யானை, கிரிகெட், பட்டிமன்றம், எஸ் எம் எஸ் கட்டணங்கள்...வெட்டி அரட்டை.

       
ஆடாத மனமும் உண்டோ? 
   

தோனிக்கு ஒரு மேட்ச் தடையாம்.... காரணம் மெதுவான ஓவர் ரேட்டாம்...     

    

மொத்த டீமும் தோனியைப் பார்த்துப் பொறாமைப் படும்.

     

திட்டு குறையுமே... ஏதாவது ஐடியா செய்து மொத்த டீமுக்குமே தடை வரும்படி ஏதாவது செய்ய முடியுமா என்று யோசித்துக் கொண்டிருப்பார்கள்... அடுத்த மேட்ச் விளையாடித்தான் ஆக வேண்டுமா என்ன? (அதுவும் ஊர்ப் பெயரைப் பாருங்கள் - அடிலயிட் (அடி + Laid) ரிசல்ட் தெரியும். பேசாமல் நீங்களே ஜெயித்ததாக வைத்துக் கொள்ளுங்கள் என்று அறிவித்து விட்டு கார் விளையாட்டு, மூணு சக்கர சைக்கிள், பனிச் சக்கரச் சறுக்கு என்று போய் விளயாடியாவது பொழுதைக் கழிக்கலாம்.

                             

"ஐ பி எல் வந்ததும் பாருங்கள்.. இவர்கள் எல்லாம் மிகப் பிரமாதமாய் விளையாடுவார்கள் மக்களும் ஆஹா ஓஹோ என்று கொண்டாடுவார்கள்" என்று பிஷன் சிங் பேடி சொல்வதிலும் அர்த்தம் இருக்கிறது!

********************************

 So & சோ 

  
ஜெயா செய்தியில் துக்ளக் ஆண்டு விழா பற்றிச் சொல்லும்போது ஸோ ஸோ என்று பத்து முறை சொன்னார் அந்தப் பெண் செய்தி வாசிப்பவர். அவர் குறிப்பிட்டது துக்ளக் ஆசிரியர் 'சோ'வை!

**********************************

 ஆன மட்டும் பார்க்கிறார்கள்!  

கேரளாவிலிருந்து யானைகளை வண்டியில் அழைத்து வந்து உலவ விட்டு தமிழக மக்களை பயமுறுத்துவதாக சில மக்கள் சொல்வதை செய்திச் சேனல்கள் காட்டின, சொல்லின.

                  

மனிதர்களை அவை  கொல்வதில்லை என்றாலும் கேஷுவலாக சுற்றி வருகின்றன என்றார்கள். காட்டு யானைகள் என்றால் மனிதர்களைக் கண்டால் ஓடுமே... அல்லது எதிர்க்குமே என்றார்கள். சிலர் அபபடி சர்வ சாதாரணமாக இவற்றை அழைத்து வந்து விட்டுச் செல்வதற்கு சீப்பான விஷயமில்லை யானை என்றும் கருத்து வந்தது.

                     

காடுகளை அழிப்பதிலும் வன விலங்குகளின் இடத்தை மனிதன் ஆக்ரமிப்பதாலும் அவை தற்சமயம் கிராமங்களுக்குப் படை எடுக்கின்றன என்றும் கூடிய விரைவில் நகரங்களுக்குள்ளும் அவை நுழையும் என்று வன ஆர்வலர்கள் சொல்கின்றனராம்.

                   

அப்போ கொஞ்ச நாளில் சென்னைத் தெருக்களிலும் மற்ற இடங்களிலும் ஆடு மாடுகள் மேய்வது போல யானைகள் திரிவதைக் காணலாம் என்று எதிர்பார்க்கலாமா... !    

***************************************

உன்னை வாழ்த்திப் போடுகிறேன்! 

   

இந்தமுறை பழைய முறையில் பொங்கல் வாழ்த்துகள் வாங்கி நண்பர்களுக்கு அனுப்பலாம் என்ற யோசனை இருந்தது. முன்பு போல மூலைக்கு மூலை பொங்கல் வாழ்த்துகள் விற்கும் கடை கிடைக்காததாலும், தேடிச் சென்று வாங்கும் பொறுமை இல்லாததாலும் செய்ய முடியவில்லை. வேலை மும்முரத்தில் முகவரி சேகரித்து வைக்க வேண்டும் என்று நினைத்ததும் மறந்து போனது.

