"காயினெல்லாம் வேஸ்ட்.. ஐம்பது ரூபாய் நோட்டு கொடுங்க"

என்ன சொன்னேன்?  யானை மங்களா அருகே வந்தோம் என்று நிறுத்தி இருந்தேன் அல்லவா?  உள்ளே போகும்போதே யானை ஆசீர்வாதங்களை விற்றுக் கொண்டிருந்ததை பார்த்தேன்.

ஒரு பிரம்மாண்டத்தை அடக்கி அடிமைகொண்ட மதர்ப்பில் மனிதர்கள் பாகனாய், பக்தனாய், பார்வையாளனாய் சுற்றி வந்து கொண்டிருந்தார்கள்.  யானையின் காலிலிருந்து சங்கிலி விடுபட்டால் மக்கள் என்ன செய்வார்கள் என்று எண்ணம் ஓடியது.

ஒரு வடமாநில தம்பதிக்கு நேர்ந்த அனுபவத்தைப் பார்த்தேன்.  சொல்கிறேன்.

முதல் சிலமுறை அவர்கள் காசு கொடுக்கக் கொடுக்க அதை வாங்கி பாகனிடம் சேர்த்து விட்டு ஆசீர்வாதம் தராமல் ஆடி ஆடி அழிச்சாட்டியம் செய்தது மங்களா.

சிலமுறை முயன்றபின் அவர்கள் நொந்துபோய் பாகனிடம் கேட்கவும் பாகன் சொன்னார், "காலில் செருப்பு அணிந்து வந்தால் ஆசீர்வாதம் கிடைக்காது."

அவர்கள் பரவசமாகி செருப்பைக் கழற்றி விட்டு பக்திபூர்வமாய் வந்து காசு கொடுத்தார்கள்.  மறுபடியும் அதே கதை.  யானை வாங்கி வாங்கி வைத்ததே தவிர ஆசீர்வாதம் தரவில்லை.

மறுபடியும் முறையீடு.

பாகனின் அலட்சிய பதில்..."காயினெல்லாம் வேஸ்ட்..  நோட்டு கொடுத்தால்தான்..  ஐம்பது ரூபாய் நோட்டு கொடுங்க"

மற்றவர்கள் எல்லோரும் சளைக்காமல் ஆசி வாங்கி கொண்டிருக்க, தங்கள் இருவருக்கு மட்டும் அது கிடைக்காத வருத்தம் கலந்த அவமானத்தில் அவர் ஐம்பது ரூபாய் நோட்டொன்றைத் தேடினார்.

பக்கம் சென்றேன்.  பதவிசாய் உரைத்தேன் 'பத்து ரூபாய் கொடுங்க போதும்...'

கொடுத்தார், வாங்கினார். மகிழ்ந்தார்.  மறுபடியும் ஒரு பிரச்சினை.  ரூபாயை இவர் கொடுத்து விட்டு, பின்வாங்கி  ஆசீர்வாதத்துக்கு மனைவி தலையைக் காட்டினார்.

நோ ஆசீர்வாதம்.  துதிக்கை நீளவில்லை.  குழம்பிப்போய் என்னைப்  பார்த்தார்.

"ரூவா யார் கொடுக்கறாங்களோ, அவங்களுக்குதான் ஆசீர்வாதம்!  யானை அதற்குதான் பழகி இருக்கிறது"

அதேபோல செய்து வெற்றியடைந்தவர், மூணு சீட்டில் ஓரளவு வென்று ஜகா வாங்கும் கஸ்டமர் போல எஸ்கேப் ஆனார்.  ஏற்கெனவே நிறைய இழந்திருந்தார்.

காணொளியைப் பாருங்கள்..  ஒரு சிறுவன் பொடியன் முன்னால் ஓடி ஓடி மொபைலில் வீடியோ எடுத்துக் கொண்டிருந்தான்.  ஆடும் யானையின் ஓரக்கண் பார்வை அவன் மீதே இருந்தது.  பாகனின் பார்வை வேறெங்கோ இருந்தது.  ஆர்வக்கோளாறில் அருகில் அருகில் ஓடிய சிறுவனை நல்லவேளை ஒரு நல்லவர் வந்து அதட்டி அந்தப் பக்கம் அனுப்பினார்.

