கவிதையாகும் ஜெ... ஓவியம்

அன்புள்ள ஸ்ரீராம், 

உங்கள் எதிர்பார்ப்புக்கு ஏற்றவிதமாக கவிதை இருக்காது. சட்டியில் இருந்தால்தானே அகப்பையில் வரும்?

இருந்தபோதும், கேட்டுக்கொண்ட அன்பை மதிக்கும் விதமாக எழுத முயன்றிருக்கிறேன். இதுக்கே மிகவும் கஷ்டப்பட்டுவிட்டேன். கதை என்றால் இவ்வளவு கஷ்டப்பட்டிருக்கமாட்டேன்.   

அன்புடன் நெல்லைத்தமிழன்

படத்துக்கான கவிதை   

வியாழன் - எங்கள்பிளாக் – மணந்துகொள் தங்கையே மாமன் மகனை

எனக்கு ஸ்ரீராம் பகிர்ந்துகொண்ட படத்தைப் பார்த்த உடனே, ஒரு சகோதரன், தன் தங்கையின் கன்னத்தில் பவுடரைச் சரி செய்வதுபோல் தோன்றியது. பெண் சிறு வயது என்று தோன்றியதால் வேறு எந்த மாதிரியும் தோன்றவில்லை. அவன் ஏன் பவுடரைச் சரி செய்யவேண்டும்? ஒரு வேளை, அவளைப் பெண் கேட்டு வந்துள்ளவர்கள் ஹாலில் காத்திருப்பதாலா? அப்படி இருந்தால் அம்மாதானே பெண்ணைக் கூட்டிவரவேண்டும் (இல்லைனா அவளின் தோழிகள்). ஒருவேளை அம்மா படுத்த படுக்கையாக இருந்தால்? 

அப்படி இருக்கும்போதும், எப்படி அண்ணன் தன் தங்கையைக் கூட்டிக்கொண்டு வருவான்? வந்தவர்கள், சொந்த மாமன், மாமியாக இருந்து, தன் பையனுக்காகப் பெண் கேட்டு வந்திருந்தால்? ஒருவேளை, சிலர் அண்ணன், தன் தங்கையின் கண்ணீரைத் துடைக்கிறான் என்று நினைத்தால்? ஏன் அவள், பெண் பார்க்க வந்திருக்கும்போது கண்ணில் நீர் வரும்படி இருக்கவேண்டும்? 

ஒருவேளை மாமன் மகன் அழகில்லாதவனாக இருந்தால்? அப்போ அவர்களின் பின்னணி என்னவாக இருக்கும்? தங்கை தேன்மொழிக்கு நிறைய படிக்கவேண்டும், வேலை பார்க்கவேண்டும் என்றும் ஆசை. அடுப்படியில் வாழ்வை முடிக்க அவளுக்கு ஆசையில்லை. அண்ணன் சபேசன் அவளின் இந்த மனதை முழுமையாக அறிந்தவன்.  [ அதென்ன பெயர் சபேசன்?  எங்கிருந்து பிடித்தீர்கள் நெல்லை?  காலத்தைக் குறிக்கும் பெயர்?!  ஸ்ரீராம் ]

அப்பா குடிகாரராக இருந்து, அதனால், பாசமுள்ள தங்கையின் குடும்பத்தோடு உறவாட முடியாமல், அண்ணணுக்கும் அண்ணிக்கும் நிலைமை ஆகிவிடுகிறது. அண்ணன், தங்கையுடனான உறவை அன்பை மிகவும் போற்றுபவன். ஆனால், குடியின் விளைவால், தங்கை கணவர் தரக் குறைவாக பேசி, தங்களின் உறவை அறுக்க நினைத்ததால் வேறு வழியில்லாமல் உறவுத் தொடர்பு அறுகிறது. 

தங்களுக்குப் பெண் இருந்திருந்தால், நிச்சயம் தங்கையின் பையனுக்குத் தான் கொடுத்திருப்பார்கள். காலத்தின் விளைவாக, தங்கை படுத்த படுக்கை ஆகிவிடுகிறாள். தங்கை கணவரும் குடியின் விளைவாக மூன்று வருடங்களுக்கு முன்பு மறைந்துவிடுகிறார். உறவு துளிர்க்கிறது. மாமன் குடும்பத்தின் அன்பையும் நல்லெண்ணத்தையும்  நன்றாக அறிந்தவன் சபேசன், மகராஜனின் நல்ல குணத்தையும் நன்றாக அறிந்தவன் சபேசன்.  மகராஜன், உறவு துளிர்க்கவேண்டும் என்ற ஆசையிலும் இயல்பாக தேன்மொழியின் மீது கொண்ட அன்பாலும் அவளை மணக்க விரும்புகிறான். மாமனுக்கும் மாமிக்கும் உறவு, அன்புப் பிணைப்பு என்பது அதைவிட மேலானதாகத் தெரிகிறது. இதனால் அவர்களே இந்த உறவை விரும்பி வேண்டி வந்திருக்கிறார்கள்.

