புதன் 181205 சந்தோஷம் நிலையானதா?

கீதா சாம்பசிவம் :

சம்பளம் வந்தால் கூடத் திருப்தி இல்லாமல் லஞ்சம் வாங்குவது ஏன்? பேராசை தானே காரணம்?  


பேராசையா! சேச்சே - தன் பேர் (பெயர்) வெளியே தெரியாமல் இருக்கத்தானே அவர்கள் ஆசைப்படுவார்கள். அதனால் பேராசை இல்லை, பொருள் ஆசைதான் காரணம்! 'something' is better than nothing என்று நினைப்பவர்களோ? 

ஆசை வெட்கம் அறியாது,  ஆசைக்கோர் அளவில்லை,  என்பார்களே நினைவில்லையா?

ஆசையே அப்படியானால் பேராசையின் நிலை என்னவாக இருக்கும்?

பானுமதி வெங்கடேஸ்வரன் : 

சில சமயம் நாம் சில மனிதர்களைப் பற்றி நினைத்துக் கொண்டிருப்போம், அவரிடமிருந்து தொலைபேசி அழைப்பு வரும், அல்லது அவரே நேரில் வந்து நிற்பார்(ஆனால் அதை அவரிடம் சொன்னால் நம்ப மாட்டார்), இப்படிபட்ட அனுபவங்கள் உண்டா? 

நிறைய உண்டு. அதுவும் எனக்குக் கடன் கொடுத்தவர்களைப் பற்றி நான் நினைக்கும்போதெல்லாம் அவர்கள் என் முன்னே வந்து நின்றுவிடுகிறார்கள்! மருந்தைச் சாப்பிடும்பொழுது, குரங்கை நினைக்காதீர்கள் என்று சொன்ன வைத்தியர் போல, பணத்தைப் பார்க்கும்பொழுது கடன் கொடுத்தவரை நினைக்காதே என்று எழுதிவைத்துக்கொள்ள வேண்டும்! 

இந்த மாதிரி நடப்பதை தற்செயல் என்று சொல்லுவோம்.  இது எல்லார் வாழ்விலும் எப்போதாவது நடந்துதான் இருக்கும்.

காக்கை உட்கார பனம் பழம் விழுந்ததும்,  நினைத்தேன் வந்தாய் நூறு வயது பாட்டும் தான் நினைவுக்கு வருகிறது.

குளிர்சாதன பெட்டிக்குள் பாம்பு, வாஷிங் மெஷினில் இருந்த குழந்தை மரணம், மோர் என்று நினைத்து ஃபினாயிலை குடித்த வாலிபர் காப்பற்றப்பட்டார் போன்ற செய்திகளை படிக்கும்பொழுது என்ன நினைத்துக் கொள்வீர்கள்? 

1. இது எந்த அளவு உண்மையாக இருக்குமென்று ஆலோசனை வரும்.

திறந்தவுடனேயே மூடப்படும் குளிர்சாதனப்பெட்டியில் பாம்பு வருவதற்கு சாத்தியம் இல்லை. ஒரு சொட்டு பினைல்  வாயில் விழுந்தவுடனேயே தூ என்று துப்புவோமே தவிர அதை மோர் என்று நினைத்து இரண்டாவது வாய் குடிக்க மாட்டோம். வாஷிங் மெஷினுக்குள் குழந்தை ஏறி உட்காருவதும் அதைப் பாராது ஓட விடுவதும் அசாத்திய கற்பனை.

2. 'விதி வலியது' என்றுதான் நினைத்துக்கொள்வேன். என் அலுவலகத்தில், என்னுடன் கம்பெனிப் பேருந்தில் பயணித்த ஒருவர், சென்னைக் குளிருக்கே(!) ஸ்வெட்டர், மஃப்ளர் என்று ஏக பாதுகாப்புகளுடன் வருவார். அவரைப் பார்க்கும்பொழுதெல்லாம் முன்ஜாக்கிரதை முத்தண்ணா என்று நினைத்துக்கொள்வேன். அவர் எங்கள் சிவில் டிபார்ட்மெண்டில் பணிபுரிந்து வந்தார். ஒருநாள், சிவில் ஆபீசில் அவர் ஒரு நண்பருடன் பேசிக்கொண்டிருந்தார். அந்த நண்பர் ஏதோ வேலையாக கொஞ்ச நேரம் சென்றிருந்த சமயத்தில், இவர், நண்பரின் மேஜை மீது இருந்த தண்ணீர் பாட்டிலை எடுத்து, தண்ணீரை மட மடவென்று குடித்துவிட்டார். அப்படி அவர் குடித்தது, யாரோ கொண்டுவந்து வைத்திருந்த ஆசிட். அவசர அவசரமாக அவரை ஆஸ்பத்திரிக்குக் கொண்டு போனாலும் அவரைப் பிழைக்க வைக்க இயலவில்லை. 

