எங்கள் Blog

19.4.14

பாஸிட்டிவ் செய்திகள் - கடந்த வாரம்

1) கலைவாணி (பொருத்தமான பெயர்தான்) - சூளைமேடு 'ரங்கா மழலையர் பள்ளி'.

2) அவருக்குப் பார்வை கிடையாது. ஆனால், நூற்றுக்கணக்கான மாணவ மாணவிகளுக்கு அவர் ஒரு வழிகாட்டி. பெண் குழந்தை என்றால் சிசுவிலேயே கள்ளிப் பாலைப் புகட்டும் உசிலம்பட்டியில் பிறந்த அவர், பல தடைகளை உடைத்தெறிந்து தென்னிந்திய அளவில் முனைவர் பட்டம் பெற்ற பார்வையற்ற முதல் பெண். புதுக்கோட்டை அரசு மகளிர் கல்லூரியில் வரலாற்று துறை தலைவராகப் பணி புரிந்து வரும் ராதாபாய்தான் இவ்வளவு சிறப்புக்கும் உரியவர்.

3) மாவட்ட துணை கலெக்டராக உள்ள திவ்யஸ்ரீ, கிண்டியில் உள்ள கருணா வித்யாலயா அமைப்பில் பார்வையற்றோருக்கும், பாரிமுனையிலும் இலவசமாக பாடம் நடத்தி வருகிறார்.

4) தண்ணீரில் ஓடும் வாகனம்! இக்கண்டுபிடிப்பிற்கு, அமெரிக்க அரசின் அங்கீகாரம் கிடைத்துள்ளது. கல்லுாரி மாணவன் கார்த்திகேசன்

5) பொது மருத்துவமனையின் சாதனையும் முகநூலின் சேவையும்...

6) சமீபத்தில் ஆழ்துளைக் கிணற்றில் விழுந்த ஒரு சிறுவன் காப்பாற்றப்பட்ட 'பாசிட்டிவ் செய்தி' எல்லாரையும் சந்தோஷப் படுத்தியது.

அவனைக் காப்பாற்றப் பயன்படுத்திய ரோபோ கருவிக்கு ஒரு கதை உண்டு. அதையும் படிக்க வேண்டும்.

7) நாற்றத்தை வாசனையாக்கியது கூடப் பெரிதில்லை. சாராய வியாபாரத்தை பூச் செடி வியாபாரமாக்கியதுதான் இன்னும் பெருமை. காமாட்சி.

18.4.14

வெள்ளிக்கிழமை வீடியோ 140418 - "ஜிலீர்...!" கேமிராவில் சிக்கிய ஆவி... (கோவை ஆவி அல்ல!)

15.4.14

சினிமாவில் முத்தக் காட்சி

சமீபத்தில் வெளியாகியுள்ள விஷால் நடித்த 'நான் சிகப்பு மனிதன்' படத்தில் இதழோடு இதழ் பதித்து ஒரு முத்தக்காட்சி இடம் பெறுகிறதாம். முகநூலில் மற்றும் விமர்சனங்களில் பார்த்தேன்.

இது ஒன்றும் புதிதல்ல. புன்னகை மன்னன் முத்தக் காட்சியும், இன்னும் சில ஹிந்திப் பட முத்தக் காட்சிகளும் ரசிகர்கள் நினைவுக்கு வரலாம். புன்னகை மன்னன் பட முத்தக் காட்சிக்குப் பிறகு கமல் படங்களில் கொஞ்ச காலம் முத்தக் காட்சி கட்டாயக் காட்சியாக இருந்தது! அவருடன் நடித்த கதாநாயகிகள் எல்லாம் இதற்காக பயந்த காலம் இருந்தது! அல்லது பயந்தது போல பேட்டி கொடுத்த காலம் இருந்தது!

அதிகம் கவனிக்கப் படாத ஒரு முத்தக் காட்சி 'குஷி' படத்தில் கடைசிக் காட்சியில். பெரும்பாலும் ரசிகர்கள் எழுந்து போக ஆரம்பிக்கும் நேரம் என்பதால் கவனிக்கப் படவில்லை போலும்! ஜோதிகா விஜய்க்குத் தரும் லிப் டு லிப் கிஸ் அது.

எம் கே டி பாகவதர் நடித்த 'ஹரிதாஸ்' படத்தில் 'மன்மத லீலையை வென்றார் உண்டோ' பாடலில் ஆடிக் கொண்டே வரும் டி ஆர் ராஜகுமாரி நடுவே ஒரு ஷாட்டில் பாகவதரை நோக்கி ஒரு பறக்கும் முத்தத்தைப் பறக்க விடுவார். அந்தக் காலத்தில் பரபரப்பாகப் பேசப்பட்ட காட்சி அது!

தமிழ் சினிமா வரலாற்றில் அதுவே 'முதல் முத்தப் புரட்சி' என்று நினைத்துக் கொண்டிருந்தேன் - இந்தத் தகவல் படிக்கும்வரை!