அடுத்த முறையாவது செய்ய வேண்டும்!   

***************************************

  குறுஞ்செய்திக் குமுறல்   

    

தீபாவளி, புத்தாண்டு, பொங்கல் என்று வந்தால் எஸ் எம் எஸ் ஸுக்கு ரகம் ரகமாகக் காசு வாங்கும் அலைபேசி நிறுவனங்களைப் பார்க்கும்போது மக்கள் அனைவரும் ஒன்றாகப் பேசி முடிவு செய்து அந்த மாதிரி நாட்களில் முன் பின்னாக ஒரு மூன்று நாட்கள் எஸ் எம் எஸ் அனுப்புவதையே சுத்தமாக நிறுத்தினால்  என்ன என்று தோன்றுகிறது. ஒரு நபர் என்றால் ஒரு நபர் கூட எஸ் எம் எஸ் அனுப்பக் கூடாது. முடியுமா?             

**********************************

 பட்டி சுட்டதடா!           
       

  

இந்த முறை சாலமன் பாப்பையா பட்டிமன்றத்தில் அந்த அளவு சுவை இல்லை. குறிப்பாக ராஜா பேச்சில். முன்பெல்லாம் ராஜாதான் கடைசியாகப் பேசுவார். கடந்த சில முறைகளாக பாரதி பாஸ்கர்.

அந்த நேரத்தில் எந்த சேனலைத் திருப்பினாலும் எல்லா சேனல்களிலும் பட்டிமன்றங்கள். எவ்வளவு பேச்சாளர்கள்...எவ்வளவு நடுவர்கள்...தென்றல் தொலைக் காட்சியில் பட்டிமன்றம் மணிக்கணக்கில் நீண்டிருந்தது. ஆனால் ராஜா, பாரதி பாஸ்கர் பேச்சு தவிர வேறு எதையும் கேட்பதில்லை!  
     
நிற்க! 
   
பதினெட்டாம் தேதி காலை எட்டு மணிக்கு சன் டி.வி 'வாங்க பேசலாம்' நிகழ்ச்சியில், 'பன்னிரண்டு' மகத்துவம் பற்றி பாரதி பாஸ்கரும் ராஜாவும் அரட்டை அடித்துக் கொண்டிருந்தபோது, ராஜா, ஒரு ரூபாய்க்கு, பன்னிரெண்டனா என்று கூறினார். எந்த ஊரில் இப்படி ஒரு கணக்கு? எங்களுக்குத் தெரிந்து, ஒரு ரூபாய்க்கு பதினாறு அணாக்கள்தான்!     

   
  ***************************************   

                                       

வெயிலும் கெயிலும்

                   

சென்னையில் இரண்டு நாட்களாக 108 டிகிரி. வெயிலூர் வேலூரை விட அதிகம். மண்டை காய்ந்து போகும் அனல். உள்ளே இருந்தாலும் அனல். வெளியில் போனாலும் அனல். "கடற்கரைக் காற்றே வழியை விடு" என்று பாட முடியவில்லை. "கடற்கரைக் காற்றே வந்து விடு" என்று கெஞ்ச வேண்டிய நிலைமை. என்னதான் மின் விசிறியை சுற்ற விட்டாலும் வருவது அக்னி நட்சத்திர அனல்தான். மேலும் மின் விசிறி சுற்ற மின்சாரம் வேண்டுமே. பத்து நிமிடங்களுக்கு ஒரு முறை வரும், போகும்! என்ன இன்வெர்ட்டர் வைத்துக் கொண்டாலும் அந்த பாட்டரி சார்ஜ் ஆவதற்கு மின்சாரம் வேண்டாமோ. தொலைக் காட்சிச் செய்திகளில் சென்னை மக்கள் படும் அவதியைக் கேட்ட போது கொஞ்சம் கஷ்டம் குறைந்தது. "அப்பாடி...எல்லோருக்கும் அப்படிதான்..." மனித மனம்!

