ஆர்த்தோவும் 'பிசியோ'வும்

 

ஆர்த்தோ டாக்டருக்கும், பிஸியோதெரபிஸ்ட்டுக்கும் ஒரு மறைமுக கட்ட பஞ்சாயத்து இருந்து கொண்டே இருக்கும் போலிருக்கிறது.  இவர் சொல்வதை அவர் மறுக்கிறார். அவர் சொல்வதை இவர் மறுக்கிறார்.

டாக்டர் இதற்காகவே படித்தவர் சரியாகத்தான் சொல்வார் என்று தோன்றும்.  பிசியோ சிலபல ஆதாரங்கள் காட்டி தன் பக்கத்தை நிறுவுவார்.  குழப்பம் என்னவோ நமக்குதான்.  உண்மையில் இவர் இல்லாமல் அவர் இல்லை, அவர் இல்லாமல் இவர் இல்லை!  ஆனால் டாக்டரைப் பார்க்காமலேயே 'பிசியோ'வை தேடி வருபவர்கள் உண்டுதான்.

இப்போதைய தொழில்களில் 'பிசியோ' படித்து விட்டு சில உபகரணங்களை வாங்கிப் போட்டால் நல்ல லாபம் என்று தோன்றுகிறது.  கொஞ்சம் சப்ஜெட் அறிவும் வேண்டும்தான்.

டாக்டர் நம் கையைக் காலை முறுக்கி ஆராய்ந்து, போதிய மெஷினுக்குள் செலுத்தி படம் பெற்று அதையும் ஆராய்ந்து ஒரு பேப்பரில் மருந்துகளோடு மூன்றெழுத்து, நான்கெழுத்துகளாக எதையோ கிறுக்கி 'பிசியோவைப் பார்....   ஒரு வாரம் பிசியோ..  அப்புறம் தவறாமல் அவர் சொல்லிக் கொடுக்கும் பயிற்சிகள்' என்று அனுப்புவதும், 

இவர் அதை வாங்கிப் பார்த்து உதட்டைப் பிதுக்கி, 'யார் பார்த்தா..?   குப்புசாமியா...   அவரு எப்பவுமே இப்படிதான்..  தேவை இல்லாததை எல்லாம் எழுதுவார்..  நானும் எவ்வளவு பார்த்துட்டேன்..  கவலைப்படாதீங்க..  நான் பார்த்துக்கறேன்' என்பதும்..

ஆர்த்தோ Knee Cap போடாதீங்க என்பார்.  'யாரைக் கேட்டு போட்டீங்க...  பிசியோ சொல்றதை எல்லாம் ஏன் கேட்கறீங்க?'

'நீங்கதானே டாக்டர் 'அவர்ட்ட அனுப்பி, பிசியோ சொல்றதைக் கேளுங்கன்னு சொன்னீங்க?'

பிசியோவிடம் வந்து ஆர்த்தோ சத்தம் போட்டதைச் சொன்னால்,  Knee Cap போடாவிட்டால் முட்டியே இடம் மாறி விடும் என்பார்.    மறுபடி ஆர்தோவைப் பார்த்தால் ' Knee Cap போடாதீங்க..  எலும்பு கம்ப்ரெஸ் ஆயிடும்'  என்பார்.   

இவரோ, 'அவர் சொல்லட்டும், நான் சொல்கிறேன்.  போடுங்க...  போடல்லைன்னா முட்டி இடம் மாறிடும்..  நவுந்து போயிடும்...  நான் சொல்லி Knee Cap போட்ட ஸ்ரீதரனைப் பார்...  ரிஷிகேசனைப் பார்...  பத்மநாபனைப்பார்,  தாமோதரனைப் பார் என்பார்!

ஒருத்தர் நடைப்பயிற்சி வேண்டாம் என்பார்.  இன்னொருத்தர் வேண்டும் என்பார்.  இரண்டு பெரும் அதற்கான காரணங்களை பொருத்தமாகச் சொல்லி குழப்புவார்கள்.

'ஏற்கெனவே டிஜெனெரேட் ஆயிருக்கு..  நடக்காதீங்க'

'நடை எப்பவுமே நல்லது...  நடங்க.. நடக்காம இருந்தா உடம்பு வெயிட் போட்டு இன்னும் பிரச்னை ஆயிடும்.  முழங்கால் வெயிட் தாங்காது'

சொல்லி வைத்து செய்கிறார்களோ என்று கூட சந்தேகம் வரும்.

2002 லிருந்தே இடது முழங்கால் பிரச்னை இருந்தாலும் நான் ஆ. மருத்துவரை அணுகியதில்லை.  ஒருவேளை அப்போதே அணுகி இருந்தால் சுலபமாக சரி செய்திருக்கலாமோ என்னவோ!

எல்லோரும் போய்ப்பார் என்று சொன்னாலும் பார்த்ததில்லை.  நான் என்னிக்கி நல்ல விஷயங்களை காதில் வாங்கி இருக்கிறேன், மிச்ச பேர் சொல்றதைக் கேட்டிருக்கிறேன்!

இப்போது கிரிக்கெட் விளையாடி முட்டியில் நோவு கண்ட மகன் ஆர்த்தோவிடம் போகிறேன், துணைக்கு வா என்று அழைத்துப்போய் என்னையும் மாட்டி விட்டு விட்டான்.

டாக்டர் செந்தில் பேண்ட்டுக்கு மேல் என் முட்டியைப் பிடித்ததுமே கால் வளைந்திருக்கிறது என்று சொல்லி என்னை வியப்புக்குள்ளாக்கினார்.  'அட, பார்றா...   பார்க்காமலேயே கரெக்ட்டா சொல்லிட்டார்...  நல்ல டாக்டர்தான் போல..'

