புதன் 200415 :: எங்கள் பிளாக்குக்கான ஆரம்பப் புள்ளி எப்படி உருவாகியது?

நெல்லைத்தமிழன் : 

நிருபர்களுக்கு அவங்க போகும் இடத்தில் (பெரிய கம்பெனி ஷோக்களுக்கு செய்தி சேகரிக்க) Press Kit என்று தருகிறார்களே. அது லஞ்சம் இல்லையா?



# இது மாதிரியான "அளிப்புகள்" பல இடங்களில் தரப் படுகின்றன.  கம்பெனிகள் விஷயத்தில் இது விளம்பரச் செலவினமாக எழுதப் படும். அதில் ஒரு சிறு நியாயமும் உண்டுதான். நவீன வியாபார யுக்தி. லஞ்சத்துக்கு கிட்டத்து உறவு .

* மருத்துவப் பிரதிநிதிகள் ஸாம்பிள் என்ற பெயரிலும், டாக்டர்களுக்கு டூர் பேக்கேஜ் ஆஃபரும் தருகிறார்கள்.  பத்திரிகைகள் வாசகர்களுக்கு இலவச இணைப்பு தருகிறார்கள்.  ஊறுகாய் கம்பெனியிலிந்து பெரிய விஷயங்கள் வரை ஒண்ணு வாங்கினா ஒண்ணு ஃப்ரீ தருகிறார்கள்.  மக்கள் வோட்டுக்குப் பணமும் இலவசங்களையும் பெறுகிறார்கள்...

ஒவ்வொருத்தரும் ஏதோ ஒண்ணுக்கு பயப்படுவாங்க (நான் சொல்வது மாரல் பயம் இல்லை). எனக்கு இடி மின்னல் பயம் உண்டு. வீட்டில் இருந்தாலும் பயம். உங்களுக்கான பயம் என்ன?

# சின்ன வயதில் கனமழை என்றால் பயப்பட்டேன்.  இப்போது யாருக்கு எந்த மாதிரி பாரமாக இருப்போமோ என்ற அச்சம் அவ்வப்போது.

& எனக்கு டினோசரைப் பார்த்தா ரொம்ப பயமா இருக்கும். 

எங்கள் பிளாக்குக்கான ஆரம்பப் புள்ளி எப்படி உருவாகியது?

& ரொம்ப சுருக்கமா சொல்றேன், கேட்டுக்குங்க. பதினொரு வருடங்களுக்கு முன்பு ஒருநாள், என் கற்பனைக் குதிரை தன் பொல்லாச்சிறகை விரித்து,  திக்குத்திசை தெரியாமல் பறந்தது. அப்போ எனக்குத் தோன்றிய சில சிந்தனைகளை, புதிதாகக் கற்றுக்கொண்ட தமிழ் font மூலம் டைப் செய்து, அப்போது வலையுலகில் நம்பர் ஒன் ஆக  இருந்த இட்லிவடை வலைப்பூ மெயில் விலாசத்துக்கு ஜிமெயில் செய்தேன். 
அதுதான் ஆரம்பப் பாடங்கள்  (LINK) என்னும் ஆரம்பப் புள்ளி. 

அது அங்கே வெளியான உடன், அதைப்பார்த்து எனக்கு ஒரே சந்தோஷம்! அது வெளியிடப்பட்ட தேதி ஜூன் 22, 2009. 

அன்றிலிருந்து , 'நாமே ஒரு blog ஆரம்பித்தால் என்ன?' என்று தீவிரமாக யோசிக்கத் தொடங்கி, கிட்டத்தட்ட blog பற்றி LKG நிலையில்தான், 'எங்கள் ப்ளாக்' எங்களால் ஆரம்பிக்கப்பட்டு, முதல் blog post ஜூன் 28, 2009 அன்று வெளியிட்டோம். எங்கள் ஆரம்பக் காலத்தில், இட்லிவடை 'மானஸ்தன்' google chat மூலம் BLOG எழுதுவது, வெளியிடுவது பற்றி, என்னுடைய பல சந்தேகங்களுக்கும் விளக்கமளித்து உதவினார்.  