கங்குலி ஐ பி எல்லில் விளையாட வந்து விட்டார் என்று ஜனங்கள் சந்தோஷமாக இருந்தார்கள். ஆனால் கங்குலிக்கு விதி என்னும் நதி வேறு பக்கமாகவே ஓடிக் கொண்டிருக்கிறது! அவர் விளையாடும் காலங்களில் இவர், ராகுல் திராவிட் போன்றோரின் புகழ்கள் டெண்டுல்கர் என்ற புயலில் காணாமல் போயின. என்னதான் வெற்றிகரமான கேப்டன் என்று பெயர் எடுத்தாலும் அவரை ஒதுக்கி வைப்பதில் எல்லோரும் மும்முரமாய் இருந்தார்கள். இந்த ஏலத்தில் அவரையும் கெயிலையும் ஏலமே எடுக்காமல் சோதனைக்குள்ளாக்கினார்கள். இப்போது கங்குலிக்கு என்ன சோதனை என்கிறீர்களா? முதலில் ஏலத்தில் எடுக்காத கெயிலை அப்புறம் ஒரு அணியில் எடுத்தார்கள். (பெங்களுரு?) அவர் 'என்னையா எடுக்காமல் இருந்தீர்கள்' என்பது போல ஆடும் அசுர ஆட்டம் எதிரணியினரை மிரள வைத்திருக்கிறது. கில்கிறிஸ்ட் முதல் நாள் அசந்து போனேன் என்று சொல்லியே விட்டார்.

      

இன்று ஒரு ஆட்டத்தில் எதிரணியின் சொல்ப ரன்களை (125 என்று ஞாபகம்) எடுக்க கெயில் ஆடிய ஆட்டத்தில் எதிரணித் தலைவர் மஹிளா ஜெயவர்த்தனே முகத்தில் ஈயாடவில்லை. உண்மையிலேயே அசுர ஆட்டம். இதில் கங்குலி எங்கே வருகிறார் என்கிறீர்களா....விஷயத்துக்கு வருகிறேன்...! இவரை ஏண்டா எடுக்காமல் விட்டோம் என்று எல்லா டீமும் ஏங்கும் அளவு கெயில் விளையாடும் போது அதே நிலையில் களமிறங்கும் கங்குலியிடம் ரசிகர்களின் எதிர்பார்ப்பு எப்படி இருக்கும்? யுவராஜ் வேறு சொல்லவே சொல்லி விட்டார். என்ன செய்யப் போகிறார் என்று பார்த்தால், கங்குலியும் இதை யோசித்திருப்பார் போலும். இன்றைய ஆட்டத்தில் அவர் ஆடவில்லை என்று சொல்லி விட்டாராம்! இரண்டு நாள் முன்பு சேவாக் இப்படி விளையாடிய ஒரு ஆட்டத்தை பாதித் தூக்கத்தில் பார்த்தேன். ஆனாலும் ஐ பி எல் ஆட்டங்களை முழு மனதாய் ரசிக்க முடியவில்லை. சில நாட்களுக்கு முன் தினமணியில் வந்த 'மலிங்காவும் டெண்டுல்கரும்' என்ற கட்டுரை ரொம்பப் பிடித்திருந்தது...நானும் அந்தக் கட்சி என்பதால்!
                           

ஐ. பி எல் அனுபவங்கள்..

சாய்ராம் கோபாலன் ஒரு முட்டிக் கால் வலி மருந்து சிபாரிசு பண்ணியிருந்தார்.  

அதை சாப்பிட வேண்டுமென்றால் முட்டி வலி இருக்க வேண்டும். அது எனக்கு இல்லையே என்ற போது டென்னிஸ் ஆடுங்கள் வரும் என்று சொல்லியிருந்தார். எனவே டென்னிஸ் ஆட முயற்சித்துக் கொண்டிருந்தேன்.

பையன் ஆர்வமாக ஓடிவந்தான்.

"என்னடா...என்ன ஆச்சு.." 

"கிடைச்சிடுசிப்பா...கிடைச்சிடுச்சி.."

நெட்டிலும் நேரிலும் நண்பர்களிடமும், தெரிந்தவர்களிடமும் ஐ.பி.எல் டிக்கெட்டுக்கு அலைந்த பையன் கடைசியில் எப்படியோ வெற்றி பெற்றான். டிக்கெட் கிடைக்காது என்று நம்பி...நிம்மதியாய் இருந்தவன் நம்பிக்கையில் மண் விழுந்தது. அட, இப்படி எல்லாம் செய்கிறார்களே என்று அங்கலாய்த்த ஐ. பி. எல்லை பையன் வற்புறுத்தல் காரணமாக நேரில் போய்ப் பார்க்க வேண்டி வந்தது. (நல்ல வேளை...ஐ.பி.எல் தேவையா என்று கேள்வி கேட்ட புலவன் புலிகேசி லீவில் இருக்கிறார்...)

