ஒருவன் செய்யும் தவறுகளில் எந்தத் தவறுகள் மன்னிக்க இயலாதவை? + சரோஜா தேவி பகுதி 09

 

கேள்வி பதில்கள் : 

நெல்லைத்தமிழன்: 

வசதி வாய்ப்பு மிக அதிகமாக அதிகமாக ஒருவன் முதலில் செய்யும் தவறு என்னவாக இருக்கும்? அதாவது செல்வம் வரும்போது ஒருவனிடம் வரும் முதல் தவறு எது?

# தான் மற்றவரை விட சற்றே உயர்வு எனும் அகந்தை வரும்.  இது தவறு என்று சொல்வதற்கில்லை.  ஆனால் இந்த அகந்தை புலனடக்கத்தைச் சிதைத்தால் விரும்பிய எதையும் பெற தவறு செய்யலாம் என்ற தைரியம் வரும். அழிந்து போன பெருஞ்செல்வர்கள் சிலரை எண்ணிப் பாருங்கள்.

* வரும் முதல் தவறு அதிகமாக செலவு செய்வதுதான்!

ஒருவன் செய்யும் தவறுகளில் எந்தத் தவறுகள் மன்னிக்க இயலாதவை? எவற்றை பெரிய தவறுகளாகக் கருத முடியாது?

# பிறரை நோக அடிக்கும் தவறுகள் மன்னிக்க இயலாதவை. யாருக்கும் தீங்கு செய்யாத தவறுகள் அதாவது நமக்கு மட்டுமே பாதிப்பு தருபவை பிறர் மன்னிக்கத் தேவையில்லாதவை.

* "தவறு என்பது தவறிச் செய்வது.  தப்பு என்பது தெரிந்து செய்வது.  தவறு செய்தவன் திருந்தப் பார்க்கணும்; தப்பு செய்தவன் வருந்தி ஆகணும்"  மன்னிக்க முடியாத தவறு என்னைப்பொறுத்த வரை நம்பிக்கை துரோகம்.

ஒரு பிரபலத்தைப் பார்ப்பதற்கு ஏன் முண்டியடிக்கிறோம்? பார்ப்பதனால் நமக்கு என்ன கிடைத்துவிடுகிறது? (தொட்டுவிடும் தூரத்தில் அவரைப் பார்த்தேன், இவர் நாம நினைக்கறமாதிரி அழகு கிடையாது, கறுப்புதான்,  பக்கத்துல பார்த்தேன், என்னா வசீகரப் புன்னகை?  என்றெல்லாம் பெருமை பேசிக்கொள்ளவா?)

# ஒருவரைப் பற்றிய அற்ப விஷயங்கள் பெரிய அளவில் பேசப்படும் போது அவரைப் பார்க்க வேண்டும் என்கிற ஆசை நமக்குள் எழுந்து நமக்கு தெரியாமலே அடங்கி உட்கார்ந்திருக்கிறது. அப்படி பார்க்கும் சந்தர்ப்பம் வரும்போது அது பீறிட்டு எழுந்து வந்து நம்மை செயல்பட வைக்கிறது. அது தருகிற அபரிமிதமான அற்ப ஆயுளுடன் கூடிய சந்தோஷம் நம்மை  அது பற்றிப் பெருமை அடித்துக் கொள்ள வைக்கிறது.

*  நல்லவேளையாக எனக்கு இதுவரை இப்படியான ஆசை வந்ததில்லை.

இரவு உணவாக ஓரிரண்டு சப்பாத்தியோ இல்லை ஒரு தோசையோ போதும் என்றெல்லாம் உணவுக்கு குறைந்த அளவு கொடுக்க ஆரம்பித்தது,  நிறைய சப்பாத்தி பண்ணி, தோசை வார்த்து நொந்த பெண் மருத்துவராக இருக்குமோ? நமக்கு எவ்வளவு தேவை என்று நம் வயிறு சொல்லாதா?

