"திங்க"க்கிழமை : சீரக ரசம் வெங்கடேஷ் பட் பாணி

சமையல் செய்யும்போது நாம் சமைப்பதே நன்றாயிருக்கும்தான்.,  ஆனாலும் பிரபலமானவர்கள் சமையல் என்றால் ஒரு மயக்கம்.  செய்கிறோமோ இல்லையோ, பார்த்து விடுவோம்..  வெங்கடேஷ் பட் சொல்வது மாதிரி..   இன்று அவர் பக்குவத்தில் சீரக ரசம் ஒன்று..  ஆனால் சொல்லி இருப்பவர் யார் என்று கண்டுபிடியுங்கள்.   சட்டென தெரிந்து விடும்!

சாப்பிடத் தெரிந்தவர்கள்தான் சமைக்க முடியும்..  ரசனை....

வெங்கடேஷ் பட் பார்ப்பதற்கு மதன்பாப் சகோதரர் மாதிரி இருக்கிறார்.

வெங்கடேஷை பேசவே விடாமல் பாஸ்கி பிளேடு போடுகிறார். 

"நல்லாயில்லைன்னா நல்லாயில்லைன்னு சொல்லிட்டு இது எப்படி நீங்க இம்ப்ரூவ் பண்ணலாம்னு சொல்வேன்.   நல்லாயில்லைன்னு சொல்றது இட்'ஸ் எ பார்ட் ஆஃப் தி சொல்யூஷன்.  நல்லாயில்லாததை எப்படி நல்லா பண்ணலாம்னு சொல்றதுக்கு தகுதி இருந்தா மட்டும்தான் நீங்க நல்லாயில்லைன்னு சொல்லலாம்" என்கிறார் பட்.  இது சமையலுக்கு மட்டும்தானா என்றும் கேள்வி வருகிறது இல்லை?!

பேட்ஸ்மேன் ஒரு பௌண்டரி அடித்ததும் ஒரு கான்ஃபிடண்ட் வருமே, அதுபோல ஒரு டிஷ் செய்து அருமையாக வந்துவிட்டால் சமையலில் ஒரு சுவாரசியம் வரும்.

செய்கிறார்களோ இல்லையோ, பார்க்க எல்லோருக்குமே ஆவல் இருக்கிறது!

எட்டாம் க்ளாஸ், ஒன்பதாம் க்ளாசில் பெயிலானவர் பட்!   வேண்டுமென்றே...

கீதா அக்கா சொல்கிறாரே அலலது செய்கிறாரே...  திப்பிசங்கள்...   அது செய்யத் தெரிய வேண்டும் என்கிறார் பட்.   அதுதான் திறமையாம் என்கிறார்.   சமயங்களில் அதுவே சுவையாகவும் அமைந்து விடும் என்கிறார்.  நம் அனுபவமும் அதுதானே!

ஏதாவது தாளிதமோ ஏதோ கருகிப் போனால் கூட சமாளிக்கத் தெரிய வேண்டும் என்கிறார்.  நெய்  புகை வருமளவு சூடாக்கி அதில் சின்னமன் லவங்கப்பட்டை  குச்சிகளையும் கறுக்கிப் போட்டு விட்டால் சமாளித்து விடலாமாம்.

ராணி எலிசபெத் 98 ல் இந்தியா வந்திருந்தபோது  தாஜில் தங்கியிருக்க, அவருக்கு வழங்கப்பட்ட உணவை அவர் இந்தியன் ஸ்டைலில் கையாலேயே சாப்பிட்டாராம்.  

ரஜினி பற்றி வெங்கடேஷ் பட் சொல்வதைக் கேட்கணும்.  சூப்பர் ஸ்டார், பணக்காரன் என்கிற பந்தா எல்லாம் தன்னை அணுகாமல் அவற்றை ஒரு வெளிவட்டத்தில் நிறுத்தி இருப்பவர் ரஜினி என்கிறார்.   95 ல்  இவர் அவரிடம் ஆர்டர் எடுக்கப் போனால் அவர் எழுந்து நிற்பாராம்.  அவர் எழுந்து நின்றால் அவரைத் தொடர்ந்து லதா ரஜினிகாந்த், மற்றும் அவரது மகள்கள் எழுந்து நிற்பார்களாம்.  அதைத்தொடர்ந்து பட் ரஜினி சம்பந்தப்பட்ட ஒரு சம்பவமும் சொல்கிறார்.

100 ஐட்டம், 130 ஐட்டம் பற்றியும் சொல்கிறார். 

ஒரு பெரிய ஐஸ் பாத்திரத்தில் கல்லுப்பு கொட்டி தயிரைக் கொட்டி, பாலை ஊற்றி கலக்கிக் கொண்டே இருந்தால் ஒரு மணி நேரத்தில் தயிர் தயார்.  அறுசுவை நடராஜனின் திறமை இது. 

"ரவா தோசை தயவு செய்து வீட்டில் ட்ரை பணணாதீங்க...  கரண்டியில் ஊற்றி வார்க்கும் தோசை அல்ல அது.  டபரா அல்லது டம்ளரில்தான் ஊற்றவேண்டும்.   ஹோட்டல்ல வாங்கி சாப்பிடுங்க...   ஏன்னா அந்த அளவு டெம்பெரேச்சர் மெயின்டெயின் செய்யும் தோசைக்கல் வேண்டும் ஒன்றரை இன்ச் கல் இருக்கவேண்டும்.   அதற்கு.  பத்து மில்லி மீட்டர் இருக்கற நான்ஸ்டிக் தவாவில் ரவா தோசை செய்தால் கல்லோடு சாப்பிடணும்" என்று ஜோக் அடிக்கிறார்.

