வெள்ளி வீடியோ : வானில் தோன்றும் மாலை சிவப்பு.. விழிகளில் பாதி விரல்களில் பாதி..

 எழுதியவர் யார்?  தெரியாது!  இசையமைத்தவர் யார்?  தெரியாது.  ஒருவேளை புகழேந்தியாய் இருக்கலாம்.  பாடியவர் எஸ் பி பாலசுப்ரமணியம்.

முன்பு 'தணிகை வாழும் முருகா' பாடலை பகிர்ந்திருந்தேன்.  அதுபோலவே ஒரு பாடல் இந்த 'நல்ல தமிழ் சொல்லாலே' பாடல்.

முருகனை தமிழ்க்கடவுள் என்று போற்றுகிறோம். அவனை நல்ல தமிழ் சொல்லால் வள்ளல் என பாடுகிறார் பாலு.

நல்ல தமிழ் சொல்லாலே 

வள்ளலே உனைப்பாட 

வல்லமை எல்லாம் தருவாய் வடிவேலா 

சொல்லமுதாய் இனிக்கும் முருகா 

உன் பெயரை 

சொல்பவர்கள் வாழ்வில் 

சுகம் கிடைக்கும் கிடைக்கும் என்றும் 

அழகனைத்தும் ஒன்றாய் அமைந்த பேரழகா 

அன்பர் மனக்கோவிலிலே 

வாழும் சிவகுமரா 

குழலிசைக்கும் கண்ணன் உளம்மகிழும் மருகா 

குழலிசைக்கும் கண்ணன் உளம்மகிழும் முருகா  

கோலமாமயில் ஏறும் ஆறுமுகா முருகா 

உன்பெருமைதன்னை அறிந்தவன் அல்லேன் 

ஓதி உணர்ந்து உள்ளம் தெளிந்தவனும் அல்லேன் 

என் நிலையறிந்தவனே ஏரகப்பதிவாழ்வே 

இது தருணம் அருள வேல்முருகா முருகா 

=====================================================================================================================

1975 ல் வெளியான 'இதயக்கனி' திரைப்படம் பெரிய வெற்றி பெற்றது.  1978 ல் தாஷ்கண்ட் திரைப்பட விழாவில் திரையிடப்பட்ட ஒரே இந்தியத் திரைப்படம் இதுதானாம்.

எம் ஜி ஆர், ராதா சலூஜா நடித்த இந்தப் படத்துக்கு இசை எம் எஸ் விஸ்வநாதன்.   ஜெகந்நாதன் இயக்கிய இந்தப் படம் வெளியானது 75 ஆகஸ்ட் மாதத்தில்.  இயக்குநர் ஜெகந்நாதனுக்கு பெரிய பிரேக் கொடுத்த படமாம்.  விகடன், கல்கி போன்ற பத்திரிகைகள் பாராட்டின என்று சொல்கிறது விக்கி.  புலமைப்பித்தன், நா காமராசன், வாலி மற்றும் ராண்டார்கை பாடல்கள் எழுதி இருக்கிறார்கள்.  ராண்டார்கை எழுதிய புத்தகம் இலவச PDF டவுன்லோடுக்கு கிடைக்குமா என்று தேடி ஏமாந்திருக்கிறேன்!

இந்தப் படத்தில் அந்தாதி வடிவில் உருவான பாடல் 'தொட்ட இடமெல்லாம்'   என்கிற பாடல் எனக்கு பிடிக்கும்.  சுசீலாவின் மிக இனிமையான குரலில் மிளிரும் பாடல் அது.  சரணவரிகள் அந்தாதியாய் மலரும். 

உஷா உதுப் மற்றும் எஸ் பி பி பாடிய பாடல்களும் இருக்கின்றன இத்திரைப்படத்தில்.  ஆனால் இன்று நான் பகிரப்போவது எனக்கு மிக மிக பிடித்த டி எம் எஸ் பாடல் ஒன்று.

வாலியின் அழகான அற்புத வரிகளில் பாடல் தளை தட்டாமல் களைகட்டுகிறது.  சுவை சொட்டுகிறது.  எம் எஸ் வியின் இனிமையான இசை.  டி எம் எஸ்ஸின் மயக்கும் குரல்.  நான் அடிக்கடி முணுமுணுக்கும் பாடல்களில் ஒன்று இந்தப் பாடல்..

'மயங்குது நெஞ்சம் தயங்குது கொஞ்சம்' என்று பாடி முடித்த உடன் சரணத்துக்கு போகும் பாடல் என்று நினைப்போம்.  விருப்பமுள்ள ஒரு திருப்பம் போல ஒரு குழலிசை சுழன்று நம்மை மீண்டும் பல்லவியில் கொண்டுவந்து லேண்ட் செய்கிறது!  ரசிக்கலாம்.

இதில் என் ஃபேவரைட் வரிகள் ஒரு சிறு தாளத்தைத் தொடர்ந்து வரும் 'நிலவென்ன நெருப்பென்ன' வரிகள்.  அடிக்கடி நான் பாடும் (!) வரிகளும் அதுதான்!

புன்னகையில் கோடி பூங்கவிதை பாடி

கண்ணிரண்டில் மேவி காட்சி தரும் தேவி

பெண்ணொருத்தி உன் போலே இன்னொருத்தி ஏது

வெண்ணிலவு இரண்டு உலகில் கிடையாது.

ஒன்றும் அறியாத பெண்ணோ

உண்மை மறைக்காத கண்ணோ

மாற்று குறையாதோ பொன்னோ

மயங்குது நெஞ்சம் தயங்குது கொஞ்சம்

ஒன்றும் அறியாத பெண்ணோ

உண்மை மறைக்காத கண்ணோ

மாற்று குறையாதோ பொன்னோ

மயங்குது நெஞ்சம் தயங்குது கொஞ்சம்

வானில் தோன்றும் மாலை சிவப்பு

வானில் தோன்றும் மாலை சிவப்பு

விழிகளில் பாதி விரல்களில் பாதி

விழிகளில் பாதி விரல்களில் பாதி

மூன்று கனிகளின் சுவை கொண்டு

நேர் வந்து நின்றது கொடி ஒன்று

ஒன்றும் அறியாத பெண்ணோ

உண்மை மறைக்காத கண்ணோ

மாற்று குறையாதோ பொன்னோ

மயங்குது நெஞ்சம் தயங்குது கொஞ்சம்

நிலவென்ன நெருப்பென்ன

உலவும் பேரழகே உனக்குள்ளே

முள்ளோ மாமலரோ என

மயக்கம் பிறக்குதடி எனக்குள்ளே

என்னென்று ஏதென்று

இனங்காணா வடிவத்தை

பெண்ணென்று பார்த்த மனம்

பித்தாகி போனதம்மா.

பாலும் வெண்மை கள்ளும் வெண்மை

பாலும் வெண்மை கள்ளும் வெண்மை

பருகிடும் வேளை புரிந்திடும் உண்மை

பாவை இனங்களும் அது போலே

நாம் பருகி பார்க்கையில் மது போலே

ஒன்றும் அறியாத பெண்ணோ

உண்மை மறைக்காத கண்ணோ

மாற்று குறையாதோ பொன்னோ

மயங்குது நெஞ்சம் தயங்குது கொஞ்சம்