சென்னை மற்றும் கோல்கட்டா இடையே நடந்த லீக் மேட்ச்...இரவு எட்டு மணிக்கு ஆரம்பிக்கும் என்றாலும் முன்னரே போய் விடுதல் நலம் என்று தெரிந்தவர்கள், தெரியாதவர்கள் எல்லோரும் ஃபோன் செய்து வற்புறுத்தியதால் மாலை நான்கு மணிக்கே கிளம்பி மைதானத்தை அடைந்தால் மனிதக் கடல்...! நீந்தி வரிசையில் நின்று ஒரு வழியாய் உள்ளே சென்று மே...லே...மேல் வரிசைக்கு சென்று அமர்ந்தோம்.

உள்ளே ஃபோன் எடுத்துச் செல்லக் கூடாது,தண்ணீர் பாட்டில் எடுத்துச் செல்லக் கூடாது என்று சொன்னார்களே என்று பார்த்தால், அதெல்லாம் ஒன்றுமில்லை, இரண்டுமே எடுத்துச் செல்லலாம் என்று விட்டு விட்டார்கள். உணவு, பெரிய வாத்தியங்களுக்குதான் அனுமதி இல்லை.

ஆனால் செல் உள்ளே எடுக்கவில்லை. யாருக்கும் பேசவும் முடியவில்லை. அழைப்பும் வரவில்லை. ("ஸ்க்ராம்ப்ளர் போட்டிருப்பாங்க அங்கிள்... நான் கூட இப்படிதான் ஏமாந்தேன்...கீழ படிக் கட்டுக்குக் கீழ போய்ப் பேசுங்க..எடுக்கும்" என்றான் பின்னாலிருந்து ஒரு எட்டு வயதுப் பொடியன்!)

எனக்கு தோனியிடம் ஒரு சந்தேகம் கேட்க வேண்டியிருந்தது. முதல் நாள் மாம்பலத்திருந்து மவுண்ட் ரோடு வரை பைக்கில் எனக்கு லிஃப்ட் தந்த ஹெல்மெட் நபர் அவர்தானா என்று தெரிய வேண்டும்! குரல் அவர் குரல் மாதிரிதான் இருந்தது. இவ்வளவு உயரத்திலிருந்து கேட்டால் அவர் பதில் சொல்வாரா?!

மேலேயிருந்து பார்க்கும்போது கம்ப்யூட்டரில் விளையாடும் பொம்மைகள் போல விளையாட்டு வீரர்கள்...டிவியில் பார்ப்பது போல பெரிதாய்த் தெரியாததில் வருத்தம்தான்..! ஆனால் பையன் என்னமோ இது ஹசி, அது கங்குலி என்றெல்லாம் கை காட்டிக் கொண்டிருந்தான். ரசிகர்களுக்குப் பரிசு கொடுக்கும் கேட்ச்கள், மற்றும் மைக் வைத்துப் பேசுபவர்கள் எல்லாம் கண்ணில் படவில்லை.

மைதானத் துளிகள்...

மைதானத்துக்கு வெளியே எல்லா டீம் சட்டைகளும் நூற்று எண்பது ரூபாய் என்று விற்றுக் கொண்டிருந்தார்கள். மேலும் தலைத் தொப்பி, ஊதுகுழல் ஆகியவையும்...

முன்னாலேயே போய் விட்டதால் சாப்பிட ஏதாவது வாங்கிதான் ஆக வேண்டும்...ஆவின் பால் கோவா கப் போல இருக்கும் கப்பில் வெஜ். பிரியாணி எண்பது ரூபாய். சுவைதான். ஆனால் காணாது.மற்ற ஐட்டங்கள் பர்கர், சிப்ஸ் என்று எதை எடுத்தாலும் ஐம்பது ரூபாய்!

ஜூஸ் கப் போலக் கப்புகளில் ஐந்து ரூபாய் கொடுத்தால் தண்ணீர் நிரப்பித் தருகிறார்கள்.

ட்ரம்ஸ் சிவமணி ட்ரம்சை தூக்கிக் கொண்டு (ஆள் வைத்துதான்..!) ஒவ்வொரு இடமாக நகர்ந்து நகர்ந்து சென்று சத்தப் படுத்திக் கொண்டிருந்தார்.

