"திங்க"க்கிழமை : அவகேடோ - கீதா ரெங்கன் ரெஸிப்பி

 

Avocado Fruit / Butter Fruit - Guacamole (குவாக்கமோல்) அவகேடோ பழம் / பட்டர் ஃப்ரூட் - மெக்சிகோவில் செய்யப்படும் ஓர் எளிய செய்முறை

அடுப்பை பயன்படுத்தாமல் செய்யும் ஓர் எளிய செய்முறை

அவகேடோ பழம்- இதில் சில வகைகள் உண்டு. நான் பெயர் சொல்லி உங்களைக் குழப்பப் போவதில்லை. பழுத்த நிலையில் ஒரு வகை நல்ல கடும் சிவப்பும் ப்ரௌனும் கலந்திருக்கும். மற்றொரு வகை அடர் பச்சையும் ப்ரௌனும் கலந்த நிறத்தில் இருக்கும். சில அடர் பச்சையாக இருக்கும். வாங்கும் போது பழமாக இருந்தால் நல்லது. நல்ல பழுத்த பழம்னா வெளிப்புறத் தோல் அடர் பச்சை நிறம் அல்லது கறுப்பு நிறத்துல இருக்கும் (படத்தில் இருப்பது போல்). பழுத்து வரும் நிலையில் உள்ள பழங்கள் வீடியோல இருப்பது போல வெளிப்புறம் பச்சையா இருந்தாலும் கொஞ்சம் அமுக்கிப் பார்த்தா எல்லாப் பக்கமும் அமுங்கும். அப்படியானதும் தேர்ந்தெடுக்கலாம். கெட்டியா காயா இருந்தாலும் செய்யலாம்தான் ஆனால் கசக்கும். எனவே பழமாகவே தேர்ந்தெடுத்தால் நல்லாருக்கும்.

மற்றொன்றும் சொல்லிவிடுகிறேன். இந்தப் பழத்திற்கு பெரிதாகச் சுவை எதுவும் கிடையாது. வெண்ணை போன்ற ஒரு texture இருப்பதால் இது binding ஆகப் பயன்படும். நிஜமாகவே எதனோடு சேர்த்து செய்தாலும் வெண்ணை போன்ற அந்த texture நன்றாக இருக்கும். 

அவகேடோ பழத்தை நெடுக்காகவோ குறுக்குவாட்டிலோ உள்ளே உள்ள பெரிய கொட்டை இடையில் சிறிதே தடுக்கினாலும் பழமாக இருந்தால் பழமே எளிதாக நகர்ந்து கொடுத்து இரண்டாக கையாலேயே பிளக்க வழி கொடுத்துவிடும்.

கொட்டையை எடுத்துவிட்டு, ஒரு ஸ்பூனால் பழத்தின் உட்பகுதியை வழித்து ஒரு பெரிய கிண்ணத்தில் போட்டு மத்தாலோ பருப்பு மசிக்கும் கரண்டியாலோ நன்றாக மசித்து வைத்துவிடலாம். அரைப்பானிலும் போட்டு அரைத்து எடுத்துவிடலாம் தான் ஆனால் அதை ப்ளேடின் அடியில் இருப்பதை எல்லாம் வழிக்க வேண்டும், கழுவ வேண்டும். மெனக்கெடல். என் வழக்கம் மத்தால் மசித்துக் கொள்வது. மற்றபடி உங்கள் விருப்பம்.

இந்தப் பதார்த்தத்திற்கு சேர்மானங்கள் அதிகம் வேண்டாம்.

இரண்டு பழத்தை வழித்து எடுத்து மசித்ததற்கு

வெங்காயம் பெரிதாக இருந்தால் - 1/2 போதும். சிறியதாக நறுக்கி வைத்துக் கொள்ளவும். கொஞ்சம் சின்னதாக இருந்தால் 1

தக்காளியும் பெரிதாக இருந்தால் - 1/2. சின்னதாக இருந்தால் 1. சிறிதாக நறுக்கி வைத்துக் கொள்ளவும்.

வெங்காயம் தக்காளியை எவ்வளவுக்கெவ்வளவு சிறியதாக நறுக்குகிறோமோ நல்லாருக்கும்.

மிளகு - 1 தேக்கரண்டி

பச்சை மிளகாய் பெரிதாக இருந்தால் - 1/2 போதும். சிறிதாக இருந்தால் 1

பூண்டு இதழ் - 1

மிளகு, பச்சை மிளகாய், பூண்டை சின்ன இடி உரலில் போட்டு இடித்து எடுத்துக் கொள்ளவும்.

உப்பு - தேவையான அளவு

எலுமிச்சை - 1-2. சாறாக என்றால் 1 மேசைக்கரண்டி தாராளமாகச் சேர்க்கலாம். பழத்தில் இருக்கும் சாறு எவ்வளவு இருக்கோ அதைப் பொருத்து. நான் 1 1/2 பயன்படுத்திக் கொண்டேன். எலுமிச்சையின் புளிப்பு இதற்குச் சுவை சேர்க்கும்.

சிறிதாக நறுக்கிய கொத்தமல்லித் தழை ஒரு கைப்பிடி.

பழம் மசிப்பதை மேலே சொல்லிவிட்டதால்...மசித்த பழத்தோடு, உப்பு, தட்டிய கலவை, நறுக்கிய வெங்காயம், தக்காளி இவற்றை நன்றாகக் கலந்து எலுமிச்சை சாறு மற்றும் பொடியாக நறுக்கிய  கொத்தமல்லித் தழை சேர்த்துவிட்டால் Guacamole தயார்.

இது ப்ரெட், சப்பாத்தி இவற்றோடு சாப்பிடலாம்.

தக்காளி வெங்காயத்தைப் பொடியாக நறுக்குவதற்குப் பதில் அதோடு மிளகு, பூண்டு, பச்சை மிளகாய் இவற்றையும் சேர்த்து அரைத்து, மசித்த/அரைத்த பழத்தோடு கலந்துவிட்டால் Dip அதாவது Corn chips கார்ன் சிப்ஸ், Toasted/Grilled Bread - டோஸ்டட் பிரெட் - போன்றவற்றை Sauce தொட்டுக் கொண்டு சாப்பிடுவது போல Guacamole ல் தொட்டுக்கொண்டு சாப்பிடலாம்.

https://youtube.com/shorts/g-R2ok6Kt-c

காணொளி எடுக்கும் போது ஒரு கையில் மொபைல் மறுகையால் பழத்தை வழிப்பதும், மசிப்பதும், இடிப்பதும் என்று எடுத்ததால் சற்று சிரமமாக இருந்தது. காணொளியில் அந்த இடங்கள் வரும் போது உங்களுக்கே தெரிந்துவிடும். 

இப்பழத்தை வதக்காமல் நம்மூர் வகைகள் செய்யலாம் குறிப்பாகத் தேங்காய் இல்லாமல்! 

எச்சரிக்கை : எனவே அவகேடோ செய்முறைகள் இன்னும் இரண்டு தொடரும்.