சிறு குழந்தைகளின் ஆரோக்கியம் + திறமை, செ நு வழக்கறிஞர் மற்றும் நான் படிச்ச கதை

 

எச்சரிக்கை : குழந்தைகளின் விளையாட்டுப் பொருட்கள். 

மதுரை : திண்டுக்கல் குட்டத்துப்பட்டியைச் சேர்ந்த 8 மாத பெண் குழந்தையின் நுரையீரல் இடதுபக்க மூச்சுகுழாயில் சிக்கிய விளையாடும் 'ரிமோட்' காரின் 'எல்.இ.டி., லைட்டை' மதுரை அரசு மருத்துவமனை டாக்டர்கள் அகற்றினர்.  

இருமல், மூச்சுத்திணறல், காய்ச்சலுடன் திண்டுக்கல் அரசு மருத்துவமனையில் இருந்து மேல் சிகிச்சைக்காக அக்., 28 மதுரை அரசு மருத்துவமனைக்கு இக்குழந்தை அனுப்பப்பட்டது. எக்ஸ்ரே பதிவில் குழந்தையின் இடதுபக்க நுரையீரலின் மூச்சுகுழாயில் ஊசிபோன்ற பொருள் இருப்பது தெரிந்ததால் சிறிய 'பிராங்கோஸ்கோப்பி' கருவி மூலம் அப்பொருள் அகற்றப்பட்டது என்றார் நுரையீரல் பிரிவு துறைத்தலைவர் பிரபாகரன்.

அவர் கூறியதாவது:  குழந்தையின் மூச்சுகுழாய் சிறிதாக இருக்கும். மயக்க மருந்துடன் 'பிராங்கோஸ்கோப்பி' கருவியை உள்ளே செலுத்துவது சிக்கலாக இருந்தது. எனவே பிரத்யேக முகக்கவச முறையில் மயக்கமருந்து கொடுக்கப்பட்டது. 

நடை பழக ஆரம்பிக்கும் குழந்தைகள்தான் ஏதாவது பொருளை எடுத்து வாயில் இடுவர். இந்த குழந்தை 8 மாதமே ஆனது என்றாலும் நுரையீரலில் அந்த பொருள் சிக்கி 2 முதல் 3 வாரங்கள் ஆகியிருக்கலாம். நல்லவேளையாக நுரையீரலுடன் ஒட்டாத நிலையில் இருந்ததால் கருவி மூலம் அப்பொருளை அகற்ற முடிந்தது. பொருளை வெளியே எடுத்தபின்பே விளையாடும் 'ரிமோட் கண்ட்ரோல் காரின் எல்.இ.டி. லைட்' என உறுதியானது என்றார்.  

இந்த சிகிச்சைக்கு உதவிய நுரையீரல் பிரிவு உதவி பேராசிரியர் ராஜேஷ்குமார், குழந்தைகள் அறுவை சிகிச்சை நிபுணர்கள் கருப்பசாமி, ஸ்ரீனிவாசகுமார், மயக்க மருந்து நிபுணர்கள் சிவக்குமார், பிரமோத் ஆகியோரை டீன் அருள் சுந்தரேஷ் குமார் பாராட்டினார்.  டீன் கூறுகையில், ''சிறு குழந்தைகள் கையில் கிடைக்கும் பொருட்களை வாயில் இட்டு விழுங்கி விடுவர். அவை வயிற்றிலோ அல்லது நுரையீரல் மூச்சுக்குழாயில் சிக்கிக் கொள்ளவோ வாய்ப்பு உள்ளதால் சிறு பொருட்களை விளையாட தரக்கூடாது. இருமல் மற்றும் மூச்சு திணறல் தொடர்ந்து இருந்தால் உடனடியாக மருத்துவமனை செல்ல வேண்டும்,'' என்றார்.

= = = = = = = = 

ஆதிரையின்  அதிசய திறமை : 

தாரமங்கலம்: சேலம், சின்ன கொல்லப்பட்டியை சேர்ந்த கார்த்திக், 26. இவரது மனைவி ஈஸ்வரி, 26. இவர் குழந்தைப்பேறுக்கு, தாரமங்கலத்தில் உள்ள தாய் வீட்டுக்கு வந்தார். அவருக்கு பெண் குழந்தை பிறந்து, ஆதிரை என பெயர் சூட்டினர்.

