"திங்க"க்கிழமை : புளிக்காய்ச்சல் - கீதா சாம்பசிவம் ரெஸிப்பி

புளிக்காய்ச்சல் என்னோட முறையில்!


சேச்சே! முறைத்தல் எல்லாம் இல்லைங்க! முறைனு சொன்னேன். அடடா! மறுபடி முறைக்கிறீங்களா? சரி, சரி, நான் செய்யும் வழக்கப்படினு வைச்சுக்கோங்க! இப்போச் செரியா? அப்பாடா! 

ஶ்ரீராம் "திங்க"ற கிழமைக்காக 4,5 முறை கேட்டுட்டார். படங்கள் சிலது அப்லோட் ஆகி இருக்கு. சில செய்முறைகளிலே அப்லோட் பண்ணலை. சிலது ட்ராஃப்ட் மோடில்! இஃகி, இஃகி! இஃகி! இந்த அழகில் எதை அனுப்பறதுனு ஒரே யோசனை. சரி உடனே அனுப்பறதுக்கு இதான் வசதினு என்னோட புளிக்காய்ச்சல் செய்முறையை எடுத்த படங்களை இணைத்து ஒரு பதிவு அனுப்பி வைக்கலாம்னு முடிவு பண்ணிட்டேன்.  நான் கொஞ்சம் வித்தியாசமானவள்னு உங்களுக்குத் தான் தெரியுமே! அதான் இந்தச் செய்முறையும் கொஞ்சம் வித்தியாசமா இருக்கும்! ஆனாலும் தி/கீதா, ரேவதி சிம்ஹன் போன்றவர்களுக்கு இது தெரிஞ்சிருக்கும். "அதான் எனக்குத் தெரியுமே!" என 2 பேரும் சொல்லப் போறாங்க பாருங்க! என்ன பேசிட்டே இருக்கே, இன்னும் ஆரம்பிக்கலையானு கேட்கறீங்களா? இதோ ஆரம்பிச்சாச்சு.

அளவெல்லாம் எனக்குச் சொல்லத் தெரியாது என்பதே உண்மை. ஹிஹி, அளக்கிற வழக்கமே இல்லையே!அதான். எல்லாம் கண்ணளவு தான்.ஆனாலும் இங்கே இந்த நெ.த., அதிரடி போன்றவங்களுக்கெல்லாம் அளந்து போட்டாலே பண்ணத் தெரியாது! இந்த அழகிலே கண்ணளவு என்றால் அவங்க அனுஷ்கா கண்ணளவா? தமன்னா கண்ணளவா என்பார்கள்.  ஆகையால் உத்தேசமாச் சொல்றேன்.

புளிக்காய்ச்சல் காய்ச்சத் தேவையான பொருட்கள்:

புளி    பழைய புளியாக இருத்தல் நலம். அல்லது பழம்புளி+புதுப்புளி கலந்து எடுத்துக்கலாம்.  ஒரு சின்ன கமலா ஆரஞ்சு அளவுக்கு எடுத்து நீரில் ஊற வைக்கவும். 

உப்பு, தேவையான அளவுக்கு.  மஞ்சள் பொடி இரண்டு டீஸ்பூன்.

தாளிக்க

 நல்லெண்ணெய்  ஒரு கிண்ணம்

மிளகாய் வற்றல்  காரமில்லாதது எனில் சுமார் 8 முதல் 10க்குள்

கடுகு  இரண்டு டீஸ்பூன், கடலைப்பருப்பு 2 டீஸ்பூன் அல்லது கொண்டைக்கடலையைக் கழுவி ஒரு டேபிள் ஸ்பூன் அப்படியே எடுத்துக் கொண்டு எண்ணெயில் போட்டுப் பொரிக்கலாம்.

வேர்க்கடலை  ஒரு சின்னக் கிண்ணம்

கருகப்பிலை ஒரு கைப்பிடி, மஞ்சள் பொடி 2 டீஸ்பூன் அல்லது விரளி மஞ்சளை வறுத்துப் பொடிக்கும் சாமான்களோடு வறுத்துப் பொடிக்கலாம்.

வறுத்துப் பொடிக்க 

வெறும் வாணலியில் இரண்டு டீஸ்பூன் வெந்தயம்,2 டீஸ்பூன் கடுகு, 2 டீஸ்பூன் கறுப்பு எள் ஆகியவற்றைத் தனித்தனியாக வறுத்து எடுத்துக் கொள்ளவும்.

நல்ல சுத்தமான நெய் அல்லது நல்லெண்ணெயில் ஒரு டீஸ்பூன் மிளகு போட்டி வெடிக்க விட்டு வைத்துக் கொள்ளவும்.

கடாயில் எண்ணெய் விட்டுக் கொள்ளவும்.