'போய் எக்ஸ்ரே எடுத்துட்டு வாங்க'

 ஏதோ ஒன்றை வைத்து விழ வைத்து விடுகிறார்கள்.

கூட்டமே இல்லாதது போல தோன்றினாலும் தொடர்ந்து வந்து கொண்டே இருக்கிறார்கள்.  கன்சல்டிங் 600 ரூபாய்.  டிஜிட்டல் எக்ஸ்ரே ஆயிரம்.  பிசியோ யோசனை சொல்ல முன்னூற்றம்பது.  அங்கேயே தினசரி பிசியோ செய்தால் அது தனி ரேட்.  உங்களுக்கெல்லாமும் தெரியும்.  மறுந்தகமும் வைத்திருக்கிறார்கள்.  வேறு சில சோதனைகளும் - அதாங்க டெஸ்ட்- வைத்திருக்கிறார்கள்.  ஸ்கேனும் உண்டு.

".ஆஹா.  ஸ்கேனும் உண்டு..  எக்ஸ்ரே உண்டு... லேபும் மெடிக்கல் ஷாப்பும் உண்டு..  செலவு செய்து எடுத்துப் பார்த்து டாக்டர் பாருங்கடா... அவர் சொல்லுறதைக் கேட்டுவிட்டு எக்ஸர்சைஸ் பண்ணுங்கடா..."

(இதன் ஒரிஜினல் வரிகள் பின்வருமாறு...  "ஆஹா பருப்புமுண்டு நெய்யுமுண்டு பாயாசமும் வடையுமுண்டு...  எடுத்து போட்ட எலைய பார்க்க வெளியில் நில்லுங்கடா அதை எச்சி இல கொறவன் போல வழிச்சு தின்னுங்கடா")

ஒரு நாளைக்கு அந்த ஆர்த்தோ எவ்வளவு சம்பாதிப்பார் என்பதில் மனம் ஓடியது!

எங்கள் ஏரியா பிஸியோவிடம் ரிப்போர்ட்டைக் காட்டியதும் உதட்டைப் பிதுக்கி விட்டு என்னை 'இப்படி ஆயிடுச்சே' என்பது போல  பரிதாபமாகப் பார்த்தார்.  

நான் ஏதோ 'குற்றம் புரிந்தவன்' (வாழ்க்கையில் நிம்மதி...) போல நின்றிருந்தேன்.

"இடது முழங்காலைப் பாருங்க..  குவிஞ்சு வந்து கூடா இருக்கு' என்றார். 

'அப்படியா?'  பார்த்தேன்.

'அப்படி தெரியலையே...'

சரேலென வலது காலிலும் லுங்கியை முட்டி வரை உயர்த்திக் காண்பித்தார் - என் காலில்தான்.

'இந்த முட்டியைப் பாருங்க...   வித்தியாசம் தெரியுதா?'

எனக்கு பெரிய வித்தியாசம் ஒன்றும் புலப்படவில்லை.  

'ஆமாம்..  தெரியுது' என்று பரவச நிலையில் பக்கத்து இருக்கை மன்னிக்கவும் படுக்கை பேஷண்ட் சொல்ல, எனக்கும் இருக்குமோ என்று தோன்றியது.  

'உன் காலை..  ச்சே...   உன் வேலையைப் பார்றி..' என்று மனதுக்குள் சொல்லிக் கொண்டு பிசியோ பெண்மணியைப் பார்த்தேன்.

'அதனால?;

'நான் பார்த்துக்கறேன்..  நான் சொல்ற மாதிரி மட்டும் பண்ணுங்க' என்றார்.

என்னடா...  நாம் பாட்டுக்க நடந்து கொண்டுதானே இருக்கிறோம், இவர்கள் இப்படி சொல்கிறார்களே' என்று தோன்றியது.

சும்மா இருந்தவனை - ஏதோ கொஞ்சம் சாய்த்து சாய்த்து நடந்து கொண்டிருந்தேன்- என்னை அழைத்துப் போய் ஒரு ஆர்த்தோவிடம் காட்டி...

மனசுக்குள் இளையராஜாவின் (படம் : இதயகோவில்) சோலோ வயலின் இசை கேட்டது.  துக்கம் பொங்கியது.  

அதற்கும் பொருத்தமான காரணங்கள் வைத்திருந்தார்கள்.  

'நல்ல சமயத்தில்,  இப்பவாவது காட்டணும்னு தோணிச்சே...   இன்னும் கொஞ்ச நாள் போயிருந்தா..'  என்று நிறுத்த மகனின் பெருமையான பார்வையைத் தவிர்த்தேன்.

இவர்கள் இப்படிதான் சொல்வார்கள்... 

அந்த வார்த்தையை அவரும் முடிக்கவில்லை.  சுஜாதாவின் சின்னஞ்சிறு கதைக்குறிப்பை அவரும் படித்திருப்பார் போல...  கொஞ்சம் கொஞ்சம் பேசி, போதுமான இடத்தில் நிறுத்தி நிறைய யூகிக்க வைத்தார்.

=================================================================================================

நியூஸ் ரூம் 

தன் மனைவி, 18 மாதங்களாக மற்றொருவருடன் தொடர்பில் இருப்பதை தெரிந்து கொண்டார். யாரும் எதிர்பார்க்காத நிலையில், தன் மனைவியை, அவருடைய காதலனுக்கு திருமணம் செய்து வைத்தார். குழந்தைகளை தானே வளர்ப்பதாகவும் அவர் கூறியுள்ளார்.  காதலனுடன் சேர்ந்து மனைவியே கணவர்களை கொலை செய்யும் சம்பவங்களால், இந்த முடிவை எடுத்ததாக அவர் கூறியுள்ளார்.  உஷார் பார்ட்டி!