ஏஞ்சல் : 

 1, சந்தோஷம் நிலையானதா ?சந்தோஷத்தின் கால அளவு எவ்வளவு ? பெரும்பாலானோர் சொல்றது துக்கம் இருக்கும் காலத்தை விட குறைஞ்ச நேரமே சந்தோசம் வந்து தலை காட்டிட்டு போகுது 

அதாவது is happiness short lived ?

ஆன்மீகப் பெரியவர்கள் எல்லோருமே, மனிதனின் இயற்கையான உள் நிலை, சந்தோஷம் அல்லது பூரணத்துவம் என்றுதான் சொல்கிறார்கள். அதுதான் உள் நிலை என்று உணர்ந்தவர்களுக்கு, என்றுமே, எப்போதுமே, எங்கும் ஆனந்தம்தான். சச்சிதானந்தம் என்றால் சத் + சித் ஆனந்தம். உணர்ந்தவர்கள் பிரம்ம ஞானிகள். சில சமயங்களில் மட்டும் உணர்பவர்கள் சில நேரம் மட்டும் சந்தோஷமாக இருந்து, மற்ற நேரங்களில் சந்தோஷத்தைத் தொலைத்துவிடுகிறார்கள். 

சந்தோஷம் துக்கம் இரண்டுமே கால  அளவுக்கு உட்பட்டதுதான் சந்தோஷம் எவ்வளவு நேரம் இருக்கும் என்று கேட்டால், அது எதன் காரணமாக எவ்வளவு ஆழமாக ஏற்படுகிறது என்பதைப் பொருத்து இருக்கும்.

 சாதாரணமாக சந்தோஷத்தின் ஆயுளைக் காட்டிலும் துக்கத்தின் ஆயுள் அதிகம் என்றுதான் சொல்லவேண்டும்.

2, சின்ன வயசில் ரோட்டு ஓரம் ஸ்டேஷன் வெளியிலெல்லாம் துண்டு சீட்டுக்கள் தருவாங்க அதில் நிறைய வாசகங்கள் இருக்கும் பிறகு இதை பத்து பேருக்கு அனுப்பாட்டி இல்லைன்னா இப்படி செய்யாட்டி ரத்தம் கக்கி போவீங்கன்னு எழுதியிருக்கும் .அப்படி துண்டு pamphlets படித்து அலறிய அனுபவங்கள் இருக்கா ?

உண்டு. துண்டு சீட்டுகள் இல்லை. வீட்டு விலாசத்திற்கு போஸ்ட் கார்ட் வரும். அதில் "ஓம் ஜகதாம்பிக மகா மாயே " என்று பத்துத் தடவைகள் எழுதி, இதை உடனே பத்து பேருக்கு போஸ்ட் கார்டில் எழுதி அனுப்பு. அனுப்பினால் பெருத்த லாபம் வரும். இல்லையேல் உனக்கு அடுத்தடுத்து கஷ்டம் வரும் என்று எழுதி இருப்பார்கள். பெரும்பாலும் இது நம்முடைய விலாசம் தெரிந்த நண்பன் ஒருவனின் வேலையாகத்தான் இருக்கும். என் பெயருக்கு வந்த அந்தக் கடிதம் ஒன்றை நான் தபால்காரரிடமிருந்து மற்றக் கடிதங்களுடன் சேர்த்துக் கையில் வாங்கியபோது, பக்கத்து வீட்டு குருராஜன் நமட்டுச் சிரிப்புச் சிரித்தபடி, எங்கள் வீட்டுத் திண்ணையில் உட்கார்ந்திருந்தான். "எங்கேருந்து கடுதாசி வந்திருக்கு " என்று கேட்டான். 'ஓஹோ சப்ஜெக்ட் கடிதம் இவன்தான் அனுப்பியிருக்கான்' என்று தெரிந்துகொண்டேன். "எல்லாம் என்னுடைய மெட்ராஸ் அண்ணன், சோலையாறு அண்ணன், அரவங்காடு அண்ணன் எழுதியிருக்கும் கடிதங்கள் என்று சொல்லியவாறு உள்ளே கொண்டுபோய் அம்மாவிடம் சப்ஜெக்ட் கடிதம் தவிர மற்றவற்றைக் கொடுத்துவிட்டேன். தான் எழுதி அனுப்பிய கடிதம் எங்கே போயிருக்கும் என்று இதுநாள் வரை குருராஜன் குழம்பியபடி இருப்பான்(ர்) என்று நினைக்கிறேன்.  

