ஆண் ஊசி, பெண் ஊசி

கிளினிக்கில் சர்க்கரை நோய்க்காக மருத்துவரைப் பார்த்து விட்டு பாஸும் மாமியாரும் வீடு வந்த சேர்ந்த ஐந்து நிமிடத்தில் க்ளினிக்கிலிருந்து ஃபோன்.

உள்ளே வந்துகொண்டே எடுத்துக் பேசினார் பாஸ்.

"மேடம்... உங்க கிட்ட கொடுத்திருக்கற ஊசியைத் திருப்பிக் கொண்டு வாங்களேன். ரொம்ப தூரம் போயிட்டீங்களா?" 

அங்கேயே ஒரு ஊசியை போட்டுக்கொண்டு அடுத்த வாரத்துக்கு இன்னொரு ஊசியை கையில் வாங்கி வந்திருந்தார்கள்.  வீட்டுக்கருகில் ஊசி போட, தெரிந்த ஆட்கள் இருந்தார்கள். 

"வீட்டுக்கே வந்துட்டேன். ஏன்?" என்றார் பாஸ்.

"ஜென்ட்சுக்கு போடற ஊசியை உங்களுக்குக் கொடுத்துட்டோம். உடனே திருப்பிக் கொண்டு வாங்களேன்"

"அய்யய்யோ...  ஜெண்ட்ஸுக்கு போடற ஊசியா?  அப்போ அங்க அம்மாவுக்குப் போட்ட ஊசி?  அதைச் சரியாப் போட்டீங்களா" பாஸ் பதறினார்.

"அதெல்லாம் சரியாத்தான் போட்டோம். கொடுத்ததுதான் தப்பாஇருக்கு. உடனே கொண்டு வர்றீங்களா?"

"உடனே வர முடியாது.. நாளைக்குக் காலை அல்லது சாயந்திரம்.."

"இல்லை மேடம்.. உடனே கொண்டு வாங்களேன்..."

"அதெப்படிங்க உடனே முடியும்? இப்பதான் வீடு வந்தோம்...  எவ்வளவு தூரம்...  ஆட்டோ சார்ஜ் வேஸ்ட்"

கேட்டுக் கொண்டிருந்த எனக்கு ஆச்சர்யமாயிருந்தது.  

போனதோ சர்க்கரை நோய்ச் சிகிச்சைக்கு. எதுவும் ஹார்மோன் ஊசி போடக் கூட வாய்ப்பில்லை. அதென்ன ஆண் ஊசி, பெண் ஊசி?

தரப்பட்டுள்ள ஊசி மருந்தை எடுத்துப் பார்த்தபோது B1, B6, B12 ஊசி எனத் தெரிந்தது. இதில் என்ன ஆண், பெண்?

பில்லைக் கேட்டால் பில் தரவில்லை என்று பதில் வந்தது. எதற்கு எவ்வளவு பணம் எடுத்துக் கொண்டுள்ளார்கள் என்றும் தெரியவில்லை.  

"வேறு ஏதும் ஊசி போட்டார்களா?" என்று கேட்டேன்.  

"இல்லை, அங்கும் இதிலிருந்துதான் போட்டார்கள்" என்றார் பாஸ்.

அழைப்பு வந்த எண்ணுக்கு தொடர்பு கொண்டு பி காம்ப்ளெக்ஸ் ஊசியில் ஆண், பெண் பேதம் என்ன, என்ன சொல்கிறீர்கள் என்று கோபமாகக் கேட்டவுடன் உண்மையை ஒத்துக் கொண்டார். அந்தக் குறிப்பிட்ட ஊசி ஒன்றுதான் இருந்திருக்கிறது. அதை அவருக்கு அல்லது அவர்களுக்கு ரொம்பவும் தெரிந்த கஸ்டமர் ஒருவருக்கு அந்த மருந்து அன்று மாலைக்குத் தேவையாய் இருந்திருக்கிறது.  ஆர்டர் போட்டால் மறுநாள்தான் கிடைக்கும்.  வருகிற காசை விட மனமில்லை!

