வெள்ளி வீடியோ : கன்னத்தில் அடிக்குமடி முத்தத்தாலே வேண்டுமடி.. மத்ததெல்லாம் உன்னுடைய இதழ்களின் இஷ்டப்படி

 41 வயதாகும் கார்த்திக் தமிழ்க் குடும்பத்தில் பிறந்தவர்.  முறையாக இசை கற்றவர்.  அவர் நண்பரின் உறவினரான பாடகர் ஸ்ரீனிவாஸ் மூலம் தூண்டப்பட்டு மேலும் இசை கற்று ரஹ்மானிடம் அவராலேயே அறிமுகப் படுத்தப் பட்டார்.

ஹிந்தியில் பு(க்)கார் படத்துக்காக புதிய குரல்களைத் தேடிக்கொண்டிருந்த ரஹ்மான் இவர் குரலை டிராக் பாட உபயோகித்துக் கொண்டிருந்திருக்கிறார்.  அடுத்த ஹிந்திப் படத்தில் இவருக்கு ஒரு உச்சஸ்தாயியில் பாடும் ஆலாபனை ஒன்றைக் கொடுத்திருக்கிறார்.

பின்னர் தமிழில் பிரசாந்த் நடித்த ஸ்டார் படத்துக்காக முதல் பாடல் வெளிவந்திருக்கிறது.  பின்னர் இளையராஜா, வித்யாசாகர், மணிசர்மா, ரஹ்மான், என்று அனைவர் இசையிலும் தமிழ், தெலுங்கு, கன்னடம், ஹிந்தி ஆகிய மொழிகளில் பாடி இருக்கிறார்.  சில படங்களுக்கு இசையும் அமைத்திருக்கிறார்.  உதாரணம் அரவான்.

இசைவிழா சமயத்தில் கர்னாடக சங்கீதப் பாடல்களை நவீன இசைக்கருவிகளுடன் இவர் பாடி இருந்ததை ஒருமுறை கேட்டிருக்கிறேன். ரசித்திருக்கிறேன்.  அப்புறம் பி பி ஸ்ரீனிவாஸ் அவர்களுக்கு அஞ்சலியாய் ஒரு நிகழ்ச்சி.  அதில் அவரது பாடல்களை சில வரிகளாய் பாடி இருந்தார்.  நன்றாய் இருந்தது.

என் இளைய மகன் இவர் ரசிகன் என்பதால் சில பாடல்கள் கேட்டிருக்கிறேன், ரசித்திருக்கிறேன்.  முக்கியமாய் ஏழாம் அறிவு படத்தில் வரும் 'முன் அந்தி சாரலில்',  வேங்கை படத்தில் வரும் 'காலங்கார்த்தாலே' போன்ற பாடல்கள். தில்லுமுல்லு படத்தில் எஸ் பி பி பாடிய 'ராகங்கள் பதினாறும்' பாடலை கார்த்திக் மீண்டும் பாடி வரவேற்பைப் பெற்றாலும், எனக்கு எஸ் பி பி வெர்ஷனே பிடித்திருந்தது.

'மாலைப்பொழுதில் மயக்கத்திலே' படத்தில் அவர் பாடிய 'என்னுயிரே' பாடலை ரசித்திருக்கிறேன் என்று என் இளையவன் எனக்கு நினைவூட்டுகிறான்.

இளையராஜா இசையில் அவர் பாடிய இரண்டு பாடல்களை இன்று  பகிர்கிறேன்.  இளையராஜா இசை மோகமிழந்து போன காலகட்டத்தில் இந்தப் பாடல்கள் இரண்டும் மறுபடியும் அவரை நினைக்க வைத்தன.  பெரும் வரவேற்பைப் பெற்று வெற்றிபெற்றன.  இசை வெளியாவதற்கு முன்னதாகவே 22 மில்லியனுக்கு விற்பனையாயினவாம் ஆடியோ உரிமை.

கெளதம் மேனன் படம் 'நீதானே என் பொன்வசந்தம்'.   ஜீவா, சமந்தா, சந்தானம் நடித்த படம் ரசனையாய் இருந்தாலும் கெளதம் மேனனின் வழக்கமான பாணி வசனங்கள் சற்றே எரிச்சலடைய வைக்கும்.  சில காட்சிகளை ரசித்துப் பார்க்கலாம்.  

இந்த இரண்டு பாடல்களுமே ஒரு சுவாரஸ்யமான சூழ்நிலையில் வெளிப்படுவதாய் காட்சி அமைப்பு.  காட்சியையும் ரசிக்கலாம்.  பாடலின் இடையில் வரும் டயலாக் கடுப்பேற்றும்!

2012 ல் வெளிவந்த  படம்.  ஏகப்பட்ட விருதுகளை அள்ளிக் குவித்தது.

"காற்றைக் கொஞ்சம் நிற்கச் சொன்னேன்.."

 

இன்று பகிரப்போகும் முதல் பாடல். பாடல்கள்  நா முத்துக்குமார் எழுதி இருக்கிறார்.மேனனின் ஆஸ்தான பாடலாசிரியர் தாமரையை விட்டு விட்டு நா முத்துக்குமார் பக்கம் வந்திருந்தார்!