- சென்னை: 'ஒரு லட்சம் ரூபாய் செலவு செய்தால், 20 லட்சம் ரூபாய்க்கு, நகை, பணத்தை கொள்ளையடிக்க வேண்டும் என்பதுதான் எங்கள் திட்டம்' என, செயின் பறிப்பு ஈரானிய கொள்ளையன் சல்மான் உசேன் வாக்குமூலம் அளித்துள்ளார்.  இலட்சியத்திருடன்!

- ராபின்ஹுட் என்னும் தெலுங்குப்படத்தில் சிறப்புத் தோற்றத்தில் மட்டுமே வரும் பாத்திரத்தில் நடிக்க கிரிக்கெட் வீரர் டேவிட் வார்னருக்கு 2.5 கோடி சம்பளம்!

- மீண்டும் மீண்டும் நிலநடுக்கத்தால் மியான்மரில் தொடரும் சோகம்!

- நொய்டா: டில்லி அருகே, 'ஆட்டிசம்' பாதித்த சிறுவனை சரமாரியாக அடித்த தனியார் பள்ளி ஆசிரியர் கைது செய்யப்பட்டார். பள்ளிக்கு சீல் வைக்கப்பட்டது.

- புதுடில்லி: டில்லியில் ஒரு கோடி ரூபாய் இன்சூரன்ஸ் பணத்துக்காக, இறப்பு நாடகமாடிய தந்தை மற்றும் மகனை டில்லி போலீசார் சமீபத்தில் கைது செய்தனர்.

- நிறம் மாறிய கண்கள்; மின்னல் தாக்குதலின் திக் திக் அனுபவங்களை பகிர்ந்த இளம்பெண் ஆஸ்திரேலியாவில் வசிக்கும் கார்லியின் கண்கள் மின்னல் தாக்குதலுக்கு பின், பச்சை நிறத்தில் இருந்து அடர் பழுப்பு நிறத்திற்கு மாறியிருந்தன.

-  'காவிரி ஆற்றில் சீமை கருவேல மரங்கள் வளர்ந்து ஆக்கிரமித்துள்ளதால், நீரோட்டம் தடைபட்டுள்ளதுடன், நிலத்தடி நீர்மட்டம் குறையும் அபாயம் உள்ளது. அவற்றை அகற்ற உரிய நடவடிக்கை எடுக்க வேண்டும்' என, விவசாயிகள் கோரிக்கை விடுத்துள்ளனர்.

- ஊட்டி : ஊட்டி, கொடைக்கானல் செல்வோருக்கு இன்று முதல் ஜூன் 30ம் தேதி வரை இ-பாஸ் கட்டாயம் என, அறிவிக்கப்பட்டுள்ளது.

- ஏப்ரல் முதல் ஜூன் வரை, நாட்டின் பெரும்பாலான பகுதிகளில் இயல்பை விட அதிகபட்ச வெப்பநிலை காணப்படும். இந்த காலகட்டத்தில், ராஜஸ்தான், குஜராத், ஹரியானா, பஞ்சாப், ம.பி., மஹாராஷ்டிரா, உ.பி., பீஹார், ஜார்க்கண்ட், மேற்கு வங்கம், ஒடிசா, சத்தீஸ்கர், தெலுங்கானா, ஆந்திரா, கர்நாடகா மற்றும் தமிழகத்தில் இயல்பை விட அதிகபட்ச வெப்பநிலை காணப்படும்.

- அமைதிக்கான நோபல் பரிசுக்கு சிறையில் உள்ள பாகிஸ்தான் முன்னாள் பிரதமர்சாம்ரான்கான் பெயர் பரிந்துரை செய்யப்பட்டுள்ளது!

- 

==========================================================================================

கும்மாயம் உ வே சாமிநாதையர் 

கும்மாயம்னா என்ன அர்த்தம்னு உங்களுக்கு தெரியுமா?

அப்படி உங்களுக்கு அர்த்தம் தெரியும்னா அதுக்கு காரணம் தமிழ்த் தாத்தா உ வே சாமிநாதய்யர்தான். 

அவர் பற்றி ஷார்ட்ஸ் எனப்படும் இந்தக் காணொளியில் நான் கேட்டது இங்கே தருகிறேன்...   அவர் பேசப்பேச கேட்டு, அப்படியே  டைப் செய்திருக்கிறேனாக்கும்!

=================================

"டாக்டர் உ வே சாமிநாதையர் பற்றி கேள்விப்பட்டிருப்பீங்க...  அவர் இல்லன்னா இன்று நமக்கு தமிழ் புக்ஸ் எதுவுமே இருக்காது.  

ஏடுகள் வடிவாக இருந்தததை அவர்தான் வீடு வீடா போய் தேடி பணம் கொடுத்து வாங்கி புக்கா பப்ளிஷ் பண்ணிணார்.  அப்படி பப்ளிஷ் பண்ணும்போது ஒரு இடத்துல ஒரு வைணவச்சொல் 'கும்மாயம்' என்று ஒரு சொல் அவருக்கு அகப்பட்டது.   

பல தமிழ் வித்வான்கள் கிட்ட 'கும்மாயம்ம்னா அர்த்தம் என்ன' ன்னு கேட்டார். 

'கும்மாயமா...  தமிழ்தானா?  நான் கேள்விப்பட்டதில்லையே அப்படீனனு சொல்றாங்க  . இவர் கேக்காத ஆளில்லை.  