அதையும் அவர் அப்படிச் சொல்லவில்லை. அவர் ஏற்கெனவே பணம் கொடுத்து விட்டதாகவும் அவருக்குத் தருவதற்குப் பதில் எங்களுக்குத் தந்து விட்டதாகவும் சொல்லி,

எங்களைக் கொண்டு வந்து தர முடியுமா என்று கேட்டவர், நான் கேள்வி கேட்டதும் கொஞ்ச நேரத்தில் அவரே வந்து வாங்கிக் கொள்வதாய்ச் சொல்லி இருக்கிறார்.

வரட்டும்...

வந்தார்.  "வாங்கி கொண்டு" சென்றார்!  

அப்புறம் நாங்கள் அந்த க்ளினிக்குக்கு செல்லவில்லை!

விவரம் தெரியாதவர்கள் என்று நினைத்து என்னவெல்லாம் சொல்லி ஏமாற்றுகிறார்கள்!

[ பின் குறிப்பு :  சம்பவம் உண்மையில் நடந்ததுதான்.  ஆனால் கொஞ்சம் பழசு!1]

===============================================================================================

நியூஸ் ரூம் 

 - சென்னை : 'அரசு ஊழியர்கள் அரசின் முன் அனுமதி பெற்று, புத்தகம் எழுதலாம்; அதில், அரசை விமர்சிக்க கூடாது' என, கட்டுப்பாடு விதிக்கப்பட்டுள்ளது.

- போபால் : மத்திய பிரதேசத்தில், தண்ணீர் பஞ்சத்தால் மனைவி பிரிந்து சென்றதை கணவர் கண்ணீருடன் நிருபர்களிடம் சொன்னதை அடுத்து, பல ஆண்டு பிரச்னைக்கு தீர்வு கிடைத்துள்ளது.

- போபால் : மத்திய பிரதேசத்தில், தனக்கு மூன்றாவது குழந்தை இருப்பதை மறைத்த ஆசிரியையின் வேலை பறிபோனது.

- அலகாபாத் : 'அதீத மது போதையில் ஆண் நண்பர் வீட்டுக்குச் சென்று, பிரச்னையை தானே வரவேற்றுள்ளார்' என, பாதிக்கப்பட்ட பெண் குறித்து அலகாபாத் உயர் நீதிமன்ற நீதிபதி கருத்து தெரிவித்துள்ளார்.

- பாட்னா: பீஹாரில் காதலனுடன் சென்றதால் மகளை கொலை செய்துவிட்டு நாடகமாடிய தந்தையை போலீசார் கைது செய்தனர்.

- ஜார்ஜியா: ஹிந்து மதம் மற்றும் ஹிந்துக்கள் குறித்து அவதூறு பேசினாலோ வேறு சூழலை கெடுக்கும் நடவடிக்கையில் ஈடுபட்டாலோ கடும் தண்டனை விதிக்கும் சட்ட மசோதா அமெரிக்காவில் முதன்முறையாக அறிமுகம் செய்யப்பட்டுள்ளது.

- குனோ பூங்காவில் டிரைவராக வேலை பார்க்கும் சத்ய நாராயண் குர்ஜார் என்பவர், பிளாஸ்டிக் கேனில் தண்ணீரை எடுத்துச் சென்று, பெரிய உலோக பாத்திரத்தில் அதை நிரப்பி, மரத்தின் அடியில் வைத்துள்ளார். பூங்காவில் இருக்கும் 'ஜுவாலா' என பெயரிடப்பட்ட பெண் சிவிங்கி புலியும், அதன் குட்டிகளும் அந்த தண்ணீரை குடித்தன. தண்ணீர் வைத்ததால், ம.பி.,யில் உள்ள குனோ தேசிய பூங்கா டிரைவரின் வேலைக்கு சிக்கல் ஏற்பட்டது.

