"திங்க"க்கிழமை : திப்பிச சாம்பார் சாதம் -- கீதா சாம்பசிவம் ரெஸிப்பி

 ரொம்ப நாள் கழிச்சு ஒரு திப்பிசத்தோடு வரேன்.!

இந்த வருஷம் ஏதும் எழுதலையோனு நினைச்சேன். ஹிஹிஹி, இங்கே வந்தே அத்தனை மாதங்கள் ஆகின்றன. ஆனால் மார்ச் 21 ஆம் தேதி வரை எழுதி இருக்கேன். அதன் பின்னர் தான் கால் வலி/குடும்பப் பிரச்னைகள்/மனச்சோர்வு/மறுபடி கால் வலி/வீக்கம்/படுக்கைனு ஆகிவிட்டது. இப்போக் கொஞ்ச நாட்களாகப் பரவாயில்லை என்றாலும் அதிக நேரம் உட்கார்ந்தால் காலில் லேசாக வீங்க ஆரம்பிக்கிறது. ஆகவே கொஞ்சம் பயமாகவும் இருக்கு. என்றாலும் இன்னிக்குக் கட்டாயமாய் இங்கே வந்தாவது பார்க்கணும்னு வந்துட்டேன். இப்போதைக்குப் புதுசா எதுவும் போடலை. ஆனால் இரண்டு நாட்கள் முன்னர் செய்த ஒரு திப்பிச வேலையைப் பத்தி மட்டும் சொல்லிட்டுப் போயிடறேன்.

நான் எப்போவுமே எதுவும் வீணாகாதபடிக்குக் கொஞ்சமாச் சமைச்சாலும் சில/பல சமயங்கள் மிஞ்சத் தான் செய்கிறது. போன வாரம் ஞாயிறன்று அவரைக்காய் 

போட்டு சாம்பார் வைத்திருந்தேன். எப்போதும் வைப்பதை விடக் கொஞ்சமாக வைத்திருந்தாலும் அது என்னமோ மிஞ்சி விட்டது. அதை அப்படியே வைச்சுச் சூடு பண்ணி விட்டு எடுத்து வைச்சுட்டேன். மறுநாள் என்ன சமைப்பது என வழக்கமான மண்டை காய்தல். யோசிச்சேன். நம்ம ரங்க்ஸ் கேட்டார் என்ன சமையல்னு! நேத்திக்கு சாம்பார் தான்னு சொல்லிட்டேன். அதை அப்படியே வைச்சுச் சாப்பிடவும் யோசனை. 

ஆகவே இரண்டு பெரிய வெங்காயம் நறுக்கிக் கொண்டேன். 

சின்ன வெங்காயம் இருந்தாலும் அதை உரிச்சு, வதக்கி வேக வைக்க நேரம் எடுக்குமே! கொஞ்சமாய் நீர்ப்புளிக் கரைசல் அரைக்கிண்ணம். ஒரு மி.வத்தல், ஒரு டேபிள் ஸ்பூன் கொத்துமல்லி விதை, ஒரு டீஸ்பூன் கடலைப்பருப்பு, வெந்தயம் அரை டீஸ்பூன், சின்னத் துண்டு லவங்கம், ஏலக்காய் ஒன்று,தேங்காய்த் துருவல் எல்லாவற்றையும் தேங்காய் எண்ணெயில் வறுத்து அரைத்துக் கொண்டேன்.  அரைக்கரண்டி பருப்பைக் குழைய வேக வைத்துக் கொண்டேன்.

கல்சட்டியைப் போட்டுத் தேங்காய் எண்ணெய் விட்டு நறுக்கிய வெங்காயத்தைப் போட்டு வதக்கிக் கொண்டு நீர்ப்புளிக்கரைசலை ஊற்றிக் கொதிக்க விட்டேன். பின்னர் நேற்றைய சாம்பாரை அதில் சேர்த்துக் கொண்டேன். நன்றாகக் கொதிக்க வைத்தேன். பின்னர் அரைத்த விழுதைச் சேர்த்துக் கொதிக்கும்போதே சமைத்த சாதத்தோடு குழைந்த பருப்பையும் சேர்த்துக் கலந்து கொண்டேன். தளதளவெனக் கொதித்தது. நல்ல வாசனையும் வந்தது.  

