"திங்க" க்கிழமை - காயிட்லி அல்லது வெஜிட்லி - ஸ்ரீராம்.

 

ஊர்ல நாட்டுல வேற யாருமே மாட்டலைன்னா அந்த ஊர்ல இருக்கற அப்பாவியைப் பிடிச்சு அடிப்பாங்களாம்..  

​அது மாதிரி வேறு எதுவும் சிக்காத நாளில், அல்லது வேறு எதிலாவது சிக்கி நான் சின்னாபின்னமான நாளுக்குப் பின் அன்றொருநாள் துன்புறுத்த இட்லியை தெரிவு செய்தேன். 

மேலே படத்தில் சமர்த்தா போஸ் கொடுக்குது பார்த்தீங்களா... இதெல்லாம்தான் ஆயுதங்கள்.

"மொத்த மாவுலயும் கலந்துடாதீங்க" - பாஸின் எச்சரிக்கைக்கு குரல் மிரட்டியது. 

"எவ்வளவு தேவையோ அவ்வளவு கரண்டி தனியா எடுத்து, அதுலதான் செய்யப்போறேன்"   என் பணிவான பதில்.

ஸோ. மாவு கொஞ்சம் தனியா எடுத்துக் கொள்ளப்பட்டது.  எத்தனைபேர் என்று எண்ணிக்கை சரிபார்க்கப்பட்டு, அத்தனை கரண்டி எடுத்து ஒரு தனிப் பாத்திரத்தில் ஊற்றிக் கொண்டேன்.  மாமியார் இந்த சோதனையில் சிக்க மாட்டார்.  எப்பவுமே எஸ்கேப்.  பாஸ் 'பேருக்கு கொஞ்சம் போட்டுப்பேன்' என்று சொன்னாலும், ருசி நன்றாக இருந்தால் தன் பங்கை பிரித்து தரச்சொல்லி வழக்கு போட்டு விடுவார்.  எனவே ஐந்து பேர் என்றே கணக்கு வைத்து யார் யார் எவ்வளவு இட்லி சாப்பிடுவார்கள் என்று மனக்கணக்கு பார்த்து அவ்வளவு கரண்டி மாவு.

சின்ன வெங்காயம், பெரிய வெங்காயம், வரமிளகாய்,  தக்காளி, இஞ்சி, சில வாழைப்பூ பிள்ளைகள், கொஞ்சம் மாங்காய் (இது ஏன் என்று கேட்காதீர்கள்.  ஃப்ரிட்ஜில் இருந்தது.  கொஞ்சம் எடுத்துக் கொண்டேன்), பச்சை மிளகாய், பூண்டு, கொஞ்சம் கறிவேப்பிலை, கொஞ்சம் கொத்து மல்லி எல்லாம் எடுத்து, கொஞ்சமாய் உப்பு சேர்த்து,  வாணலியில் இட்டு அரைவாசி வேகும் அளவு புரட்டி, ஆறியதும் அரைத்து வைத்துக் கொண்டு, அதை அந்த மாவில் சேர்த்தேன்.

சி & பெ வெங்காயம், பூண்டு, குடை மிளகாய், கொஞ்...சம் மாங்காய், இங்கும் கொஞ்சம் வாழைப்பூ பிள்ளைகள், மெலிதாக நறுக்கிய மூன்று சிறு தேங்காய் பத்தைகள், உருளைக்கிழங்கு பொடியாய், கேரட் பொடியாய், பச்சை மிளகாய், கொத்து மல்லி ஆகியவற்றை பொடியாய் நறுக்கி எடுத்துக் கொண்டு மாவில் சேர்த்தேன்.  காஷ்மீரி மிளகாய்ப்பொடி இன்னும் வாங்கப் படவில்லை.  அது இருந்திருந்தால் அது இரண்டு ஸ்பூன் சேர்த்து சிவப்பாக, கலர்ஃபுல்லாக இருந்திருக்கும்!

தக்காளி, வெங்காயம், துளி புளி, துவரம்பருப்பு, வரமிளகாய்,  இரண்டு பல் பூண்டு போட்டு வாணலியில் வதக்கி ஆறவைத்து உப்பு போட்டு சட்னி அரைத்து வைத்துக் கொண்டேன்.  தேங்காய் சட்னமி அரைத்து வைத்தேன்.  இட்லிக்கென்று ஒரு ஸ்பெஷல் சாம்பார் செய்தேன்.  அதன் செய்முறை இன்னொரு நாளில் சொல்கிறேன்.

இட்லிக்கு நடுவே அப்படியே வட்டமாய் வைக்க...

மாவில் சேர்க்க...

கலந்த மாவை எடுத்து நன்றாகக் கலக்கி வைத்துக்கொண்டு, இட்லித் தட்டில் எண்ணெய் தடவி அதில் வார்த்து எடுத்தேன்.

மேலே படத்தில் காட்டியுள்ளபடி அரைக்கரண்டி மாவூற்றி வெங்காயச்சுருளை நடுவில் வைத்து மேலும் அரைக்கரண்டி ஊற்றி, அதே போல இன்னொரு தட்டில் வட்டமாக நறுக்கப்பட்ட குடைமிளகாயை நடுவே வைத்து மேலும் அதன்மேல் மாவு ஊற்றி ஜாக்கிரதையாக இட்லி குக்கரில் வைத்து வார்த்து எடுத்தேன்.  நேரம் கடந்தும் இன்னும் கொஞ்சம் வேகவேண்டி இருந்ததால், மேலும் சற்று நேரம் வைக்க வேண்டி இருந்தது.

தக்காளி சட்னி, தேங்காய் சட்னி இதற்கென செய்த சாம்பார்  தொட்டுக்கொண்டு சாப்பிட்டோம்.  நன்றாய் இருந்தது.  ஏகப்பட்ட வெங்காயம்  செலவு!

பின் யோசனைகள்  :

குடைமிளகாய் மற்றும் வெங்காயத்தை அப்படி வட்டமாக கட் செய்து வைத்து இட்லி வார்த்திருக்க வேண்டாம்.  

வெறும் இட்லியாகவே இதைச் சாப்பிடலாம் என்றாலும் ஒன்றுக்கு மூன்று "தொட்டுகை" செய்திருக்க வேண்டாம்!!  ஒரு காரச்சட்னி மட்டும் செய்திருந்திருக்கலாம்.  எனக்கு காரம் எதுவும் தெரியா விட்டாலும், பாஸும், மருமகளும் 'உஸ் உஸ்' என்றார்கள்.