1935 ஆம் ஆண்டு வெளிவந்த தமிழ் பேசும் படம் 'மேனகா'. புராணங்களை விட்டு வெளிவந்து தமிழில் எடுக்கப்பட்ட முதல் சமூகப் படமாம் அது. இதே படத்துக்கு இன்னொரு 'முதல்' சிறப்பும் உண்டு. அது கடைசியில்!

நாடகமாக நடிக்கப்பட்டு வந்த கதையை அதே நடிகர்களை வைத்து, அதே வசனங்களுடன் படமாக்கினார் அந்தப் படத்தின் இயக்குனர் ராஜா சாண்டோ.

டி கே சண்முகம், டி கே பகவதி, எம் எஸ் விஜயாள் ஆகியோர் நடித்த இந்தப் படத்தில்தான் நாயக, நாயகியர் முதன்முதலில் 'தொட்டு' நடித்தனராம். இந்தப் படத்துக்கு முன்பு வரை எவ்வளவு ஆருயிர்க் காதலர்களாக இருந்தாலும் 'சகியே, பிராண நாதா' என்றெல்லாம் பேசிக் கொண்டு, போதிய இடைவெளியில் நின்றுதான் நடிப்பார்களாம். இந்தப் படத்தில் நாயகியைத் தூக்கிக் கொண்டு ஓடுவது, பாலியல் பலாத்காரக் காட்சி எல்லாம் இருந்ததாம். அதனாலேயே பரபரப்பாகப் பேசப்பட்டு வெற்றிகரமாக ஓடியதாம்.

இந்தப் படத்தில் ஒரு காட்சியில் நாயகன் நாயகியை ஒரு கையால் அணைத்து, இன்னொரு கையால் அவள் வலது கையைப் பற்றி உள்ளங்கையிலிருந்து தொடங்கி தோள்பட்டை வரை முத்தமிட்டுக் கொண்டே செல்வாராம்.

அந்நாளில் இந்தக் காட்சி பரபரப்பாகப் பேசப்பட்டது. தீரர் சத்யமூர்த்தி கூட (அவரும் அந்தக் காலத்தில் நாடகங்களில் எல்லாம் நடித்துள்ளார்) இது பற்றி பத்திரிகையில் பேட்டி கொடுத்த அவர், 'தவறில்லை, ஆனால் இது மாதிரி முத்தக் காட்சியை ரொம்ப நீட்டக் கூடாது' என்ற வகையில் கருத்துத் தெரிவித்திருந்திக்கிறார்! டி கே சண்முகமும் இந்தக் காட்சியின் ஒத்திகை முதல் ரியல் ஷாட் வரை நடிக்கும்போது வரை ரொம்ப வெட்கப்பட்டதாய் ஒரு பேட்டியில் அப்போது தெரிவித்திருக்கிறார்.

கடைசியில் சொல்கிறேன் என்று சொன்ன இந்தப் படத்தின் இன்னொரு சிறப்பு என்ன தெரியுமா?

பின்னாட்களில் ஒவ்வொரு படத்திலும் பாரதியார் பாடல்கள் இடம் பிடித்தன.

ஆனால் மஹாகவி பாரதியார் பாடல் ஒன்று இடம்பெற்ற முதல் திரைப்படம் 'மேனகா'தான். அதில்தான் தீரர் சத்யமூர்த்தி நெகிழ்ந்து போனாராம்.

'வாழ்க நிரந்தரம்! வாழ்க தமிழ்மொழி! வாழிய, வாழியவே" என்ற பாரதியாரின் பாடல் இந்தப் படத்தில் இடம்பெற்றதாம்.

[இந்தப் படத்தின் பாடல்கள் கிடைக்கிறதா என்று யூ டியூப் உட்பட்ட தளங்களில் தேடித் பார்த்தேன். கிடைக்கவில்லை!]

14.4.14

எங்கள் தாய்!

இன்று பிறந்தது இனிய புத்தாண்டு மட்டும் இல்லை; எங்கள் ப்ளாக் பதிவின் மூன்று ஆசிரியர்களின் தாய் திருமதி இராஜலட்சுமி கோபாலன் அவர்களும்தான்!

அவர் பிறந்தது 14 - 04 - 1914.

இன்று அவருடைய நூற்று ஓராவது பிறந்தநாளைக் கொண்டாடிக்கொண்டிருக்கின்றார்!

13.4.14

ஞாயிறு 249 ::

இராசராசசோழன் : "யப்பா... என்ன வெய்யில்? என்ன வெய்யில்? மாமன்னனாய் இருந்தாலென்ன? எனக்கும் தாகம் இருக்கும்தானே? பானைகளில் தண்ணீரும். குளிர்சாதனப்பெட்டியும் அருகில் நான் வைத்திருப்பதில் உங்களுக்கென்ன ஆட்சேபணை? கும்பிடறேன். போய் ஜோலியைப் பாருங்கப்பா..."