பெற்றது மட்டுமல்ல அது போன்ற ஒரு கடிதம் வந்து அதை அனுப்பியவருக்கே 10 தடவை திருப்பி அனுப்பி அவரை சங்கடப்படுத்தியதும் நன்றாக நினைவிருக்கிறது.

3, மனுஷரில் நல்லவர் யார் கெட்டவர் யார்னு எப்படி கண்டுபிடிக்கிறது ? 

ஒருவரைக் கண்டவுடன் நம் மனதில் ஏற்படும் அதிர்வுகளை வைத்து அவர் நல்லவரா பொல்லாதவரா என்று கண்டுபிடிக்க இயலும். அப்படி இல்லாவிட்டால் அவரது எழுத்து பேச்சு பாவனை நடவடிக்கை இவற்றை வைத்துதான் அவர் எப்படிப்பட்டவர் என்று சொல்ல வேண்டும்.

எப்பொழுதும், எல்லோருக்கும் நல்லவர்  (அல்லது) எல்லோருக்கும் கெட்டவர் என்று யாரும் இருக்க இயலாது. நாம் நல்லவராக இருந்துவிட்டால், மற்றவரிடம் உள்ள நல்ல குணங்கள்தான் நமக்குத் தெரியும். Normally we see only reflections of ourselves in others. அப்படி நல்ல குணம் எதுவும் ஒருவரிடத்தில் நமக்குத் தெரியவில்லை என்றால், அந்த ஒருவரை அதிகம் நெருங்காமல் அல்லது நெருங்கவிடாமல் இருப்பது நல்லது. 

4,TORN ஜீன்ஸ் எப்பவோ நம்மூரிலும் பேஷன் வந்துவிட்டது அறிவோம் ..அதுபோல பட்டுப்புடைவையை கிழித்து டோர்ன் காஞ்சி சில்க் சாரீ கட்டும் நாள் வருமா ??? 

வராது - வரக் கூடாது.

சாரீ கட்டறவங்களே ரொம்பக் கம்மியாகிட்டு வர்றாங்க! இதுல டோர்ன் சாரீக்கு எங்கே போறது! 

ஒரு பழைய ஜோக் :

பிச்சைக்காரர் : " அய்யா பழைய கிழிஞ்ச சட்டை இருந்தா கொடுங்க அய்யா!"

வீட்டிலிருப்பவர்: "பழைய சட்டைகள் இருக்கு ஆனால் எல்லாம் கிழியாம நல்ல சட்டையா இருக்கு. "

பி கா : " பரவாயில்லை. அதைக் கொடுங்க. நான் அதைக் கிழிச்சுப் போட்டுக்கறேன்!" 

5,இந்த ஆண்கள் மட்டும் எப்பவும் ..//எங்கம்மா இது சட்னியை எவ்ளோ ருசியாசெய்வாங்க .இந்த கேக் அவங்க செஞ்சது இன்னும் ருசி நினைவில் ,அம்மா பூண்டு குட்டி துணியில் கட்டி ரசத்துக்கு போடுவாங்க ,தலைக்கு எண்ணெய் போட்டு வார்வாங்க இப்படி எந்நாளும் அம்மா புராணம் பாடுவதன் காரணம் என்ன ?????????????? அம்மா ஆழ்மனதில் பதிந்து விட்டதாலா ?? 

அம்மாவின்  சமையலை பெண்கள் உள்வாங்கிக்கொண்டு அம்மா போலவே சமைக்க ஆரம்பித்து விடுகிறார்கள் .  ஆண்களுக்கு அந்த சாமர்த்தியம் இல்லை என்பதால் அம்மா சமையலை புகழ்பாடி திருப்திப் பட்டுக்கொள்கிறார்கள். 

