வறுமைக்கு வறுமையை வைத்ததோர் மாமன்னன் வாழ்கவே வாழ்க வாழ்க

கர்ணன்.  தமிழில் முதன் முதலாக ஈஸ்டமென்கலரில் வெளியான திரைப்படம்.  1964 ல் பந்துலு இயக்கத்தில் சக்தி கிருஷ்ணஸ்வாமி வசனத்தில் வெளியானது.  கண்ணதாசன் பாடல்கள்.  விஸ்வநாதன் - ராமமூர்த்தி இசை.

இன்று பகிரப்பட்டுள்ள இந்தப் பாடல் யு டியூபில் துண்டு துண்டாகக் கிடைத்தது.  இப்போது சேந்து  ஒரே காணொளியாக கிடைக்கவும் சேர்த்தே பகிர்ந்து விட்டேன்.  முதலில் மூன்று துணுக்குகளாக எடுத்து வைத்திருந்தேன்.  

சிவாஜி அதாவது கர்ணனை வள்ளல் அது இது என்று ஐஸ் வைத்து புகழும்போது அவர் முகத்தில் தெரியும் பெருமிதம், உடனே பொருள்களை எடுத்து கொடுக்கும் பெருமை..

பாடலின் ஒவ்வொரு பகுதியும் ஒவ்வொரு சுவாரஸ்யம், இனிமை.  டி எம் சௌந்தரராஜன், பி பி ஸ்ரீனிவாஸ், திருச்சி லோகநாதன், சீர்காழி கோவிந்தராஜன் ஆகியோர் குரல்களில் பாடல்.  ஆயிரம் கரங்கள் நீட்டி பாடலில் குழுவினராக பாட ஆரம்பித்தாலும், 'தழைக்கும் ஓர் உயிர்கட்கெல்லாம்' வரியில் டி எம் எஸ்ஸின் குரல் ஓங்கி ஒலிக்கும்.

படத்தில் வரும் அளவு கர்ணன் நாயக குணங்கள் கொண்டவன் இல்லை என்று வாதங்கள் முன்வைக்கப்பட்டாலும் மகாபாரதம் எல்லா கருத்துக்கும், எல்லா யூகத்துக்கும் இடம் கொடுக்கிறது.  எல்லோருக்கும் சமமான நாயக அந்தஸ்து கொடுக்கப்பட்டிருக்கிறது.  குணம் நாடி குற்றமும் நாடி போல அளவில்தான் மாற்றம்.  துரியோதனன் வில்லன் என்றாலும் மகாவீரன்.

பந்துலு இந்தப் படத்துக்காக திருமுருக கிருபானந்த வாரியார் அவர்களிடமும், சேங்காலிபுரம் அனந்தராம தீக்ஷிதர் அவர்களிடமும் விவரங்கள் விசாரித்துக் கொண்டாராம்.

உள்ளத்தில் நல்ல உள்ளம் பாடலும் ஆயிரம் கரங்கள் நீட்டி பாடலும் வரிகளாக எழுதி அப்புறம் டியூன் போடப்பட்டு மற்ற பாடல்கள் எல்லாம் டியூனுக்கு எழுதிய பாடல்களால்.  இரண்டே நாட்களில் கண்ணதாசன் பாடல்களை எழுதிவிட, மூன்றே நாட்களில் பாடல்கள் ஒலிப்பதிவு முடிந்ததாம்.

மழை கொடுக்கும் கொடையுமொரு

இரண்டு மாதம்…ம்ம் ம்ம் ம்ம்

வயல் கொடுக்கும் கொடையுமொரு

மூன்று மாதம்…ம்ம் ம்ம் ம்ம்

பசு வழங்கும் கொடையுமொரு

நான்கு மாதம்…ம்ம் ம்ம் ம்ம்

பார்த்திபனாம் கர்ணனுக்கோ

நாளும் மாதம்…..

பார்த்திபனாம் கர்ணனுக்கோ

நாளும் மாதம்…

நாணிச் சிவந்தன

மாதரார் கண்கள்

நாடு தோறும் நடந்து சிவந்தன

பாவலர் கால்கள்

நற்பொருளை தேடிச் சிவந்தன

ஞானியர் நெஞ்சம்…ம்ம்…..ம்ம்ம்

தினம் கொடுத்து

தேய்ந்து சிவந்தது

கர்ண மாமன்னன் திருக்கரமே….