திடீரென்று பாகனே பதறியடித்து எழுந்து முன்னே ஓடியதை பார்த்து அங்கே என்னவென்று பார்வையைத் திருப்பினால், பிறந்து சில நாட்களே ஆகியிருக்கக் கூடிய ஒரு குழந்தையை கைகளுக்குள் பொதிந்தபடி ஆசி வாங்க  ஒரு அசடு, யானைக்கு அருகே, மிக அருகே வந்திருந்தார்.  ரூபாய் குழந்தையின் சின்னஞ்சிறு பிஞ்சுக் கைகளில் இருந்தது.

பாகன் அவரை அதட்டி அந்தப் பக்கம் அனுப்பி வைத்தார் - குழந்தை கையிலிருந்த ரூபாயை வாங்கி கொண்டுதான்!  பாஸ் பத்து ரூபாய்க்கு 'ஆசி' வாங்கி, என்னையும் வாங்கச் சொன்னார்.  நானும் பத்து ரூபாய் கொடுத்து ஆசி வாங்கிக் கொண்டு  அடுத்த கோவிலுக்கு கிளம்பினேன்.

============================================================================================

எம்.ஆர். ராதா பேசுகிறார்!

1971ம் ஆண்டு மே1ந் தேதி, ஏறக்குறைய ஐந்தாண்டு காலம் வெறிச்சோடிக் கிடந்த சென்னை தேனாம்பேட்டை போயிஸ் ரோட் வீடு கலியாண வீடுபோல் 'கலகல' வென்று காட்சியளிக்கிறது. வெளியே பல கார்கள் நிற்கின்றன. சில கார்கள் வருவதும் போவதுமாயிருக்கின்றன. ஆணும் பெண்ணுமாக மக்கள் அங்கங்கே சிறு சிறு கூட்டமாக நின்று, மாடியைப் பார்ப்பதும், தங்களுக்குள் ஏதோ பேசிக் கொள்வதுமாக இருக்கிறார்கள். மேலேயும் கீழேயுமாகச் சிலர் வந்து கொண்டும் போய்க் கொண்டும் இருக்கிறார்கள். அவர்களைத் தொடர்ந்து நானும் போகிறேன். ராதாவின் குரல் ஒலிக்கிறது:

"என்னைப் பார்க்கவா இத்தனை பேரு ? நான் என்ன, ராஜாஜியைப் போல, பெரியாரைப் போல, காமராஜைப் போல பெரிய மேதையா ? சாதாரண நடிகன்தானே? என்னைப் பார்க்க ஏன் இப்படி விழுந்தடிச்சிக்கினு வர்றீங்க?... சரி, பார்த்தாச்சா?... போங்க மாலை வேறே கொண்டாந்து இருக்கீங்களா?... ஐயோ, ஐயோ சரிசரி, போடுங்க... போட்டாச்சா?... போயிட்டு வாங்க!''

ராதாவின் குரலா இது, இத்தனை யிருக்கிறதே ... சன்னமா

வியப்பு அடங்கு முன் இன்னொரு குரல் கேட்கிறது: "உங்கள் குரல் முன்னைப் போல்..."

"அஞ்சி வருஷமாப் பேசாம இருந்த குரல் இல்லையா? அப்படித்தான் இருக்கும்; கொஞ்சம் கட்டினாச் சரியாயிடும்!" என்கிறார் ராதா.

மேலே செல்கிறேன். ராதா தம் உறவினர்களுடன் பேசிக் கொண்டிருக்கிறார். "உங்கள் உறவினர்களோடு பேசிக் கொண்டிருக்கிறீர்கள் போலிருக்கிறது; நான் டிஸ்டர்ப் செய்ய வந்துவிட்டேனோ?" என்கிறேன்.

"டிஸ்டர்ப் என்ன, டிஸ்டர்ப்? நான் என்ன, பெரிய ஸயன்டிஸ்ட்டா? விண்வெளி ஆராய்ச்சி சேஞ்சிக்கிட்டு இருக்கேனா? 'சாதாரண ஆக்டர்!' நீங்களெல்லாம் பேசற பேச்சுக்குக் கொஞ்சம் பாலிஷ் கொடுத்து மேடையிலே பேசறவன். அவ்வளவு தான் உங்களுக்கும் எனக்கும் உள்ள வித்தியாசம். ஆக்டர்னா நீங்க ஓவரா நினைச்சிடாதீங்க... ஆ!... தொண்டை கட்டிக்கிச்சி... இப்ப நான் 'ரத்தக் கண்ணீர் ராதா' வாயிட்டேன் ... ஏய், காந்தா!... யார் அங்கே...?"