நளன் உள்ள வீடுகளில் இந்தப் பிரச்னை வருவதில்லை! 

6, பெரும் செல்வந்தர்களைவிட இல்லாதோர் கிட்ட தாராள குணம் அதிகமா இருக்கே ? காரணம் என்ன ??

அடுத்தவர் துயர் தாமே பட்டவர்களுக்குத்தான் தெரியும் என்பதால் இருக்குமா ?

மிகப்பெரிய அளவில் பொதுக் காரியங்களுக்காக மிகப் பெரிய தொகைகளை நன்கொடையாக வழங்கி இருக்கும் மிகப்பெரும் செல்வந்தர்கள் பற்றி நீங்கள் யோசிக்க வில்லை போலிருக்கிறது. 

7,உங்கள் மனைவியின் தொலைபேசி எண் உங்கள் சகோதர சகோதரியின் தொலைபேசி எண் ஐ மீன் மொபைல் எண் இவற்றில் யார் நம்பரை மனப்பாடமா போனை பாக்காம சொல்ல முடியும் உங்களால் ??

நினைவிலிருந்து பல எண்களை சொல்வதற்கில்லை என்றாலும் மிக முக்கியமான ஓரிரண்டு எண்களை நினைவில் வைத்திருக்கிறேன். செல்போன் என்று வந்த பிறகு இந்த வியாதி எல்லோருக்கும் பரவி விட்டது என்றே தோன்றுகிறது. 

மகன், மகள், மருமகள் அலைபேசி எண்கள் எப்பொழுதும் நினைவில் இருக்கின்றன. மனைவி எப்பொழுதும் என் கூடவே இருக்கிறார்கள் என்பதால், தனி எண் கிடையாது. மாப்பிள்ளையின் அலைபேசி எண் .... ஊஹூம்....  நினைவில் இல்லை. 

8, வாழ்க்கை ஒரு வட்டம்னு சொல்றாங்களே எப்படி ??

எல்லாம் ஆனபின் இறுதியில் பூஜ்ஜியம் என்பதால் இருக்குமோ?

Virtuous Circle? May be it is a Vicious Circle! 

9, கார்ட்டூன் பார்க்கும் பழக்கம் உண்டா ? உங்களுக்கு பிடிச்ச கார்ட்டூன் என்ன ஏன் ?எதற்கு பிடிக்கும் ??

நிறைய கார்ட்டூன்கள் (மட்டும்தான்) பார்ப்பேன். tom and jerry, pop eye, Mr Bean cartoon form etc, etc. கார்ட்டூனில் சோகப்படங்கள் கிடையாது என்பதுதான் காரணம். எனக்கு சோகப்படங்கள் பிடிக்காது. 

கார்ட்டூன் பார்ப்பதில்லை. டாம் & ஜெர்ரி பிடிக்கும். காரணம் சிறந்த உடல்மொழிச் சித்தரிப்பு.

10, சமீபத்தில் ரசித்த அல்லது உங்களை சிந்திக்க வைத்த வித்யாசமான முகப்புத்தக ஸ்டேட்டஸ் என்ன ? ஏன் ?

முகப்புத்தகம் சமீப காலங்களில் என்னுடைய நேரத்தை அதிகம் அபகரித்துக் கொண்டுவிட்டது! 

நகைச்சுவை, புதிய விவரங்கள், சுவாரஸ்ய நிகழ்வுகள், அரசியல் (நாகரீக) கிண்டல்கள் போன்ற பதிவுகளை ரசிப்பேன். அநாகரீக வார்த்தைகள், வசவுகள் உள்ள பதிவுகளைத் தவிர்ப்பேன். அத்தகைய பதிவுகளை எழுதுபவர்கள் என் நட்பு வட்டத்தில் இருந்தால் அவர்களை நட்பு நிலையிலிருந்து விலக்கி வைத்துவிடுவேன். 

முகப்புத்தகம் கணக்கு வைத்திருப்பவர்கள் பார்த்து ரசிக்க : 

மணியடிச்சா சோறு! 

  

நான் ஃபேஸ்புக் ரசிகன் அல்ல.

 =============================================

நன்றி! மீண்டும் சந்திப்போம்!