தேய்ந்து சிவந்தது

கர்ண மாமன்னன் திருக்கரமே

மன்னவர் பொருள்களை

கை கொண்டு நீட்டுவார்

மற்றவர் பணிந்து கொள்வார்…

மாமன்னன் கர்ணனோ

தன் கரம் நீட்டுவார்

மற்றவர் எடுத்துக் கொள்வார்…

வலது கை கொடுப்பதை

இடது கை அறியாமல்

வைத்தவன் கர்ண வீரன்

வறுமைக்கு வறுமையை

வைத்ததோர் மாமன்னன்

வாழ்கவே வாழ்க வாழ்க

என்ன கொடுப்பான்

எவை கொடுப்பான்

என்றிவர்கள் எண்ணும் முன்னே…ஏ…ஏ…

பொன்னும் கொடுப்பான்

பொருள் கொடுப்பான்

போதாது போதாதென்றால்

இன்னும் கொடுப்பான்

இவையும் குறைவென்றால்

எங்கள் கர்ணன்

தன்னைக் கொடுப்பான்

தன் உயிரும் தான் கொடுப்பான்

தயாநிதியே…

ஆயிரம் கரங்கள் நீட்டி

அணைக்கின்ற தாயே போற்றி

அருள் பொங்கும் முகத்தைக் காட்டி

இருள் நீக்கும் தந்தாய் போற்றி

 தாயினும் பரிந்து

சாலச் சகலரை

அணைப்பாய் போற்றி

தழைக்கும் ஓர் உயிர்கட் கெல்லாம்

துணைக் கரம் கொடுப்பாய் போற்றி

தூயவர் இதயம் போல

துலங்கிடும் ஒளியே போற்றி

தூரத்தே நெருப்பை வைத்து

சாரத்தை தருவாய் போற்றி

ஞாயிறே நலமே வாழ்க

நாயகன் வடிவே போற்றி

நானிலம் உளநாள் மட்டும்

போற்றுவோம் போற்றி போற்றி…

=======================================================================================

கர்ணன் படம் பற்றி இணையத்தில் வாசித்தது...

ஐம்பது வருடங்களுக்கு முன்பு இருந்த மக்கள் மஹாபாரத கதையை அறிந்தவர்கள், அவர்கள் அப்படத்திலுள்ள பெரும்பாலான காட்சிகள் ஜோடிக்கப்பட்டவை என்பதை உணர முடிந்தது. ஆனால் இன்று இருப்பவர்களுக்கு பாரதக் கதையே தெரியாதே, திரைப்படத்தைப் பார்த்துவிட்டு அதை அப்படியே நம்பிவிடும் வாய்ப்பே அதிகம்...

இத்திரைப்படத்தில் ஜோடிக்கப்பட்டுள்ள காட்சிகளில் மிகவும் கண்டிக்கத்தக்க காட்சி: இறுதியில் கிருஷ்ணர் கர்ணனிடம் வந்து தர்மத்தை பிச்சை கேட்கும் காட்சி. எடுத்துச் சொல்வதற்கு ஆள் இல்லை என்பதால், பெரும்பாலான தமிழக மக்கள், கிருஷ்ணர் கர்ணனிடம் பிராமண ரூபத்தில் வந்து அவன் செய்த தானத்தின் பலன்களை தானமாகப் பெற்றார் என்று இன்றும் நம்பிக் கொண்டுள்ளனர். இதில் எள்ளளவும் உண்மையில்லை, இது ஏமாற்றுத்தனத்தின் உச்சகட்டம். கிருஷ்ணர் தனது விஸ்வரூபத்தை கர்ணனுக்குக் காட்டியதாகக் கூறுவதும் பொய், "வஞ்சகன்_கண்ணனடா" என்பதும் துளியும் ஏற்கத்தக்கதல்ல. கதாநாயகர்களுக்காக வடிவமைக்கப்படும் இத்தகைய காட்சிகள் பெரும் கண்டனங்களுக்கு உரியவை. அந்தோ பரிதாபம்! கண்டிக்கத்தான் ஆள் இல்லை!

இதர சில குளறுபடிகள்

திரைப்படத்தின் குளறுபடிகள் சொல்லி மாளாதவை, அவை எமது நோக்கமும் அல்ல. இருப்பினும், முக்கிய குளறுபடிகளை சுட்டிக் காட்டுவதை கடமையாக உணர்கிறோம்.

* கர்ணன் செய்த அனைத்து அட்டூழியங்களும் மறைக்கப் பட்டுள்ளன.

* கர்ணன் அர்ஜுனனால் தோற்கடிக்கப்பட்ட காட்சிகளில் ஒன்றையும் காணோம்.

* குந்தி போர்க்களத்திற்கு ஓடிவந்து, மகனே என்று அழுவதெல்லாம் சுத்த பொய். மஹாபாரதத்தின்படி போர் முடிந்த பின்னர், இறந்த உறவினர்களுக்கு யுதிஷ்டிரர் ஈமச் சடங்குகளைச் செய்யும்போது மட்டுமே குந்தி அதனை வெளிப்படுத்துவாள். போர்க்களத்திற்கு வந்து அழுவதாகவும், அதற்காக கர்ணன் ஏற்கனவே வேண்டுகோள் விடுத்ததுபோலவும் காட்டியிருப்பது வேதனைக்குரியதாகும்.