பானுமதி வெங்கடேஸ்வரன் : 

அம்மா சமைத்துப் போட்டதை விட அதிக காலங்கள் மனைவி சமைத்துப் போட்டாலும், ஆண்களுக்கு பட்சணங்கள்,அல்லது பிடித்த உணவு என்றால் அம்மாவின் நினைவு வருவதற்கு காரணம் என்னவாக இருக்கும்?(இதற்கு எந்த சாயமும் பூசாமல் உளவியல் காரணம் கூற வேண்டுகிறேன்)


* First impression is the best impression என்பார்கள்.  நாம் பார்த்த முதல் சமையல்காரர் அம்மா.  ருசித்த முதல் சுவை அவரவர் அம்மா கைப்பக்குவம்.  ஆண்கள் என்ன, பெண்கள் மனதில் கூட அவரவர் அம்மாவின் கைப் பக்குவம் நினைவில் தங்கி இருக்கும்.  அவர்கள் தாங்களே சமைத்த உணவின் சுவைத் தரத்துக்குக் கூட தன் அம்மாவின் கைப்பக்குவச் சுவையை நிர்ணயக் கோடாக மனதுக்குள் வைத்திருப்பார்கள்.

# பிடிப்பதும் அல்லாததும் கால அடிப்படையில் அமைவதல்ல. அபிமானம், ருசி இவற்றால் உருவாவது. 

நகைச்சுவை உணர்ச்சியை வளர்த்துக் கொள்ள முடியுமா?

# நகைச்சுவை உணர்வுக்கான மனப்பாங்கு இருக்க வேண்டும். மற்றபடி, வேண்டும் என்பதால் அடையக் கூடியதல்ல. 

& இப்போ அதுக்கு என்ன வயது என்று சொல்லுங்க, அப்புறம் அது வளருமா / வளராதா வளர்த்துக்கொள்ள முடியுமா என்று சொல்கிறேன்! 

இலக்கியத் தரம் என்கிறார்களே அப்படி என்றால் என்ன? அதை யார் நிர்ணயம் செய்கிறார்கள்? 

* (இ தரம் )நிர்ணய சபையா இருக்கிறது?  பொதுஜன, வெகுஜன அபிப்ராயம்தான்!!!

# காலம் கடந்து ரசிக்கப் படுவதும், எல்லாக் காலத்திலும் அறிவார்ந்த விமர்சகர்களால் பாராட்டப்பட்டு வருவதும் ஒரு பிரதேசத்தின் அடையாளமாக அறியப் படுவதும் இலக்கியத் தரத்துக்கான யோக்கியதைகள். நிர்ணயம் செய்யப் படுவதல்ல நிகழ்வாக இருப்பது.


புராண உபன்யாசம் செய்பவர்கள் பணத்தில் குறியாக இருப்பதை சிலர் விமர்சனம் செய்கிறார்களே, அதில் என்ன தவறு?

# நிலையாமை பணம் முக்கியமல்ல என்றெல்லாம் ஊருக்கு உபதேசம் செய்வது விமர்சனத்துக்குத் தப்ப முடியாது. 
முன் காலத்தில் தட்டு நீட்டி, மனமுவந்து தரப்படும் காணிக்கைகளை மட்டும் பெற்றுக் கொண்டு மிக நன்றாக உபன்யாசம் செய்தவர்களைப் பார்த்திருக்கிறேன்.

ஏஞ்சல் : 

1, நாம் ஒன்றை நினைத்து பேச அதை அருகிலிருப்பவர் கேட்டு பின்பு மயங்கிய  (பேயறைஞ்சு போன ) தருணங்கள் இருக்கா ?  

# இருக்கலாம். 

& அதாவது, நாம் ஒன்றை நினைத்து எதிரிலிருப்பவரிடம் பேச, அதை அருகிலிருப்பவர் கேட்டு பேயறைந்து போயிருக்கவேண்டுமா? 