குழந்தைக்கு, மூன்று மாதம் முடிந்ததும் பல்வேறு நாடுகளின் தேசியக்கொடிகளை காட்டி, ஈஸ்வரி பயிற்சி அளித்து வந்தார். தொடர் பயிற்சியால் நான்காவது மாதத்தில், 32 நாடுகளின் கொடியை, ஆதிரை சரியாக தொட்டு காட்டினார்.

32 தேசியக்கொடிகளை சரியாக காட்டி அசத்தல் உலக சாதனை படைத்த 4 மாத பெண் குழந்தை

இந்நிகழ்வை வீடியோவாக பதிவு செய்த ஈஸ்வரி, கடந்த அக்., 7ல், 'நோபல்' உலக சாதனை புத்தகத்துக்கு அனுப்பினார். இதை ஆராய்ந்து, 22ல் நோபல் உலக சாதனை புத்தகத்தில், ஆதிரையின் பதிவு இடம்பிடித்தது.

மேலும் ஆதிரைக்கு நோபல் உலக சாதனை சான்றிதழ், பதக்கம் வழங்கப்பட்டன. அதை, ஈஸ்வரி, அவரது குடும்பத்தினருடன் சென்று, சேலம் கலெக்டர் பிருந்தாதேவி, அ.தி.மு.க., பொதுச்செயலர் பழனிசாமி ஆகியோரிடம் காட்டி மகிழ்ந்தார்.

= = = = = = = ======================================================================================

செயற்கை நுண்ணறிவு வழக்கறிஞர் : 

புதுடில்லி: சுப்ரீம் கோர்ட்டில் உள்ள தேசிய நீதித்துறை அருங்காட்சியகம் மற்றும் காப்பகத்தில் ஏ.ஐ., வழக்கறிஞர் உருவாக்கப்பட்டு உள்ளது.

இதன் திறப்பு விழா இன்று நடந்தது. இந்த விழாவில் கலந்து கொண்ட தலைமை நீதிபதி சந்திரசூட் ஏ.ஐ.,யின் அறிவுத்திறனை பரிசோதிக்கும் வகையில் அதனுடன் கலந்துரையாடினார்.

அப்போது, ''இந்தியாவில் மரண தண்டனை அரசியலமைப்பு சட்டத்திற்கு உட்பட்டதா?'' என சந்திரசூட் கேள்வி எழுப்பினார்.

அதற்கு வழக்கறிஞர் உடையுடன் கண்ணாடியுடன் காணப்பட்ட அந்த செயற்கை நுண்ணறிவு வழக்கறிஞர் அளித்த பதில்: "ஆம், இந்தியாவில் மரண தண்டனை அரசியலமைப்பு சட்டத்திற்கு உட்பட்டது. ஆனால், இது சுப்ரீம் கோர்ட்டால் தீர்மானிக்கப்பட்ட அரிதான வழக்குகளுக்கு மட்டுமே வழங்கப்படும். மிகவும் கொடூரமான குற்றங்களுக்கு மட்டுமே அத்தகைய தண்டனை வழங்கப்படுகிறது"  எனக்கூறி தலைமை நீதிபதியை ஆச்சர்யப்படுத்தியது. இந்த நிகழ்ச்சியில் சந்திரசூட் உடன், புதிய தலைமை நீதிபதியாக பதவியேற்க உள்ள சஞ்சீவ் கண்ணா உள்ளிட்டோர் உடன் இருந்தனர்.

=================

================================================================

நான் படிச்ச கதை

ஜீவி 

சகுனியின் சிரம்

இதிகாசங்கள் நம்முள் ஏற்படுத்தியிருக்கும் உள்ளக் கிளர்ச்சிகள் ஏராளம்.  அதுவும் நம் பாரத நாட்டு இதிகாசம் என்றால் கேட்கவே வேண்டாம். ஒரு தனி பாசமே அவற்றின் மேல் நமக்குண்டு. 

துவாபர யுகத்து மகாபாரத நிகழ்வுகள் சம்பந்தப்பட்ட இந்தக் கதையை வாசித்த பொழுது அப்படியான உணர்வு தான் எனக்குள்ளும் ஏற்பட்டது.  உடனே இந்தக் கதையை நம் எபி வாசகர்களுடன் பகிர்ந்து கொண்டால் என்ன என்ற எண்ணம் ஏற்பட்ட பொழுது,  கதை கொஞ்சம் நீளமாக இருக்கிறதே என்ற குறுக்கு யோசனை ஒன்று. 