அவங்க எல்லாம் என்ன சொல்றாங்க, 'இது வைஷ்ணவ வார்த்தையா இருக்கு...அதனால நாமதாரிகள் கிட்ட போய்க் கேளுங்க..  அவங்க வேணா சொல்வாங்க' னு சொல்றாங்க.  

நாமதாரிகள்கிட்ட கேக்கலாம்ன்னா  ஆழ்வார் திருநகரி -  திருநெல்வேலிப்பக்கம்  - நவதிருப்பதினு ஒண்ணு இருக்கு...  ஒன்பது 

முக்கியமான கோவில் அங்க இருக்கு.  

அங்க போனா, ஒருத்தருக்கும் தெரியல 

வார்த்தையே வழக்கொழிஞ்சு போச்சு.  

அப்போ நம்மாழ்வார் புறப்பாடு.  திருவீதி உலா எதிர்ல வர்றார்.  

அவரைப்பார்த்து உடனே "நம்மாழ்வாரே..  இந்த கும்மாயத்துக்காக நான் படற பாடு...  கொஞ்ச நஞ்சம் .இல்ல.  எனக்கு வேறு வரம் ஒன்றும் வேண்டாம். இந்த வார்த்தைக்கு அர்த்தம் தெரிஞ்சா போதும் அப்படீன்னு அவர்ட்ட கேக்கறார்.  

அப்புறம் திரும்பி வர்றார்.  கும்பகோணத்துக்கு வர்றார்.  கும்பகோணத்துல அவருக்கு ஒரு வேலை.  

கும்பகோணத்துக்கு வந்தா இந்த சாரங்கபாணி கோவில் கிட்ட வந்த உடனே  மழை பிடிச்சுக்குது... உடனே சாரங்கபாணி கோவிலுடைய முகப்பு இருக்கு இல்லையா...   அங்க வந்து மழைக்கு ஒதுங்கறார்.  

அப்போ மழை லேசா தூறல் விட்டுப்போச்சு..  அப்படிங்கற நேரத்துல புறபபடலமான் னு நினைச்சுகிட்டு இருக்கற நேரத்துல உள்ளேயிருந்து பட்டாச்சாரியார் தட்டை எடுத்துக்கிட்டு கோவிலை விட்டு வீட்டுக்குப் போறார்.  அவர் வீட்டுக்கு போறார்.  தட்டை எடுத்துக்கிட்டு அவர் வீட்டுக்கு போறார். 

இவரைப்பார்த்து யாருன்னு அவருக்கு தெரில..."ஓய் ஐயரே..  என்ன இங்க நிற்கறீர்...   உள்ளே பிரசாதம் வாங்கிக்க வேண்டியதுதானே?  இன்னிக்கி  கும்மாயம்" அப்படீன்னு போறார்.  "என்ன சொன்னீங்க?  கும்மாயமா?" அப்படீன்னு திடுதிடுதிடுன்னு உள்ளே ஓடறார்.   

உள்ளே ஓடினா பெருமாள் சன்னதில உருண்டை உருண்டையா பாசிப்பருப்பும் வெல்லமும் கலந்த உருண்டை,  அதுக்கு பேருதான் கும்மாயம்.. 

அதை வாங்கிட்டு 'ஓ  இதுதான் கும்மாயமா?  என்னைப் போட்டு கும்மி பிடிச்சுட்டா கும்மி' அப்படீன்னு எழுதியிருக்கார் நூல்வடிவிலே எழுதி இருக்கார்.  

எதுக்கு சொல்ல வர்றேன்னா ஒரு நூல்ல வந்து ஐயம் திரிபற எல்லா விஷயமும் விளங்கணும்னா  நூலாசிரியரோட தயவு வேணும்.  நூலாசிரியர் நம்மாழ்வார் கிட்ட போய் அப்ளிகேஷன் போட்டாரு.  'இந்த வைஷ்ணவச் சொல் எனக்கு புரிய மாட்டேங்குதுன்னு...    அவர் நேரா கும்பகோணம் அனுப்பிச்சிட்டார். அங்க போனா  தியரிட்டிகலா மட்டும் தெரியாது.. ப்ராக்டிகலாவும் அங்கேயே கிடைக்கும்..  அங்க போ' னு அனுப்பிட்டார்."

==============================================================================================

மொழிபெயர்ப்புக்கான சாகித்ய அகாடமி விருது பெற்று நூலிலிருந்து முன்னுரை மட்டும் .இங்கே..

பாலியல் தொழிலாளியான நளினி ஜமீலா, அவரது தன் வரலாற்றின் மூலம் கேரளப் பண்பாட்டு உலகை அதிர்ச்சிக்கு உள்ளாக்கினார். மலையாளிகளின் தனி வாழ்க்கையிலும் சமூக வாழ்க்கையிலும் நிலவும் கலாச்சாரப் பாசாங்கையும் போலி ஒழுக்கச் சார்பையும் அம்பலப்படுத்தினார். ‘எனது ஆண்கள்’ நளினியின் வரலாற்றில் மேலும் சில அத்தியாயங்களைப் பகிரங்கப்படுத்துகிறது. பெண்கள் மீதான ஆண்களின் கண்ணோட்டத்தையும் அணுகுமுறைகளையும் தனது சொந்த அனுபவத்தின் பின்னணியில் இந்த நூலில் எடுத்துக்காட்டுகிறார். இது நளினி ஜமீலாவின் வாக்குமூலம் மட்டுமல்ல; ஒரு சமூகத்தின் கோணல்களையும் கபடங்களையும் அப்பட்டமாக விவாதிக்கும் தார்மீக அறிக்கையும் ஆகும்.

எனது ஆண்கள்....