- பீஜிங்:சீனாவில் பலத்த சூறாவளி வீசுவதால், 800க்கும் மேற்பட்ட விமானங்கள் ரத்து செய்யப்பட்டன. ரயில் சேவையும் பாதிக்கப்பட்ட நிலையில், உடல் எடை 50 கிலோவுக்கு குறைவான நபர்கள் வெளியே வர வேண்டாம் என, அறிவுறுத்தப்பட்டுள்ளது.

- அலிகார் : உத்தர பிரதேசத்தில், திருமணத்துக்கு 10 நாட்களுக்கு முன், மகளுக்கு நிச்சயிக்கப்பட்ட இளைஞருடன் அவரது தாயார் ஓட்டம் பிடித்த சம்பவம் அரங்கேறி உள்ளது.

- சென்னை :  விரைவு ரயில்களில் நிர்ணயிக்கப்பட்ட அளவை விட கூடுதல் சுமைகளை எடுத்துச் செல்லும் பயணிகளிடம் கூடுதல் கட்டணம் வசூலிக்கப்படும் என்று தெற்கு ரயில்வே அறிவித்துள்ளது.

- வாஷிங்டன்: மோசடி குற்றச்சாட்டின் பேரில் இந்தியர் 200 பேரை அமெரிக்க நிறுவனம் பணி நீக்கம் செய்தது.  இவர்களில் பெரும்பாலோர் தெலுங்கு பின்னணியைச் சேர்ந்தவர்கள்.

- வர்த்தக போர் தீவிரம்; சீன பொருட்களுக்கு 245 சதவீதம் வரி விதித்து டிரம்ப் அதிரடி

- மும்பை: நாசிக் அருகே உள்ள மன்மாட் முதல் மும்பை வரை இயக்கப்படும் பஞ்சவாடி எக்ஸ்பிரஸ் ரயிலில் இந்தியாவின் முதல் முறையாக ஏ.டி.எம்., இயந்திரம் அமைக்கப் பட்டுள்ளது. இந்த ஏ.டி.எம்., இயந்திரத்தில் பணம் எடுத்து ரயில்வே அதிகாரிகள் மேற்கொண்ட சோதனை வெற்றி அடைந்தது.

=========================================================================================

==================================================================================================

இருமொழியா மும்மொழியா என்ற பஞ்சாயத்து இன்னும் ஓய்ந்தபாடில்லை. ஆனால் பலருக்கும் தெரியாத ஒரு மொழி உள்ளது. அதைத் தற்போது இருவர் மட்டும் பேசுகிறார்கள் என்பதுதான் வியப்பான செய்தி அந்த மொழியின் பெயர் மாதிகா.
கேரளாவின் கண்ணூர் மாவட்டத்தில் கரிவள்ளூர் கிராமப் பஞ்சாயத்துக்கு உட்பட்டது கூக்காணம் எனும் கிராமம். அதன் ஒதுக்குப்புறமான பகுதியில் 87 வயதாகும் கே பி நாராயணன் என்பவரும் அவருடைய உறவுக்காரப் பெண்ணான ராஜபுத்ரியும் வசித்து வருகின்றனர். இவர்கள் இருவரு மட்டுமே இப்போது மாதிகா மொழியைப் பேசுகிறார்கள். தெலுங்கு துளு கன்னடம் மலையாளம் ஆகிய நான்கு மொழிகளின் கலவைதான் மாதிகா. இந்த மொழிக்கு எழுத்து வடிவம் இல்லை. எனவே அழிவின் விளிம்பில் இருக்கிறது.
இந்த மொழி பேசும் சமூகத்தினர் வெகு காலத்துக்கு முன்னர் கர்நாடகாவில் மலைப்பாங்கான பகுதிகளிலிருந்து புலம்பெயர்ந்து கேரளாவின் வடக்கு மலபார் பகுதிகளில் குடியேறியிருக்கின்றனர். இவர்கள் முதலில் ஆதிவாசிகள் பட்டியலில் இருந்திருக்கிறார்கள். பின்னர் அட்டவணை சமூகப்பிரிவின் கீழ் கொண்டுவரப்பட்டிருக்கிறார்கள். மேற்படி இந்த இருவரின் காலத்துக்குப் பிறகு மாதிகா மொழியைப் பேசும் நபர் ஒருவரும் இருக்கப்போவதில்லை என்பதுதான் கசப்பான உண்மை.

