"திங்கக்கிழமை : வாழைத்தோல் சம்பல் - அதிரா ரெஸிப்பி

வாழைத்தோல் சம்பல்/பச்சடி  

இண்டைக்கு என்ன ஜொள்ளப்போகினமோ தெரியல்லயே:)

இது நான் வச்சிருக்கும் பெயர்:). உங்களுக்கு இது பிடிக்கவில்லையாயின் உங்கள் விருப்பத்துக்கு என்ன பெயராவது வச்சுக் கூப்பிடுங்கோ.. நா ஒண்ணும் வாணாம்னு சொல்லலியே:)).

வாழையில் எதுவுமே கழிவில்லைத்தானே.. இதை மாத்தியும் ஜொள்ளலாம், எதையும் நாங்க கழிக்க விடமாட்டோம்:).. அந்த வகையில் இந்தத் தோலிலும் அதிக சத்திருக்கு, முடிஞ்ச வரைக்கும் தோலோடு சமைத்தால் நல்லதே.. இல்லை தோலை நீக்கித்தான் சமைப்போம் என அடம்பிடிச்சால்:).. தோலை எறியாமல் இப்பூடிச் செய்திடுங்கோ.

முதலில் வாழைத்தோலை இப்படிக் கட் பண்ணி, மூழ்கும் அளவு தண்ணீர் விட்டு உப்பும் சேர்த்து நன்கு அவித்து எடுக்கோணும்.

அவித்து எடுத்ததை, இப்படி குட்டிக் குட்டியாக கட் பண்ணி எடுக்கோணும்.

அதனுள், தேங்காய்ப்பூ, பச்சைமிளகாய், வெங்காயம் உப்பு சேர்த்து கொஞ்சம் பால்[முதற்பால்] உம் சேர்த்து, நன்கு பிசைந்து குழைத்து, பின் தேசிக்காய் பிழிந்து விட்டுப் பிரட்டவும்.

(பச்சை மிளகாய் அளவு எனக்குப் போதாது!  காரப்பொடி சேர்க்கலாமோ!  வாழைப்பூவை வைத்தது போல இருக்கிறது!  -  ஸ்ரீராம்)

சூப்பரா இருக்குதெல்லோ?:)

ஊசி இணைப்பு:

புரோகோலியில் நிறைய சத்திருக்கு.. நான் சொல்ல வேண்டிய தேவை இல்லைத்தானே, அதே நேரம் இதனை கண்டபடி அவித்து பொரித்து சத்தை வீணடிக்காமல், இப்பூடி செய்து சும்மா சாப்பிடக் குடுங்கோ.. விரும்பிச் சாப்பிடுவார்கள்.. இப்படித்தான் நான் எப்பவும் செய்து குடுப்பேன், கிழமையில் 2 நாட்களாவது இப்படி செய்துவிடுவேன், விரும்பிச் சாப்பிடுவினம்.

அப்படியே முழுசாக் கழுவிப்போட்டு, கீழ்த் தண்டுப்பகுதியை கொஞ்சம் கீறி அடையாளப்படுத்தி விட்டு, தண்டு கீழே இருப்பதுபோல வைத்து, உப்புப் போட்டு கொஞ்சம் தண்ணீர்- தண்டை மூழ்க விட்டால் போதும், மேலே பட்டர்/மாஜரின் பூசி விடுங்கோ இப்படி.. மூடி ஒரு 8-10 நிமிடங்கள் அவிய விட்டால் போதும், தண்டு அவிஞ்சிட்டால் ஓகே, அப்படியே பூவின் கலர் மாறமுன் ஓவ் பண்ணி, மூடியபடி கொஞ்ச நேரம் விட்டால்.. ரெடியாகிடும்.

(இதுவரை நான் இதைச் சமைத்ததே இல்லை -  சும்மா தகவலுக்கு -  ஸ்ரீராம்.)

இதோ கலர் மாறவில்லை, ரெடியாகிவிட்டது.. இப்படியே எடுத்துச் சாப்பிட சுவையோ சுவை:)..

நெல்லைத்தமிழன் சொல்லும்வரை என் கண்ணில் படவே இல்லை, இம்முறை தமிழ்க்கடையில் நேத்திரம் வாழைக்காய் வாங்கினால்.. 1.5 அடி நீளம் இருந்துதே...

நன்றி...__()__

 பேபி அதிரா எங்கே புறப்பட்டுவிட்டீங்க?:). அது அடுத்த ரெசிப்பி செய்து எங்கள் புளொக்குக்கு அனுப்போணுமெல்லோ.. அதுதான் மார்க்கட்டுக்குப் போகிறேன்:))

 “உள்ளுக்குள்ளேயே நமக்குப் பகை உணர்ச்சி இருக்குமாயின், அது எதிரியைத்தாக்காது, நம் உடலைத்தான் தாக்கும்”

================================