# வயிறு சொல்லும்; ஆனால் நாக்கு கேட்காது.

*  பிடித்த உணவு சாப்பிடும் முன்பு இரண்டு மூன்று முள்ளங்கி பத்தை பச்சையாக சாப்பிட்டு விட்டு பத்து நிமிடங்கள் கழித்து உணவை அணுகவும்!

பானுமதி வெங்கடேஸ்வரன் :

சமையலில் புதிதாக ஏதாவது முயற்சிக்க வேண்டுமென்றால் உங்கள் தேர்வு காணொளிகளா? புத்தகங்களா(டிஜிடல் புத்தகங்களும் இதில் அடங்கும்)?

# இதற்கு நம் நண்பர் நெ.த அல்லது ஸ்ரீராம்தான் பதிலளிக்க சரியானவர்.

என்னிடம் சமையல் புத்தகம் எதுவும் கிடையாது. அண்மையில் வெண்டைக்காய் கறி எப்படி செய்ய வேண்டும் என்று youtube ஐ பார்த்து செய்தேன். அவ்வளவுதான் நம்ம சாமர்த்தியம்.

& இரண்டுமே உண்டு. இரண்டுக்கும் சம பங்கு! 

*  பெரும்பாலும் சொந்தக் கற்பனைதான்.  தேடிச்சென்று பார்ப்பதில்லை என்றாலும் தானாக வரும்  சமையல் குறிப்புகளை பார்ப்பதுண்டு.

சிறு குழந்தைகள் வயதுக்கு மீறி பேசினால் அதிகப்பிரசங்கித்தனம் என்கிறோம். வயதானவர்கள் தங்களுக்கு வயதாவதை ஒப்புக்கொள்ள மறப்பது என்ன தனம்?

# அது முட்டாள்தனமா பரோபகார சிந்தையா என்பது அவர் செய்ய அல்லது செய்யாமலிருக்கும் காரியம் என்ன என்பதைப் பொறுத்திருக்கும்.

*வயசாவதை ஒப்புக்கொள்ளாவிட்டால் கூட பரவாயில்லை.  சிறுகுழந்தை போல பேசாமல் இருந்தால் சரிதான்!

= = = = = = = 

படமும் பதமும் : 

நெல்லைத்தமிழன் :

பஹ்ரைனில் முத்து ரவுண்டபவுட் (பேர்ல் ரவுண்டபவுட்) என்று ஒன்று இருந்தது. மிகவும் புகழ் பெற்ற மிக அருமையான இடம். பஹ்ரைனில் இருக்கும் செண்ட்ரல் மார்க்கெட் என்ற இடத்திற்குப் பக்கத்தில் இருந்தது. செண்ட்ரல் மார்க்கெட் நம்ம ஊர் கோயம்பேடு மார்க்கெட் போன்று. எல்லா நாட்களிலும் இந்திய மற்றும் எல்லா தேச காய்கறிகள் பழங்கள் குறைந்த விலையில் கிடைக்கும்.  பெரும்பாலும் நான் வெள்ளிக்கிழமை காலையில் செண்ட்ரல் மார்க்கெட் செல்வேன் (பசங்களையும் வற்புறுத்தி எழ வைத்து அழைத்துச்செல்வேன். அவங்க கடுப்பாவாங்க).  காய்கறிகள் வந்துகொண்டிருக்கும்போதே புத்தம் புதிதாக நான் வாங்குவேன். அதிலும் மிகவும் சீக்கிரம் சென்றால்தான் சௌசௌ கிடைக்கும். அது பெரும்பாலும் இந்தியாவிலிருந்து வராது. பிலிப்பைன்ஸில் இருந்து வரும். அந்த மக்களுக்குப் பிடிக்குமாம்.  அது சரி...பேர்ல் ரவுண்டபவுட் படத்தைப் போட்டுவிட்டு மார்க்கெட் பற்றிப் பேசுகிறேனே என்று நினைக்கிறீர்களா? இந்த ரவுண்டபவுட் இப்போது இல்லை. அழிக்கப்பட்டுவிட்டது. அதைப்பற்றி எப்போது எழுதுவேன், அதற்கும் என் கம்பெனிக்கும் ஒரு வகையில் சம்பந்தம் ஏற்பட்டு எப்படி கம்பெனி பாதிக்கப்பட்டது என்றெல்லாம் எழுதமுடியுமா?