ஒவ்வொரு ஓவர் இடைவெளியிலும் குத்துப் பாடல்கள்...ஆட்டங்கள்...

ஆட்டம் ஆரம்பிக்கும் முன்பும் நடந்து கொண்டிருக்கும்போதும் ஏராள பறவைகள் மேலே பறந்த வண்ணமிருந்தன.

ஆரம்பிக்கும் முன்னரும் முடிந்த பின்னரும் எல்லா இடங்களையும் இணைத்து பஸ்கள் விட்டிருந்தது சிறப்பு.

வயதான தம்பதிகள் முதல் குழந்தைகள் வரை ஆட்டத்தை மிக ரசித்தார்கள். அட, நம்ம தாத்தா கலைஞர் கூட பேரனுடன் அமர்ந்து பார்த்தாராம்..எங்களுக்குத் தெரியாது மறு நாள் டிவி பார்த்துதான் இதையும், அம்பையர் இரண்டு மூன்று அவுட்கள் தவறாகத் தந்தார் எண்பது போன்ற விவரங்களும் தெரிந்தன.

அது சரி, ஆட்டம் என்கிறீர்களா? அது யாருக்குத் தெரியும்? யார் பார்த்தார்கள்..பையனைத்தான் கேட்க வேண்டும்.

முத்தையா முரளிதரன் விஜய் டிவியில் அனுவுடன் பேசிக் கொண்டிருந்தார்.

அவருக்குப் பிடித்த நடிகர் ரஜினிதானாம் சிவாஜியை பத்து முறை பார்த்தாராம். கமல் நடித்த நாயகன் பிடிக்குமாம்.

லெக் ஸ்பின் போடும்போது அதில் ஆஃப் ஸ்பின் கலந்தால் அதுதான் 'தூஸ்ரா' என்றார்.

பிடித்த கேப்டன் அர்ஜுனா ரணதுங்காதானாம். நாற்பது வயதாகியும் சிறப்பாக விளையாடும் ஜெயசூர்யாவுக்கு பாராட்டு மாலை சூட்டினார்.

ஹெய்டனுக்கு நாமக்கல் ஆஞ்சநேயர் என்று பெயர் வைத்துள்ளார்களாம். ஹெய்டனுக்கு இவர்கள் தமிழ் சொல்லிக் கொடுப்பார்களாம். ஐ.பி.எல், எதிரிகளாகப் பார்க்கும் வெளிநாட்டு வீரர்களையும் நண்பர்களாகப் பார்க்கக் கற்றுக் கொடுத்திருக்கிறது என்றார்.

இதை எழுதிக் கொண்டிருக்கும்போது செல் ஒலித்தது. எடுத்தல் புதிய குரல்.."சார்! நான் வசந்தபாலனோட அசிஸ்டென்ட் பேசறேன்...நேத்து ஐ.பி.எல் மேட்ச் நடுவுல திரையில உங்களை டைரக்டர் பார்த்தாராம்..அடுத்த படத்துல நடிக்கிறீங்களான்னு கேக்கச் சொல்றார்.."

பையனை முறைத்தேன். அவனால்தானே இந்த புதிய வம்பெல்லாம்...!   

தோனியின் நிபந்தனைகள்

பிரின்சிபால் ரூமிற்குள் நுழைந்தார் பியூன். 
"என்ன?"  
"சார் தோனி வந்துருக்காரு."
"ஓ அப்படியா? வரச் சொல்லு."


தோனி உள்ளே வருகிறார். 
"காலை வணக்கம் சார்." 
"வணக்கம், வாங்க தோனி."
"எதுக்கு சார் என்னைக் கூப்பிட்டு அனுப்பினீர்கள்?"
"தோனி நீங்க பி காம் பரீட்சை பாஸ் பண்ணவே இல்லை போலிருக்கே? எனி பிராப்ளம்?"


"ஆமாம் சார், பரீட்சை முறையை சற்று மாற்றியமைக்க வேண்டும்."
"எப்படி?"
"சார் ஐந்து நாள் பரீட்சை முறையை மாற்றி, ஒரே நாள் இரண்டு மணி நேர பரீட்சை என்று ஆக்கிவிட வேண்டும்."
"ஓஹோ ஐந்து நாள் டெஸ்ட் இல்லாமல் ட்வென்டி ட்வென்டி போலயா? ஓ கே, அப்புறம்?"