2016 ல் செஃப் களுக்கு இருக்கும் சாலரி பேக் பற்றிச் சொல்கிறார்.  நல்ல, சரளமாகப் பேசக் கூடிய, தரமான செஃப் கிடைத்தால் மாதம் ஒன்றரை லட்ச ரூபாய்.  

============================================================================================

உணவே மருந்து --சீரகம்!

இப்போ நம்ம வெங்கடேஷ் பட் சொன்ன உடுப்பி ரசம் பத்திப் பார்ப்போம். இதிலும் சீரகம் தான் சேர்க்கிறார். ஆனால் அளவு எல்லாம் இருக்கு! மேலும் இதற்காகப் பயன்படுத்தும் மிளகாய் வற்றலும் மங்களூர் வற்றல் என்றார். அதாவது காய்ந்த மிளகாய் கொஞ்சம் சுருங்கிக் காணப்படுமே அது தேவை! அல்லது காஷ்மீர் மிளகாய் எனப் பெரிய பெரிய வணிக வளாகங்களில் விற்கப்படும். அதைப் பயன்படுத்திக்கலாம்.  இதுவும் கிட்டத்தட்ட ஜீரக ரசமே! ஆகையால் தான் இங்கே போடுகிறேன். முந்தாநாள் செய்து பார்த்தேன். நல்ல தெளிவாக ரசம் இருந்தது.

நான்கு பேருக்குத் தேவையான பொருட்கள் மட்டுமே இங்கே எழுதுகிறேன்.

காஷ்மீர் மிளகாய் வற்றல் 4

தனியா ஒரு டேபிள் ஸ்பூன்

வெந்தயம் ஒரு டீஸ்பூன்

ஜீரகம்    ஒன்றரை டீஸ்பூன்

கருகப்பிலை ஒரு கைப்பிடி இவற்றை

வறுக்க தே.எண்ணெய் தேவையான அளவு. மேலே சொன்னவற்றை ஒவ்வொன்றாக நிதானமாக வறுத்துக் கொண்டு ஒரு பேப்பரில் போட்டு எண்ணெய் இல்லாமல் வடித்துக் கொள்ளவும். ஆறியதும் மிக்சி ஜாரில் போட்டுப் பொடிக்கவும்.

தாளிக்க

நெய் அல்லது தே.எண்ணெய்

கடுகு, ஒரு மி.வத்தல், கருகப்பிலை

ரசம் செய்யத் தேவையான பொருட்கள்

தக்காளி நடுத்தரமாக ஒன்று

புளிக்கரைசல் அரைக்கிண்ணம்

உப்பு தேவையான அளவு

மஞ்சள் பொடி ஒரு சிட்டிகை

துவரம்பருப்புக் குழைய வேக வைத்தது ஒரு டேபிள் ஸ்பூன் நீர் விட்டுக் கரைத்துக் கொள்ளவும்.

பெருங்காயம் கால் டீஸ்பூன் அல்லது ஒரு துண்டு பெருங்காயக் கட்டி

பச்சை மிளகாய் தேவையானால் நடுவில் கீறிக்கொள்ளவும். இந்த அளவு ரசத்துக்கு ஒன்று போதும்.

கொத்துமல்லித் தழை

வெல்லம் தூளாக இரண்டு டீஸ்பூன் (நான் வெல்லம் சேர்க்கவில்லை. ரங்க்ஸுக்கு சர்க்கரை என்பதோடு வெல்லம் சேர்த்தால் அந்த ருசியும் பிடிக்கிறதில்லை)

ஒரு பாத்திரத்தில் புளிக்கரைசலை விட்டு உப்பு, மஞ்சள் பொடி சேர்த்துக் கொதிக்கவிடவும். பெருங்காயம் சேர்க்கவும். இன்னொரு பக்கம் ஒரு வாணலியில் தே.எண்ணெய் அல்லது நெய் ஊற்றிக் கடுகு, மி.வத்தல், கருகப்பிலை தாளித்துத் தக்காளியை நறுக்கிச் சேர்த்து வதக்கவும். கொதிக்கும் ரசத்தில் சேர்க்கவும். சிறிது நேரம் கொதிக்கவிடவும். பின்பு பருப்புக் கரைசலைக் கொஞ்சம் ஊற்றி மீண்டும் கொதிக்கவிடவும். மீதம் இருக்கும் பருப்புக் கரைசலில் பொடித்து வைத்துள்ள பொடியைச் சேர்த்துக் கரைத்து ரசத்தில் ஊற்றவும். பொடி போட்டதும் ரசம் அதிகம் கொதிக்கக் கூடாது. கீழே இறக்கியதும் கொத்துமல்லித் தழை தூவவும்.

சாதாரணமாக ரசத்துக்குக் கடைசியில் தான் தாளிதம் சேர்ப்போம். இங்கே ரசம் கொதிக்கையிலேயே தாளிதம் செய்து சேர்க்க வேண்டும். இன்னும் சொல்லப் போனால் முதலில் தாளிதம் செய்து கொண்டு தான் வெங்கடேஷ் பட் அதில் புளிக்கரைசலை ஊற்றிக் கொதிக்க வைத்தார்.  இதுவும் ஒரு வகை ஜீரக ரசமே!

==========================================================================================