துறைத் தலைவன் என்பதால், வருடத்திற்கு ஒரு முறை பஹ்ரைனில் என்னுடைய டிபார்ட்மெண்டில் வேலை பார்த்த அனைவருக்கும் ஒரு நாளில் ஒயிட் ஃபாரஸ்ட் கேக் ஆர்டர் செய்வேன்.  இதைத் தயாரிப்பது எங்கள் சூப்பர்மார்க்கெட்டின் பேக்கரி டிவிஷன்.

ஸ்ரீராம் :

மதுரைக்கு சற்றே வெளியே கோவில்.  2014 ல் எடுக்கப்பட்ட ஃபோட்டோ.  அப்போதே செல்ஃபி பாய்ண்ட் வைக்கப்பட்டிருக்கிறது இல்லை?!!

சற்றே மேடேறி அருகே சென்றால் அந்த செல்ஃபி பாயிண்ட் இதுதான்....

= = = = = = = = = = = = = = = = = = = = = = = = = = =

KGG பக்கம் : 

சரோஜாதேவி தொடர்கதை : 

முந்தைய பகுதி சுட்டி : பகுதி 08 : நானே நாநா, யாரோதானா ! 

இனி 

பகுதி 09 : மாயா மச்சீந்திரா .. ! 

நாநா: " என் அம்மா அப்பா இருவரும் டெல்லியில் இருக்காங்க. இருவரும் அங்கே வேலையில் இருக்கிறார்கள். மத்ய சர்க்கார் வேலை. என் அண்ணன் குடும்பம் ஆந்திராவில் இருக்கிறார்கள். என் அப்பாவின் தாத்தா ஆங்கிலேயர் காலத்தில் சட்டப் படிப்பு படித்து, நீதித்துறையில் பெரிய பதவி வகித்தவர் . அந்தக் காலத்திலேயே அவர் இந்த மைலாப்பூரில் வாங்கிப் போட்ட சொத்துகள் எல்லாவற்றையும் நான் பார்த்துக் கொள்கிறேன். தாத்தா ஆந்திராவில் வாங்கிப் போட்ட சொத்துகள் எல்லாவற்றையும் அண்ணன் பார்த்துக் கொள்கிறார். அவர் பிரைவேட் கம்பெனியில் தலைமைப் பொறுப்பில் இருக்கிறார். அப்பாவின் தாத்தாவின் சொத்துக்கள் எல்லாம், அவரின் ஒரே பேரனானதால் இவருக்கு வந்துவிட்டது. அப்பா அம்மா ஆசைப்பட்டபடி நான் சென்னையில் கம்ப்யூட்டர் இஞ்சினீரிங் படித்து, சொந்த பிஸினஸ் செய்ய ஆரம்பித்துள்ளேன். 

என் பிஸினஸ் நிறுவனத்தின் பெயர் 🍌Banana enterprises. இந்த நிறுவனத்தில் பல பிரிவுகள் உள்ளன. 

பிரைவேட் டிடெக்டிவ் ஆக நீ பதிவு செய்தபோது அதில் C A படிப்பு முடித்ததாக நீ எழுதி இருந்தது சரியான தகவல்தானே? " 

" ஆமாம்" என்றான் பாபா. 