நாகையில் ஒரு பஸ் ஸ்டாப்பின் பெயர் 'குடை' (அது ஒரு முச்சந்தி, அங்கே டிராஃபிக் போலீஸ் நிற்கின்ற நிழற்குடை இருப்பதால், 'வெளிப்பாளையம் குடை' என்று அந்த ஸ்டாப்பிற்கு பெயர். சுருக்கமாக 'குடை' என்றே குறிப்பிடுவார்கள். ) ஒருநாள் நான் பயணித்த 'நாகூர் - நாகை' டவுன் பஸ்  அந்த ஸ்டாப் அருகே வந்தபோது மழை பெய்யத் தொடங்கியது.  நடத்துனர் " குடை எல்லாம் எறங்குங்க" என்று சொன்னார். நான் உடனே எனக்கு எதிரிலிருந்த ஒருவரை (அவர் ஏற்கெனவே என்னிடம் வெளிப்பாளையம் ஸ்டாப் வரும்போது சொல்லு தம்பி என்று சொல்லியிருந்தார். கையில் குடை வைத்திருந்தார். ) " சார் - நீங்க இங்கே இறங்கிடுங்க " என்று சொன்னேன். 

அதைக் கேட்ட எனக்குப் பக்கத்தில் உட்கார்ந்திருந்த கிராமவாசி ஒருவர் என்னிடம் " தம்பி நான் நாகை பஸ் ஸ்டாண்டுக்கு டிக்கெட் எடுத்திருக்கேன். என் கிட்டே குடை இருக்கு. நானும் இங்கே இறங்கிடணுமா? " என்று கேட்டார் பயந்து போய்! 

2, மனித பலவீனங்களில்  கிடைத்த தருணத்தை பயன்படுத்தி ஏறி சவாரி செய்பவர்களுக்கு என்ன தண்டனை கொடுக்கலாம் ?

# பலவீனப் பட்டவருக்குதான் ஆலோசனையோ அறிவுரையோ எச்சரிக்கையோ தரலாம். பொய் சொல்லி ஏமாற்றவில்லை என்றால் அடுத்தவர் அறியாப் பருவத்தவராக இல்லாத வரையில், தருணத்தைப் பயன்படுத்துவது தண்டனைக்குரியதாகாது.

& எதிலே சவாரி செய்கிறார்கள் என்பதைப் பொருத்தது. ரயிலோ அல்லது பஸ்ஸோ என்றால், டிக்கெட் பரிசோதகர்கள் உரிய தண்டனை கொடுப்பார்கள். ஆட்டோ / டாக்சியில் அப்படி சவாரி செய்ய முடியாது. குதிரை சவாரியாக இருக்குமோ? 

3, வாய்ப்பும் சக்தியும் சூழலும் அமையும்போது அதை பயன்படுத்தினால் அது சந்தர்ப்பவாதமா ?

# இல்லை. சாமர்த்தியம்.

& எந்த நோக்கத்திற்காக பயன்படுத்துகிறோம் என்பதைப் பொருத்தது அது. சுயநல நோக்கம் எதுவும் இல்லை என்றால், டபிள் ஓ கே. 

4, சாகசங்கள் நிறைந்ததா மனித வாழ்க்கை ?

# அவரவர்க்குத் தக்க அளவில் - ஆம்.

& அது நாம் எதை சாகசம் என்று நினைக்கிறோம் என்பதைப் பொருத்தது. எங்கள் ஊரில் எம்ஜியார் சினிமாவுக்கு, முதல் நாள், முதல் ஷோவுக்கு அடித்துப் பிடித்து டிக்கெட் வாங்கி, போலீசிடம் அடி வாங்கி, வேட்டி கிழிந்து வந்தவன் கூட அதை ஒரு வீர சாகசமாக ஒரு வாரத்துக்கு சொல்லிக்கிட்டுத் திரிவான். 

5, வாழ்க்கையின் யதார்த்தத்தை ஒதுக்கி தள்ளிவிட்டு கனவுலகில் வாழ்கிறோமா நாம் ?