முன்னுரை:

கேரளத்தில் ஆண்கள்

இதுவரை பழகிய மலையாள ஆண்களில் எழுபத்தைந்து சதவீதம் பேரும் பெண்களைச் சரிசமமாக நினைக்காதவர்கள்தான். பெண்கள் மிகவும் மோசமானவர்கள் என்ற எண்ணம் மலையாளிகளின் பிறப்பிலேயே வந்தது. 'மலமூத்ர விஸர்ஜனமாகுந்ந பாத்ரம், நரஜன்மம் நரகத்திலாழ்த்துந்ந காத்ரம் என்று ஸ்ரீ நாராயண குருகூட நினைத்திருந்ததாகக் கேள்விப்பட்டிருக்கிறேன் -உண்மைதானா என்று தெரியாது - தங்களுக்குத் தேவையானபோதும்கூட, இதெல்லாம் தன்னுடைய பெருந்தன்மை என்ற ஏளன எண்ணம்தான் மலையாளி ஆண்களுக்கு; 'வர்றியாடீ', 'உனக்கு எவ்வளவு டீ' என்றொரு மனோபாவம்.

1. மலமும் மூத்திரமும் வெளியேற்றுகின்ற பாத்திரமாகிய பெண் உடலானது, அதனை விரும்புகிறவனை நரகத்தில் மூழ்கடித்து விடும்.

கர்நாடகத்திலும் தமிழ்நாட்டிலும் நிலைமை இதுவல்ல. கர்நாடகத்தில், அரசாங்கத்தின் அங்கீகாரம் இல்லையென்றாலும் கம்பெனி வீடுகளும் அதற்கு ஆதரவு தரும் ரவுடிகள் உட்பட்ட பலரும் இருப்பதனால், பாதி அங்கீகாரம் பெண்களுக்கு இருக்கிறது. ஒரு எல்லைக்கு அப்பால் 'வாடீ, போடீ' என்னும் மொழியை அவர்கள் பயன்படுத்தமாட்டார்கள். தமிழ்நாட்டில் என்றால் ஒரு தனிப்பட்ட மரியாதைதான் மலையாளிப் பெண்களுக்கு. இப்பெண்கள் அவர்களுக்குக் குப்பைக் கூளங்கள் அல்ல, அவர்கள் ஒரு படி மேலேதான் என்ற மனோபாவத்தினால் மலையாளிப் பெண்களிடம் ஆண்களுக்கு ஒரு மோகம் உண்டு.

செக்ஸ் விஷயத்திலும் இந்த வேறுபாடு உண்டு. கர்நாடகக்காரர்களுக்கு செக்ஸின்மீது பெரும் பேராசை எதுவுமில்லை. எந்த விவசாய நிலத்திலும் தேவைக்குக் காரியம் நடக்கும். இருபத்தேழு-இருபத்தெட்டு வயதுள்ளபோது எனக்கு மங்களூரில் தனியாக வீடு கிடைப்பதற்குத் தடையேதும் இல்லாமல் இருந்தது. பக்கத்து வீட்டுக்காரனிடம் வழியில் வைத்துப் பல மணிநேரங்கள் பேசினாலும் பிரச்சனை எதுவுமில்லை. அவனுடைய மனைவி எதிரே வந்தாலும் எதுவும் கேட்கமாட்டாள். பேராசை இல்லை. இரவில் வீட்டைத் தட்டமாட்டார்கள். பிடித்து இழுத்தல் இல்லை. அந்த அளவுக்குக் 'கிடைக்காதது' என்ற எண்ணம் அவர்களுக்கில்லை. இரவில் கணவனைத் 'தூக்கிட்டுப் போயிடுவாங்களோ' என்ற பயமும் இல்லை. மைசூரிலும் ஏறக்குறைய இதே நிலைமைதான்.

கேரளத்தில் எனக்கு, இந்த அறுபத்தி நான்காவது வயதிலும் வீடு வாடகைக்குக் கிடைக்காது. சுங்கவரிபோல, 'நீ பாலியல் தொழிலாளிதானே, தந்திட்டுப் போ' என்ற கண்ணோட்டம்தான். பெண்களின் விஷயத்தில் பழைய காலம்தான் இன்னும் கொஞ்சம் நல்லது என்று தோன்றுவதுண்டு. அக்காலத்தில் நாயர்களோடு உறவு ஏற்பட்டிருந்தது, அதை வைத்துக்கொண்டு வேறொருவன் வந்து, 'என்னையும் மேல படுக்க வச்சுக்க என்று நிர்ப்பந்தம் செய்யமாட்டான் அல்லவா! நான் மண் அள்ளும் வேலைக்குச் செல்கின்ற காலத்தில் எல்லாரும் பயப்பட்ட இரண்டு ரவுடிகள்தான் தெங்கம்புள்ளி பாலனும் பள்ளிவளப்பன் குட்டப்பனும். அவர்களுக்கு ஒரு 'ஏரியா' உண்டு.

அங்கே செல்ல வேண்டுமென்றால், ஒன்று வேறுவழியில் போவார்கள், இல்லையெனில் குரூப்பாகப் போவார்கள். அவர்களுடைய ரவுடியிசம் என்னவென்றால் சீட்டாட்டம்தான். ஏதாவது பெண்கள் அந்த வழியாக வந்தால் ஓடிவந்து இரண்டு மார்பையும் பிடிப்பார்கள்; கட்டிப்பிடிப்பார்கள். மார்பைப் பிடிப்பதுதான் அவர்களுடைய அதிகபட்ச ரவுடியிசம். தூக்கிக்கொண்டு போகமாட்டார்கள். கர்ப்பிணி ஆகிவிடுவார்கள் என்ற பயம்தான். அது ஊரில் உள்ளவர்களுக்குத் தெரிந்தால் மானம் போய்விடும். பாலன் கே.நாயரைப் போன்ற ரவுடிகளெல்லாம் சினிமாவில் இருந்துதான் வந்தார்கள். இப்போது தொலைக்காட்சித் தொடர்கள் உட்படப் பலவற்றிலும் பெண்களைத் தோற்கடிப்பதற்கான தந்திரம் 'கன்னித்தன்மை'யை அழித்தலும், 'கர்ப்பிணியாக்குதலும்'தான்.

