செய்து கொடுப்பார்.  ஆனாலும் சில சமயங்களில் இவர்களுக்கெல்லாம் ஒரே மாதிரி யோசித்து முன்னர் சொன்ன கதைகள் மாதிரி கூர் மழுங்கி இருக்கும்  அல்லவா...

கடந்த வாரம் தண்ணீர் வரா ஒரு நாளில் நான் வெடிக்க, கீழ் வீட்டுக்காரர் அவருடைய ஆஸ்தான ப்ளம்பரை அழைக்க, திருப்பம் நிகழ்ந்தது. 

"தண்ணீர் மெயின் டேங்க்கிலிருந்து கீழே வரும் வழியில் உள்ள ஜங்க்ஷன் இடத்தில் அடைத்துக் கொண்டிருக்கலாம், அதை பார்ப்போம், அதுதான் எப்பவுமே முதல் படி, அப்படி இருந்தால் சட்டென முடிந்து விடும்.  பெரும்பாலும் இதிலேயே சரியாகி விடும் இல்லாவிட்டால் என்ன செய்யலாம் என்று ஸ்டெப் பை ஸ்டெப்பாக பார்க்கலாம்" என்றார்.  

பைப்பையோ அறுத்துப் பார்த்ததில் அங்கே மண் கல்லாக இறுகி தண்ணீர் கீழே வராமல் மெலிதாக வருவது தெரிந்தது, அடைப்பு இருந்ததும் புரிந்தது.  அந்த யூனியன் பைப்பைவால்வோடு மாற்றியதும் சரியாகி விட்டது!

அப்பா...டி...   எவ்வளவு ரிலீஃப் தெரியுமா?  ஜஸ்ட் 1800 ரூபாயில் வேலை முடிந்தது!  இப்போது தடையில்லாமல் தண்ணீர் வருவதில் உள்ள  சுகம், நிம்மதி...

சுபம்.  சுகம்.

============================================================================================

வண்ணதாசன் என்ன சொன்னார் என்றால்.....

யார் யாரிடம் எதைப் பற்றி எவ்வளவு பேச வேண்டும் என்று சிலர் கணக்கு வைத்திருப்பார்கள். அதில் தப்பு ஒன்றும் கிடையாது. ஒரு வகையில் அது ஒரு கெட்டிக்காரத்தனம் தான் . இல்லை என்று சொல்லவில்லை.

ஆனால் எனக்கு ரொம்ப வேண்டியவர்கள் கூட, என்னிடமும் அப்படியே இருப்பது மனசுக்குக் கஷ்டமாக இருக்கிறது. அவர்கள் எதிர்பார்க்கிறது போல், என்னிடம் பேசுவதற்கு, உப்புப் புளியைத் தவிர வேறு  சரக்கு  இல்லாமல் இருக்கலாம். ஆனால் விஷயம் தெரிந்து  நல்லாப் பேசுகிறவர்களின் பேச்சை,  ஒரு சொட்டுக் கூடச் சிந்தாமல் அப்படியே வாங்கிக்  கொள்கிறேனே அது உண்மையா இல்லையா?

இவ்வளவு தூரம் இப்படியே தான் வந்திருக்கிறேன். இன்னும் கொஞ்ச தூரம் தானே பாக்கி. இதில் எதுக்கு எனக்கு வேண்டாத கவலை எல்லாம்?

-வண்ணதாசன் - 

=============================================================================================

இணையத்தில் பார்த்து ரசித்த படம்...

கண்ணை மூடி இருக்கும் கன்னி - 

வழியும் 

தண்ணீருக்காகவா, கண்ணீருக்காகவா?

எதற்காக, எதை மறைக்க 

கண்மூடி இருக்கிறாள்?

பாவங்களா, சுய பரிதாபங்களா 

எவை தண்ணீருடன் 

வழிந்து கரைந்து போகும்

என்று நினைக்கிறாள்?

"சோப்புத்தண்ணி கண்ல போகாம இருக்க நீ கூடத்தான் கண்ண மூடிப்பே..  உடனே ஏதாவது கவிதைன்னு கிளம்பி வந்துடுவீங்களே...!!"

============================================================================================

பைரப்பா என்ன சொல்கிறார் என்றால்.....

சமகாலத்தில் ஒன்றைப் பற்றி எழுதும்போது எழுத்தாளன் தகவல்களுக்காக தேடி அலையத் தேவையில்லை.  அவனை அறியாமல் அவனுடைய அனுபவத்தோடு இரண்டற கலந்துவிட்ட விவரங்கள் படைப்புக்கு தகுந்த வகையில் தாமாக பொங்கி வந்து விழுந்து விடும்.  ஆனால் சரித்திர பூர்வமான விஷயங்கள் அந்த அளவு அனுபவத்தோடு நெருக்கமாக வைப்பதில்லை.  ஆனால் ஆய்வுக்கு உகந்ததாக இருக்கிறது.  

- எஸ் எல் பைரப்பா -

==============================================================================================

வலையில் படித்தது...  "ஞிமிறு"  இந்த வார்த்தை கேள்விப் பட்டிருக்கிறீர்களா? 

'ஞ' எழுத்து வரிசையில் தொடங்கும்  எத்தனை வார்த்தை அறிவோம் நாம்? ஞானம், ஞாலம், 

சிலபேர் நியாயம் என்பதை பேச்சுவழக்கில் 'ஞாயம்' என்பார்கள்!!!