 # இதற்கு விடை அவரவர் மனதில் இருக்கும். 

& வாழ்க்கையின் யதார்த்தத்தை ஐம்புலன்களும் அன்றாடம் நம் மூளைக்கு உணர்த்திக்கொண்டுதான் உள்ளன. மனம் / புத்தி மட்டும் அப்பப்போ கனவுலகில் கனி உண்ணும். 

6, சமீபத்தில் நீங்கள் ரசித்து துக்கத்திலும் விழுந்து புரண்டு சிரித்த ஒரு பின்னூட்டம் எது ?   //If this isn't played at my funeral I'm not going// 
 Vera Lynn - We'll Meet Again யூடியூப் காணொளியில் வந்த பின்னூட்டம்   இதுதான் நான் நேற்று பார்த்து வலியுடன்   சிரித்தது காரணம் உலகப்போரில் செல்லுமுன் சோல்ஜர்ஸ் இந்த பாட்டை பாடினாங்கன்னு பிரிட்டிஷ் மஹாராணி கொரோனா வைரஸ் பற்றிய உரையில் கூறினார். 

# அப்படி ஏதுமில்லை. ரசித்தது நிறைய உண்டு. 

& துக்க சூழ்நிலையில் கூட்டத்தின் நடுவே சிரிப்பு வராது. 

7, அடையாளங்கள் அவசியமா ?தற்போதைய சூழலில் ஏறக்குறைய அனைவரும் தங்களுக்கான          அடையாளத்தை வெளிப்படுத்தனும் நிலைநிறுத்தணும் என்கிற முனைப்புடன் இருக்கிறார்கள்  ஏன் ?அல்லது     இருக்கிறாற்போல் தோன்றுவது ஏன் ?

# அவசியமிருந்தாலும் இல்லாமல் போனாலும் அடையாளம் நிழல் போல அவரவர்க்கு இருக்கும். மாறுபட்ட மேலான அடையாளங்களை விரும்பி அல்லது லாபம் கருதி ஏற்படுத்திக் கொள்பவர் மட்டுமே பொய்முகத்தோடு காணப்படுவார். 

 8, மறைமுகமா நட்பு பாராட்டுவது நேரடியா நட்பு பாராட்டுவது இதை பற்றி இப்படிப்பட்ட மன நிலை உள்ளவர்களைப்பற்றி  உங்கள் கருத்து என்ன ? ****  இந்த கேள்விக்கு பிஞ்சு சொற்பொழிவாளர்  பதில் சொல்ல தடை போடப்பட்டுள்ளது   :))))))))  

 # நட்பில் மறைமுகம் ஏது ? ஒருதலை நட்பு நட்பாகாது. 

& எல்லா வகையிலும் நட்பு பாராட்டுவதுதானே? தவறு எதுவும் இல்லை. 

9,  இந்த மினி இட்லின்னு சொல்றாங்களே அது பார்க்க குட்டியா இருக்கே அதை சாப்பிட்டா    மற்ற இட்லிமாதிரி சுவை  திருப்தி வருமா ?      நான் இதுவரை சுவைத்ததில்லை அதான் கேட்கிறேன்.

 # ஏன் சுவைத்ததில்லை என முதலில் சொல்லுங்கள். தின்று பாருங்கள் உங்கள் விடை என்ன என எங்களுக்கும் சொல்லுங்கள்.

& பெரிய இட்லியாக இருந்தால் கூட, விண்டுதானே சாப்பிடுகிறோம். மினி இட்லிகளை ஒரு ப்ளேட் சாம்பாரில் மூழ்கடித்தால், அவை பெரிய இட்லியை விட சுலபமாக ஊறிவிடும். விள்ளாமல், விரியாமல் அப்படியே ஒவ்வொன்றாக லபக்கிடலாம்! 