ராதா சிரிக்கிறார். அப்போது அவர் மகன் வாசு வருகிறார். அவரைப் பார்த்ததும், "வாசு உங்களை விட நன்றாக நடிக்கிறார் என்று சினிமா ரசிகர்கள் பேசிக் கொள்கிறார்களே ?" என்கிறார் டாக்டர்.

"அதை நான் ஒத்துக்க முடியாது. டி.வி.எஸ்.ஸை எடுத்துக்குங்க; அவருடைய பையனுங்க அந்த ஸ்தாபனத்தை இப்ப பிரமாதமா முன்னுக்குக் கொண்டாந்திருக்காங்க. அதை வெச்சி ஆதியிலே அதுக்குக் காரணமாயிருந்த டி.வி.எஸ். திறமையிலே குறைஞ்சவருன்னு சொல்லி விட முடியுமா?" என்கிறார் ராதா.

"அது எப்படிச் சொல்ல முடியும்?'' என்கிறேன் நான். சக பத்திரிகையாளர் ஒருவர், "உங்கள் மனைவியைக் கொஞ்சம் கூப்பிடுகிறீர்களா ? அவரை ஒரு படம் எடுத்துக் கொள்கிறேன்", என்கிறார் வினயத்துடன்.

"என் மனைவியை எதுக்குக் கூப்பிடறது ? நான் மட்டும் பார்க்கத் தான் அவ இருக்கா; நீங்களும் உங்க பேப்பரைப் படிக்கிறவங்களும் பார்க்க அவ இல்லே!" என்று ராதா 'பட்'டென்று பதிலளிக்கிறார்.

"ஜெயில்லே..." என்று நான் மெல்ல ஆரம்பிக்கிறேன். ராதா குறுக்கிட்டுச் சொல்கிறார்:

"எனக்குத் தெரிஞ்ச வரையிலே ரோசமுள்ளவனும் மானமுள்ளவனும் ஜெயில்லே இருக்கான்!... அங்கே வேலை கெடைக்குது, கூலி கிடைக்குது, இட்லிசாம்பார், சாப்பாடு எல்லாம் கெடைக்குது... 'இன்னிக்கு உனக்கு விடுதலைடா'ன்னு ஜெயிலர் சொன்னாக்கூட 'அதுக்குள்ளேயா, இன்னும் கொஞ்ச நாள் இருந்துட்டுப் போறேனே!'ங்கிறான்... அதைப் பத்தியெல்லாம்தான் உங்க கதிர்லே தொடர்ந்து வரப் போவுதே?... அப்போ சொல்றேன்!"

சொன்னபடி அவர், 'கதிரு'க்காக வாரா வாரம் என்னிடம் சொல்லிக் கொண்டு வந்ததைத்தான் நீங்கள் இப்போது புத்தக வடிவில் படித்துக் கொண்டிருக்கிறீர்கள்.

சென்னை - 30                                                                                                           விந்தன்

15.3.72.

====================================================================================================

ஆசீர்வாதங்களை 

விற்றுக் கொண்டிருந்தது 

ஆனை ஒன்று 

பட்டை போட்ட நெற்றியில் 

துதிக்கையை வைத்து 

வித்தை காட்டியபடி 

இடதும் வலதுமாக 

கால்களை 

மாற்றி மாற்றி வைத்து 

காண்போரைக் 

கவரும் வண்ணம் 

ஆசீர்வாதங்களை 

விற்றுக் கொண்டிருந்தது 

ஆனை ஒன்று 

பிரம்மாண்டத்தை அடக்கி 

அடிமை கொண்ட 

மதர்ப்பில் மனிதன் 

பாகனாய், பக்தனாய் 

பார்வையாளனாய் 

பக்கம் சென்று பழகினான்.

கால் சங்கிலி கணநேரம் 

விடுபட்டால் 

காணாமல் போகும் 

மொத்த கூட்டமும் 

சங்கிலி அறுக்காமல் 

ஆசீர்வாதங்களை 

விற்றுக் கொண்டிருந்தது 

ஆனை ஒன்று 

'காயினெல்லாம் 

கண்ணுல காட்டாதே' 

'பத்து ரூபா காசைப் பார்த்தாலே 

பத்திகிட்டு வருது' 

'மூக்குக்குள்ள மாட்டிகிட்டு 

மூச்சு முட்டுது' 

ஆனாலும் 

திருப்பி எல்லாம் தருவதற்கில்லை 

வாங்கி  பாகனிடம் 

கொடுத்து விடுவதிலும் 

குறைவில்லை!

