"திங்க"க்கிழமை : கதம்ப இட்லி - துரை செல்வராஜூ ரெஸிப்பி

 கதம்ப இட்லி 

*** *** *** ***

தேவையானபொருள்கள்:

வழக்கம் போல வீட்டிற்கான இட்லி மாவு

பாசிப்பயறு 200 கி

கேரட், பீன்ஸ், 

முட்டைக் கோஸ் இலைகள், பூண்டு, இஞ்சி அனைத்துமாக 200/250 கி

  

மல்லித் தழை சிறிது

கறிவேப்பிலை ஒரு இணுக்கு

கல் உப்பு தேவையான அளவு.

செய்முறை:

ஒருநாள் முன்னதாக பச்சைப் பயறை ஊற வைத்து முளை கட்டி வைக்கவும்..

வழக்கம் போல வீட்டிற்கான இட்லி மாவு தயாராக இருக்கட்டும்..

முளை கட்டிய பச்சைப் பயறை மிக்ஸியில் இட்டு ஒரு சுற்று சுற்றி இட்லி மாவுடன் கலந்து கொள்ளவும்..

கேரட், பீன்ஸ், முட்டைக் கோஸ் இலைகள், பூண்டு இஞ்சி  இவற்றையும், 

மல்லித் தழை கறிவேப்பிலை இலைகளையும்  மிக மிக சன்னமாக நறுக்கிக் கொள்ளவும்..

இவை அனைத்தும் 250 கிராமிற்கு மிகாமல் இருப்பது நல்லது..

இவற்றையும் இட்லி மாவுடன் நன்றாகக் கலந்து தேவை எனில் உப்பு சேர்த்து  இட்லித் தட்டில்   ஊற்றி பக்குவமாக அவித்தெடுத்து வற மிளகாய் இல்லாத தக்காளிச் சட்னி தேங்காய் சட்னியுடன் பரிமாறவும்.

 

இது காய்கறிகளுடன் அவிக்கப்பட்ட  உணவாதலால் இதயத்துக்கு  இதமானது.. 

பச்சைப் பயறை தோலுடன் அரைத்திருப்பதால் கூடுதலாக நார்ச்சத்தும் புரதச் சத்தும் கிடைக்கும்..

ஃஃஃ