புத்தகம் பையிலே.... புத்தியோ பாட்டிலே

 

போன புதன், வியாழன் எல்லாம் மனதில் ஓடிக்கொண்டிருந்த பாடல் "ஆணென்ன பெண்ணென்ன நீயென்ன நானென்ன.."

அதே ஞாயிறு திங்கட்கிழமைகளில் அல்லது 'கடந்த புதனுக்கும் கடந்த புதன் முதலே 'அவ்வப்போது மனதில் ஓடிய பாடல் "தேன்மழையிலே தினம் நனையும் என் நெஞ்சமே"

​இந்தப் பாடல்கள் மனதில் ஏன் விட்டு விட்டு ஓடுகின்றன என்று நான் உடனே யோசிக்கவில்லை.  எனக்கே என் வழக்கம் தெரியும்தான் என்றாலும் ஏனோ மனதில் படவில்லை.

முன்னரும் இதுபோன்ற சில சந்தர்ப்பங்கள் பற்றி எழுதி இருக்கிறேன்.

வெங்கட் சமீப காலமாக பதிவுகள் எழுதுவதில்லை.  அவர் தளத்துக்கு சென்று திறந்தாலே எனக்கு மனதில் "முத்துக்களோ கண்கள்" என்னும் பாடல் மனதில் ஓடும்.

​'ரொம்ப இழுக்காம விஷயத்துக்கு வா' என்று கடுப்படுப்பீர்களே ஆனால்,

அல்லது இந்நேரம் விஷயத்தை யூகித்திருப்பீர்களேயானால்,

அதே சமயம், 

எப்படி என்று மட்டும் புரிந்திருக்காது.  சரிதானே?

பானு அக்கா சில நாட்களுக்கு முன்னால் செவ்வாய்கிழமைக்கு ஒரு கதை அனுப்பி இருந்தார்.  கதையின் தலைப்பு 'புதியவன்'.

அது கண்ணில் படும் நேரமெல்லாம் மனதில் 'தேன்மழையிலே' பாடல் ஓடி இருக்கிறது.  அதாவது அந்த SPB பாடல் இடம்பெற்ற திரைப்படம் புதியவன்!  மனதின் அல்லது மூளையின் செயல்பாடுகள் ஆச்சர்யமானவை.

அடுத்த பாடல் 'ஆணென்ன...  பெண்ணென்ன..'.  இதுவும் SPB பாடல்தான்.  யார் பாடியது என்பதில் விசேஷம் ஒன்றும் இல்லைதான்.  சும்மா குறிப்பிடுகிறேன்.  இந்தப் பாடல் மனதில் ஓடியதற்கு காரணம் சென்ற வார வியாழன் பதிவுக்கு நானே கொடுத்திருந்த தலைப்பு...  "ஆண் ஊசி, பெண் ஊசி!"

சரி..   இப்போ வெங்கட் தளத்துக்கு சென்றால் ஏன் அந்தப்பாடல் நினைவுக்கு வரவேண்டும் என்று நீங்கள் சொல்லுங்களேன்...

==========================================================================================

வட்டார எழுத்து...

சமீபத்தில் சகோதரி 'அமைதிச்சாரல்' சாந்தி மாரியப்பன்  சிபாரிசில் ஒரு நாஞ்சில் நாடன் கதை படித்தேன்.  பல அம்சங்கள் என்னைக் கவர்ந்தாலும் இந்த மூன்று வரிகளை ஸ்பெஷலாக பகிர்ந்து விட்டு மிச்சதுக்கு வருகிறேன்!.

1)  தமிழைத் சொல்லி கொடுக்க சம்பளம் வாங்குகிறவரெல்லாம் தமிழ் கற்றிருக்க வேண்டும் என்று அவசியமில்லை என்பது மானா காவன்னாவுக்கு மனதில் ஏறியிருக்கவில்லை  

2)  மேலும் மானா காவன்னாவுக்கு நீர் பிரிவதில் தொந்தரவு உண்டு.  அடிக்கடி செலவாதிக்குப் போகவேண்டும்.  கடங்காணியில் இருக்கும் பைப்பு மூடு போலச் சொட்டு சொட்டாக வரும்.  நீண்ட நேரமாகும்.

3) காலனின் வாகனத்தின் கனைப்புச்சத்தம் காதோரம் கேட்டதுபோல தோன்றியது.