சுமார் 5 அல்லது 6 மிளகாய் வற்றல் எடுத்துக் கொள்ளலாம். அல்லது தாளிப்பில் மி.வத்தலைக் குறைத்துக் கொண்டு வறுத்துப் பொடிப்பதில் அதிகம் ஆக்கிக்கொள்ளலாம். நான் தாளிப்பில் 4 மிளகாய் வற்றல் மட்டுமே போடுவேன்.வறுத்துப் பொடிப்பதில் காரத்தைச் சேர்த்து விடுவேன். மிளகாய் வற்றலை விதை நீக்கி வறுத்தால் கமறல் வராது. காரமும் அதிகம் இருக்காது.  மி.வத்தல் கறுகாமல் வறுத்து எடுத்துக் கொள்ளவும். அடுத்துக் கொத்துமல்லி விதை.

சுமார் 2 டேபிள் ஸ்பூன் கொத்துமல்லி விதையை எண்ணெயில் போட்டுச் சிவக்க வறுத்துக் கொள்ளவும். பெருங்காயத்தைப் பொரித்துக் கொள்ளவும். இப்போது வெறும் வாணலியில் வறுத்த சாமான்கள், நெய்யில் வறுத்த மிளகு ஆகியவற்றையும் இதோடு சேர்த்துக் கொண்டு நல்ல மென்மையான மிருதுவான பொடியாகப் பொடித்துக் கொள்ளவும். பொடியைத் தனியாக வைக்கவும்.

புளியை நன்கு கெட்டியாகக் கரைத்து எடுத்துக் கொள்ளவும்.கடாய், உருளி அல்லது கல்சட்டியை அடுப்பில் வைத்து ஒரு கிண்ணம் நல்லெண்ணெயை ஊற்றவும். தாளிக்கும் மிளகாய் வற்றலை இரண்டாய்க் கிள்ளிக் கொண்டு உள்ளிருக்கும் விதைகளை எடுத்துவிட்டுக் காய்ந்த எண்ணெயில் முதலில் போட்டுக் கருப்பாகும் வரை வறுக்கவும். 

பின்னர் தாளிக்கும் பொருட்களை ஒவ்வொன்றாகச் சேர்க்கவும். கடைசியில் கருகப்பிலை போட்டுத் தாளித்த பின்னர் மஞ்சள் பொடியைச் சேர்க்கவும். அல்லது வறுத்துப் பொடித்த பொடியோடு மஞ்சளையும் சேர்த்துப் பொடித்து வைக்கவும்.  பின்னர் கரைத்த புளிக்கரைசலை ஊற்றி உப்பையும் போட்டுக் கொதிக்க விடவும்.நன்கு புளி வாசனை போகக் கொதித்ததும் சலசலவென எண்ணெய் பிரிந்து வர ஆரம்பிக்கும்.

அப்போது வறுத்த பொடியைத் தேவையான அளவுக்குக் கண் திட்டமாகச் சேர்க்கவும். எல்லாப் பொடியையும் உடனே சேர்க்கவேண்டாம். பின்னால் சாதம் கலக்கும்போது தேவையானால் பொடியைப் போட்டுக் கலந்து கொள்ளலாம்.  புளிக்காய்ச்சல் ரொம்பக் கெட்டியாகவும் இல்லாமல் நீர்க்கவும் இல்லாமல் கரண்டியால் அள்ளும் பதத்துக்கு இருக்க வேண்டும். ஒரு சிலர் நன்கு கொதிக்க விட்டு மி.வற்றல், தாளிதங்கள் மட்டுமே தெரியும்படி மிகவும் கெட்டியாக எடுப்பார்கள். இது அவரவர் விருப்பம். எங்க வீட்டில் கொஞ்சம் கெட்டியாக, கொஞ்சம் தளர எனக் கூட்டுப் பதத்துக்கு இருக்கும். 

இந்தப் புளிக்காய்ச்சலை சுமார் ஒரு மாதம் வரை வெளியேயே வைத்துக்கொள்ள முடியும். குளிர்சாதனப் பெட்டியில் இருந்தால் 2, 3 மாதம் கூட வைத்துக் கொள்ளலாம். புளிக்காய்ச்சல் காய்ச்சிய பின்னர் சாதத்தை விரைப்பாக வடித்துக் கொண்டு நல்லெண்ணெய், அரைடீஸ்பூன் உப்பு, பெருங்காயப் பொடி, மஞ்சள் பொடி சேர்த்துக் கிளறி ஆற வைத்துப் பின்னர் புளிக்காய்ச்சலைத் தேவையான அளவுக்குப் போட்டுக் கிளறி வைக்கலாம். ஊர்களுக்குப் போகும்போது கையில் எடுத்துப் போகலாம். வீட்டிலேயே ஒரு நாள் குழம்பு வைக்காமல் புளியஞ்சாதம் சாப்பிட்டுக்கலாம்.


கற்சட்டியில் புளிக்காய்ச்சல்....   பார்க்கையிலே நாவில் அருவி!


============================================================================================

யாரிவர்கள்?