தகவல் நன்றி ஜி வி ரிதன்யா சினேகிதி, JKC ஸார்.

==================================================================================================

==============================================================================================

===============================================================================================

நடிகர்த்திலகத்தின் இன்னொரு சாதனை - அதிகம் பேர் அறியாதது.

நடிகர் திலகம் சிவாஜி கணேசன் 350 படங்களுக்கு மேல் நடித்தவர், பல வேடங்களில் நடித்தவர், நடிப்பின் சிகரம் என்றெல்லாம் போற்றப்படுகிறார். ஆனால் அவர் சப்தமே இல்லாமல் பல சாதனைகளை செய்திருக்கிறார். அதில் முக்கியமானது முதல் நூறாவது பட நாயகன் சிவாஜி.

சிவாஜிக்கு முந்தைய காலகட்ட நடிகர்கள் 50 படங்கள் வரை நடித்தது பெரிய. விஷயமாக இருந்தது. நடிகர் திலகம் சிவாஜி தான் முதல் 100 படங்களில் நடித்த ஹீரோ. சிவாஜியின் நூறாவது படம் 'நவராத்திரி'. இந்தப் படத்தில் சிவாஜி 9 வேடங்களில் நடித்தார். படமும் 100 நாட்களுக்கு மேல் ஓடியது. சிவாஜிக்கு பிறகு எம்ஜிஆர், ஜெமினி கணேசன், ரஜினி, கமல் உள்ளிட்ட பல ஹீரோக்கள் நூறு படங்களில் நடித்தனர்.

அதோடு சிவாஜியின் இன்னொரு சாதனையும் உண்டு. இன்றைக்கு ஒரே நாளில் ஒரே நடிகர் நடித்த இரண்டு படங்கள் வெளிவந்தால் அது அதிசயமாக பார்க்கப்படுகிறது. ஆனால் ஒரு முறை இரு முறை அல்ல 17 முறை சிவாஜி நடித்த இரண்டு படங்கள் ஒரே நாளில் திரைக்கு வந்திருக்கிறது.

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

ஒரு பத்திரிகையாளரின் அனுபவம்....

........ ஜோகிந்தர் சிங்கிற்கு என்ன பதில் சொல்வது என்று எனக்குத் தெரியவில்லை. அரசின் மறைமுக உதவியோடு இலங்கைக்குச் செல்லவும், விடுதலைப் புலிகள் தலைவர் பிரபாகரனைச் சந்திக்கவும் நான் விரும்பவில்லை. அதே நேரத்தில், அப்படியொரு வாய்ப்பு கிடைக்குமானால் அதை ஏன் தவிர்க்க வேண்டும் என்றும் எனக்குள் இருந்த பத்திரிகையாளன் கேள்வி எழுப்பினான்.

யோசித்து பதிலளிக்கிறேன் என்று கூறி அவரிடமிருந்து விடைபெற்றேன். ஒரு அதிகாரியை எனக்கு அறிமுகம் செய்து வைத்தார் சிபிஐ இயக்குநர் ஜோகிந்தர் சிங். அந்த அதிகாரி எனக்குத் தேவையான எல்லா உதவிகளையும், ஏற்பாடுகளையும் செய்து தருவார் என்று என்னிடம் தெரிவித்தார். அன்று இரவு முழுவதும் ஜோகிந்தர் சிங்குக்கும் சிபிஐ. அதிகாரிக்கும் நான் என்ன பதில் சொல்வது என்று தெரியாத குழப்பத்தில் தவித்தேன்.

