"திங்க"க்கிழமை : வெஜிடபிள் கோன் சூப் - அதிரா ரெஸிப்பி

வெஜிடபிள் கோன் சூப்

ஆஆஆ ரொம்பக் குளிருதே .. எப்போ சூப் ரெடியாகுமோ:))

வெஜிட்டபிள் கோன் சூப் செய்வதற்கு, நாம் வீட்டில் சமைக்கும் மரக்கறிகளின், தண்டுகளை வீசிடாமல் சேர்த்து வைக்கோணும், பெரும்பாலும் இலைகளை எடுத்துவிட்டுத் தண்டுகளை எறிவோமெல்லோ அப்படி எறியாமல், அவற்றை சேர்த்து வச்சு சூப் செய்திடலாம், தண்டில்தான் அதிக சத்துக்கள் இருக்கு.

இது என்னிடம், வீட்டில் இருந்த மரக்கறிகள் அனைத்திலும் கொஞ்சம் கொஞ்சம் சேர்த்திருக்கிறேன், ஒரு பிழை நடந்துவிட்டது, சிகப்பு மரக்கறி சேர்த்தால், சூப் கறுப்பாகிடும். நான் இங்கு சிவத்த வெங்காயமும், சிவப்பு ட்ரடிஸ்[Radish] உம் சேர்த்தேன் அதனால சூப் கலர் கறுப்பாகி விட்டது, இதே முறையில் சிக்கன் சூப் செய்தேன் அது வெள்ளையாக இருக்கு, என்பக்கத்தில் வெளிவரும்.

பெரிய பெரிய துண்டுகளாக வெட்டினால் போதும், உள்ளி, வெங்காயம், பச்சை மிளகாயும்[விரும்பினால்] சேருங்கோ.. மற்றும் மிளகுப்பவுடர், கொஞ்சம் உப்பு சேர்த்து இப்படி தண்ணி விட்டு நன்கு அவிக்கவும்.

இப்படி நன்கு அவிஞ்சதும், கொஞ்சம் மெதுவாக கடைவதுபோல நசித்து.. நன்கு வடித்தெடுக்கவும்.

கொஞ்சம் கோன்[நான் சேர்ப்பது ஃபிரீசரில் இருந்த சோளன்], கொஞ்சம் புரோகோலி, காலிபிளவர், கரட்டும் போடலாம் மற்றும் ஸ்பிரிங் ஆனியனும் சேர்க்கலாம், இப்படி மிகவும் குட்டியாக ரெடி பண்ணி வையுங்கோ [நிறையப் போடக்கூடாது.. பட்டும் படாமலும் தெரிவதுதான் நல்லது].. இதில் சுவீட் பெப்பரும் சேர்த்தேன் நான்.

பின்னர் அந்த வடித்த வெஜிடபிள் ஸ்ரொக் கை அடுப்பில் வச்சு, நன்கு கொதிக்கும்போது[கொதிக்காமல் சேர்க்கக்கூடாது], வெள்ளை சோள மா பவுடர்[white corn flour] அதில் என் அளவுப்படி ஒரு லீட்டர் ஸ்ரொக் க்கு 4-5 மேசைக்கரண்டி மா தேவைப்படும், மாவை வெண்சூட்டுத் தண்ணியில் கரைச்சு, இப்படி சேர்க்கவும். சூப் ஓரளவு தடிப்பான பதமாக அதாவது மெல்லிய கஞ்சிப் பதமாக வரோணும்.. அப்போது வெட்டி வைத்திருக்கும் அந்த மரக்கறிகளையும் சேர்த்து, ஒரு கொதி வந்ததும் இறக்கவும். 

அதிராவின் ஸ்பெஷல் சூப் ரெடி, பிரட் ரோஸ்ட் உடன் சாப்பிட சுவையோ சுவை.

சூப் குடிச்சால் இந்த டிஷ் இலவசம்:)).. 

நான் அடிக்கடி செய்யும் கொள்ளு சுண்டல்:) 

ஆனால் இம்முறை நெ.தமிழனுக்காகவே செய்தேனாக்கும்:)

=============================

 “மொட்டுக்களை உடைத்து விட்டமைக்காக, செடியிடம்

தென்றல் மன்னிப்புக் கேட்பதில்லை”

======🙏======