நோட்டைப் 

பார்த்தால் மட்டும் 

'நோ' சொல்வதே இல்லை 

வாங்கிப் பாகனிடம் 

சேர்த்து விட்டு 

நோட்டு 

கொடுத்தோர் நெற்றியில்,

தலையில் என 

கிடைத்த இடத்தில் 

பட்டும் படாமலும்  

நொட்டென்று 

ஒத்துகிறது 

புறந்துதிக்கையால்!

இன்று 

வழக்கமான அளவா,

இல்லை 

'எக்ஸ்ட்ரா கட்டிங்'கும் சேர்த்தா 

தெரியவில்லை 

டார்கெட் முடிந்தால் 

உள்ளே சென்று 

பக்தர் கூட்டம் பார்க்காமல் 

பதவிசாய் 

ஓய்வெடுக்கலாம் 

அடுத்த ஷிஃப்ட் வரை!

))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))) 

1800 களில் 26 வயது வாலிபர் எப்படி இருக்கிறார் பாருங்கள்...!

ஆசிரியர் ஸ்ரீ ராஜமய்யர்

* ஸ்ரீ ராஜமய்யர் வத்தலகுண்டில் பிறந்தவர். கதையும் மதுரை ஜில்லாவைப் பற்றியதுதான்.

* விவேகானந்தராலும் பாரதியாரா லும் புகழப்பட்டவர் ஸ்ரீ ராஜ மய்யர்.

* ஸ்ரீ ராஜமய்யர் தமது 26ஆவது வயதிலேயே உயிர் நீத்தார். அதற்குள் இவர் தமிழில் எழுதிய நவீனம் 'கமலாம்பாள் சரித்திரம்' ஒன்றே.

* விவேகானந்தர் தன் அமெரிக்க விஜயத்திற்குப் பின் சென்னையில் துவக்கிய 'பிரபுத்த பாரதா' அல்லது விழித்துக்கொண்ட இந்தியா' என்ற ஆங்கிலப் பத்தி ரிகையின் முதல் ஆசிரியராக ஸ்ரீ விவேகானந்தரால் தேர்ந் தெடுக்கப்பட்ட கெளரவத்தை அடைந்தவர்.

* * ஷெல்லி, பைரன், கீட்ஸ், கம்பன் இவர்களின் கவிதைகளில் ஆழ்ந்த கலைக்கனவு. தன் கலைத் திறமை யால் சிகாகோவையும் லண்டனை யும் ஒரு கை பார்க்க வேண்டும் என்ற பெரிய எண்ணம். தன் புகழ் கடல் தாண்டி பரவவேண்டு மென்ற அவா. இவையே வத்தலகுண்டு ராஜத்தின் இளமை. பி. எல். பரீக்ஷை தேராமல் போகவே ஆசை அவலமானது. ஆளே மாறிப்போனார். கலைக் கனவுகள் வேதாந்த பித்தமாகி' விட்டது. 1893ஆம் ஆண்டில் "விவேக சிந்தாமணி' பத்திரிகை யில் தமது. சித்த நிலையையே 'கமலாம்பாள்' என்ற தொடர் கதையாக அவர் எழுதினார்.

* * அவர் அமைதியாக இறந்த காட்சி ஓர் அற்புதம். இரண்டு நாள் கழித்து பிரபுத்த பாரதததில் வெளியான "வேதாந்தம்', 'ராஜாதிராஜன்' என்னும் கட்டுரைகளுக்காக அவர்மீது ராஜத் துரோகக் குற்றம் சாட்டினார்கள். அரசாங்கம் பிடி வாரண்ட் அனுப்பியது. போலீஸார் வந்தனர். ஆனால் வாரண்டை சாதரா செய்ய ஆள் தான் இல்லை.

இப்பகுதிகள் ஸ்ரீ ஸ்வாமி சுத்தானந்த- பாரதியார் 'கல்கி'யில் எழுதிய "பெரியவாள் கதை "யிலிருந்து எடுக்கப்பட்டவை.