இக்கட்டான பிரச்னைகள் எனக்கு வரும்போது அதற்கு விடைதேடி நான் செல்கின்ற இடங்கள் மூன்று. முதலாவது முன்னாள் பிரதமர் சந்திரசேகர்ஜி; அடுத்தது பிரணாப் முகர்ஜி; மூன்றாவது, அப்போது வெளியுறவுத் துறைக்கு அமைச்சராக இருந்த ஐ.கே.குஜ்ரால். அரசுமுறை பயணமாக இலங்கைக்குச் சென்றிருந்ததால் அவரை சந்திப்பது என்பதும், அறிவுரை கேட்பதும் இயலாது.

காலை சுமார் 10 மணிக்கு கிரேட்டர் கைலாஷில் இருந்த பிரணாப் முகர்ஜியின் வீட்டுக்குச் சென்றேன். வழக்கமாக தொலைபேசியில் அவர் இருப்பதை உறுதிசெய்துவிட்டுதான் நான் போவது வழக்கம். அன்று வழக்கத்துக்கு மாறாக முன் அனுமதி பெறாமலேயே அவரை சந்திக்கச் சென்றேன்.

என்னுடைய அதிருஷ்டம் அவர் வீட்டில் இருந்தார். அவரை சந்திக்க பார்வையாளர்கள் யாரும் வந்திருக்கவில்லை. உள்ளே தனது அலுவலக அறையில் அவர் படித்துக் கொண்டிருக்கிறார் என்று உதவியாளர் தெரிவித்தார். அப்போது அவரைத் தொந்தரவு செய்ய விரும்பாததால் நான் காத்திருந்தேன்.

சுமார் 2 மணி நேரத்துக்கும் மேலான காத்திருப்புக்குப் பிறகு, அவரது அறையில் இருந்து அழைப்பு மணி அடிக்கப்பட்டது. நான் காத்திருப்பதைத் தெரிவிக்கும்படி உதவியாளரிடம் சொல்லி அனுப்பினேன்.

சில நிமிடங்களில் அழைத்தார். வழக்கம் போல 'கம்.. கம்..' என்று மகிழ்ச்சியுடன் என்னை அவர் வரவேற்றபோது, நீண்ட நாள் இடைவெளி கலைந்ததுபோல இருந்தது.

அவரது மேஜைக்கு முன்னால் அமர்ந்த என்னிடம் அவர் கேட்ட முதல். கேள்வி என்னைத் திடுக்கிட வைத்தது.

'விடுதலைப் புலிகள் பிரச்னை தமிழ்நாட்டில் மீண்டும் தலைதூக்கியிருக்கிறது என்று தோன்றுகிறதே, என்ன நடக்கிறது?'

'அப்படியெல்லாம் விடுதலைப் புலிகளின் நடமாட்டம் அதிகரித்துவிடவில்லை. அவர்களுக்கு ஆதரவும் பெருகிவிடவில்லை. அதே நேரத்தில் தமிழ்நாட்டில் இலங்கை வாழ் தமிழர்களின் நலன் குறித்த கவலை இல்லாமல் இல்லை. திமுகவும், முதல்வர் கருணாநிதியும் மீண்டும் ஒருமுறை ஈழப் பிரச்னையில் சிக்கிக்கொள்ளத் தயாராக இல்லை என்பதுதான் எனது கருத்து.'

'நேற்று பேரவையில் முதல்வர் கருணாநிதி பேசியதையெல்லாம் நான் படித்தேன். பாமக போன்ற கட்சிகள் விடுதலைப் புலிகளுக்கு ஆதரவாகவும், தமிழ் ஈழத்தை வலியுறுத்தியும் பேசுவது திமுகவின் வாக்கு வங்கியில் சரிவை ஏற்படுத்தும் என்று அவர் நிச்சயமாக அஞ்சுவார். மத்திய அமைச்சரவையில் திமுக இடம்பெற்றிருப்பதால் அவரால் முன்புபோல, வெளிப்படையான விடுதலைப் புலிகள் ஆதரவு நிலையை எடுக்க முடியாது.'