                                                          
பின்னர் இரும்புக்கரண்டியில் நெய்யைத் தாராளமாக ஊற்றிக் கொண்டூ கடுகு மட்டும் போட்டுப் பாதி மி.வற்றல், கருகப்பிலை, பெருங்காயத் தூள் போட்டுத் தாளித்துச் சாதத்தில் விட்டுக் கலக்கிவிட்டுக் கொத்துமல்லித் தழையைப் பொடியாக நறுக்கிச் சேர்த்தேன். சாம்பார் சாதம் தயார். ரசம் வைத்துவிட்டுப் பாகற்காயை வதக்கிவிட்டு அது போறாதோனு சந்தேகத்தில் இரண்டு அப்பளங்களும் பொரித்து எடுத்துக்கொண்டு அன்னிக்குப் பாட்டை ஒப்பேத்தியாச்சு. இதே போல் வத்தக் குழம்பு மிஞ்சினால் புளியஞ்சாதம் மாதிரி மாற்றலாம். அதைப் பின்னர் பார்ப்போமா? அன்னைக்கு என்னமோ உடம்பு கொஞ்சம் ஒரு மாதிரி இருந்ததால் படங்கள் எல்லாம் எடுத்துப் போடலை. ஆனால் புதிதாகச் செய்யும் சாம்பார் சாதம் போலவே அமைந்திருந்தது. இன்னொரு முறை இந்தத் திப்பிசம்பண்ணும்போது படங்கள் மட்டும் எடுத்துப் போடறேன்.

===========================================================================

மம்முட்டி படத்தின் அவிழ்க்கப்படாத மர்மம் ; 34 வருடங்களுக்கு பிறகு வெளியிட்ட இயக்குனர்

மலையாள திரை உலகில் கமர்சியல் இயக்குனர்களில் பிரபலமானவர் இயக்குனர் ஜோஷி. இவர் மம்முட்டி, மோகன்லால் உடன் இணைந்து பல படங்களில் பணியாற்றியுள்ளார். 

அந்த வகையில் 1992ல் ஜோஷி இயக்கத்தில் மம்முட்டி நடிப்பில் வெளியான படம் "கவுரவர்". இந்தப் படத்தின் கதையை மறைந்த இயக்குனர் லோகிததாஸ் எழுதியிருந்தார். சிறைவாசம் முடிந்து திரும்பும் மம்முட்டி, நீண்ட காலமாக பிரிந்து இருந்த தனது மகளை தேடி கண்டுபிடிப்பது தான் இந்த படத்தின் கதை.

கதைப்படி மம்முட்டியின் மகள் வேறு ஒரு நபர் வீட்டில் அவரது இரண்டு பெண் குழந்தைகளுடன் சேர்த்து வளர்ந்து வருவார். ஆனால் மம்முட்டி அந்த நபரை கண்டுபிடிக்கும் சமயத்தில், மம்முட்டியின் மகள் யார் என்கிற உண்மையை அவரிடம் கூறாமல் இறந்து விடுவார். மம்மூட்டியும் இந்த மூவரையுமே என்னுடைய மகளாகவே நினைத்துக் கொண்டு வளர்க்கிறேன் என்று சொல்வதாக படம் முடியும். 

இதில் என்ன ஆச்சரியம் என்றால், படத்தில் மம்முட்டியின் உண்மையான மகள் யார் என்கிற உண்மை கடைசிவரை ரசிகர்களுக்கு சொல்லப்படவே இல்லை.. அது மட்டுமல்ல, படத்தில் நடித்த மம்முட்டிக்கு கூட தனது மகள் கதாபாத்திரத்தில் நடிக்கும் குழந்தை நட்சத்திரம் யார் என்கிற உண்மை இப்போது வரை தெரியாதாம்.

சமீபத்திய பேட்டி ஒன்றில் இந்த தகவலை கூறியுள்ள இயக்குனர் ஜோஷி, 

"ஆனால் ரசிகர்களுக்கு க்ளூ கொடுப்பது போல மற்ற இரண்டு பெண்களின் முகமும் நீள் வட்ட வடிவில் இருக்கும், ஆனால் மம்முட்டியின் மகளாக நடித்தவரின் முகம் மட்டும் வட்ட வடிவில் இருக்கும். இதை பார்வையாளர்கள் தங்களது நுண்ணறிவால் கண்டுபிடித்துக் கொள்ள வேண்டும் என்பதற்காகவே அது பற்றி வெளிப்படையாக கூறாமல் வைத்திருந்தோம். ஆனால், இப்போதுவரை யாராலும் அதை கண்டுபிடிக்க முடியவில்லை" என்று கூறியுள்ளார்.

======================================================================================

​எப்படியும் கீதா அக்கா எழுத்தைப் படிக்க முடியலன்னு சொல்வாங்க...  எழுத்துகளும் மங்கலாதான் இருக்கு....   

                       

"வழக்கமா நீ பெல்பாட்டம்தானே போட்டுக்கொண்டு வருவே... இன்னிக்கி என்ன டிரான்ஸ்பரென்ட் புடவை கட்டிக்கொண்டு வந்திருக்கே?"

​"பெல்பாட்டத்தை என் தம்பி போட்டுக்கொண்டு போயிட்டான் கிரிஜா"