வெஜிடபிள் பிரியாணி பற்றிய அந்த சிறுகதையின் ஆரம்ப வர்ணனை மிகவும் அற்புதமானது.  இளையராஜா இசை போல நீங்கள் அந்த காட்சிக்குள் உடனே புகுந்து ஒன்றி பயணிக்க ஆரம்பித்து விடுவீர்கள்,.

வழியெங்கும் மஞ்சளாய் நெருஞ்சி பூத்திருந்தது. ஆடி மாத நடப்பில் வேம்பு பழுத்து உதிர்ந்துகொண்டிருந்தது. கிளிகள் வயிறார உண்டு கொஞ்சின. புங்கு மொட்டுப் பிடிக்க ஆரம்பித்திருந்தது. முத்துக் கள் போலக் கோக்கலாம். கானுயிருக்கோ புள்ளினத்துக்கோ கன்று காலிக்கோ எந்தப் பயனும் தராத சீமை உடைமரங்கள் காலி நிலங்களில் எல்லாம் தழைத்துக்கொண்டிருந்தன. நடந்தால் காலில் குத்தும், கை கால்களில் கீச்சும், வெட்டிக் காயப் போட்டால் விறகாகும்.

தூரத்து மலைப்பாறையில் வெள்ளைப் பெயின்டில் பெரிய எழுத்துக்களில் 'கர்த்தர் நல்லவர் என்பதை ருசித்துப் பாருங்கள்!' எனத் தீற்றப்பட்டிருந்தது. வெயிலில் பளீரென மினுங்கியது.பாறையை நோக்கிச் சென்று முட்டித் திரும்பியது சாலை. திரும்பும் வளைவில் பெரிய ஆலமரம் ஒன்று ஒங்கிச் செழித்திருந்தது. எழுபது எண்பது வயதி ருக்க வேண்டும். யார் கல்யாணத்துக்கு வைத்த ஆலங்கொம்பு என்று வயசாளிகளைக் கேட்டால் தெரியும். நீண்ட குளத்தங்கரை முழுக்க ஆல மரங்கள்.

பெரும்பாலும் எல்லா ஆலமரங்களும் மூளி பட்டுத்தான் நின்றன. சாலையில் படர்ந்த கிளைகளை பஸ் போக்குவரத்துக்காகத் தறித்தது. நிச்சயதார்த்தத்துக்குக் கால் நாட்ட ஆலங்கொம்பு வேண்டுமெனத் தறிபட்ட கிளைகள். பால்மரங்களை விறகுக்கு வெட்ட ஆரம்பித்திருக்க வில்லை இன்னும். ஆட்டுக்கு ஒடிபட்ட தழைகள்...

ஆலமரங்களைப் பிளந்து கொண்டு சாலையாஅல்லது சாலைக்கு வரம்பாக ஆலமரங்களா எனத் தோன்றும். சிலமரங்களின் அடிக்கிளை களில் - பசுவோ எருமையோ ஈன்றதும் விழும் நஞ்சுக்கொடியை பனை ஒலைப்பெட்டிகளில் கருப்பட்டிச் சிப்பங்கள் போலக் கட்டிக் கொச்சக் கயிறுகளில் தூக்கிய ஊசலாட்டம்.

சாலைமுட்டித் திரும்பும் வளைவில் நின்ற பெரிய ஆலமரத்தில் ஒரு கிளைகூட வெட்டுப்பட்ட ஊனம் இல்லை. 'எலுங்கொடித்' தொங்கல் இல்லை. பருவ காலங்களில் பொங்கிப் பூரித்துக் காய்த்துப் பழுத்து பல்வகைப் புள்ளினங்களும் பிறந்த வீட்டுச் சீராடலில் குலுங்கும் மரம் ஏனெனில் அம்மரத்தில் பேயாடிக் கொண்டிருந்ததான அச்சம் இருந்தது.

வெள்ளி செவ்வாய் இரவுகளில் பொந்து போல் மடிந்திருந்த அடிமர இடுக்கில் மினுங்கிய அகல்விளக்கு. கழிப்புக் கழித்து வெட்டி முறித்த இளவன்காய், எலுமிச்சம் பழம். சிலசமயம் பெரிய மந்திரவாதங்கள் தடந்த அடையாளங்கள். ஓரடிச் சதுரத்தில் குருத்தோலைத் தட்டுக் காமணம், புதுப்பானைப் பொங்கல், பூசைச்சாமான்கள், கழுத்தறுபட்டுச் செத்துக்கிடக்கும் கறுப்பு விருதுப்பூனை..........