பெண்பார்க்கும் படலத்துக்கு முன், சபேசன், தேன்மொழியின் கன்னத்தில் உள்ள பவுடரைச் சரி செய்யும்போது, அவளிடம் கூறுவதாக நான் எழுதியிருக்கிறேன்.

கவிதை ரசிக்கும் மன நிலை உள்ளவன் அல்ல நான். எனக்கு மரபுக் கவிதைகள், கொஞ்சம் Elevated contents உள்ள பக்திப் பாடல்களில்தான் மிகுந்த விருப்பம். துரை செல்வராஜன் அவர்கள் பகிர்ந்து கொள்ளும் அபிராமி அந்தாதி, நாயன்மார்களின் பாடல்கள், ஆழ்வார்களின் பாடல்கள், கண்ணதாசனின் மரபுக் கவிதைகள் (அவருடைய இயேசு காவியம் எனக்கு கல்லூரியில், மாரல் சயன்ஸ் தேர்வில் முதலாவதாக வந்ததற்காகக் கிடைத்த பரிசு. அதில் உள்ள கவிதைகள் எனக்கு மிகவும் பிடிக்கும்) போன்றவற்றை ரசிப்பேன். திரைப்படப் பின்னணியை மறந்துவிட்டு, கண்ணதாசனின், வாலியின் தத்துவப் பாடல்களை மிகவும் ரசிப்பேன். வாலியின் முற்றெதுகைக் கவிதைகள் சிறப்பானவை என்ற போதும், அதில் என்னால் ஆழமுடிவதில்லை. இணையத்தில் சீராளன் போன்றவர்கள் எழுதும் மரபு, சந்தக் கவிதைகளும் எனக்குப் பிடிக்கும்.

ரசிகன், ரசிக்கப்படுபவர் போல எழுத முடியுமா, அதிலும் கவிதை? அது சாத்தியமா? அதற்கென்ற திறமை வேண்டும். எழுத்தைவிட, ஓவியத்தைவிட, கவிதை எழுத தனிப்பட்ட மோன மன நிலைவேண்டும். என்னிடம் அது இல்லை. ஸ்ரீராம் கேட்டுக்கொண்டதற்கு இணங்க எழுத முயன்றிருக்கிறேன். எனக்கு கண்ணதாசன் அவர்கள் இயேசு காவியத்தில் எழுதிய முதல் பாடல்தான் ஞாபகத்தில் வருகிறது  (பொங்குமாங் கடல் புகுந்தளவெடுக்கப் போயினன் வெற்றி பெற்றேனா…… தாய்த்தமிழ் ஆசை வாய்த்த’நூற் பற்றுத் தந்ததால் துணிந்துவிட் டேனா?.)

[ கவிதையை விட விளக்கம் பெரிதாக இருந்தாலும் க(வி)தை நன்றாக இருக்கிறது நெல்லைத்தமிழன் - ஸ்ரீராம் ]

