திங்கக் கிழமை 'தால் மக்கனி' கீதா ரெங்கன் ரெசிப்பி

தால் மக்கனி

ஹை! எபி கிச்சன் ரசிகப் பெருமக்களுக்கு அன்பார்ந்த வணக்கம். தொற்றினால் ஊரடங்கு, சோஷியல் டிஸ்டன்ஸ் என்று இருப்பதால், எபி கிச்சனுக்குள் ஒருவர் அல்லது இருவர் மட்டுமே மாஸ்க், கையுறை எல்லாம் போட்டுத்தான் சமைக்க வேண்டும் என்று ரூல்ஸ்!!! ஃப்ளைட் இல்லாததால் தேம்ஸ்காரங்க கீதாவோடு ரவுஸ் செய்ய வர முடியலை. இங்க இருக்கறவங்களும்தான். எனவே கீதா அடக்க ஒடுக்கமாக பூஸாரின் வாலை இழுக்காமல் நேராக ரெசிப்பிக்குப் போகும் முன்…

இந்த ரெசிப்பி எபியில் வெளி வரும் சமயம், ஊரடங்கு தளர்த்தப்பட்டு இருக்கும் வேளையாக இருக்கலாம். இருந்தாலும், உடனே கடைகளுக்கும், கோயில்களுக்கும், பொது இடங்களுக்கும், கூட்டத்திலும் முண்டி அடித்துப் போகாமல் அப்போதும் இதே சோஷியல் டிஸ்டன்ஸை கடைபிடிப்போம். ஏன்னா, புராணக் கதைகளில் வரும் வில்லன்கள் மாயாவியாக மறைந்திருந்து தாக்குவது போல இந்தத் தொற்று மறைந்திருந்து எந்தவித சிம்டம்ஸும் கூட வெளிப்படுத்தாமல் தாக்கும் மர்மம். அடாது வெயில் அடித்தாலும் விடாது தாக்குவேன் என்று தாக்கிக் கொண்டிருக்கிறது. அது எங்கு வேண்டுமானாலும் ஒளிந்திருக்கலாம். யாருக்குத் தெரியும் எந்தப் புற்றில் எந்த பாம்பு இருக்கு என்பதைப் போல. அதனால் இதே சுத்தத்தை எப்போதும் அனுசரிப்போம். 

பஞ்சாப் தால் மக்கனி ரெசிப்பியை நான் ஒரு பஞ்சாபி பெண்மணியிடம் கற்றுக் கொண்டேன். இதன் சூட்சுமமே, முழு கறுப்பு உளுந்து மற்றும் ராஜ்மாவுடன் இதற்கான மெயின் பொருட்களான வெண்ணை (அதனால்தான் மக்கனி – ஹிந்தியில் மக்கன் என்றால் வெண்ண) மற்றும் பால் க்ரீம் இவற்றைச் சேர்த்து  நிறைய நேரம் குறைந்த தீயில் வைத்துக் கிளறுவதில்தான் இருக்கிறது. எவ்வளவுக்கெவ்வளவு அப்படிக் கிளறுகிறோமோ அவ்வளவு க்ரீமியாகச் சுவையுடன் இருக்கும்.

தால் மக்கனி கொஞ்சம் காரம் குறைவாக இருக்கும். மசாலா சுவை தூக்கலாக இருக்காது. மசாலா கூடப் போடாமலும் செய்வார்கள். காரம் வேண்டுபவர்கள் கூடுதலாகச் சில்லி பௌடர் சேர்த்துக் கொள்ளலாம். இதில் போடப்படும் வெண்ணை, க்ரீம் அளவு எல்லாம் உங்களின் விருப்பத்திற்கு ஏற்ப சேர்த்துக் கொள்ளலாம். அதற்காகச் சேர்க்காமலேயே செஞ்சுடாதீங்க. சுவையே அத்தனை நன்றாக இருக்காது. ஏனென்றால் இது கறுப்பு உளுந்தில் செய்வது.

இம்முறை படங்களுடனேயே விளக்கமும் கொலாஜில் கொடுத்துவிட்டேன். ஒரு சிறு முயற்சி. நெட் படுத்தலால், கொலாஜில் எழுத்தை போல்ட் செய்ய முடியாமல் போய்விட்டது.