"மனகாவல பெருமாள் பிள்ளை பேத்தி மறுவீடும்  வெஜிடபிள் பிரியாணியும்" - நாஞ்சில் நாடன்.

==========================================================================================

நியூஸ் ரூம் 

- இந்தியாவின் மிக நீளமான ரயில் சுரங்கப்பாதை; ரயில்வே துறையில் அடுத்த மைல்கல்.  ரிஷிகேஷ்: உத்தரகண்டில் அமைக்கப்பட்டு வரும் நாட்டின் மிக நீளமான ரயில் சுரங்கப்பாதையின் இறுதிகட்ட பணிகளை ரயில்வே துறை அமைச்சர் அஸ்வினி வைஷ்ணவ் பார்வையிட்டார்.

- பெண் என்பவர் யார்? பிரிட்டன் கோர்ட் விளக்கம்.

- சென்னை:நிலத்தின் சர்வே எண் மற்றும் பட்டா விபரங்களை, மொபைல் போன் வாயிலாக அறிவதற்காக, புதிய செயலியை வருவாய் துறை உருவாக்கி வருகிறது.

- கேன்சர் நோய் பாதிப்பு : சாவிலும் சத்தியத்தை நிறைவேற்றிய கணவன்

- டேராடூன்: குமாவுன் பல்கலை.,யில் ஆள் மாறாட்டம் செய்து பேராசிரியர் பணி நியமனம் செய்தது 20 ஆண்டுகளுக்கு பிறகு வெட்ட வெளிச்சமாகி உள்ளது.  

- சண்டிகர்: இறந்து போனதாக அறிவிக்கப்பட்ட ராணுவ வீரர் ஒருவர், 16 ஆண்டுகளுக்குப் பிறகு திரும்பி வந்த நிகழ்வு குடும்பத்தினரிடையே இன்ப அதிர்ச்சியை ஏற்படுத்தியது.

- மீரட் : உத்தர பிரதேசத்தில், காதலனுடன் நெருக்கமாக இருந்ததை கணவன் பார்த்து விட்டதால், அவரை காதலன் உதவியுடன் கழுத்தை நெரித்துக் கொலை செய்து, அவர் உடல் மீது உயிருள்ள பாம்பை விட்டு, பாம்பு கடித்து இறந்ததாக நாடக மாடிய மனைவியை போலீசார் நேற்று கைது செய்தனர்.

- ராசிபுரம்: நாமக்கல் அருகே பலகோடி ரூபாய் மதிப்புள்ள திமிங்கல எச்சத்தை விற்பனை செய்ய முயன்ற 3 பேரை வனத்துறையினர் கைது செய்தனர்.

- சென்னை: ''மனித உடலில் இருக்கும் மின்சாரமே பட்டாசு ஆலை விபத்திற்கு காரணம்,'' என, தொழிலாளர் நலத்துறை அமைச்சர் கணேசன் தெரிவித்தார்.

- இந்த மனுவை நீங்கள் எளிமையாக திரும்பப் பெற அனுமதித்தால், அது தவறான முன்னுதாரணமாக மாறிவிடும். எனவே, மனுவை தாக்கல் செய்த வழக்கறிஞர் சந்தீப் டோடிக்கு, 5 லட்சம் ரூபாய் அபராதம் விதிக்கிறோம். அதை நான்கு வாரங்களுக்குள் தேசிய சட்ட சேவைகள் ஆணையத்தில் செலுத்த வேண்டும். இவ்வாறு நீதிபதிகள் உத்தரவிட்டனர்.

- 

================================================================================================

"குமுதம் எஸ் ஏ பி யோசனையின்பேரில் நடத்தப்பட்ட அந்த லைப்ரரி மீட்டிங்கில் குமுதம் எடிட்டோரியலில் வேலை பார்ப்பவர்கள் மட்டுமே கலந்து கொள்ள அனுமதி உண்டு.

அதிகபட்சம் பத்துப் பேர்.