மலையாளி ஆண்களின் கள்ளத்தனத்திற்கு ஏற்ற நிலஅமைப்புதான் கேரளத்தினுடையது. ஊரில் சாத்தியப்படாத விஷயங்களுக்கு, பக்கத்து மாநிலத்தைத் தேடி ஓடிப்போவது எளிது. என்னுடைய வாடிக்கையாளர்களில் மிகவும் பணக்காரர்களாக இருந்தவர்கள் வர்த்தகம் செய்பவர்கள்தான். ஒரு புகழ்வாய்ந்த நபரின் நண்பர் எனக்கொரு பொருளாதார உதவி செய்துதரத் தயாரானபோது, 'என்னிடம் ஒருமுறை வர வேண்டும்' என்று சொன்னார். அவர் வடகரைக்காரர்தான். 'இங்கெயெல்லாம் வேண்டாம், மங்களூருக்குப் போலாம்' என்று சொன்னார்.வடகரைக்காரரான அவர் கம்யூனிஸ்டாகவும் இருந்தார். வடக்கன் கேரளத்தில் உள்ளவர்களுக்கு மங்களூருக்குச் செல்வதுதான் விருப்பம். அங்கே நெருங்கிப் பழகுவதற்குப் பயப்பட வேண்டாம். காசும் குறைவுதான். அதிகமான பாலியல் தொழிலாளர்களும் அங்கே உண்டு. துளுவில் 'கடப்பனக்கிள்' என்றொரு

சொல் உண்டு; 'ஒளித்து ஓடுபவன்' என்பதுதான் அதன் பொருள். மலையாளிகள் வேலை தேடியும் பெண் தேடியும் மங்களூருக்கு வருவார்கள். மாஹியில் விலை குறைந்த மது கிடைப்பதுபோல மங்களூரில் செலவு குறைந்த பெண் கிடைப்பாள். லாட்ஜுகளில் காசும் ரெய்டும் குறைவுதான். கோழிக்கோட்டுக்காரர்கள் என்றால் மைசூருக்குத்தான் போவார்கள். மைசூரில் உள்ள பாலியல் தொழிலாளர்கள், மலையாளிகள் அவர்களுக்கு அதிகப் பணமும் கூடுதல் அன்பும் கொடுப்பதாக என்னிடம் சொன்னார்கள். ஊர்விட்டு ஊர் செல்லும்போது குணநலன்களும் மாறுகின்றன. திருச்சூர் பகுதியில் உள்ளவர்கள் பழனிக்குத்தான் செல்வார்கள். பழனியில் வயது வித்தியாசம் எதுவும் பார்க்காமல் ரூம் கொடுப்பார்கள். பக்தர்களின் வருகை காரணமாகத்தான் இது. கோட்டயத்துக்காரர்கள், திருநெல்வேலிக்குத்தான் போவார்கள். திருவனந்தபுரத்தில் உள்ளவர்களுக்குக் கன்னியாகுமரிதான் விருப்பம். சுற்றுலாத்தலமானதால் ஆணையும் பெண்ணையும் சேர்த்துப் பார்த்தால் அங்கு பிரச்சனை எதுவுமில்லை. இப்படி மலையாளிகளின் செக்ஸ் கள்ளத்தனங்களைப் பாதுகாப்பதற்குப் புவியமைப்பு பெரிதும் உதவிசெய்கிறது.

கேரளத்திற்குள் பல்வேறு ஜாதிக்காரர்களுக்கும், மதக்காரர்களுக்கும், பணியாளர்களுக்கும் இடையே, இந்த விஷயத்தில் சிறு வேறுபாட்டைத்தான் பார்த்திருக்கிறேன். நான் வாவனூரில் ரோஸியுடன் இருந்தபோது, அந்த ஏரியாவில் முஸ்லிம்களுக்கு இடையே கொஞ்சம் சரிசமமாக நடத்துவதைப் பார்த்திருக்கிறேன். நல்ல சாப்பாடு வாங்கிக் கொடுக்க வேண்டும் என்றெல்லாம் அவர்கள் நினைப்பார்கள். நான் கிழிந்த பாவாடை கட்டியிருப்பதைப் பார்த்து, ரோஸியின் நண்பருக்குக் கவலை வந்து, 'கிழிஞ்சதக் கட்டக்கூடாது' என்று சொன்னார். நாயர்களுக்கு 'டிஸ்போசபிள்' மனநிலைதான். பயன்படுத்திவிட்டுத் தூக்கியெறிதல் 'இதுகிட்ட இவ்வளவு போதும்' என்ற மனநிலை.

இந்த மூன்று மாநிலங்களுக்கும் வெளியே எனக்கு வாடிக்கையாளர்கள் இருந்ததில்லை. கல்கத்தாவிற்கும் தாய்லாந்திற்கும் டெல்லிக்குமெல்லாம் பயணம் செய்தபோது மலையாளிகளுக்கு மட்டுமேயுள்ள சில அற்பத்தனங்களையும் குரூரங்களையும் பற்றி, பின்னோக்கிப் பார்த்து என்னால் கூடுதலாகப் புரிந்துகொள்ள முடிந்திருக்கிறது.