கொலாஜில் விளக்கத்துடன் சொல்ல விட்டுப் போனவை. பருப்புகளைக் குறைந்தது 8 மணி நேரம் ஊற வைக்க வேண்டும். நான் அவற்றை வேக வைக்கும் போது பால் அதிகமும், கொஞ்சம் தண்ணீரும் கலந்து விட்டு வேக வைத்து எடுத்துக் கொள்வேன். பாலில் வேக வைக்கும் போது அதன் சுவை இன்னும் நன்றாக இருக்கும்.  இது என் அனுபவ டிப்ஸ். பருப்பை விட கொஞ்சம்  அதிகம் இருந்தாலும் பிரச்சனை இல்லை. ஏனென்றால் நிறைய நேரம் கிளற வேண்டுமே. 

குக்கரில் வேக வைக்கும் போது விசில் சத்தம் 7, 8 வரும் வரை வேக வைக்க வேண்டும். உங்கள் குக்கரின் திறனைப் பொருத்து. அவித்த பருப்பை அப்படியே மசிக்கவும் செய்யலாம் இல்லை என்றால் கொஞ்சம் பருப்பை மிக்ஸியில் அடித்து எடுத்துக் கொண்டு மீதி உள்ள பருப்போடு கலந்து கொள்ளலாம். பருப்பு வெந்த பக்குவம் பொருத்து நான் இப்படியும் செய்வதுண்டு.

நெட் பிரச்சனையால் எழுத்துகளின் அளவை எத்தனை முறை மாற்றியும் மாறாமல் படுத்தியது. போல்டும் செய்ய முடியவில்லை. எனவே இந்தப் படத்தில் உள்ளதை மட்டும் இங்கும் தருகிறேன்.

3 வெங்காயம், 1 தக்காளி. 2 வது படத்தில் காட்டியுள்ளபடி இஞ்சி, பூண்டு அளவு. வெங்காயத்தில் 1/2 வெங்காயத்தைப் பொடியாக நறுக்கிக் கொண்டு மீதி 2 1/2 வெங்காயத்தையும், தக்காளியையும் பெரிதாகக் கட் செய்து கொள்ளலாம். பானில்/வாணலியில் 1 டேபிள் ஸ்பூன் வெண்ணை போட்டு அதில் பெரிதாகக் கட் செய்த வெங்காயத்தைப் போட்டு வதக்கவும். வெங்காயம் கொஞ்சம் வதங்கியதும், நறுக்கியத் தக்காளியை அரைப் போடலாம். அல்லது அப்படியே போட்டும் வதக்கிடலாம். எப்படியும் அரைக்கத்தான் போகிறோம். கொஞ்சம் வதங்கியதும் கொஞ்சம் தண்ணீர் சேர்த்து, பூண்டு, இஞ்சி போட்டுக் கொதித்து தண்ணீர் வற்றியதும் ஆறியதும் நல்ல நைஸ் விழுதாக அரைத்துக் கொள்ளவும்.

எல்லாரும் அவங்கவங்க வீட்டுல கையைக் கழுவிட்டு ரெடியாக இருங்க. எல்லார் வீட்டுக்கும் டோர் டெலிவரி செய்துடலாம். தேம்ஸ்கு எப்படி அனுப்பறதுனு ஓசனை பண்ணிட்டுருக்கேன்.

ஹலோ தேம்ஸ் பூஸார்ஸ் அதாரு நீங்க ஜெசி, டெய்சி பிள்ளையாமே என்னைப் போல. ரொம்ப ஓவரா விஷமம் எல்லாம் செய்வீங்களாம், அதுவும் ஜெஸிதான் லீடராம். இனி நம்ம கிட்ட உங்க பாச்சா எல்லாம் பலிக்காது. என் பேரு க்ளோயி. சென்னைவாசி. இங்க புது என்ட்ரி. இனி நானும் அப்பப்ப தலை காட்டுவேன். 

மீண்டும் சந்திப்போம் அடுத்த எபி கிச்சன் ஷோவில். அதுவரைக்கும் நன்றி கூறி விடை பெறுகிறோம். மிக்க நன்றி எபி கிச்சன் டைரக்டர் ஸ்ரீராம் மற்றும் எபி ஆசிரியர்கள் அனைவருக்கும். 

========================================================