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

நியூஸ் ரூம் 

பானுமதி வெங்கடேஸ்வரன் 

=========================

- திருவனந்தபுரம்: 'அணிவகுப்பு நிகழ்ச்சிகளில் பயன்படுத்தப்படும் யானையின் வாழ்க்கை, யூதர்களை ஒழிப்பதற்காக போலந்தில் ஜெர்மானியர்களால் கட்டப்பட்ட முகாம் போல் உள்ளது. வணக்கம் செலுத்துதல், தலையைத் தூக்குதல், மலர் மழை பொழியுதல் போன்றவற்றிக்கு யானைகளை பயன்படுத்த கேரளா ஐகோர்ட் தடை விதித்தது.

-  புதுடில்லி: ஐந்தே ஐந்து பொருட்கள், நாட்டின் பணவீக்கத்தில் பிரச்னை ஏற்படுத்துவதாக, மத்திய நிதித்துறை செயலர் துஹின் காந்த பாண்டே தெரிவித்து உள்ளார்.  தக்காளி, வெங்காயம், உருளைக்கிழங்கு, தங்கம் மற்றும் வெள்ளி ஆகிய ஐந்து பொருட்கள் தான், பணவீக்கப் பிரச்னையை ஏற்படுத்துகின்றன. 

-  நொய்டா: நொய்டாவில், தனியார் மருத்துவமனையில் அனுமதிக்கப்பட்ட சிறுவனுக்கு, இடது கண்ணில் உள்ள பிரச்னைக்கு, மருத்துவர் தவறுதலாக வலது கண்ணில் அறுவை சிகிச்சை செய்ததாக புகார் எழுந்துள்ளது.

-  இறந்தவரின் கண் எங்கே; மருத்துவமனையில் உறவினர்கள் போராட்டம்: எலி மீது பழி போடும் டாக்டர்கள்.  பீஹார் மருத்துவமனையில் அனுமதிக்கப்பட்ட நோயாளி சிகிச்சை பலனளிக்காமல் உயிரிழந்தார். அவரது இடது கண்ணை காணவில்லை என்று உறவினர்கள் போராட்டம் நடத்தியதால் பெரும் பரபரப்பு ஏற்பட்டது.

- எல்.ஐ.சி., வெளியிட்ட செய்தியில், 'இணையதளத்தில் ஏற்பட்ட தொழில்நுட்ப கோளாறு காரணமாகவே, முகப்பு பக்கம் ஹிந்தி மொழிக்கு மாறியுள்ளது. தற்போது, அது சரி செய்யப்பட்டு, ஆங்கிலம், ஹிந்தியில் தெரியும் அளவுக்கு மாற்றி அமைக்கப்பட்டுள்ளது. சிரமத்திற்கு வருந்துகிறோம்' என்று கூறப்பட்டுள்ளது.

-  திருமலையில் அமைந்துள்ள ஏழுமலையான் கோவிலில் பணியாற்றும் ஹிந்துக்களைத் தவிர, மாற்று மதத்தினரை விருப்ப ஓய்வு பெற அல்லது வேறு துறைகளுக்கு இடமாற்றம் கோரும்படி, திருமலை திருப்பதி தேவஸ்தானம் அறிவுறுத்தியுள்ளது. திருமலையில் இனி ஹிந்துக்கள் மட்டுமே கடைகள் நடத்த அனுமதிக்கவும் முடிவு செய்யப்பட்டுள்ளது.

- குளிர்காலங்களில் புலிகள் இனச்சேர்க்கையில் ஈடுபடுவது வழக்கம். அதற்காக பெண் துணையை தேடி, ஆண் புலிகள் நீண்ட துாரம் பயணிக்கும். அந்த வகையில், மஹாராஷ்டிராவை சேர்ந்த ஜானி என்ற ஆண் புலி மஹாராஷ்டிராவில் இருந்து தெலுங்கானா காடுகள் வரை, 300 கி.மீ., துாரத்தை, 30 நாட்களில் கடந்து வந்துள்ளது.

- லக்னோ : ''கும்பகர்ணன், ஆறு மாதங்கள் தொடர்ச்சியாக துாங்குவார் என ராமாயணத்தில் கூறப்படுவது கட்டுக்கதை. அவர் ஒரு தொழில்நுட்ப நிபுணர். நவீன இயந்திரங்களை வடிவமைக்கும் ஆராய்ச்சியில் அவர் ஈடுபட்டவர்,'' என, உத்தர பிரதேச கவர்னர் ஆனந்திபென் படேல் பேசியதை எதிர்க்கட்சியினர் கிண்டல் செய்து வருகின்றனர்.

- சென்னை: பிரபல இசையமைப்பாளர் ஏ.ஆர்.ரஹ்மானை பிரிந்து செல்வதாக அவரது மனைவி சாய்ரா பானு அறிவித்துள்ளார்.