தாய்லாந்தில் ஓர் அனுபவம் ஏற்பட்டது. தோழி லலிதா உடன் இருந்தார். லலிதாவிற்குக் கொஞ்சம் இந்தி தெரியும். ஆனால் அவளுக்குப் பொதுவாகவே முஸ்லிம்களிடம் ஓர் ஏளனம் இருந்தது. நாங்கள் ஹோட்டலில் உட்கார்ந்து மதுபானம் குடித்துக்கொண்டிருந்தோம். அந்தப்பக்க இருக்கையில் இரண்டு பாகிஸ்தான்காரர்கள் இருந்தனர். அவர்கள் மதுபானம் குடிக்கவில்லை. நான் எனக்கு முன்னால் இருந்த பாயச டம்ளரை உயர்த்தி அவர்களிடம் 'சியர்ஸ்' சொன்னேன்.அவர்களும் உயர்த்தி, எங்களை அங்கே அழைத்தனர். லலிதா தயங்கினார். நம்முடைய எதிரிகள் அல்லவா என்று கேட்டார். பின்னர் நாங்கள் இருவரும் அங்கேபோய் உட்கார்ந்தோம். யார் என்று கேட்டபோது உண்மையைச் சொன்னேன். பாலியல் தொழிலாளர்கள் சந்திப்பு நிகழ்வுக்குக் கேரளத்திலிருந்து வந்ததாகச் சொல்லியும் அவர்கள் கிட்டத்தட்ட அரை மணிநேரம் பேசிக்கொண்டிருந்தனர். கேரளமாக இருந்திருந்தால், அப்போதே பேச்சை வெட்டிக்கொண்டிருப்பார்கள். ஒருமுறை கல்கத்தாவிலிருந்து வந்த தோழிக்குக் காய்ச்சல் வந்து, மருத்துவமனைக்கு அழைத்துச் சென்றபோது, நாங்கள் யாரென்று தெரிந்ததும், டாக்டர் தொடுவதற்குக்கூடத் தயாராகவில்லை. ஏளனமும் புறக்கணிப்பும்தான் இங்கே. தொற்றுநோய் வருவதுபோலத் தள்ளி நிற்பார்கள்; இருந்தும் பெண்ணைப் பார்த்தால் சும்மா விடவும் மாட்டார்கள். ஒருமுறை நான் மைசூரிலிருந்து கோழிக்கோட்டிற்குப் பஸ்சில் வந்துகொண்டிருந்தேன். வயநாட்டின் வனப்பகுதியில் நுழையும்போது மாலை நேரமாக இருந்ததால், வெளியே அழகான காட்சிகள். பனிமூடிய மலைத்தொடர்கள். அதை இரசிப்பதற்காக எனக்குப் பின்னால் இருந்தவர் ஜன்னல் கண்ணாடியை முன்னோக்கி நகர்த்தியபோது அது என் கையில் பட்டது. நான் கோபமாகத் திரும்பிப் பார்த்தேன். மொத்தத்தில் நான் உட்பட ஏழெட்டுப் பேர்தான் பஸ்ஸில் என்னுடைய பார்வையைப் பார்த்து, 'பின்னால் உள்ளவர் என்னை நோண்டியிருப்பார்' என்று மற்றவர்கள் நினைத்தனர்.

சுவாரஸ்யம் அதுவல்ல; அவர்கள் எல்லோரும் எனக்கு எதிராகப் பேசிக்கொண்டு குறுக்கிட்டனர் என்பதுதான்!'அப்படிப்பட்டவளாக இருக்கலாம்' என்று சொல்லி, விஷயம் தெரியாமல் அந்த நபரை நியாயப்படுத்தினார்கள். எனக்கு அருகிலிருந்த இளைஞன் உண்மையை விளக்குவதற்கு முயற்சித்தபோது, எல்லோரும் அவனுக்கு எதிராகத் திரும்பினர். 'உனக்கு இன்னும் கல்யாணம் ஆகல இல்ல' என்று சொல்லித்தான் தாக்குதல் நடத்தினர். 'நம்முடைய மனைவிகள் யாரும் இப்படியெல்லாம் நடந்துகொள்ளமாட்டார்கள்; இவள் ஒரு சரியான பெண்ணென்று தோன்றவில்லை' என்றெல்லாம் சொல்லிக் கோழிக்கோடு வரும்வரை தகராறு தொடர்ந்தது.இடிப்பதையும் தடவுவதையும் பொறுத்துக்கொள்கின்ற, எதிர்த்துப் பேசாத மனைவிதான் 'நல்ல பெண்' என்ற பாடத்தை அன்று நான் படித்தேன். நேரங்கெட்ட நேரத்தில் பயணம் செய்கின்றவள் மோசமான பெண்தான். அதே சமயம்,வேலையின் காரணமாகக் கிட்டத்தட்ட ஆறு மாதகாலம் மைசூரில் விடியற்காலை மூன்றுமணிக்கெல்லாம் பஸ்ஸிலிருந்து இறங்கிப்போயிருக்கிறேன், எந்தவிதமான கேள்வியும் இல்லாமல்.