10, ஒரு தலைமுறை செய்யும் தவறுகளுக்கு அவர்களின் அடுத்த தலைமுறையையும் (அவர்களுக்கு பெற்றோர்   செய்யும் செய்த எந்த ஒரு விஷயத்திலும் சம்பந்தமில்லாதபோதும் ) அவர்களையும் சேர்த்து  திட்டுவது சரியா ?

# திட்டுவதே தவிர்க்க வேண்டிய விஷயம்தான். 

& ரொம்பத் தப்பு. யார் தவறு செய்கிறார்களோ அவர்களை மட்டும்தான் கண்டிக்கவேண்டும். ஏன் தவறு செய்தார்கள் என்று அறிந்து, அதை அவர்கள் திருத்திக்கொள்ள சந்தர்ப்பம் கொடுக்கவேண்டும். 

11, உண்மையான கம்யூனிசம் என்பது என்ன ? வெள்ளிக்கிண்ணத்தில் உணவுண்டு எல்லாவித வசதிகளுடன் வளர்ந்த ஒருவரால்  பாட்டாளி வர்க்கத்தின் அல்லல்களைப்பற்றியம் புரட்சி  நிஜ கம்யூனிசம் பேசுவது இயலுமா ?

 # கம்யூனிசம் என்றால் என்ன என்பது பற்றி இனிச் சொல்லித் தெரியவேண்டியதில்லை. நடைமுறைச் சிக்கல்கள் நிறைந்த நல்ல கொள்கை. 

 12,    1. வாழ்க்கையில் தனக்கு பிடித்த விஷயங்களை செய்வதில் கிடைப்பது.        
         2. பிறருக்காக சில விஷயங்களை செய்வது. 

   இவ்விரண்டில் எதில் கிடைக்கும் சந்தோஷம் நிரந்தரமானது ?

# சந்தோஷமோ துக்கமோ எதுவும் நிரந்தரமானவை அல்ல. 

& வாழ்க்கையில், தனக்குப் பிடித்த விஷயங்களை பிறருக்காக (பொதுநலத்திற்காக) செய்வது சந்தோஷம். 

13, சில நேரங்களில் சில மனிதர்கள் எதோ ஒரு பாதிப்பை நம்மில் நம்முள் ஏற்படுத்தி சென்றுவிடுவார்கள் அப்படி நீங்கள் சந்தித்த ஓரிரண்டு பேரை பற்றி கூறவும் ?

# ஒன்றிரண்டு அல்ல நூறு அல்லது ஆயிரக் கணக்கில் எல்லாருக்கும் இருப்பார்கள். குறிப்பாக ஆசிரியர்கள், நண்பர்கள், எழுத்தாளர்கள், தீர்க்க தரிசிகள், உறவினர்கள் இப்படி. இவர்களில் யாரைச் சொல்வது யாரை விடுவது ?

& ஒருநாள் மாலை ஆறுமணி இருக்கும். பீச் ஸ்டேஷனில், மூன்றாவது பிளாட்ஃபார்மில் குரோம்பேட்டை செல்ல மின்வண்டித் தொடருக்காகக் காத்திருந்தேன். லேசான மழை. நடைமேடை தூண் ஒன்றின் கீழே சற்றேறக்குறைய எட்டு வயதுள்ள சிறுவன் ஒருவன். கண்களில் கண்ணீரோடு உட்கார்ந்திருந்தான். 

போர்ட்டர் ஒருவர், அந்தப் பையனுக்கு, ரயில்வே சிற்றுண்டி நிலையத்திலிருந்து இட்லி பார்சல் மற்றும் டீ வாங்கி வந்து கொடுத்தார். அவன் நடுங்கும் விரல்களோடு அந்த பார்சலைப் பிரித்து இட்லியைத் தின்றான். போர்ட்டர் திரும்பவும் எங்கிருந்தோ வந்து அவனிடம் ஒரு மாத்திரையைக் கொடுத்து, " இந்தாடா - இதைப் போட்டுக்கிட்டு, டீயைக் குடிடா " என்றார். அவன் அவ்வாறே செய்தான். டீ கிளாசை அவனிடமிருந்து பெற்றுத் திரும்பி வந்து சிற்றுண்டிச்சாலை மேடையில் வைத்தார் அவர். " பையனுக்கு என்ன உடம்புக்கு?" என்று அவரிடம் கேட்டேன். " ஜுரம் சார்." என்றார். "பக்கத்திலே ஏதாவது டாக்டரிடம் அழைத்துச் செல்லலாமே " என்றேன். "என்ன சொன்னாலும் அந்த இடத்தைவிட்டு நகரமாட்டேங்குறான் சார்." என்றார். 
" பையன் பேர் என்ன? " என்று கேட்டேன். " தெரியாது சார்" என்றார். 