'முதல்வர் கருணாநிதியே அதனால்தான் விடுதலைப் புலிகளுக்கு ஆதரவாகப் பேசினால் கைது செய்யப்படுவார்கள் என்று எச்சரித்திருக்கிறார். வை. கோபாலசாமி பிரிந்துவிட்ட நிலையில் திமுக தீவிரமான இலங்கைத் தமிழர் ஆதரவு நிலைபாட்டை எடுக்காது. அதே நேரத்தில் விடுதலைப் புலிகளுக்கும் அதன் தலைவர் பிரபாகரனுக்கும் இளைஞர்கள் மத்தியில் ஆதரவு இருக்கிறது என்பதையும் குறிப்பிடாமல் இருக்க முடியவில்லை.'

'இளைஞர்கள் மத்தியில் என்றால், பரவலாகவா அல்லது குறிப்பிட்ட சிலரிடம் மட்டுமா?'

 'திராவிடர் கழகம், மதிமுக, பாமக போன்றவற்றில் இருக்கும் இளைஞர்கள் பிரபாகரனைத் தலைமைப் பண்புக்கு முன்னுதாரணமாக நினைக்கிறார்கள்' என்று சொல்லி நிறுத்தினேன்.

பிரணாப் முகர்ஜி சாவகாசமாக தனது பைப்பில் புகையிலையை நிரப்பி, பற்ற வைத்து, புகையை உறிஞ்சினார். சிறிது நேரம் ஏதோ யோசித்தபடி இருந்தார். நான் இடைமறிக்க விரும்பவில்லை. மூன்று, நான்கு நிமிடங்களுக்குப் பிறகு என்னை அவர் ஏறெடுத்துப் பார்த்தபோது நான் மெதுவாக பேசத் தொடங்கினேன்.

'நான் உங்களிடம் யோசனை கேட்பதற்காகத்தான் இங்கு வந்திருக்கிறேன். நான் என்ன கேட்க நினைத்து வந்தேனோ, அதே விஷயம் குறித்து நீங்கள் பிரஸ்தாபித்தது என்னை ஆச்சரியப்படுத்துகிறது...'

'என்ன பிரச்னை, என்னிடம் என்ன யோசனை கேட்க வந்தாய்?'

நான் போஃபர்ஸ் ஆவணங்கள் குறித்துத் தெரிந்துகொள்வதற்காக சிபிஐ அலுவலக நிருபர்கள் கூட்டத்துக்கு போனதில் தொடங்கி, இயக்குநர் ஜோகிந்தர் சிங்கை சந்தித்தது, அவர் என்னைத் தனியாக அழைத்துப் பேசியது, என்னிடம் விடுதலைப் புலிகள் தலைவர் பிரபாகரனை சந்திக்கும்படி கேட்டுக்கொண்டது என்று அனைத்தையுமே தெரிவித்தேன்.

'ஜோகிந்தர் சிங்கின் வேண்டுகோளை ஏற்றுக்கொள்வதா, கூடாதா என்று நீங்கள்தான் எனக்கு வழிகாட்ட வேண்டும்' என்று நான் சொன்னபோது, பிரணாப்தா புன்னகைத்தார்.

'அவர்கள் சொன்னதையெல்லாம் நீ அப்படியே நம்பி இலங்கைக்குப் போய் பிரபாகரனை சந்திக்க நினைப்பது எனக்கு வியப்பாக இருக்கிறது.

போய் பிரபாகரனை சந்திக்க நினைப்பது எனக்கு வியப்பாக இருக்கிறது. அவர்கள் உன்னை ஆழம்பார்க்கிறார்கள். பிரபாகரனுடன் தொடர்பில் இருக்கும்

உனது நண்பர்கள் யார் யார் என்பதைத் தெரிந்துகொள்ள விரும்புகிறார்கள். அடுத்தகட்டமாக உன்னை பலியாடாக அனுப்பினாலும் நான் ஆச்சரியப்பட மாட்டேன்..' என்று சொல்லி நிறுத்தினார் பிரணாப் முகர்ஜி.