மலையாளிகள் மதிக்க வேண்டும் என்றால் 'போனஸாக' ஏதாவது இருக்க வேண்டும்; வெள்ளை நிறமோ,பார்ப்பதற்கு அழகோ எல்லாம்... குருவாயூரில் எனக்கு ஒரு தோழி உண்டு. கிட்டத்தட்ட முப்பதுவருடங்கள் குருவாயூரில் தங்கியிருந்து பொருளாதார அடிப்படையில் என்னைவிட மேல்நிலைக்கு வந்த தோழி ஆனால் அவளால் பகலில் எந்த ஆணோடும் சேர்ந்திருக்க முடிந்ததில்லை. பார்ப்பதற்கு அழகாக இருக்கிறேன் என்பதற்காக எனக்கு ஒருபோதும் அதிகக் காசு கிடைத்ததும் இல்லை. இரவானால் அழகு, அழகின்மை என்றெல்லாம் எதுவுமில்லை மலையாளி ஆண்களுக்கு.என்னை அவர்களுடைய மனைவி என்று சொல்லி ரூம் எடுக்க முடியும் என்னும் வாய்ப்பு இருப்பதால்தான், என்னையெல்லாம் பகலில் அழைத்துக்கொண்டு செல்வார்கள். கோவிலாக இருந்தாலும் தேவாலயமாக இருந்தாலும் அதற்குப் பக்கத்தில் ரூம் எடுப்பதற்குச் செல்கின்ற வெள்ளைநிறப் பெண்களுக்கு ரூம் கொடுப்பார்கள்; மற்றவர்களுக்குக் கொடுக்க மாட்டார்கள்.

தன்னைத் தவிர்த்து யாரும் பார்க்கவில்லை என்றால், மலையாளிக்கு இரவில் எந்தப் பெண்ணும் சம்மதமே. அமலா மருத்துவமனை அருகில் எனக்கு வேறொரு தோழி இருந்தாள். அவளிடம் குளிக்கச் சொல்லும்போது, "நேத்து ராத்திரி சார் என்னெ தேச்சுக் குளிக்கவச்சாரு" என்று சொல்வாள்.

குளிக்கவைத்துச் செக்ஸ் வைத்துக்கொள்கின்ற வாடிக்கையாளர்கள் உண்டு. அழகு குறைந்தவர்களுக்கு நிறைய வாடிக்கையாளர்கள் கிடைக்கமாட்டார்கள் என்ற மூடநம்பிக்கை இதற்குப் பின்னால் இருக்கிறது. 'கன்னித்தன்மை' என்ற மூடநம்பிக்கையில் அல்லவா மலையாளியின் 'தன்னுணர்வு' நிறுவப்பட்டிருக்கிறது. முதலிரவில் அழாததனால் சந்தேகத்திற்கு உள்ளான அனுபவத்தைப் பல மனைவிகளும் என்னிடம் சொன்னதுண்டு. ஏராளமான வாடிக்கையாளர்கள் இருப்பதனால் பெண்குறியில் புண் ஏற்பட்டு, அதன் காரணமாக அழுதால் இத்தகைய வாடிக்கையாளர்களுக்கு மகிழ்ச்சிதான்; ஏனென்றால் அந்தப் பெண் கன்னித்தன்மை உள்ளவள் என்பதுதான் அவர்களுடைய நம்பிக்கை.

வெளிநாட்டில் வாழ்வதாலோ அல்லது வேறு ஏதோ செய்வதன் பெயரிலோ மாறுபட்டவர்கள்தான் மீதி வருகின்ற இருபத்தைந்து சதவீத ஆண்கள். ஒரு செயற்பாட்டாளராகவோ, எழுத்தாளராகவோ எதுவுமில்லாமலிருந்த காலத்தில் நான் பழகிய, என்னோடு நெருக்கம் காட்டிய சில நண்பர்களைப் பற்றித்தான் இந்தப் புத்தகத்தில் சொல்லியிருக்கிறேன்.

நளினி ஜமீலா

=============================================================================================================

ஞானக்கூத்தன் கவிதை ஒன்று இந்த வாரம்.  அவர் 1971 ல் எழுதியது.  'கல்மண்டபம்' ( நினைவிருக்கிறதுதானே?)  படிக்கத் தொடங்கி இருக்கிறேன்.  அதன் அணிந்துரையில் வண்ணதாசன் அவருக்கு நினைவுக்கு வந்த இரண்டு ரெபஃரென்ஸ் குறிப்பிடுகிறார்.  ஒன்று இந்தக் கவிதை..  தேடி எடுத்து விட்டேன்.  இன்னொன்று வண்ணநிலவன் எழுதிய 'பிணத்துக்காரர்கள்' என்னும் சிறுகதை.  அது எவ்வளவு தேடியும் இன்னும் கிடைக்கவில்லை.

அன்று வேறு கிழமை

 ஞானக்கூத்தன்

நிழலுக்காகப் பாடையின் கீழ்
பதுங்கிப் போச்சு நாயொன்று

பதுங்கிச் சென்ற நாய்வயிற்றில்
கிழக்குக் கோடிப் பிணந்தூக்கி
காலால் உதைத்தான். நாய் நகர

மேற்குக் கோடிப் பிணந்தூக்கி
எட்டி உதைத்தான். அது நகர
தெற்குக் கோடிப் பிணந்தூக்கி
தானும் உதைத்தான். அது விலக
வடக்குக் கோடிப் பிணந்தூக்கி
முந்தி உதைத்தான். இடக்கால்கள்
எட்டா நிலையில் மையத்தில்
பதுங்கிப் போச்சு நாய்ஒடுக்கி

நான்கு பேரும் இடக்காலை
நடுவில் நீட்டப் பெரும்பாடை
நழுவித் தெருவில் விழுந்துவிட
ஓட்டம் பிடித்து அவர் மீண்டும்
பாடைதூக்கப் பாடையின் கீழ்
பதுங்கிப் போச்சு நாய் மீண்டும் -------------------    1971

-----------------------------------------------------------------------------------------------------------------------------------------------

பொக்கிஷம்.