1975 ல் ஏழ்மையான குடும்பத்தில் பிறந்திருந்த முத்துக்குமார் பாலுமஹேந்திராவிடம் நான்கு வருடங்கள் பணிபுரிந்திருக்கிறார்.  பின்னர் மலபார் போலீஸ் படத்துக்காக முதல் பாடல் எழுதி இருக்கிறார்.  கிரீடம், வாரணம் ஆயிரம் படங்களுக்கு கதை வசனம் எழுதி இருக்கிறார்.  ஆனால் மஞ்சள் காமாலை நோயினால் பாதிக்கப்பட்டு 2016 ல் மறைந்தார்.

இந்தப் பாடலில் பல்லவியைவிட சரணங்கள் கேட்பதற்கு சுவாரஸ்யமாய் இருக்கும்.

காற்றைக் கொஞ்சம் நிற்க சொன்னேன் 

பூப்பறித்து கோர்க்க சொன்னேன் 

ஓடி வந்து உன்னை சந்திக்க. 

மெத்தை ஒன்று தைக்க சொன்னேன், 

மேகம் அள்ளி வைக்க சொன்னேன், 

கண்ணை மூடி உன்னை சிந்திக்க.  

சுற்றும் பூமி நிற்க சொன்னேன்… 

உன்னை தேடி பார்க்க சொன்னேன்… 

உன்னை பார்த்து கேட்க சொன்னேன் 

என்னை பற்றி கேட்க சொன்னேன், 

என் காதல் நலமா என்று..  

நேரில் பார்த்து பேசும் காதல் ஊரில் உண்டு ஏராளம். 

நெஞ்சில் பார்த்து பேசும் காதல் நின்று வாழும் எந்நாளும். 

தள்ளி தள்ளி போனாலும் உன்னை எண்ணி வாழும் ஒரு ஏழை இதயம் நெஞ்சத்தை பாரடி.. 

தங்க மெத்தை போட்டாலும் உன் நினைவில் என்றும் தூக்கம் இல்லை ஏன் என்று சொல்லடி… 

சாத்தி வைத்த வீட்டில் தீபம் ஏற்றி வைக்க நீ வா. 

மீதி வைத்த கனவை எல்லாம் பேசி தீர்க்கலாம்.. ஹே ஹே ஹே…  

நேற்று எந்தன் கன்வில் வந்தாய் நூறு முத்தம் தந்தாயே… 

காலை எழுந்து பார்க்கும் போது கண்ணில் நின்று கொண்டாயே.. 

பார்த்து பார்த்து எந்நாளும் பாதுகாத்த என் நெஞ்சில் என்ன மாயம் செய்தாயோ சொல்லடி

உன்னை பார்த்த நாள் தொட்டு 

எண்ணம் ஓடும் தறிகெட்டு.. 

இன்னும் என்ன செய்வாயோ சொல்லடி 

என்னை இன்று மீட்கத்தான் உன்னை தேடி வந்தேனே.. 

மீட்டபோதும் மீண்டும் நான் உன்னுள் தொலைகிறேன்…  

முதல் பாடலைவிட இன்னும் அழகான பாடல் இரண்டாவது பாடல்.  

என்னோடு வா வா என்று சொல்ல மாட்டேன் என்னும் இந்தப் பாடல் அழகான காதல், குறும்புப் பாடல்.  சமந்தாவின் ஊடலும், கோபமாய்க் காட்டிக் கொண்டாலும் ஜீவாவைத் தேடும் காதலும் காட்சியையும் அழகாக்கும்.  பாடலை வெகுவாக ரசிக்க வைப்பது கார்த்திக்கின் புதிய, இளமையான குரல்.

என்னோடு வா வா என்று சொல்ல மாட்டேன் 

உன்னை விட்டு வேறு எங்கும் போக மாட்டேன் 

நீ என்னோடு வா வா என்று சொல்ல மாட்டேன் 

உன்னை விட்டு வேறு எங்கும் போக மாட்டேன்  

செல்ல சண்டை போடுகிறாய் தள்ளி நின்று தேடுகிறாய் 

ஆ ஆ ஆ அன்பே என்னை தண்டிக்கவும்  

புன்னகையில் மன்னிக்கவும் 

உனக்கு உாிமை இல்லையா  

கன்னம் தொடும் கூந்தல் ஒதுக்க 

நீ சாய்வதும் என்னை கொஞ்சம் பாா்க்கதானடி 

கண்ணை மூடி தூங்குவதை போல் நீ நடிப்பது 

எந்தன் குரல் கேட்கதானடி  

இன்னும் என்ன சந்தேகம் என்னை இனி எந்நாளும் 

தீயாக பாா்க்காதடி 

சின்னப் பிள்ளை போல நீ அடம்பிடிப்பதென்ன சொல்ல 

என்னை விட யாரும் இல்லை அன்பு செய்து உன்னை வெல்ல 

சண்டை போட்ட நாட்களைத்தான் 

எண்ணி சொல்ல கேட்டு கொண்டால் 

கணக்கும் பயந்து நடுங்கும்  

காதலுக்கு இலக்கணமே தன்னால் வரும் 

சின்ன சின்ன தலைக்கனமே 

காதல் அதை பொறுக்கணுமே 

இல்லையெனில் கட்டி வைத்து உதைக்கணுமே 

உன்னுடைய கையாலே தண்டனையை தந்தாலே 

என் நெஞ்சம் கொண்டாடுமே 

கன்னத்தில் அடிக்குமடி முத்தத்தாலே வேண்டுமடி 

மத்ததெல்லாம் உன்னுடைய இதழ்களின் இஷ்டப்படி 

எந்த தேசம் போனபோதும் என்னுடைய சொந்த தேசம் 

உனது இதயம் தானே