இது நடந்தது இருபத்தைந்து வருடங்களுக்கு முன்பு. இருவருமே ஏதோ ஒரு பாதிப்பை எனக்குள் ஏற்படுத்திவிட்டார்கள். 

14, இன்றைய வெற்றி நாளைய தோல்விக்கு மனதை பண்படுத்துமா ? 

 # வெற்றி மகிழ்ச்சியை, சில சமயம் ஆணவத்தைத் தருவது. பண்படுவது வெற்றியால் வருவது அல்ல. 

& தோல்விதான் வெற்றிக்கு முதல் படி என்று சொல்வார்கள். ஒருவேளை அதையே உல்டா செய்தால், வெற்றிதான் தோல்விக்கு கடைசி படியோ? 

15, பொழுது போகாத மாலை வேளையில் வானத்தை பார்த்தபோது  அதில் இருந்த விதவிதமான டிசைன் பஞ்சு பொதிகளை பார்த்து உதித்த கேள்வி இது       ஆறுக்கு பெயர் இருக்கு, மரத்துக்கு பெயர் இருக்கு, நிலத்துக்கு பெயர் இருக்கு, ஆனா ஏன் மேகத்துக்கு மட்டும் பெயர் வைக்கலை நம் முன்னோர் ?

# வெண்மேகம்,  கருமேகம், மழைமேகம் என்றெல்லாம் பேர் இருக்கிறது போதாதா ?

& ஆக்சுவலா முன்னோர்கள் அவற்றுக்குப் பேர் வைத்தார்களாம். ஆனால் அவற்றை ஸ்கூலில் சேர்க்கமுடியவில்லை. எல்லா மேகக் குழந்தைகளும் வகுப்புகளில் கம்முனு உட்காராம உலா போயிட்டே இருந்ததால, ஹெட் மாஸ்டர் அவைகளின் பெயரை அட்டெண்டன்ஸ் ரெஜிஸ்டரிலிருந்து தூக்கிட்டாராம். 

முகிலினங்கள் அலைகிறதே
முகவரிகள் தொலைந்தனவோ
முகவரிகள் தவறியதால்
அழுதிடுமோ அது மழையோ! 

அதிரா :  

1. அல்லிக்கும் சந்திரனுக்கும்தான் பொருத்தம் என்பார்கள், மாலையில் மலர்வதைத்தவிர வேறேதும் காரணம் உண்டோ?

# இல்லை.

& அல்லிக்கும் சந்திரனுக்கும்தான் பொருத்தம் என்பவர்கள், தாமரைக்கும் சூரியனுக்கும்தான் பொருத்தம் என்றும் சொல்வார்கள். ஆனா தமிழகத்தில் சூரியனுக்கும் தாமரைக்கும் சண்டைதானே நடக்குது! 

2.சிலர் ரிவி, மற்றும் சினிமா பார்க்கும்போது, மற்றவர்கள் இருப்பதையும் கவனிக்காமல், சத்தமாக பேசுவார்கள்.. அடி அடி விடாதே, துரத்து, ஆஆ பாவம் விட்டிடு...., ஆஆஆ ஓகே பண்ணிடுவார் பாரு.. ஹா ஹா ஹா இப்படிப் பல.. இவர்கள் மனநிலையில் எப்படியானவர்கள்?
[[[சமீபத்தில் பாட்டி ஒருவர், இப்போ வீட்டுக்குள் ரிவி பார்க்கும்போது லொக்டவுன் நேரத்தில்.. இப்படிச் சத்தம் போடுகிறாவாம் என ஊரிலிருந்து வந்த செய்தி கேட்டதும் உதிச்ச கேள்வி:))] ஆனா இப்படிப் பலரைப் பார்த்திருக்கிறேன்.]].

