வெள்ளி வீடியோ 180406 : ஊர் முழுதும் ஏசட்டுமே உனது வார்த்தை வேதமடா...

   குழந்தையும் தெய்வமும் கொண்டாடுமிடத்து.  

   குழந்தை பொய் சொல்லாது என்று சிவாஜியும் நம்புகிறார்.  படம் இமயம்.  1979 இல் வந்த படம்.   குழந்தை என்று சொன்னாலும் காட்சியில் வருவது ஒரு சிறுவன்.

   படத்தில் உள்ள கேரக்டர்கள் பெயர் எல்லாம் நதியின் பெயர்கள்.  'தன் தம்பி தங்கக்கம்பி' என்று வார்த்தைக்கு வார்த்தை சொல்லி,  நம்பும் தேங்காய் சீனிவாசனை அவர் தம்பி அயோக்கியன் என்று நிரூபிக்க  குழந்தை உதவியுடன் போராடுகிறார் சி.க. - கிளைமேக்ஸ் வரை.

   ஒரு காட்சியில் குடும்பத்தின் நிம்மதியைக் கெடுக்க வந்ததாக குழந்தையை ஸ்ரீவித்யா அடித்துவிட,  மனம் வாடும் குழந்தையை சிவாஜி டி எம் எஸ் குரலில் சமாதானப்படுத்துகிறார்!

   என் அப்பாவுக்கு மிகவும் [பிடித்த பாடல்.  "நானா நான தனக்கு தந்தன்" என்று வரும் வரிகளை மிகவும் ரசிப்பார்.  சாய்வு நாற்காலியில் அமர்ந்தபடி படித்துக் கொண்டிருக்கும் புத்தகத்தை கையில் மடக்கி அடையாளம் வைத்தபடி தொலைகாட்சி அருகில் வந்து விடுவார் - பாடலை ரசிக்க...

   கண்ணதாசன் பாடலுக்கு இசை எம் எஸ் விஸ்வநாதன்.  குரல் டி எம் எஸ், எல் ஆர் அஞ்சலி.

கண்ணிலே குடியிருந்து 

கருணை தரும் தெய்வம் ஒன்று 

குழந்தையென்று 

கங்கை நதி பெருகி வந்து 

கவிதை தரும் வார்த்தை  

ஒன்று மழலையென்று 

நீலக்கடல் மாணிக்கங்கள் 

வைரமலைப் பவழமடா 

நெஞ்சைத் தொடும் காற்று வந்து 

எடுத்துக் கொடுத்த தங்கத்தட்டு 

பேசவரும் பச்சைக்கிளி 

பிரித்து வைத்தால் பாவமடா 

பிள்ளை உன்னைக் குற்றம் சொன்னால் 

பிறப்பு முழுதும் துன்பம் கண்ணா..

சத்தியத்தின் கோபுரத்தில் 

தவழுவதே குழந்தையடா 

தத்தித் தத்தி ஓடும் பிள்ளை 

மறைத்துக் கெடுப்பதில்லையடா 

ஊர் முழுதும் ஏசட்டுமே 

உனது வார்த்தை வேதமடா 

உண்மை நம்பும் உள்ளம் இங்கே 

உனக்கும் எனக்கும் சொந்தம் கண்ணா