ஆனால் வரும் பிரபலத்துக்குத் தெரியும். அந்தப் பத்துப் பேரிடம் பேசுவது பத்துலட்சம் பேருக்கு எதிரில் பேசுவதற்குச சமம்.

அதனால்தான் சுஜாதா அந்த லைப்ரரி மீட்டிங்கில் பேசியபோது “என் எதிரில் அமர்ந்திருக்கும் தமிழ்நாட்டுக்கு வணக்கம்.” என்றதோடு, தொடர்ந்து குமுதம் = தமிழ்நாடு என்றும் சொன்னார்."

  குவிகம் - ஏப்ரல் - 'என் குமுத நாட்கள்'

=================================================================================================

அலமாரியில் 

நீட்டிக் கொண்டிருந்த 

சீப்பில் 

வெள்ளி இழைகளாக 

சிக்கி 

தொங்கி  கொண்டிருக்கின்றன 

தடுக்கி விழுந்ததில் 

தவறிப்போன 

பாட்டியின் தலைமுடிகள் 

தூக்கி எறிந்து 

சுத்தம் செய்ய 

மனமில்லாமல் 

மயங்கி நிற்கிறாள் 

அம்மா.

=========================================================================================

முன்பின் தெரியாதவர்கள்கூட, விற்பனைக்காக புத்தகங்கள் கேட்டால் அனுப்பி விடுவாராம் விஜயா வேலாயுதம். விற்று விட்டு ஒழுங்காக பணம் அனுப்புவார்களா? என்று, யாராவது கேட்டால், ”புத்தகம் படிப்பவர் மட்டுமல்ல. புத்தகம் வாங்குபவரும் நிச்சயம் தரமானவர்களாகத்தான் இருப்பார்கள்” என்பாராம்.

சகமனிதர்கள் மீதான அவரது நம்பிக்கை இன்றுவரை தொடர்வது வியப்பாகத்தான் இருக்கிறது.

விற்பனைக்காக புத்தகங்கள் பெற்றுச் சென்ற ஒருவரிடமிருந்து சில மாதங்களாகியும் பணம் வரவில்லை. அலுவலகத்தில் பணம் அனுப்ப நினைவூட்டி கடிதம் எழுதச்சொல்லி ஐயாவிடம் வலியுறுத்தியபோது அவர் எழுதிய கடிதம், ‘இந்த தேதியில் புத்தகங்களை அனுப்பியிருந்தோம். பெற்றுக் கொண்டீர்களா? விபரம் தெரியப்படுத்தவும்’. பணம் எப்போது அனுப்புவீர்கள் என்று ஒரு வார்த்தைகூட அதில் இல்லை.

கடிதம் போய்ச்சேர்ந்த அடுத்த நாளில் விற்பனையாளரின் மனைவியிடமிருந்து போன். கணவருக்கு கிட்னி பெயிலியராகி மருத்துவமனையில் இருப்பதாகவும், மாற்று சிறுநீரகம் பொருத்தப்பட்டு உடல் நலம் தேறி வருவதாகவும் விரைவில் பணம் அனுப்புவதாகவும் குறிப்பிட்டிருக்கிறார்.

வேலாயுதம் ஐயா, அலுவலக பணியாளரைக்கூப்பிட்டு சொன்னார், ‘நிச்சயம் அவர்கள் உடல் நலம் பெற்று வந்தவுடன் பணம் அனுப்புவார்கள். அதுவரை அவர்கள் கேட்கும் புத்தகங்களை அனுப்பி வைக்கவும். பணத்தைப் பற்றி பேசி அவர்களை சங்கடப்படுத்த வேண்டாம்.’

வணிகம் என்று வந்துவிட்டால் அதில் மனிதாபிமானத்திற்கோ நம்பிக்கைக்கோ இடமில்லை என்கிற, இன்றைய காலகட்டத்தில்கூட இப்படிப்பட்ட மனிதர்கள்தான் நம்பிக்கையை இன்னும் உயிரோடு வாழ வைத்துக் கொண்டிருக்கிறார்கள்.

நாமும் அதில் இணைவோம்.

இணையத்தில் படித்தது  - கந்தசாமி ஸார் பகிர்வு - 28-3-25

============================================================================

இணையத்தில் ரசித்தது...

================================================================================

ஜோக்ஸ் 

-