" எனக்கு இப்போ வேண்டியது ஒரு ஆடிட்டர். எனக்குக் கிடைக்கும் சில கணக்கு வழக்குகளை ஆராய்ந்து உண்மை நிலையை அளிக்கக்கூடிய ஒரு நம்பத் தகுந்த ஆள். " 

" ஓ கே. என்னால் முடியும்" 

" அது போதும். தேவை என்றால் நீயும் அருவமாக மாறி சில தகவல்களை கண்காணித்து எனக்கு விவரங்கள் கொடுக்க வேண்டும். " 

" செய்கிறேன். சட்டத்திற்குப் புறம்பான விஷயங்கள் எதுவும் கிடையாதுதானே" 

" இதற்கு ஒரு வார்த்தையில் பதில் சொல்ல வேண்டும் என்றால் ' இல்லை' என்பேன்; விளக்கமாக சொல்ல வேண்டும் என்றால் ' ends justify the means' என்று சொல்வேன். போகப்போக நீயே புரிந்துகொள்வாய் " 

" சரி. புரிந்து கொள்கிறேன். சந்தேகம் வந்தால் கேட்கிறேன். ஆனந்துக்கு வீணா எனக்கு விமலா போல உனக்கு யாராவது இருக்கிறார்களா?" 

" இன்றளவில் அப்படி யாரும் என் மனதில் இல்லை. எதிர்காலத்தில் யாராவது வரலாம். நான் கல்யாணம் செய்து கொண்டு குடும்ப வாழ்க்கை தொடங்கினால்தான் ரிடையர் ஆன பின்பு என்னோடு வந்து இருப்போம் என்று அம்மா அப்பா சொல்கிறார்கள். அடிக்கடி கல்யாண புரோக்கர் ஒருவரை வேறு என்னைப் பார்க்கச் சொல்லி அனுப்புகிறார்கள். அவர் கொண்டு வந்த படங்களும் விவரங்களும் பாவனாவிடம் ஒரு தனி ஃபைலில் உள்ளன. ஆனால் அவர்களில் யாரும் எனக்கு ஏற்றவர்களாகத் தோன்றவில்லை.‌" 

" சரி. நானும் பார்த்து காலாகாலத்தில் உனக்கு ஒரு கால்கட்டு போட முயற்சி செய்கிறேன் " என்றான் பாபா.‌

*****

" ஆஸ்பத்திரிக்குப் போகிறேன் என்று சொல்லிவிட்டு வந்திருப்பதால் இரண்டு மூன்று நாட்களுக்கு இங்கேயே என்னோடு தங்கு. ஆனந்தினுடைய அப்பா அம்மா இங்கே வரும்போது அவர்களுடன் சேர்ந்து நாம் இருவரும் உன் வீட்டுக்கு போவோம். ஆனந்த் அப்பா அம்மா இருவரும் ஜயராமனைப் பார்த்து பேசட்டும்.‌ பிறகு வீணாவும் ஆனந்தும் வீடியோ காலில் பேசட்டும். முதலில் அவர்களின் டும் டும் டும் முடியட்டும்.  அப்புறம் பாபா விமலா டும் டும் டும் "

" நடக்கட்டும் நடக்கட்டும் " என்றது பாவனா. 

****** 

அன்று சாயந்திரம் நாநா பாபாவிடம், " வா என்னோடு ஒரு வாக்கிங் போய்ட்டு வரலாம் " என்றான். 

இருவரும் கிளம்பினார்கள். 

இருவரும் பக்கத்தில் இருந்த பார்க் ஒன்றில் நடந்தபடியே பல விஷயங்கள் பற்றி பேசினார்கள்.‌

திரும்பி வரும்போது ஒரு டாக்டர் வீட்டு வாசலில் நிறைய பேர் காத்திருந்தனர். 

' டாக்டர் அ. கபாலி ' என்று வாசலில் பெயர் போட்டிருந்தது.‌

பக்கத்தில் இருந்த டீக்கடை வாசலில் கொஞ்சம் பேர் இருந்தனர். 

நாநா : " பாபா நீ  கொஞ்ச நேரம் இங்கே நில்லு. நான் அரூபமாக மாறி ஐந்தே நிமிடங்களில் திரும்பி வருகிறேன்"  என்று  சொல்லி திடீரென்று மாயமாக மறைந்தான். 

(தொடரும்)