* கர்ணனின் மகன் விருஷஷேணன், அவனது கண்களுக்கு முன்பாக முறையான போரில் அர்ஜுனனால் கொல்லப்பட்டான். அவன் ஒரு சிறுவனும் அல்ல, பின்னால் இருந்து தாக்கப்பட்டவனும் அல்ல. விருஷஷேணனை சிறுவனாகக் காட்டியதும் பின்னால் இருந்து கொல்லப்பட்டதாகக் காட்டியதும் வெற்று அனுதாபங்களை கர்ணனுக்கு சேகரிப்பதற்காகவே.

* சல்லியன் தேரிலிருந்து ஓடியவனா? இல்லை. சல்லியன் பெரும் முயற்சி செய்தும் தேரை உயர்த்த முடியாததால், கர்ணனே இறங்க வேண்டியிருந்தது என்பதே உண்மை.

* நாக அஸ்திரத்தை இரண்டாம் முறை பிரயோகிக்க கர்ணன் மறுத்ததற்கு, “நான் எனது வெற்றிக்கு நாகங்களைச் சார்ந்தவன் அல்ல,” என்ற கர்ணனின் அகந்தையே காரணம். குந்தி அவ்வாறு வரம் கேட்டதாக வருவது கற்பனை.

* கர்ணன் பரசுராமரிடம் பொய் சொல்லி கலை கற்றது துரியோதனனின் தூண்டுதலினால் அல்ல. துரியோதனனைச் சந்திப்பதற்கு முன்பாகவே கர்ணன் பரசுராமரிடம் கலை கற்றிருந்தான்.

* மனைவியைப் பணயம் வைத்ததை கர்ணன் திட்டுவது போன்ற காட்சிகள் உண்மையை திருப்பிப் போடுகின்றன. திரௌபதியை அவமானப்படுத்தியதில் கர்ணன் மிக முக்கிய பங்கு வகித்தான் என்பதை யாரும் மறந்துவிடக் கூடாது.

* அதர்மத்தின் பக்கம் நின்ற கர்ணனைக் காண தர்ம தேவதை வருவதுபோன்ற காட்சிகள் எதற்காக?

* கர்ணனின் திருமண வாழ்க்கை குறித்த தகவல்கள் கற்பனைகளால் மூழ்கியுள்ளன.

மொத்தத்தில் சினிமா பார்த்து மஹாபாரதம் கற்க வேண்டாம் என்பதை இதன் மூலமாக பகவத் தரிசன வாசகர்களுக்கு அறிவுறுத்துகிறோம்...

__நன்றி _: ஶ்ரீ கிரிதாரி தாஸ்

(மீள் பதிவு)

Narayanasami Krishnaswami  

----------------------------------------------------------------------------------------------------------------------------------------------------------------

திரைப்படத்தில் ஒரு காட்சி.  இந்திரன் வயோதிக அந்தணர் வேடம் கொண்டு கர்ணனின் கவச குண்டலங்களை பெற வருவதாக அக்கட்சி அமைப்பு.  கர்ணனின் தந்தையான சூரியன் அதை கர்ணனுக்கு சொல்லி எச்சரிக்கிறான்.  'உயிரைக்கூட தானம் செய்வேன் என்னும் கொள்கையை உடைய  கர்ணன் அதையும் கொடையாகக் கொடுக்கிறான்.

காட்சியில் சூரியன் சன்னதியிலிருந்து சிவாஜி வெளியே வந்து ராமதாஸை பார்க்கிறார்.  "வணக்கம் வயோதிகரே" என்று கரம் குவிக்கிறார். வயோதிகர் வேடத்தில் வந்திருக்கும் இந்திரன் தடுமாற்றத்துடன் "வ.. வணக்கம் மன்னா" மன்னனைப் பணிகிறான்.  கர்ணன் சட்டென விலகி உள்ளே சன்னதியை இந்திரன் வணங்குமாறு நிற்கிறான்.  நல்ல காட்சியமைப்பு.  ரசிக்கும்படி இருந்தது.  அதன் பின்னரான காட்சியில் சகுனி கர்ணனை துரோகம் செய்து விட்டதாகக் குற்றம் சாட்டும்போது சிவாஜியின் சட்டென கை நீட்டி மாமாவைக் காட்டி, அதே வேகத்தில் திரும்பி கைகளை துருரியோதனன் பக்கம் நீட்டி துரியோதனனைப் பார்க்கும் காட்சி..