எனக்கு குப்பென்று வியர்த்துவிட்டது. இப்படியெல்லாம் நான் நினைக்கவே இல்லை. அவரது அனுபவமும், அரசியல் நுட்பமும் எத்தகையது என்பதை அப்போது உணர்ந்தேன். அவரே மேலும் பேசினார்.

'விடுதலைப் புலிகளை நீ சாதாரணமாக எடைபோட்டு விடாதே. இந்தியா போன்ற மிகப் பெரிய நாட்டில், முன்னாள் பிரதமரையே அத்தனை பாதுகாப்புகளையும் மீறி அவர்களால் படுகொலை செய்ய முடிந்தது என்றால், எந்த அளவுக்கு அந்த அமைப்பு கட்டமைக்கப்பட்டிருக்கிறது என்பதை சிந்தித்துப் பார்க்க வேண்டும். ஜோகிந்தர் சிங்கும், இந்திய அரசும்

உனக்குப் பின்னால் இருக்கிறது என்கிற சின்ன சந்தேகம் ஏற்பட்டாலும், நீ பிரபாகரனையே சந்திக்கும் அளவுக்கு நெருங்கினாலும் உயிரோடு திரும்ப மாட்டாய்..'

'அப்படியானால் நான் சந்திக்க விரும்பவில்லை என்று சொல்லி விடுகிறேன்.

'சொல்லிவிடுகிறேன் அல்ல. மிகவும் அழுத்தமாகவும், தீர்மானமாகவும்

அப்படியொரு ரிஸ்கை எடுக்க நான் தயாராக இல்லை என்று  சொல்லிவிடு.  ஒருவேளை உன்னை மீண்டும் தனியாக அழைத்து வற்புறுத்தவோ, அல்லது 'யாருடைய ஆலோசனை கேட்டு இப்படி முடிவெடுத்தாய் 'என்று கேட்டாலும் தைரியமாக எனது பெயரை நீ ஜோகிந்தர் சிங்கிடம் தெரிவிக்கலாம் அவர் என்னை தொடர்பு கொண்டால் நான் பேசிக் கொள்கிறேன்' 

இப்படி பக்க பலமாக எனக்கு பிரணாப் முகர்ஜி இருக்கிறார் என்கிற தைரியம் நிஜமாக நெகிழ வைத்தது.  அவர் இருக்கும்  நிலைக்கு என்னை போன்ற சாதாரணமான ஒரு பத்திரிக்கையாளருக்கு ஆதரவாக இருக்க வேண்டிய அவசியமும் இல்லை.  நான் நாற்காலியில் இருந்து எழுந்து அவரது காலை தொட்ட போதும் என் கண்கள் கலங்கிவிட்டன. 

அவர் புன்னகைத்தபடியே என் முதுகில் தட்டினார்.  'இதில் எல்லாம் சிக்கிக் கொள்ளக் கூடாது' என்று தெரிவித்தார். நான் மீண்டும் நாற்காலிக்கு சென்று அமர்ந்தேன்

பிரணாப்தா என்கிற மந்திரச் சொல் - கி வை - தினமணி ஆகஸ்ட் 24

================================================================================================

பொக்கிஷம்  

-

=========================================================================================

வாட்ஸாப் குடும்பக் குழுமத்தில் உறவொன்று பகிர்ந்த படம் .  சுவாரஸ்யமாக இருந்ததால் இங்கும் பகிர்கிறேன்!

ஒரு சாதாரண புகைப்படம் எப்படி பார்ப்பவர்களை குழப்ப முடியும் என்பதற்கு உதாரணம் இந்த படம்!!!

கொஞ்சம் உற்று நோக்கினால் அல்லது zoom செய்து பார்த்தால் உண்மை தெரியும்!!! வெறும் துணி ஒருவரை மிதக்க வைக்கும் விந்தை படத்தை எடுத்த பெயர் தெரியாத போட்டோகிராபர் வாழ்க!!!

================================================================================================

ஜோக்ஸ் 

இணையத்திலிருந்து எடுத்துத் தொகுக்கப்பட்டவை 

===========================================================================================