"திங்க"க்கிழமை : மிளகு சீரகப்பொடி - ஸ்ரீராம்

இன்று நான் பகிரப்போவது ஆரோக்கியமானது மட்டுமில்லை, எளிமையானதும் கூட.

இட்லியை படுத்தியது போதும் என்று தோன்றியதால் இன்னொரு இட்லி ரெசிப்பி அப்புறம் பகிர்கிறேன்.  போன வாரமே JKC ஸார் ஒரு இட்லி மீம்ஸ் அனுப்பி இருந்தார்.

எனவே வேறு எதுவும் பயங்கரமாய் படுத்தாமல், பயமுறுத்தாமல் ஒரு சாதாரணமான பகிர்வு.  உங்களில் யாருக்காவது இது புதுசு என்றால் கமெண்ட்டில் சொல்லவும். ஆச்சர்யப்பட்டுக் கொள்கிறேன்!

சிறு வயதில் இருபது தேதிக்குமேல் வீட்டில் சில பொருட்கள் தீர்ந்து விடும்.  அப்பா எங்காவது கடன் வாங்கி சமாளித்தால் சில சமயம் மீண்டும் செழிப்பாவோம்.  ஆனால் அவர் அலுவலகத்திலோ, நண்பர்களிடத்திலோ கடன் வாங்கினாரா என்பது எங்களுக்குத் தெரியாது.  நிச்சயம் வாங்கியிருக்க வேண்டும்.  இல்லாவிட்டால் அந்த தேதிகளில் காலியாகும் காசு டப்பாவில் மறுபடி கொஞ்சம் காசு கண்ணில் படாதே....!   

அப்பாவுக்கு அந்த வழக்கம் இருந்தது.  பணம் வந்ததும் அம்மா கையால் காசு டப்பாவில் வைத்து விடுவார்.  

சொல்லி இருக்கிறேன்.  

சோதனையாக இருபது தேதிக்கு மேல் காலியாகும் பொருள்களில் சில, காபிப்பொடி, சர்க்கரை, நல்லெண்ணெய் போன்றவை.  

அந்த நேரம் காய்கறி வாங்குவதில் கூட கொஞ்சம் சிக்கனம் கடைப்பிடிக்கப்படும்.  காபியில் வெல்லம் போட்டு சாப்பிடுவோம்.  ஆறு பேர்களுக்கு, மேலும் அடுத்து யாரும் விருந்தினர் வந்தாலும் ஆவின் பால் அரை லிட்டர்தான்.  நபர்களுக்குத் தகுந்தாற்போல தண்ணீர் ஊற்றப்படும்!

அதுபோன்ற சில தினங்களில் இது எங்களுக்கு கைகொடுக்கும்.

எது?

மிளகு சீரகப்பொடி.

பருப்புப்பொடி, தனியாப்பொடி எல்லாம் கூட அம்மா செய்து வைத்திருப்பாள்.  ஆனால் எனக்கு பருப்புப்பொடி அப்பவும் பிடிக்காது, இப்பவும் பிடிக்காது.  தனியாப்பொடி போட்டு சில சமயம் சாதம் பிசைந்து சாப்பிட்டிருக்கிறேன்.  தனியா இல்லை, எல்லோருடனும் சேந்துதான்!!!

புளியோதரைப்பொடி போல ஏதோ ஒன்று அவ்வப்போது பிசைந்து சாப்பிட்ட நினைவு இருக்கிறது. அது என்ன என்று சரியாய் நினைவில்லை.  வறுத்த கடலைப்பருப்பும், நிலக்கடலையும் அதில் கிடைக்கும் என்று நினைவு இருப்பதால் புளியோதரைப்பொடி என்றுதான் நினைவு.  ரெடிமிக்ஸ் வாங்கி வைத்திருந்த ஞாபகம்.

கொஞ்ச நாட்கள் என் தாத்தா கூட அது தயாரித்து விற்பனை செய்து கொண்டிருந்தார்.

மிளகு சீரகப்பொடி செய்வது மிக எளிது என்பது உங்களுக்கும் தெரியும்.

மிளகும் சீரகமும் சம அளவு எடுத்து அதில் பெருங்காயம் சேர்த்துக் கொண்டு மிக்சியில் அரைத்து வைத்துக் கொள்ளவும்.  அப்போதெல்லாம் அம்மியில் அரைத்து வைத்துக் கொள்வோம்!

உப்பு இப்போது சேர்க்கக் கூடாது.  அப்புறம் அதை கொஞ்ச நாட்களுக்கு வைத்திருக்க முடியாது.  நீர் விட்டுக்கொள்ளும்!  சிலபேர் மிளகு அதிகமாகவும் சீரகம் சற்றே குறைந்த அளவிலும் எடுத்து அரைத்துக் கொள்வார்கள்.  அதெல்லாம் அவரசவர் ருசி. விருப்பம்.  என் நண்பர் இதில் இரண்டு பட்டை மிளகாய் வரமிளகாய் சேர்த்துக் கொள்ளலாமா என்று கேட்டார்!

சூடான வெண்ணிற சாதத்தை தட்டில் போட்டுக்கொண்டு இந்தப் பொடியைத் தூவி, தேவையான அளவு உப்பு போட்டுக்கொண்டு நெய் விட்டு பிசைந்து சாப்பிட்டால் ருசிதான்.  ஆரோக்யமும் கூட.