நான் பயணம் செய்த இடங்களின் படங்கள் : தாய்பே :: நெல்லைத்தமிழன்

 

தாய்பே Taipei, தாய்வான் –  Taipei Zoo – பகுதி 1 of 3 

நான் தாய்வானுக்கு ஆபீஸ் வேலையாக (அங்குள்ள புகழ்பெற்ற கம்ப்யூட்டர் எக்ஸிபிஷனில் கலந்துகொள்ளவும், எங்களது கம்பெனிக்குத் தேவையான கணிணி சம்பந்தமான பொருட்களை evaluate செய்து வாங்கவும் முதன் முதலில் 2008ல் சென்றிருந்தேன். அதன் பிறகு நான்கு தடவை சென்றிருக்கிறேன்.

தாய்வான், ஒருங்கிணைந்த சீனாவின் பகுதியாக 1912லிருந்து இருந்து வருகிறது. கம்யூனிஸ்ட் கட்சி, சீனாவை கபளீகரம் செய்தபிறகு, அதற்கு எதிராகப் போராடியவர்கள் 50களில் தாய்வானில் அடைக்கலம் புகுந்தனர். தாய்வானில் தனித்த அரசு அமைந்தது. இருந்த போதிலும், சீனாவில் ஆட்சிக்கு வந்த கம்யூனிஸ்ட் கட்சி, எப்போதுமே தாய்வான், தங்களைச் சார்ந்து என்ற அரசியல் நிலையிலேயே இருக்கிறது. அந்த அரசியலுக்குள் நாம் புக வேண்டாம்.

கணிணி சம்பந்தப்பட்ட உபகரணங்கள் எதுவாக இருப்பினும், மேற்கத்தைய நாடுகளின் தயாரிப்புகள் மிக விலை உயர்ந்தவை. அதே சமயம், சைனா, தாய்வான் போன்ற நாடுகளில் தயாரிக்கப்படுபவை ஐம்பது சதவிகித்துக்கும் குறைவான விலையில் கிடைக்கும் (உண்மையில் அதைவிட விலை குறைவு). இதனால் வாடிக்கையாளர்கள் குறைவதைக் கண்ட மேற்கத்தைய நாடுகளின் நிறுவங்கள், தங்கள் உபகரணங்களை சைனாவிலோ அல்லது தாய்வானிலோ உற்பத்தி செய்து அதைத் தங்கள் பிராண்ட் பெயரில் விற்க ஆரம்பித்தன. அப்படி இருந்துமே, விலை வித்தியாசம் 40 சதவிகிதத்துக்கும் அதிகமாக இருந்தது.  இதில், தாய்வான் உபகரணங்களுக்கும் சைனா உபகரணங்களுக்கும் வித்தியாசம் உண்டு. தயாரித்த பொருளின் Quality Control தாய்வானில் இன்னும் செம்மையாகச் செய்வார்கள். அதனால் நான், நேரடியாக தாய்வானிலிருந்தே உபகரணங்களை வாங்குவதற்கு 2008ல் மேற்கொண்ட முதல் பயணம் உபயோகமாக இருந்தது.

நான் ஒரு நாட்டிற்குப் பயணம் மேற்கொண்டால், வேலை நேரம் முடிந்ததும் ஏதாவது ஒரு இடமாவது சுற்றிப் பார்ப்பேன். நேரத்தை வீணடித்துக்கொண்டு, ஹோட்டலில் தங்கமாட்டேன். 

ரொம்ப அவசியம் இருந்தாலொழிய இரவு உணவு சந்திப்புக்களைத் தவிர்த்துவிடுவேன். உணவு என்பதை நான் பெரிய பிரச்சனையாக எடுத்துக்கொள்வதில்லை. (எடுத்துக்கொண்டால் பயணம் செய்வது இயலாது). எங்குமே பழங்கள் கிடைக்கும், பழரசம், வாசனையூட்டப்பட்ட பால் போன்றவற்றை வைத்துச் சமாளித்துவிடுவேன். மறுநாள் உடனடியான உணவுக்கு, ஏதாவது செய்து எடுத்துக்கொண்டு சென்றுவிடுவேன். ஊறுகாய் பாட்டில் ஒன்றும் கொண்டுசென்றுவிடுவேன். வெறும் இனிப்புகளையே சாப்பிட்டாலும், எப்போது நாக்குக்கு உப்பு/காரம் கேட்குதோ அப்போது, அந்த ஊரில் கிடைக்கும் நல்ல English bread வாங்கி, ஊறுகாய் தடவிச் சாப்பிட்டுவிடுவேன். காலம் மாற மாற, அந்த ஊரில் ஏதேனும் இந்திய ரெஸ்டாரண்ட் இருந்தால் அங்கு பயணத்தில் ஒரு தடவையாவது உணவு சாப்பிடுவேன்.  இந்திய சைவ உணவகங்கள் தவிர (வெகு அபூர்வமாக இதில் மாற்றம் ஏற்பட்டிருக்கிறது ஸ்டார் ஹோட்டல்களில்) வேறு எந்த சைவ உணவகத்திலும் சாப்பிடமாட்டேன். 

அதுபோல எனக்கு என்று வைத்துக்கொண்டிருக்கும் கர்மாக்களை (தர்ப்பணம் போன்று) விட்டதும் இல்லை. அந்த அந்த ஊரிலேயே குறைவு வராமல் செய்துவிடுவேன்.

அந்த அந்த ஊரின் பாதுகாப்பைப் பற்றிச் சரியாகத் தெரிந்துகொள்வேன். பொதுவாக நான் பயணம் செய்த நாடுகளில் பாதுகாப்புக் குறைவு ஏற்பட்டதில்லை.   

ஒவ்வொரு பயணத்திலும் ஏதாவது ஒரு இடத்தைப் பார்த்து வருவேன். அப்படி நான் பார்த்த இடங்களைப் பற்றிய படத் தொகுப்பை எங்கள் பிளாக்கிற்கு அனுப்ப ஆரம்பித்திருக்கிறேன். அப்படி அனுப்பும்போது, நானே என்னளவில் சென்சார் செய்தே அனுப்புகிறேன்.  அதன் காரணத்தையும் பிறகு சொல்கிறேன்.

அவ்வளவு தூரம் சென்று ஒரு உயிரியல் பூங்காவுக்கா செல்லவேண்டும் என்று கேட்டால், அதற்கு என்னிடம் பதில் இல்லை. ஆனால் மூன்று பகுதிகளாக Taipei உயிரியல் பூங்கா படங்கள் வரும்.

(தொடரும்)