இருந்தாலென்ன, மகாபாரத நிகழ்வுகள் சம்பந்தப்பட்ட கதை என்றால் நீளத்தை ஒரு பொருட்டாகக் கருத மாட்டார்கள் என்ற ஞானோதயம் எல்லா எதிர்மறை எண்ணங்களையும்  வென்றது.

பகவான் கிருஷ்ணரையும்   சகுனியையும் எதிர் எதிர் நிறுத்தி சுவையான கதை ஒன்றைப் படைத்திருக்கிறார் ஆசிரியர் தேவகாந்தன்..  இவர் ஈழ நாட்டு தமிழர் என்பதால் ஓரிரு இடங்களில் ஈழத்தமிழ் உச்சரிப்பு வார்த்தைகள் குறுக்கிட்டாலும் வாசிப்பு சுகத்தில் அவையெல்லாம் பெருத்த எதிர்பாடாக இல்லை.  ஏனென்றால் இந்த சின்னச் சின்ன விஷயங்களையெல்லாம் தாண்டிய மகத்தான ப்ரேமை மகாபாரத வாசிப்பில் நமக்குண்டு.

சொல்லப்போனால் காந்தாரி தான் இந்தக் கற்பனை கதையின் நாயகி.    கிருஷ்ணர், சகுனியைத் தாண்டி காந்தாரியின் சொந்த அபிலாஷைகளின் மேல் கட்டப்பட்டதாய் கதை நீள்கிறது.  மகாபாரத்தின் நீளமான சுவாரஸ்யமான நிகழ்வுகளுக்கிடையே அந்தப் பெண்ணிற்கென்று தனிப்பட்ட ஆசை அபிலாஷைகள் இருக்காதா, என்ன? -- என்ற எழுத்தாளரின் கற்பனையின் விளைவு இந்தக் கதையாய் உருவம் கொண்டிருக்கிறது.

தன் கணவன் கண் பார்வையற்றவன் என்ற உண்மை அறியாதவளாகவே காந்தாரத்து இளவரசியான காந்தாரி திருதராஷ்டிரனுக்கு நிச்சயக்கப்பட்ட மணப்பெண்ணாய்   அஸ்தினாபுரத்து அரண்மனையில் நுழைகிறாள்.  மத்திய கூடத்தில் தன் தங்கையின் முகத்தை நிமிர்ந்து பார்க்கவே தயக்கமாக இருக்கிறது சகுனிக்கு. இதற்கு அப்புறம் நடப்பவை தான் இக்கதையின் ஜீவனான பகுதிகள். 

காந்தாரியின் நெருக்கமான தோழி சுகர்மாவை மறக்காமல் கதை நிகழ்வின் முக்கிய பாத்திரப் படைப்பாய் ஆசிரியர் உலாவ விட்டிருக்கிறார். அர்ஜுனன், பீஷ்மர்,  சத்தியவதி, பாண்டு, சஞ்சயன், துரியோதனன், யுதிர்ஷ்டிரன்,  பாஞ்சாலி,  துச்சாதனன் எல்லோரும் வாசிப்பின்  குறுக்கே வந்து போகிறார்கள்.  திருதராஷ்டிரன் இல்லாமல் காந்தாரியா?... ஆக, திருதராஷ்டிரனும் உண்டு.  இந்திர பிரஸ்தத்து அரக்கு மாளிகை பற்றிய பிரஸ்தாபமும் உண்டு.

நம் அருமை நண்பர் நெல்லைத்தமிழரின் நீண்ட யாத்திரை தொடரில் சமீபத்தில் குருஷேத்திர தலத்தின் படங்களையும் ஸ்ரீ கிருஷ்ணரின் கீதோபதேச காட்சிகளையும் பார்த்தோமல்லவா?   அந்த வாசிப்பின் நினைவுகளும் ஒருவிதத்தில் என்னில் இக்கதையைப் பகிர்ந்து கொள்வதில் பெரும் பங்கு வகித்தது என்பதையும் சொல்லியாக வேண்டும்.

எழுத்தாள அன்பர்  தேவகாந்தனின்  இந்தக் கதைக்கான சுட்டி  இதோ.  வாசித்து மகிழுங்கள்.

சிறுகதைகள்.காமிற்கு நன்றி.

= = = = = = = = =