வட இந்தியா முகலாய ஆட்சியால், ஹிந்து ராஜாக்கள் அரசவைகளின் ஆதரவால்  புத்தம்புதிதான ஓவியங்கள் 16-ம் நூற்றாண்டுக் கடைசியில் இருந்து தோன்றலாயின. அவற்றில் ராகமாலா ஓவியங்கள் என்பவை உண்டு. அளிமகிழ்வு (Bee-Joy) என்னும் ராகத்தின் (< அராகம் = செம்மை. ராகங்களுக்கு வர்ணம் உண்டு. உ-ம்: Blues என்கிறோமே) ஓவியங்கள், பாரதியின் "ஞிமிறென இன்புறு" வாக்கியத்தை விவரிக்கும் எனக் கருதுகிறேன்.

ஞகார எழுத்து தமிழின் சிறப்பு எழுத்து. இது வடமொழியில் சேர்த்துள்ளனர். ஆனால், பல வடநாட்டாருக்கு ஞ- வருக்கம் உச்சரிக்க வராது. ஞானம் க்யான் ஆகிவிடுகிறது அல்லவா?

ஞிமிறு என இன்புறு - மேலும் பார்ப்போம்,

நா. கணேசன்

********************************************************************************************************************************************

ஞிமிறென இன்புறு

ஞிமிர்தல் என்றால் ரீங்கரித்தல் என்று பொருள். ஆங்கிலத்தில் இதனை Humming, Buzzing என்பர். தேனீ, வண்டு ஆகிய பூச்சிகள் இவ்வகையான ஒலியை எழுப்புவதால் அவற்றுக்கு ஞிமிறு என்று பெயர். வண்டினங்களின் சிறகுகள் காற்றில் வேகமாக அதிர்வதால் இவ்வகை ஒலி உண்டாகிறது.

ஒரே மாதிரியான ஒலியை வண்டுகள் இடையறாது இசைப்பதால் அவை பாடுவதைப் போன்ற மயக்கம் நமக்கு ஏற்படுகிறது. கம்பர் கூட , ' தேம் பிழி மகர யாழின் வண்டுகள் இனிது பாட' என்று எழுதுகிறார்.  பாடுதல் என்பது மகிழ்ச்சியின் வெளிப்பாடாகும். உள்ளம் மிகுந்த உற்சாகத்துடன் இருக்கும் போது உதடுகள் தன்னியல்பாக ஒரு பாடலை முணுமுணுக்கத் தொடங்கவிடும். இவ்வாறு பாடுவதையும் ஆங்கிலத்தில் Humming என்ற சொல்லால் குறிப்பர்.

வண்டுகள் எப்படிக் கவலையின்றி, பாடிக்கொண்டே, மலர்கள் தோறும் சென்று, தேன் சுவைத்து மகிழ்ச்சியாகச் சுற்றித் திரிகின்றனவோ , அதே போல மனிதர்களும் ஆனந்தமாக வாழ வேண்டும் என்பது பாரதியாரின் ஆசை. அதனால் தான் ஞிமிறென இன்புறு என்கிறார்.

இந்த ஆத்திசூடியை இன்னொரு கோணத்திலும் அணுகலாம்.

தேனீக்கள் உழைப்புக்கும் சுறுசுறுப்புக்கும் பெயர் போனவை. ஒரு துளி தேனைச் சேகரிப்பதற்காக தொலை தூரம் பறப்பவை. தேனீக்கள் வாடித் தளர்ந்திருப்பதை நாம் ஒருபோதும் கண்டதில்லை.

'எப்போதும் பாடுபடு. எப்போதும் சுகப்பட்டுக் கொண்டிரு. உழைப்பிலே சுகம் இருக்கிறது' என்று பாரதியார் எழுதுகிறார். எனவே, தேனீயைப் போல் உழைப்பதில் இன்பம் கொள் என்னும் பொருள்பட "ஞிமிறென இன்புறு" என்று பாரதியார் எழுதியிருக்கலாம்.  "The process is more important than the result. The result is just a by-product of the process. Take care of the process. Eventually you will get the desired result" என்ற கிரிக்கெட் வீரர் எம்.எஸ்.தோனியின் கூற்று இங்கே நினைவுகொள்ளத்தக்கது. ~நிரஞ்சன்

N. Ganesan அவர்கள் பக்கத்திலிருந்து - நிரஞ்சன் என்பவருக்கு அவர் அளித்த பதிலில்...

https://groups.google.com/g/karanthaijayakumar/c/v0PGOUz-tXQ/m/z9KlYZ5pAgAJ?utm_medium=email&utm_source=footer

=========================================================================================

இணையத்தில் படித்ததுதான்...   புதன் கேள்வி பதில் பகுதியில் பதில் கிடைக்குமா?!!

===========================================================================================

பொக்கிஷம்  :- 

ஆஸ்திகள் 1 கோடிக்கு மேல் இருந்தால் இன்ஷ்யூரன்ஸ்...   அந்தக் காலத்திலேயே 1 கோடி..  அம்.....மாடி!

ஓவியம் யார் என்று தெரிகிறதா?  எந்தத் தொடருக்கு என்று கண்டுபிடிப்பது சிரமம்தான்..  சிரமம் என்ன, யூகிக்க முடியாதுதான்!

தேடாத இடமெல்லாம் தேடினேன்....

எந்த பிறந்தநாள் என்று சொல்லாததால் ஜோக் பூர்த்தி ஆகவில்லை!

'ராலே' சைக்கிள் தெரியும்...  "ராலே சைக்கிள் நல்ல தரமானது.." என்று ரேடியோ விளம்பரம் கூட வரும்.  'ஹெர்குலிஸ்' சைக்கிள் தெரியும்..  Bபார் எல்லாம் உறுதியாக இருக்கும் என்று நம்பிய காலம் உண்டு!  பிலிப்ஸில் சைக்கிள் கேள்விப்பட்ட நினைவு இல்லை!  அப்புறம் 'ஹீரோ' சைக்கிள் கூட வந்ததது.