- தெய்வானையை விட வயது அதிகம் உள்ளது திருநெல்வேலி நெல்லையப்பர் கோயிலில் உள்ள யானை காந்திமதி. 55 வயதாகும் காந்திமதி தினமும் மாலையில் பக்தர்களுக்கு ஆசி வழங்குவது வழக்கம்.  தற்போது யானை துதிக்கையால் ஆசி தருவதற்கும் பக்தர்களிடம் தேங்காய், பழங்கள் உணவுப் பொருட்கள் வாங்குவதற்கும் தடை விதிக்கப்பட்டுள்ளது. பாகன் ராமதாஸ் மற்றும் உதவியாளர்கள் யானையை கவனித்து வருகின்றனர்.

-  லண்டன்: ஏலத்தில் இந்திய மதிப்பில் 3.4கோடிக்கு விலை போன திப்பு சுல்தானின் வாள்.

-  பெங்களூர்: சமீப காலத்தில் சிறுநீர்ப்பை தொற்றால் பாதிக்கப்படும் ஆண்களின் எண்ணிக்கை அதிகமாகியுள்ளது. உடலமைப்புக்கூற்றின் படி பெண்களுக்குத்தான் இந்த பாதிப்பு அதிகமாக இருக்கும். இரண்டு வருடங்களுக்கு முன்புவரை UTI எனப்படும் யூரினரி ட்ராக்ட் இன்ஃபெக்ஷனால் பாதிக்கப்படும் நோயாளி ஒரு மாதத்திற்கு ஒருவர் அல்லது இரண்டு பேர்கள் இருந்த இடத்தில் இப்பொழுது ஒரு வாரத்திற்கு பத்து நோயாளிகள் வருகிறார்களாம். இதற்கு காரணங்களாக போதுமான தண்ணீர் அருந்தாமல் இருப்பது, மாறிவரும் வாழ்க்கை முறை, stress, மற்றும் முறையற்ற உறவுகள் என்று மருத்துவர்கள் கூறுகிறார்கள். 

-  தமிழகத்தில் போதைப்பொருள் புழக்கத்தை தடுக்க, சி.பி.ஐ. மற்றும் போதைப்பொருள் தடுப்பு அதிகாரிகள் அடங்கிய சிறப்பு கண்கானிப்பு குழுவை மத்திய,மாநில அரசுகள் அமைக்க வேண்டும். பள்ளி,கல்லூரிகளிலிருந்து 100 சதுர மீட்டர் சுற்றளவுக்குள் எழுதுபொருள், மருந்து, உணவுப்பொருள் கடைகளைத் தவிர்த்து வேறு எந்தக் கடைகளையும் அனுமதிக்கக் கூடாது என்று சென்னை உயர்நீதிமன்றம் உத்தரவிட்டுள்ளது.

-  செக்கு எண்ணெய், பனை வெல்லம் உற்பத்தி செய்யும் குறுந்தொழில் நிறுவனங்களிடமிருந்து வாங்கி, ஒரே பிராண்டில் உலகம் முழுவதும் விற்க தமிழக அரசு முடிவு செய்துள்ளது.

-  உள்நாட்டு விமானங்களில் பயணித்தவர்களின் எண்ணிக்கை கடந்த ஞாயிறன்று(17.11.24)முதல் முறையாக ஐந்து லட்சத்தை தாண்டியது. தீபாவளியும், முகூர்த்த தினங்களும் இதன் முக்கிய காரணங்கள்.

-  தென்காசி அரசு மருத்துவமனையில் ரீல்ஸ் மோகத்தில் பிராங்க் செய்த பீர் முகமது, ஷேக் முகமது என்னும் இரு இளைஞர்களை கைது செய்த போலீசார் பின்னர் பொது இடங்களில் இவ்வாறு நடந்து கொள்வது தவறு என்று எச்சரித்து அவர்களை விடுதலை செய்தனர்.

-  மார்ச் 2025ல் ஹைட்ரஜன் ரயில் பயன்பாட்டுக்கு வரும். அதற்கான பெட்டிகளை தயாரிப்பதில் ICF மும்முரம். ஹைட்ரஜன் ரயில்களால் காற்று மாசுபாடு அடைவது தடுக்கப்படும்.

==================================================================================================

()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()()(

ஆனந்த சயனமா அபாய சயனமா?

=====================================================================================================

பொக்கிஷம்  :