# ரசனைக்கேற்ற ஈடுபாடு. 

& கஷ்டம், கஷ்டம். நாட்டில் படிப்பறிவு வளர்ந்தால்தான் இந்த நிலை மாறும். 

3.கிராமத்து வாழ்க்கையை விரும்பிக் கொண்டும் ரசிச்சுக் கொண்டும், ஆனா கிராமத்தில் போய் வாழ விரும்பாமல் நகரத்திலேயே வாழ்க்கை நடத்துவோர் பற்றி என்ன நினைக்கிறீங்க?

# ரசனை/விருப்பம் உண்மையாக இருந்தாலும் வசதி வாய்ப்பு இல்லாதிருக்கலாம். அல்லது விருப்பம் மேம்போக்கானதாக இருக்கலாம்.

& நான் வானத்தில் இருக்கின்ற நிலாவை விரும்பி, ரசித்துக்கொண்டு இருப்பேன். அதுக்காக என்னை உடனே ராக்கெட்டில் ஏற்றி அங்கே அனுப்பிவைத்து, அங்கேதான் வாழவேண்டும் என்று சொல்வீர்களா! 

4.ஒருவரின் நடை உடை பாவனையைப் பார்த்து ஓரளவாவது அவர்கள் எப்படிப்பட்டவர்கள் எனக் கணக்கெடுக்க முடியுமோ? அது சரியாக வருமோ?

# முடியாது. சரியாக வந்திருந்தால் அது தற்செயல். 

& முடியும். சில விதிவிலக்குகள் உண்டு. அதாவது சில சமயங்களில் நம்முடைய கணிப்பு தவறாக போய்விடும். சில பொய்த் தோற்றங்கள்தான் இதற்குக் காரணம். 

5.மனிதர்களில்தான் அதிக அன்பு பாசம் நேசம் இரக்கம் வைப்பது நல்லதோ? இல்ல 5 அறிவான பறவை விலங்குகளில் வைப்பது நல்லதோ? ஒன்றை மட்டும் கூறவும்:))[இது அஞ்சு சம்பந்தப்பட்ட கேள்வி அல்லவாக்கும்:))].

# அன்பு நேசம் அல்லது இரக்கம் வரவழைக்கப்படும் இயல்பல்ல; இயற்கையாக அமைந்திருப்பது. 

& எல்லா உயிர்களிடத்திலும் அன்பாக இருக்கலாம். ஓரறிவு, ஈரறிவு என்றெல்லாம் ஏன் பிரித்துப் பார்ப்பது? 

6. முற்காலத்தில் கணவனோடு உடன்கட்டை ஏறும் பழக்கம் ஏன் ஏற்பட்டது? அன்பால இல்லை என்பது மட்டும் புரிந்தது.. ஏனெனில் பாண்டு இறந்தபோது இரு மனைவிகளும் பேசி, ஒரு முடிவுக்கு வந்த பின்னர் ஒருவர் உடன்கட்டை ஏறினாராம்.. அப்போ இது கட்டாயத்தின் பேரிலதானே நடந்திருக்குது.

 # கைம்பெண்களுக்கு விதித்திருந்த கட்டுப்பாடுகள் கொடூரமானவையாக இருந்ததும் சுற்றி நிற்பவர்களின் நிர்ப்பந்தத்தாலும் உடன்கட்டை இருந்திருக்கும். 

7. வாழ்க்கையில் நமக்கு எதிலாவது எப்பவாவது திருப்தி கிடைத்து விடுமோ?.. மீண்டும் தேவைப்படாத .. தேடாத அளவுக்கு?

  # கிடைக்காமலா இருக்கும் ?

  ===================================================