மணந்துகொள் தங்கையே மாமன் மகனை

மாமனும் மாமியு மேநம்

உறவினை வேண்டி நின்றார்

தங்கையின் மகளைத் தன்றன்

தனயனுக்காய்க் கேட்டு வந்தார்

தங்களுக்குப் பெண் இருந்தால்

என்றைக்கோ உங்கள் வீட்டில்

தேன்மொழி யின்வாழ்வு இப்போ

தொடரட்டும் எங்கள் வீட்டில்

மருமகள் என்ற போதும்

மகளேபோல் பார்ப்போம் அவள்தன்

கல்வியைத் தொடரச் செய்வோம்

களிப்புறும் வகையில் வைப்போம்

அடுப்படி வேலை என்று

அடக்கியே வைக்க மாட்டோம்

எம்முடன் வாழ்வதி லேஅவள்

இன்புறுவள் என்றே சொன்னார்

உன்நலம் எண்ணியே நாளும்

வாழ்கின்றேன் தங்காய் நானும்

தந்தையை இழந்த போதும்

மனம் தளருதல் தேவையில்லை

படிப்பதில் விருப்பம் உண்டு

அதுபற்றிக் கவலை வேண்டாம்

மணந்துகொள் மாமன் மகனை

வாழ்க்கையில் வளமுண் டாகும்

ஆணுக்கு அழகு என்ன

மின்னிடும் முகலட் சணமா

கட்டிய மனைவி எண்ணம்

ஈடேற்றி மகிழும் குணமா

உருவத்து அழகு எல்லாம்

காலத்தே கரைந்து போகும்

அவனகத்தில் ஒளிரும் எண்ணம்

வாழ்க்கையே மின்னும் திண்ணம்

குணத்திலே பெயருக் கேற்ற

மகராஜன் நம்மாமன் மகன்

உன்னையே துணையாய்க் கொள்ள

உறுதியாய் வேண்டி நின்றான்

எவருக்கோ கொடுத்து உந்தன்

நலத்தையே எண்ணி நாளும்

கவலையில் கிடந்து ழல்வேன்

உறவெனில் கவலை இல்லை

உன்’நலம் எண்ணியே நாளும்

வாழ்கின்றேன் தங்காய் நானும்

நம்வாழ்வின் துன்ப காலம்

சென்றது என்றே தோணும்

என்னிலும் மேன்மை யாய்உன்

நலத்தினைப் பார்த்துக் கொள்வான்

மணந்துகொள் மாமன் மகனை

வாழ்க்கையே ஒளிரும் தங்காய்

=========================================================================

அன்பு ஸ்ரீராம்,

எங்கள் Blog-ல் ஜெயராஜின் படத்திற்காக, நீங்கள் கேட்டுக்கொண்டபடி ஒரு சிறுகவிதை தருகிறேன்:

வாசகர்களுக்குக் கவிதையை அணுகுவதற்காக ஒரு குட்டிக்குறிப்பு: 

சில பெரிசுகள், சிறிசுகளை எப்போதும் critical-ஆக observe செய்வதையும், இளசுகளின் காரியங்கள்பற்றிக் காரமாக comment பண்ணுவதையும் பார்க்கிறோம் இல்லையா. இங்கே ஜெயராஜின் ஓவியம் உயிர் பெறுகிறது. சீனை சற்றுத் தள்ளியிருந்து கவனிக்கிறது ஒரு பெரிசு: அதன் மனம் பதைபதைப்பில் ஏதோ சொல்கிறதே :

கொடுக்காதே இடம்..

மீசைக்காரப்பயல் ஏதோ திட்டம்போடுகிறான்

ஆசை கீசை வைத்துவிடாதே அழகுக் கிளியே 

காசைக் கரியாக்கிக் கடைக்குப்போய் 

ஓசைப்படாமல் ஏதோ வாங்கிவந்திருக்கிறானே

மல்லிகைப்பூவோ மசால்தோசையோ

முகவாயைத் தொட்டு முகரவைக்கிறானே - உன்

அகத்துக்குள் நுழைய ஐடியா போடு்கிறானா

அயோக்யன்.. அற்பன்.. ஆண்களில் கடையன்..

தடியனிடமிருந்து கொஞ்சம் தள்ளியே நில் - நீ

படிந்துவிட்டதாக நினைத்துவிடுவான்

மடப்பயலிடம் நீ மசிந்துவிடாதே

தடம் மாறியே பயணித்துவிடாதே !

**

அன்புடன், 

ஏகாந்தன்

[ அந்தப் 'பெரிசி'ன் பதைபதைப்பு நமக்கும் தொற்றிக் கொள்கிறது ஏகாந்தன் ஸார்...  அறியாத வயதில் புரியாத உணர்வுகளைக் குழப்பிக்கொள்ளும் பருவம் - ஸ்ரீராம்  ]

=====================================================================================

உரிமையுடன் ஒரு வேண்டுகோள்  :  கவிதையைப் படைத்த இருவரும் மனம் மகிழும் வண்ணம் அவர்கள் கற்பனை பற்றிய தங்கள் எண்ணங்களை தனித்தனியாக பகிர்ந்து கொண்டால் எங்களுக்கும் மகிழ்ச்சி.  கவி படைத்தவர்களுக்கும் மகிழ்ச்சி 

தமிழ்மணம்