"ஒவ்வொரு சப்ஜெக்டுக்கும் ஒவ்வொரு ஆசிரியர், மொத்தம் ஐந்து ஆசிரியர்கள்.  ஒரு ஆசிரியர், ஆறு நிமிடங்களில் ஆறு கேள்வி கேட்கலாம். ஒருவர் ஆறு கேள்வி கேட்டவுடன், அடுத்த ஆசிரியர் அவர் சப்ஜெக்டில் ஆறு கேள்விகள் - இந்த வகையில் மாற்றி மாற்றி, ஐந்து ஆசிரியர்களும் மொத்தம் நூற்று இருபது கேள்விகள், ஆளுக்கு இருபத்துநான்கு கேட்கலாம்."
"ஓஹோ ஐந்து பவுலர்கள் ஆளுக்கு நான்கு ஓவர்கள் போடுகின்றர்ற்போல்! அப்புறம்?"


"ஒவ்வொரு கேள்விக்கும் நான் பதில் சொல்லுவேன். உடனுக்குடன் எனக்கு மார்க் கொடுக்கவேண்டும்."
"ஸ்கோர் போர்டில் உடனுக்குடன் ஸ்கோர் தெரிவது போலயா? சரி."


"ஆமாம் சார். அதுமட்டும் இல்லை - யாராவது ஒரு ஆசிரியர் அவுட் ஆஃப் சிலபஸ் கேள்வி கேட்டுவிட்டால், அந்த கேள்வி கணக்கில் வராது - எனக்கு ஒரு மார்க் கொடுக்கணும்."
"வைடு பால்? ஓ கே."


"பிறகு எந்த ஆசிரியராவது தவறான கேள்வி கேட்டுவிட்டால் ....."
"தவறான கேள்வியா? எப்படி?"
"அந்த ஆசிரியர் பி காம் சப்ஜெக்ட் இல்லாமல் வேறு எதிலாவது கேட்டுவிட்டால், அல்லது வேறொரு ஆசிரியரின் சப்ஜெக்டில் இவர் கேட்டுவிட்டால் - அதற்கு எனக்கு ஒரு மார்க்; அந்த கேள்வி கணக்கில் வராது; மேலும் அதற்கு அடுத்த கேள்வி அவர் என்ன கேட்டாலும் - நான் எனக்குத் தெரிந்த பதில் எதையும் சொல்லுவேன், அதற்கு முழு மதிப்பெண் கொடுக்கவேண்டும்."
"அட! நோ பால் + ப்ரீ ஹிட் போல.பலே, பலே, அப்புறம்?"


"அறுபது கேள்விகள் முடிந்தவுடன், நான் என் தோழர்களுடன் கூடி, மேற்கொண்டு என்ன செய்யலாம், என்ன கேள்விகள் வரும், என்ன பதில்கள் கூறலாம் என்று இரண்டரை நிமிடங்கள் விவாதிப்பேன்."
"ஸ்டிரேட்டஜி டிஸ்கஷன்ஸ் டைம் - ஓ கே."


"நான் சொல்லும் பதில்களுக்கு கேள்வி கேட்கும் ஆசிரியர் மார்க் போடக் கூடாது. வேறு மூன்று ஆசிரியர்கள்தான் மார்க் போடலாம்."
"அம்பயர்கள் - சரி சரி."


"கேள்விக்கு பதில் எப்படி இருந்தாலும், மார்க் போடும் ஆசிரியர்கள் என்ன மார்க் கொடுக்கிறார்களோ அதைத்தான் யுனிவெர்சிடி ஏற்றுக் கொள்ளவேண்டும்."
"அம்பயர் முடிவுதான் இறுதியானது. சரி."


"கடைசி கண்டிஷன். ரொம்ப முக்கியமானது. பரீட்சை ஹாலில், மஞ்சளாடை அணிந்த சியர் லீடர்ஸ் இருக்கவேண்டும். என்னுடைய முழு மதிப்பெண்கள் பெறுகின்ற ஒவ்வொரு பதிலுக்கும் அவங்க குத்தாட்டம் ஆட வேண்டும். சிவமணி டிரம்ஸ் ஒலிக்கவேண்டும். "

பிரின்சிபால் முகம் சிவந்தது. அவர் தோனியைப் பார்த்து, "கெட் அவுட்" என்று அடித்தொண்டையிலிருந்து கத்துகிறார். 


தோனி எழுந்து அறைக்கு வெளியே ஓடுகிறார்.